လောင်းကစားဝိုင်း

January 24, 2022

မတ္တရာမြို့နယ်၌ လောင်းကစားဝိုင်းများ ဆက်မဖွင့်ကြရန် ပကဖ နောက်ဆုံးအကြိမ် သတိပေး

မန္တလေးတိုင်း၊ မတ္တရာမြို့နယ်အတွင်းမှာ လောင်းကစားဝိုင်းတွေ အင်မတန်များပြားလာတဲ့အတွက် လောင်းကစားဝိုင်းတွေ ဆက်မလုပ်ကြဖို့ ပကဖ (မတ္တရာ)က နောက်ဆုံးအကြိမ် သတိပေးလိုက်ပါတယ်။

စစ်ကောင်စီအာဏာသိမ်းပြီးနောက်ပိုင်း အုပ်ချုပ်ရေး ယန္တရားရဲ့ အကျင့်ပျက်ချစားမှုတွေကြောင့် နေရာအနှံ့ လောင်းကစားဝိုင်းတွေ များပြားလာပြီး ဂျင်ဝိုင်း၊ ကြက်ဝိုင်း၊ဖဲဝိုင်း၊ဂလုံး ဂလုံးဝိုင်း၊စတဲ့ အကြီးစားလောင်းကစားဝိုင်းတွေအပြင် စမာကလာ‌ ခေါ် ၂၄ ရုပ်ပါ မဲကစားဝိုင်းနဲ့ အခြားသော လောင်းကစားမှုတွေကို ဒိုင်ဖွင့်လှစ်ပြီး လောင်းကစားဝိုင်းတွေပြုလုပ်နေကြတာ စိစစ်တွေ့ရှိရတယ်လို့ ဆိုပါတယ်။

မတ္တရာ နယ်ခံ တစ်ဦးက "တော်တော်ဆိုးနေပါတယ်၊ စမာကလာ ခေါ်  ၂၄ ရုပ်ပါ မဲဝိုင်းလေးတွေက ရွာတိုင်းနီးပါးမှာ လာဖွင့်နေကြပြီး တစ်ချို့ရွာတွေဆို နေ့ရောညပါ ဖွင့်ပြီး ကစားနေကြပါတယ်။ ရဲကို လိုင်းကြေးအဖြစ် တစ်ဝိုင်းကို ၅၀၀၀ ပေးသွင်းရတယ် ကြားပါတယ်။ နောက် ဂျင်ဝိုင်း၊ ဖဲဝိုင်း၊ ကြက်ဝိုင်း အကြီးစားကြီးတွေက ငါးဝိုင်းလောက်ရှိပါတယ်။ မတ္တရာ ပုသိမ်ကြီး အစပ်က လှိုင်းပေါက်ရွာမှာဆိုရင် ဂျင်၊ ဖဲ၊ ဖိုး၊ ပြည့်တန်ဆာပါ အစုံရတယ်ကြားသိရပြီး ဓားကိုင်လူမိုက် အစောင့်အရှောက်ကိုက ၂၀ ကျော်လောက်ရှိတယ် ကြားသိထားရတယ်" လို့ ပြောပါတယ်။

လောင်းကစားဝိုင်းတွေ များပြားလာတာကြောင့် နောက်ဆက်တွဲ ခိုးမှု၊ လုယက်မှု၊ ခိုက်ရန်ဖြစ်ပွားမှု၊ အများပြည်သူတွေရဲ့ လုံခြုံရေးကို ထိပါးမှုတွေလည်း များပြား‌လာနေပြီး ပကဖ (မတ္တရာ)ဆီ ပြည်သူ့တိုင်ကြားစာ အမြောက်အများ ရောက်ရှိနေတယ်လို့ ဆိုပါတယ်။

အဲ့ဒီအတွက် လောင်းကစားဝိုင်းတွေနဲ့ လောင်းကစားနည်းတွေကို ဖွင့်လှစ်မကစားကြဖို့ နောက်ဆုံးအကြိမ် ပြင်းထန်စွာ သတိပေးတာဖြစ်ပြီး ပြည်သူတွေအနေနဲ့လည်း လောင်းကစားဝိုင်းတွေနဲ့ နီးကပ်စွာမနေကြဖို့ ပကဖ (မတ္တရာ) က ထုတ်ပြန်အသိပေးထားပါတယ်။

5 days Ago

January 8, 2022

ဧရာဝတီတိုင်းတွင် စစ်ကောင်စီတပ်ကငွေယူပြီး လောင်းကစားဝိုင်းများ ဖွင့်ခွင့်ပြုနေ

ဧရာဝတီတိုင်းမှာ စစ်တပ်အာဏာသိမ်းပြီးနောက်ပိုင်း ဒီဇင်ဘာလပိုင်းကစတင်ကာ စစ်ကောင်စီ တပ်သားတွေက လောင်းကစားဝိုင်းတွေကို ပိုက်ဆံတောင်းပြီး တရားဝင်ပုံစံမျိုး ခွင့်ပြုတာတွေပြုလုပ်လာတယ်လို့ ဒေသခံတွေထံက သိရပါတယ်။ 

ဧရာဝတီတိုင်း ၂၆ မြို့နယ်မှာ လောင်းကစားဝိုင်းတွေကို လိုင်းကြေးယူပြီး ခွင့်ပြုထားတာ ဖြစ်ပြီး လောင်းကစားဝိုင်းတွေကို တောဘက်တွေမှာ ပိုမိုပြုလုပ်လေ့ရှိတယ်လို့ ဒေသခံပြည်သူတွေ ကပြောပါတယ်။ 

ပုသိမ်မြို့ခံတဦးက “အာဏာသိမ်းပြီး ချက်ချင်းလုပ်တာ မဟုတ်ဘူး ၅ လလောက်ကြာမှာစတာ။ မြို့ပေါ်မှာတော့ အဲ့လောက် မဟုတ်ဘူး တောဘက်ပေါ့။ ပြောရရင် ဘာမှမသိတဲ့ သူတွေလုပ်တာပေါ့။ ကြက်ဝိုင်းရှိတယ်၊ ဂျင်ဝိုင်းရှိတယ်၊ ဖဲဝိုင်းရှိတယ် ဒါက အလုပ်အများဆုံးတွေကိုပြောပြတာ”လို့ ပြောပါတယ်။

အရပ်သားအစိုးရလက်ထက်ကလည်း လောင်းကစားဝိုင်းတွေကို ရဲတွေက လိုင်းကြေးရယူပြီး ခွင့်ပြုပေးတာ ရှိပေမဲ့ အာဏာသိမ်းစစ်ကောင်စီလက်ထက်မှာ နှစ်ဆလောက်ပိုမိုများပြားလာတာလို့ ဆိုပါတယ်။ 

ဧရာဝတီတိုင်းအတွင်း မြို့နယ်တွေမှာ ပြုလုပ်တဲ့ လောင်းကစားဝိုင်းတွေကို သက်ဆိုင်ရာ ရဲစခန်းမှူးတွေနဲ့ ကျေးရွာအုပ်ချုပ်ရေးမှူးတွေက လိုင်းကြေးရယူပြီး ခွင့်ပြုပေးထားတာဖြစ်တယ်လို့ သိရပါတယ်။

3 weeks Ago
More News
Up