ဝင်ခွင့်ပိတ်

November 30, 2020

ရန်ကုန်တက္ကသိုလ် နှစ် ၁၀၀ ပြည့်ပွဲ လာသူများသဖြင့် ဝင်ခွင့်ပိတ်

ရန်ကုန်တက္ကသိုလ် နှစ် ၁၀၀ ပြည့် အထိမ်းအမှတ် ရာပြည့်သဘင် အခမ်းအနား မီးထွန်းထားတာကို လူတွေ အများအပြားလာရောက် ဓာတ်ပုံရိုက်နေကြလို့ ဒီနေ့မှာတော့ အထဲကို ဘယ်သူမှ ပေးမဝင်တော့ပါဘူး။ ရန်ကုန်ဟာ Stay  at  Home   သတ်မှတ်ထားတာဖြစ်ပေမယ့် တက္ကသိုလ်မှာ အလှဆင် မီးထွန်းတာကို လူအများအပြား လာရောက် အမှတ်တရ ဓာတ်ပုံရိုက်နေကြတာဖြစ်ပါတယ်။ ကမာရွတ်မြို့နယ်က တိုင်းလွှတ်တော်ကိုယ်စားလှယ် ဦးတင်ဝင်းက “မနေ့က လူတွေ အများကြီးလာကြတယ်။ ဒါက ကိုဗစ် Law နဲ့လည်း ငြိတယ်လေ။ သူတို့လည်းမနိုင်ဘူး။ ဒါနဲ့ တက္ကသိုလ်ရှိတဲ့ ကမာရွတ်မြို့နယ် ထွေအုပ်က ဒီလိုတော့လုပ်လို့မရဘူးလို့ အသိပေးတယ်။ သူတို့ (ရန်ကုန်တက္ကသိုလ် တာဝန်ရှိသူတွေ)ကလည်း လက်ခံတယ်လေ။ ဒီမနက်ကစပြီး ပိတ်လိုက်တာပါ” လို့ ပြောပါတယ်။ ရာပြည့်သဘင်အခမ်းအနားကို လူတွေအများကြီးလာနေတာနဲ့ ပတ်သက်လို့ မနေ့ကပဲ ပညာရေးဝန်ကြီး၊ ဒုဝန်ကြီး၊ အမြဲတမ်းအတွင်းဝန်၊ ညွှန်ကြားရေးမှူးချုပ်တွေ၊ ရန်ကုန် တက္ကသိုလ်ပါမောက္ခချုပ်၊ ဒုတိယ ပါမောက္ခချုပ်တွေနဲ့ ပါမောက္ခတွေ၊ ရန်ကုန်ဆေးတက္ကသိုလ် (၁) ပါမောက္ခချုပ်၊ ကုသရေးဦးစီးဌာန ဒုတိယညွှန်ကြားရေးမှူးချုပ်၊ ရန်ကုန်တိုင်း ပြည်သူ့ ကျန်းမာရေးနဲ့ ကုသရေးဦးစီးမှူးတို့ဟာ အွန်လိုင်းကနေ အစည်းအဝေးလုပ်ခဲ့ကြပါသေးတယ်။ ဒီအစည်းအဝေးကနေ အလှဆင်အထိမ်းအမှတ် မီးထွန်းညှိထားတာကို ဒီဇင်ဘာ ၁ ရက်အထိ ညစဉ် ည ၈ နာရီအထိပဲ ထွန်းဖို့၊ ပင်မဂိတ်အဝင်မှာ  ဝင်ရောက်သူ    တယောက်ချင်းစီကို ကိုယ်အပူချိန် တိုင်းဖို့နဲ့ အပူချိန်မြင့်တက်သူတွေ့ရင် သီးခြားခွဲထုတ်ပြီး တက္ကသိုလ်များ ဆေးရုံက   Isolation Unit ဆီ ချက်ချင်းပို့ဆောင် ခဏထားပြီး သတ်မှတ်ထားတဲ့ ကျန်းမာရေးလုပ်ငန်းစဉ်တွေအတိုင်း  ဆက်လက်ဆောင်ရွက်ဖို့တို့ကို ဆုံးဖြတ်ထားတာပါ။ ဒီနေ့မှာတော့ အပြင်လူ ဘယ်သူ့ကိုမှ ဝင်ခွင့်မပေးတော့ကြောင်း တက္ကသိုလ်အဝင်ဂိတ်မှာ ဆိုင်းဘုတ်ထောင်ထားပြီး ဝန်ထမ်းတွေပဲ ဝင်ထွက်ခွင့်ရမယ်လို့ ဦးတင်ဝင်းက ပြောပါတယ်။ အထဲဝင်ခွင့်မရပေမယ့် အပြင်ကနေ ဓာတ်ပုံရိုက်တာမျိုးတော့ လုပ်နိုင်တယ်လို့လည်း ဆိုပါတယ်။ ရာပြည့် သဘင်အထိမ်းအမှတ် အခမ်းအနား ကြိုတင်ရိုက်ကူးထားတာကို မနက်ဖြန် ဒီဇင်ဘာ ၁ ရက်မှာ မြန်မာ့အသံရုပ်မြင်သံကြားတီဗွီနဲ့ ဖေ့စ်ဘွတ်ခ်တို့ကနေ ထုတ်လွှင့်ဖို့ စီစဉ်ထားပါတယ်။ တက္ကသိုလ်ဝင်းထဲကို ဝင်ခွင့်မပေးတော့တဲ့အကြောင်းနဲ့ အခမ်းအနားအကြောင်းကို သိရဖို့ ရန်ကုန်တက္ကသိုလ် တာဝန်ရှိသူတွေဆီကို ဖုန်းနဲ့ ဆက်သွယ်ပေမယ့် မရခဲ့ပါဘူး။ Photo - Ye Myo Khant / MPA
7 months Ago

March 27, 2020

တရုတ်တွင် ပြည်ပကဝင်လာသူများမှတဆင့် ကိုရိုနာဗိုင်းရပ်စ်ကူးစက်မှု မြင့်တက်လာသဖြင့် ဝင်ခွင့်ပိတ်

ပြည်ပကနေ ကိုရိုနာဗိုင်းရပ်စ် ကူးစက်ခံရပြီး ပြန်ဝင်လာသူတွေ စစ်ဆေးတွေ့ရှိရမှု မြင့်တက်လာတာကြောင့် တရုတ်အစိုးရဟာ ပြည်ပဧည့်သည်ဝင်ရောက်မှုအားလုံးကို ဗီဇာရှိသည် ဖြစ်စေ၊ နေထိုင်ခွင့်ရထားသည် ဖြစ်စေ၊ ယာယီဝင်ခွင့်ပိတ်ပင်တော့မယ်လို့ မတ် ၂၇ ရက်နေ့မှာ ကြေညာလိုက်ပါတယ်။ တရုတ်ပြည်ဟာ ပြည်တွင်းနဲ့ နိုင်ငံခြားလေကြောင်းလိုင်းအားလုံးကိုလည်း တစီးမှာ ခရီးသည် ၇၅ ရာခိုင်နှုန်းသာ တင်ဆောင်ဖို့နဲ့၊ တပတ်ကို လေကြောင်းခရီးစဉ်တခုစီပဲ ပြေးဆွဲဖို့ ကန့်သတ်ထားတယ်လို့ ရိုက်တာသတင်းမှာ ဖော်ပြထားပါတယ်။ တရုတ်နိုင်ငံဟာ သောကြာနေ့အထိ သုံးရက်ဆက်တိုက် ပြည်တွင်းမှာ ကိုရိုနာဗိုင်းရပ်စ် ကူးစက်ခံရမှု ကင်းမဲ့နေရာကနေ အခုအသစ်တွေ့ရှိတဲ့ ပြည်ပက ပြန်လာသူတွေမှာ ကူးစက်ခံရမှုတွေ ဖြစ်လာတာပါ။ မတ် ၂၆ ရက်နေ့က တွေ့ရှိတဲ့ ကူးစက်ခံရသူ ၅၅ ဦးမှာ ၅၄ ဦးက ပြည်ပကနေ ဝင်ရောက်လာတာ ဖြစ်ပါတယ်။ တရုတ်အမျိုးသားကျန်းမာရေးကော်မရှင်က မတ် ၂၇ ထုတ်ပြန်ချက်အရ နိုင်ငံမှာ ကိုရိုနာဗိုင်းရပ်စ်ကူး စက်ခံရသူ ၈၁,၃၄၀ ဦးရှိပြီး၊ သေဆုံးသူက ၃,၂၉၂ ကျော်ရှိတယ်လို့ သိရပါတယ်။ ဒီထဲမှာ ကူးစက်ခံရသူ ၅၆၅ ဦးက ပြည်ပကနေ ပြန်လာတဲ့တရုတ်နိုင်ငံသားတွေ သို့မဟုတ် တရုတ်ကို ဝင်လာတဲ့ နိုင်ငံခြားသားတွေ ကူးစက်ခံထားရတယ်လို့ ပြောပါတယ်။ ဒီအတွင်း ဗိုင်းရပ်စ် စတင်ပြန့်ပွားလို့ ပိတ်ထားခဲ့တဲ့ ဝူဟန်မြို့ကိုတော့ လာမယ့်ဧပြီ ၈ ရက်နေ့မှာ ပြန်လည်ဖွင့်ပေးဖို့ရှိနေပြီး မြေအောက်ရထားလမ်း ၆ လိုင်းကို ပြန်ဖွင့်တော့မယ်လို့လည်း ရိုက်တာသတင်းမှာ ဖော်ပြထားပါတယ်။
1 year Ago
Up