လျှပ်စစ်ရုံး

January 25, 2022

လျှပ်စစ်မီတာခ အတင်းအကျပ်ကောက်ခံနေသည့် ဇီးကုန်းမြို့နယ်လျှပ်စစ်ရုံး ဗုံးခွဲခံရ

လျှပ်စစ်မီတာခအတင်းအကျပ်ကောက်ခံနေတဲ့ ပဲခူးတိုင်း ဇီးကုန်းမြို့နယ်လျှပ်စစ်ရုံးမှာ ဇန်နဝါရီ ၂၄ ရက်နေ့ မနက်ပိုင်းမှာ ဗုံးပေါက်ကွဲခဲ့တယ်လို့ ဇီးကုန်း PDF ကနေ သိရပါတယ်။

ဇီးကုန်းမြို့နယ် လျှပ်စစ်ရုံးကို မနေ့က မနက် ၉ နာရီလောက်မှာ ဇီးကုန်း PDF တပ်ဖွဲ့က ဗုံးခွဲတိုက်ခိုက်ခဲ့ပြီး ထိခိုက်ပျက်စီးမှုရှိနိုင်တယ်လို့ ZG-PDF ရဲ့ ပြန်ကြားရေးတာဝန်ခံက ဒီဗွီဘီ ကို ပြောပါတယ်။

အဲဒီ EPC ရုံးကို ပြည်သူလူထုဆီကနေ စစ်ကောင်စီရဲ့အလိုကျ လျှပ်စစ်မီတာခတွေ အတင်းအကျပ်လိုက်လံကောက်ခံနေလို့ ဗုံးခွဲသတိပေးလိုက်တာဖြစ်ပြီး မီတာခတွေကို အတင်းအကျပ် ဆက်လက်ကောက်ခံမယ်ဆိုရင် ဒီထက်ပိုပြီး ပြင်းပြင်းထန်ထန်တိုက်ခိုက်သွားမယ်လို့ ဆိုပါတယ်။

ဇီးကုန်မြို့နယ်ထဲက ပြည်သူတွေအနေနဲ့ လျှပ်စစ်မီတာခ လုံးဝမပေးဆောင်ကြဖို့နဲ့ မီတာရုံးနားကို သွားလာတာတွေ၊ မီတာရုံးက Non CDM ဝန်ထမ်းတွေနဲ့ အနီးကပ်ဆက်ဆံတာတွေ၊ မီတာခ လိုက်ကောက်တဲ့ ဝန်ထမ်းတွေနဲ့ နီးနီးကပ်ကပ်မနေကြဖို့ သတိပေးထားပါတယ်။

ဇီးကုန်းမြို့ခံတစ်ယောက်က “ဇီးကုန်း EPC ရုံးဘက်မှာ မနေ့မနက်ပိုင်း ဗုံးပေါက်ကွဲသံအကျယ်ကြီး ကြားလိုက်တယ်ဗျ။ အဲဒီနောက်ပိုင်းမှာ စစ်ကောင်စီတပ်သားတွေနဲ့ ရဲတွေ ဖြတ်သွားတာ တွေ့ရတယ်။ ဗုံးခွဲတဲ့သူတွေကို သွားရှာကြတာဖြစ်နိုင်တယ်” လို့ ပြောပါတယ်။

စစ်ကောင်စီတပ်တွေဟာ ဇီးကုန်းမြို့ဝင်မြို့ထွက် ဂိတ်တွေမှာ လုံခြုံရေးတင်းကျပ်ထားပြီးတော့ လမ်းသွားလမ်းလာ ပြည်သူတွေရဲ့ ကားတွေ၊ ဆိုင်ကယ်တွေနဲ့ လက်ကိုင်ဖုန်းတွေကိုပါ စစ်ဆေးတာတွေ ပြုလုပ်နေတယ်လို့ ဒေသခံတွေဆီကနေ သိရပါတယ်။

22 hours Ago

January 24, 2022

၃ လနှင့်အထက် မီတာခမပေးပါက မီတာဖြုတ်သိမ်း အရေးယူခံရမည်ဟု စစ်ကောင်စီ ခြိမ်းခြောက်

ရန်ကုန်မြို့က ပြည်သူတွေအနေနဲ့ ၃ လနဲ့အထက် မီတာခမပေးဘူးဆိုရင်  မီတာကိုပါဖြုတ်သိမ်းခံရမယ့်အပြင်  အရေးယူခံရဦးမယ်လို့ ရန်ကုန်လျှပ်စစ်ရုံးတချို့က ကြေညာပါတယ်။

အာဏာသိမ်းယူထားတဲ့ စစ်ကောင်စီကို ဆန့်ကျင်တဲ့အနေနဲ့  ပြည်သူတွေက မီတာခမပေးဆောင်ဘဲနေကြတာကို တုံ့ပြန်တဲ့အနေနဲ့ စစ်ကောင်စီက လျှပ်စစ်မီးတွေဖြတ်နေချိန်မှာ အခုလို ထပ်ပြီး ခြိမ်းခြောက်လိုက်တာပါ။

၃ လနဲ့အထက် ဓာတ်အားခမပေးဘူးဆိုရင် ဓာတ်အားဖြတ်တောက်တာခံရမယ့်အပြင် လုပ်ထုံးလုပ်နည်းနဲ့အညီ တပ်ဆင်မီတာကို ဖြုတ်သိမ်းခံရမယ်လို့ သင်္ဃန်းကျွန်းမြို့နယ်နဲ့ တာမွေမြို့နယ် လျှပ်စစ်မန်နေဂျာရုံးတို့က သူတို့ရဲ့ ဖေ့စ်ဘွတ်ခ်လူမှုကွန်ရက်စာမျက်နှာတွေကနေ ကြေညာထားတာပါ။

သူတို့ထုတ်ပြန်လိုက်တဲ့ ကြေညာချက်မှာ မြို့နယ်နာမည်ကို ကွက်လပ်ထဲ ဖြည့်ရတာဖြစ်လို့ ရန်ကုန်တတိုင်းလုံးမှာ အခုလို ကြေညာဖို့ စီစဉ်ထားတာလည်းဖြစ်နိုင်ပါတယ်။

မီတာခတွေကို အွန်လိုင်းကနေ ပေးဆောင်ကြပေမဲ့ ကြွေးကျန်စာရင်း ပေါ်နေတယ်လို့ မီးသုံးစွဲသူတချို့က ပြောပါတယ်။

လက်ရှိမှာတော့ စစ်ကောင်စီဟာ တနိုင်ငံလုံးကို နေ့စဉ်ရက်ဆက် မီးဖြတ်နေပြီး တချို့ မြို့နယ်ဒေသတွေမှာတော့ တရက်ကို ၂ ကြိမ်၊ ၆ နာရီဝန်းကျင်လောက် မီးဖြတ်ခံနေရတာပါ။

2 days Ago
More News
Up