ရန်ကုန်၊ လှိုင်သာယာ(အရှေ့ပိုင်း)မြို့နယ်၊ ဗိုလ်ချုပ်မှတ်တိုင်အနီး ရန်ကုန်-ပုသိမ် လမ်းမကြီးပေါ်မှာ ဇူလိုင် ၁၁ ရက်၊ မနက်စောပိုင်းက အဝတ်အစားမပါ ဒဏ်ရာတွေနဲ့ အမျိုးသားတစ်ဦး မှောက်ရက်သေဆုံးနေတာ တွေ့ရတယ်လို့ ဒေသခံတစ်ဦးက ပြောပါတယ်။
“မနက် ၆ နာရီခွဲက လှိုင်သာယာ ဗိုလ်ချုပ်မှတ်တိုင်ကားလမ်းမပေါ်မှာ လူတစ်ယောက် သေနေတာ တွေ့ခဲ့တယ်။ အဝတ်စားတွေလည်း မပါဘူး။ မှောက်ခုံကြီး။ နောက်ကျောမှာ ဒဏ်ရာတွေတော့ တွေ့တယ်။ စစ်သားတွေနဲ့ ယာဉ်ထိန်းတွေ ရောက်နေတယ်” လို့ မျက်မြင်တစ်ဦးက ပြောတာပါ။
သေနေသူက လူလတ်ပိုင်းအရွယ်လောက်သာ ရှိသေးပြီး သေဆုံးချိန် ကြာမြင့်လို့လား၊ ရာသီဥတုကြောင့်လား မသိ။ အလောင်းမှာ သွေးမရှိဘဲ ဖြူဆုတ်နေပြီလို့ တွေ့မြင်ခဲ့သူ တစ်ယောက်က ဆိုပါတယ်။
လူသေ တွေ့ရှိရာနေရာကို စစ်ကောင်စီရဲ့ လုံခြုံရေးတပ်ဖွဲ့ဝင်တွေ လာရောက်စစ်ဆေးနေပြီး သေဆုံးသူဟာ ဘယ်သူဘယ်ဝါဆိုတာနဲ့ ဘာကြောင့်သေဆုံးသွားတယ်ဆိုတာ မသိရသေးပါဘူး။
ကမ္ဘာ့စားနပ်ရိက္ခာအစီအစဉ် (WFP) ဟာ ရန်ကုန်တိုင်းထဲက လိုအပ်နေတဲ့ ပြည်သူ ၃ သိန်းကျော်ဆီကို စားနပ်ရိက္ခာတွေ ပေးအပ်နိုင်ခဲ့ပြီလို့ ရန်ကုန်အခြေစိုက် ကုလရုံးက ထုတ်ပြန်ပါတယ်။
လှိုင်သာယာမြို့နယ်ထဲက နေထိုင်မှုအတည်တကျမရှိသူ၊ ဆင်းရဲနွမ်းပါးဆုံး လူဦးရေ ၃၃၄,၀၀၀ ဆီကို တလစာဆန်တွေ ဖြန့်ဝေတာဖြစ်ပြီး မကြာခင်မှာ ထပ်ပြီးဖြန့်ဝေပေးဦးမယ်လို့ ဆိုပါတယ်။
ဒဂုံဆိပ်ကမ်းမှာလည်း မကြာခင်ဆန်တွေ ဖြန့်ဝေမှာဖြစ်ပြီး လူတွေလက်ထဲအရောက်ပို့ပေးတာလို့လည်း ဆိုပါတယ်။
ဒါဟာ WFP ရဲ့ မြန်မာနိုင်ငံမှာ အကြီးဆုံးစီမံကိန်းတခုဖြစ်တဲ့ လူဦးရေ ၂ သန်းဆီကို စားနပ်ရိက္ခာဖြန့်ဝေနေတာဖြစ်ပါတယ်။
WFP အနေနဲ့ ပဋိပက္ခဖြစ်ပွားရာဒေသတွေမှာပေးနေတဲ့ လူသားချင်းစာနာမှု အထောက်အပံ့တွေ ရပ်မသွားဘဲ စစ်တပ်က အာဏာသိမ်းပြီးနောက်ပိုင်းမှာ ပိုပြီး တိုးပေးနေတယ်လို့ WFP တာဝန်ရှိသူတယောက်က ပြောပါတယ်။
မေလတုန်းကလည်း ကချင်၊ ချင်း၊ ရခိုင်နဲ့ရှမ်းပြည်နယ်က စားနပ်ရိက္ခာအခက်အခဲရှိသူ လူဦးရေ ၃၄၀,၀၀၀ ဆီကို အသက်ကယ်ဆယ်ရေး စားနပ်ရိက္ခာ ဒါမှမဟုတ် ငွေကြေးအကူအညီတွေ ပေးခဲ့ပါသေးတယ်။
