လျှပ်စစ်ဓာတ်အား

June 27, 2019

မီတာခတိုးကောက်သလို မီးမှန်မှန်လာစေလို (အယ်ဒီတာအာဘော်)

လွန်ခဲ့သည့်နွေက ပူပြင်းခြောက်သွေ့သည့် ရာသီဥတုဖြစ်စဉ် အယ်လ်နီညိုနှစ် ဖြစ်ခဲ့ပြီး အပူဒဏ် ပြင်းထန်ခဲ့သည်။  မြန်မာပြည်သူတို့ အပူဒဏ်ကို တင်းခံနေရတုန်း ရန်ကုန်နှင့် မန္တလေးမြို့ကြီးများအပါအဝင် ဒေသအနှံ့တွင် လျှပ်စစ်မီးပြတ်သည့်ဒဏ်ကို ထပ်ဆင့် ခံစားခဲ့ကြရသည်။ ရန်ကုန်တွင် မီးတခါပြတ် ၂ နာရီနှုန်း၊ တခါပြတ် သုံးလေးနာရီနှုန်းဖြင့် လျှပ်စစ်မီးကို အလှည့်ကျ ခွဲဝေသုံးစွဲခဲ့ကြရပြီး အင်မတန်ပူပြင်းသည့် နွေလယ် မေလ၏ အပူဒဏ်ကို လည်စင်းခံခဲ့ကြရသည်။ မိုးဖြိုင်ဖြိုင်ကျလာသည့် ဇွန် ၂၂ ရက်တွင် လျှပ်စစ်မီးကို နဂိုမူလအတိုင်း အချိန်ပြည့် ပေးတော့မည်ဟု ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းက ကြေညာခဲ့သည်။ အချိန်ပြည့်ပေးမည်ဆိုသော်လည်း မီးက ပြတ်တောင်းပြတ်တောင်း ပျက်နေတုန်း အခြေအနေ ဖြစ်သည်။ ယင်းအခြေအနေတွင် အစိုးရက လျှပ်စစ်မီတာခ နှုန်းထားများကို တိုးမြှင့်ကောက်ခံမည်ဟု ဇွန် ၂၅ ရက်တွင် ကြေညာလိုက်သည်။ လျှပ်စစ်ဓာတ်အား ထုတ်လုပ်ဖြန့်ဖြူးမှု တိုးချဲ့ရေး၊ မဟာဓာတ်အားလိုင်းစနစ်မှ လျှပ်စစ်မီး မရရှိသေးသည့် ဒေသများ မီးရရှိရေးလုပ်ငန်းများ ဆောင်ရွက်နိုင်ရန် လျှပ်စစ်မီတာခ နှုန်းထားများကို တိုးမြှင့်ကောက်ခံမည်ဟု အစိုးရကြေညာချက်တွင် ဖော်ပြထားသည်။ ထိုသို့တိုးမြှင့်ရန် နယ်ပယ်အသီးသီးမှ ကိုယ်စားလှယ်များနှင့် အဖွဲ့အစည်းများဖြင့် တွေ့ဆုံဆွေးနွေးကာ အကြံပြုချက် ရယူဆောင်ရွက်ခဲ့ခြင်းဖြစ်သည်ဟု ဝန်ကြီးဌာနက ဆိုသည်။ တိုးမြှင့်နှုန်းထားကို လာမည့် ဇူလိုင် ၁ ရက်တွင် စတင်ကောက်ခံမည်ဖြစ်ပြီး ပြည်ထောင်စုအစိုးရ၏ သဘောတူညီချက်ကို ၂၀၁၉ ဧပြီက ရရှိပြီးဖြစ်သည်ဟု ထုတ်ပြန်ချက်တွင် ဖော်ပြသည်။ တိုးမြှင့်ကောက်ခံမည့် မီတာခ နှုန်းထားများကိုကြည့်လျှင် လျှပ်စစ်မီး ပိုသုံးလေ မီတာခ ပိုဆောင်ရလေဖြစ်အောင် စီမံခန့်ခွဲထားကြောင်း တွေ့ရသည်။ ယခင် ယူနစ် ၃၀၀ ခန့်သုံးသော အိမ်ထောင်စုတစုသည် မီတာခ ကျပ် ၁၅၀၀၀ ခန့်သာ ပေးဆောင်ရသော်လည်း ယခု နှုန်းထားသစ်အရ ကျပ် ၃၅၀၀၀ ပေးဆောင်ရတော့မည် ဖြစ်သည်။ မီတာခများ တိုးကောက်တော့မည် ဆိုသောသတင်း ထွက်ပေါ်လာပြီးနောက် မီတာခ တိုးကောက်လည်း တိုးပေးမည်၊ မီးမှန်အောင် လုပ်ပေးဆိုသည့် အုပ်စုနှင့် မီတာခ တိုးကောက်ခြင်းကို လက်မခံ ကန့်ကွက်သည့်အုပ်စု နှစ်ခုကွဲသွားသည်။ ယခု တိုးမြှင့်ကောက်ခံမည်ဆိုသော မီတာခများသည် အိမ်နီးချင်းနိုင်ငံများနှင့် နှိုင်းယှဉ်ကြည့်လျှင် နိမ့်ကျနေသေးသည်ဟု ထုတ်ပြောနေကြသော်လည်း လူတဦးချင်း ဝင်ငွေခြင်း နှိုင်းယှဉ်ကြည့်လျှင် မြန်မာနိုင်ငံက နိမ့်ကျနေသေးသည်။ မြန်မာနိုင်ငံတွင် အလုပ်သမားတဦး တရက် လုပ်ခလစာ ကျပ် ၄၈၀၀ သာ ရရှိနေချိန်တွင် အိမ်နီးချင်း ထိုင်းနိုင်ငံတွင် တရက် ဘတ် ၃၀၀ မြန်မာကျပ် ၁၅၀၀၀ ခန့် ရရှိနေသည်။ မီတာခ တိုးကောက်မည့်စနစ်တွင် ပိုသုံးလျှင် ပိုပေးရမည့်စနစ် ဖြစ်နေသည့်အတွက် အဲယားကွန်း၊ ပန်ကာ အချိန်ပြည့်ဖွင့်ထားခြင်းမျိုးကို ရှောင်ကြဉ်ကြရတော့မည် ဖြစ်သည်။ လူမရှိဘဲ အိမ်ရှေ့ကနေ အိမ်နောက်အထိ တအိမ်လုံး လင်းထိန်နေအောင် မီးထွန်းထားခြင်းမျိုး ရှောင်ရမည်၊ လျှပ်စစ်မီးဖိုများအစား ဂက်စ်မီးဖိုများ ပြောင်းသုံးပြီး လျှပ်စစ်မီးချွေတာရေး လုပ်ဆောင်ကြရန် အိမ်ထောင်ဦးစီးနှင့် အိမ်ရှင်မတို့ ပြင်ဆင်နေကြပြီ။ အစိုးရဘက်က ကြည့်လျှင်လည်း လျှပ်စစ်မီးအတွက် လက်ရှိ ၂၀၁၈-၁၉ ဘဏ္ဍာရေးနှစ်မှာတင် အစိုးရက လျှပ်စစ်ကဏ္ဍအတွက် စိုက်ထုတ်ကုန်ကျငွေသည် ကျပ်သန်းပေါင်း ၆၃၀ ဘီလီယံအထိ ရှိခဲ့သည်ဟု သိရသည်။ လျှပ်စစ်ကဏ္ဍတွင် နိုင်ငံတော်က အကြီးအကျယ် အရှုံးပေါ်နေသဖြင့် မီတာခများတိုးမြှင့်ရန် အစိုးရ တာဝန်ရှိသူများက လွှတ်တော်တွင် ပြောကြားထားသလို လူသိရှင်ကြား ကြိုးပမ်းနေသည်မှာ အချိန်အတန်ကြာပြီ ဖြစ်သည်။ ယခုမှ ကောက်ခါငင်ကာ  မီတာခများ တိုးလိုက်ခြင်းတော့ မဟုတ်ပေ။ လျှပ်စစ်မီတာခ နှုန်းထားများကို တိုးမြှင့်ကောက်ခံရန်နှင့် လျှပ်စစ်ကဏ္ဍတွင် ရင်းနှီးမြှုပ်နှံမှုများ ပိုမိုလုပ်ဆောင်ရန် ကမ္ဘာ့ဘဏ်ကလည်း တိုက်တွန်း အကြံပြုထားသည်။ အမှန်တကယ်တော့ မြန်မာတနိုင်ငံလုံး၏ သုံးပုံတပုံတွင်သာ လျှပ်စစ်မီးကို အသုံးပြုခွင့် ရနေခြင်းဖြစ်ပြီး ကျန်သည့် သုံးပုံနှစ်ပုံသော ပြည်သူလူထုများ အထူးဖြင့် တိုင်းရင်းသားဒေသများ၌မူ  မြန်မာပြည် စတင် ဖြစ်တည်ကတည်းက ယခုချိန်ထိ လျှပ်စစ်မီးနှင့် အလှမ်းဝေးနေဆဲဖြစ်သည်။ မီတာခများ တိုးမြှင့်ကောက်ခံလိုက်ပါက ကုန်ဈေးနှုန်းများ မြင့်တက်လာမည့် ဒဏ်ကိုတော့ဖြင့် လျှပ်စစ်မီးရရှိသည့် ဒေသများရော မီးမရရှိသည့် ဒေသများပါ ခံစားကြရမည် ဖြစ်သည်။ ယခုလို အချိန်မျိုးတွင် လောင်စာဆီဈေးနှုန်းများပါ ထပ်မတက်လာစေရန် ပြည်သူတို့ ရင်တမမ ဆုတောင်းနေကြရသည်။ မည်သို့ပင်ဆိုစေကာမူ အစိုးရဘက်က ပြောထားသည့်အတိုင်း လျှပ်စစ်ဓာတ်အား ထုတ်လုပ်ဖြန့်ဖြူးမှု တိုးချဲ့ရေး၊ မဟာဓာတ်အားလိုင်းစနစ်မှ လျှပ်စစ်မီး မရရှိသေးသည့်ဒေသများ မီးရရှိရေး လုပ်ငန်းများကို ပြည်သူယုံကြည်မှုရအောင် ပွင့်လင်းမြင်သာစွာ အမှန်တကယ် ဆောင်ရွက်ပေးရန် လိုအပ်သည်ဟု ရှုမြင်သည်။ တဖက်ကလည်း လျှပ်စစ်ဓာတ်အားကို မမှန်မကန် ခိုးယူသွယ်တန်း အသုံးပြုနေသူများ၊ မသမာသည့်နည်းဖြင့် မီတာခများများ မဆောင်ရလေအောင် ဆောင်ရွက်နေသူများ၊ မီတာခ မဆောင်ရဘဲ အခွင့်ထူး ခံစားနေရသူများကို ကြပ်ကြပ်မတ်မတ် ကိုင်တွယ်၊ ထိထိရောက်ရောက် အရေးယူရန်လည်း ဒီဗွီဘီက တိုက်တွန်းလိုက်သည်။
2 years Ago

May 27, 2019

လျှပ်စစ်ဓာတ်အား လုံးဝမထုတ်လုပ်နိုင်တော့သည့် ရေအားလျှပ်စစ်စက်ရုံ ၆ ရုံအထိရှိနေ

မြန်မာပြည်မှာ တည်ဆောင်ထားတဲ့ ရေအားလျှပ်စစ်စီမံကိန်းတွေအနက် ရေအား လျှပ်စစ် စက်ရုံစီမံကိန်း ၆ ခု အနေနဲ့ လျှပ်စစ်ဓာတ်အား လုံးဝထုတ်လုပ်နိုင်ခြင်းမရှိတဲ့ အခြေအနေကို ရောက်ရှိနေပြီလို့ လျှပ်စစ်နှင့် စွမ်းအင်ဝန်ကြီးဌာန ဒုတိယဝန်ကြီးက ပြောပါတယ်။ မေလ ၂၇ ရက်က ကျင်းပတဲ့ ပြည်သူ့လွှတ်တော်အစည်းအဝေးမှာ ဆိပ်ကမ်းမဲဆန္ဒနယ် ကိုယ်စားလှယ်တင်သွင်းထားတဲ့ ၂၀၃၀ ပြည့်နှစ်မှာ လျှပ်စစ် ၁၀၀ ရာခိုင်နှုန်း ရရှိရေးအတွက် ဝန်ကြီးဌာနအနေနဲ့ တိကျတဲ့မူဝါဒနဲ့ ဆောင်ရွက်ဖို့ တိုက်တွန်းတဲ့အဆိုအပေါ် ဒုဝန်ကြီးက ရှင်းလင်းပြောဆိုလိုက်တာပါ။ “လက်ရှိ အခြေအနေလေးကို လွှတ်တော်ကိုယ်စားလှယ်ကြီးများသိအောင် တင်ပြလိုပါတယ်။ ဇောင်းတူ ရေအားလျှပ်စစ်စီမံကိန်းဟာ လျှပ်စစ်ထုတ်လုပ်နိုင်မှု လုံးဝမရှိတော့ ပါဘူး။ မုန်းရေအား လျှပ်စစ်ဟာ လျှပ်စစ်ထုတ်လုပ်နိုင်မှု လုံးဝမရှိတော့ပါဘူး။ ကျူးရေအား လျှပ်စစ်စီမံကိန်းဟာ လျှပ်စစ်ထုတ်လုပ်နိုင်မှု လုံးဝမရှိတော့ပါဘူး။ မြစ်သာ ရေအားလျှပ်စစ်စီမံကိန်းဟာ လျှပ်စစ်ထုတ် လုပ်နိုင်မှု လုံးဝမရှိတော့ပါဘူး။ ရာဇကြို ရေအားလျှပ်စစ်စီမံကိန်းဟာ ထုတ်လုပ်နိုင်မှုမရှိပါဘူး။ တာပိန်ရေအားလျှပ်စစ်ဟာ ထုတ်လုပ်နိုင်မှု လုံးဝမရှိပါဘူး” လို့ ဒုဝန်ကြီး ဒေါက်တာထွန်းနိုင်က ရှင်းလင်းတင်ပြခဲ့ပါတယ်။ အဲဒီ ရေအားလျှပ်စစ်စီမံကိန်းတွေအနေနဲ့ ယခုနှစ်အတွင်းမှသာ လျှပ်စစ်ထုတ်လုပ်နိုင်ခြင်း မရှိတော့တဲ့ အခြေအနေမျိုး ဖြစ်ပေါ်ခဲ့တာလို့လည်း ဆိုပါတယ်။ ဒီအခြေအနေနဲ့ ပတ်သက်ပြီး ဒုဝန်ကြီးက “ယခင့်ယခင် နှစ်တွေက ဒီလောက်အခြေအနေ မဆိုးခဲ့ပါဘူး။ အခုနှစ်မှာတော့ အထူးမြင့်မားတဲ့ ရာသီဥတုရယ်။ လစဉ်ရေဝင်တဲ့ နှုန်းထားတွေဟာ ယခင်နှစ်များထက် ထူးကဲစွာ လျော့နည်းသွားတာလည်း တွေ့ကြုံရပါတယ်” လို့ ရှင်းပြခဲ့ပါတယ်။ ကျန်ရှိတဲ့ တခြားရေအားလျှပ်စစ်စီမံကိန်းတွေအနေနဲ့လည်း တချို့က တနေ့တာလုံး လျှပ်စစ် ထုတ်လုပ်နေနိုင်တဲ့အခြေအနေမှာ တည်ရှိနေပေမယ့် တချို့ကတော့  တနေ့ကို ၂ နာရီ ထုတ်လိုက်နိုင်ပြီး တချို့ကတော့ တနေ့ ၄ နာရီသာ ဓာတ်အားထုတ်နိုင်တယ်လို့လည်း ဒုဝန်ကြီးက ဆိုပါတယ်။
2 years Ago
More News
Up