လေယာဉ်

January 13, 2022

လေယာဉ်ဖြင့်ဗုံးကြဲမှုကြောင့် မိုးတားကြီးဒေသခံအချို့ဒဏ်ရာရပြီး နေအိမ် ၁၀ လုံး မီးလောင်

စစ်ကိုင်းတိုင်း ကသာမြို့နယ် မိုးတားကြီးရွာမှာ စစ်ကောင်စီတပ်က ဂျက်တိုက်လေယာဉ်နဲ့ ဗုံးကြဲချတာကြောင့် ဒဏ်ရာရရှိသူ ၅ ဦးထက်မနည်းနဲ့ နေအိမ် ၁၀ လုံး မီးလောင်ကျွမ်းခဲ့သလို ကလေးမြို့နယ်မှာလည်း နေအိမ် ၂ လုံး မီးရှို့ဖျက်ဆီးခံရပြီး တိုက်ပွဲဖြစ်ပွားခဲ့တယ်လို့ သိရပါတယ်။

မိုးတားကြီးကျေးရွာကို ဇန်နဝါရီ ၁၂ ရက်နေ့ နေ့လယ်ပိုင်းမှာ စစ်ကောင်စီတပ်က ဂျက်တိုက်လေယာဉ် ၃ စီးနဲ့ ဗုံးကြဲချခဲ့တာကြောင့် ကလေးငယ်တွေအပါအဝင် ပြည်သူ ၅ ဦး ထိခိုက်ဒဏ်ရာရရှိခဲ့ပြီး ဘာသာရေးအဆောက်အဦတစ်ခုအပါအဝင် နေအိမ် ၁၀ လုံး မီးလောင်ကျွမ်းခဲ့တယ်လို့  ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။

ဗုံးကြဲချတာကြောင့် အသက် ၆၉ နှစ်အရွယ် ဦးကျော်မောင် (လက်ထိမှန်)၊ ၁၉ နှစ်အရွယ် မောင်သက်ထူးအောင် (ညာဘက်ပေါင်ထိမှန်)၊ အသက် ၇ နှစ်အရွယ် မောင်အောင်သက်ထွေး  (ညာလက်ထိခိုက်ဒါဏ်ရာရ) နဲ့ အသက် ၆ နှစ်အရွယ် မောင်နော်ဇက်အောင် (ဘယ်ဘက် ခြေသလုံး ထိခိုက်)  တို့ ထိခိုက်ဒဏ်ရာရရှိခဲ့တယ်လို့ သိရပါတယ်။

စစ်ကောင်စီက မိုးတားကြီးကျေးရွာကို အကြောင်းမဲ့ ဗုံးကြဲတိုက်ခိုက်ခဲ့တာလို့ ဒေသခံတစ်ဦးက ပြောပါတယ်။

“ဂိုဒေါင်တွေရော၊ စပါးတွေရော၊ စပါးကျီတွေရော မီးလောင်ဆုံးရှုံးရတယ်။  ကျနော်တို့လည်း ဗုံးကြဲတော့ ထွက်ပြေးကြတယ်။ တချို့အိမ်တွေက ဗုံးကြဲလို့ မီးလောင်တာတွေကို မြင်ရတော့ ဝိုင်းဝန်းမီးငြိမ်းပေးကြတယ်။ ၁၂ လုံးကြဲတာ ဟုတ်တယ်။ မပေါက်ကွဲသေးတဲ့ ဗုံး ၅လုံးကျန်တယ်။ မိုးတားကြီး အထက်တန်းကျောင်းနားက စာသင်ဆောင်လည်း လောင်တဲ့ထဲပါသွားတယ်။ တိုက်ပွဲ ဖြစ်တာ မရှိဘူး ဒီတိုင်းလာကြဲသွားတာ” လို့ ပြောပါတယ်။

ဗုံးကြဲချတာကြောင့် ဒဏ်ရာရသူဒီထက်ပိုများနိုင်ပြီး သေဆုံးသူတွေ ရှိနိုင်တယ်လို့ ဒေသခံတွေက ပြောကြားခဲ့ကြပါတယ်။

ကသာမြို့နယ် မိုးတားကြီးနဲ့ မိုးတားလေး ကျေးရွာ တစ်လျောက်မှာ ဒေသခံပြည်သူ့ကာကွယ်ရေးတပ်တွေနဲ့ စစ်ကောင်စီတပ်တို့ မကြာခဏ တိုက်ပွဲဖြစ်ပွားလေ့ရှိပြီး နိုဝင်ဘာ ၉ ရက်နေ့က တိုက်ပွဲအပြင်းထန်ဆုံးဖြစ်ခဲ့တာကြောင့် စစ်ကောင်စီတပ်က အယောက် ၄၀ လောက် သေဆုံးခဲ့တယ်လို့ ဒေသခံပြည်သူ့ကာကွယ်ရေးတပ်တွေဆီက သိရပါတယ်။

စစ်ကောင်စီတပ်နဲ့ ပျူစောထီးအဖွဲ့ဝင်  အင်အား ၆၀ လောက်ဟာ ကလေးမြို့နယ် တောင်ပိုင်း အင်းကျွန်းကျေးရွာကို ဇန်နဝါရီ ၁၂ ရက်နေ့ မနက်ပိုင်းက ဝင်ရောက်ကာ နေအိမ် ၂ လုံးကို မီးရှို့ဖျက်ဆီးခဲ့ပြီးနောက် ရေရှင်ကျေးရွာဘက်မှာ ကလေးပြည်သူ့ကာကွယ်ရေးတပ်နဲ့ တိုက်ပွဲဖြစ်ပွားခဲ့ကြတယ်လို့ ဒေသခံတွေဆီက သိရပါတယ်။

ဇန်နဝါရီ ၁၂ ရက်နေ့ နေ့လယ်ပိုင်းမှာ တိုက်ပွဲပြင်းထန်စွာဖြစ်ပွားပြီး ဟံသာဝတီရွာဘက်ကနေ စစ်ကောင်စီတပ်ဖွဲ့က လက်နက်ကြီးတွေနဲ့ စစ်ကူပစ်ခတ်ခဲ့တယ်လို့ ကလေးပြည်သူ့ကာကွယ်ရေးတပ်ဖွဲ့ က ပြောပါတယ်။

တိုက်ပွဲမှာ စစ်ကောင်စီနဲ့ ပျူစောထီးအဖွဲ့ဝင် ၅ ဦးသေဆုံးပြီး  ကလေးပြည်သူ့ကာကွယ်ရေးတပ်ဖွဲ့ဝင် ၂ ဦး  လက်နက်ကြီး ထိမှန်ဒဏ်ရာရရှိခဲ့တယ်လို့ ကလေးပြည်သူ့ကာကွယ်ရေးတပ်ဖွဲ့ဆီက သိရပါတယ်။

နေ့လယ် ၁ နာရီလောက်မှာတော့ စစ်ကောင်စီ တပ်သားတွေနဲ့ ပျူစောထီးအဖွဲ့ဝင်တွေဟာ ကျောက်ပြုတ်ကျေးရွာဘက်ကို ပြန်ဆုတ်သွားတယ်လို့ သိရပါတယ်။

ကျောက်ပြုတ်ကျေးရွာကို ၂၀၂၁ ခုနှစ် စက်တင်ဘာ ၁၁ ရက်နေ့ကလည်း စစ်ကောင်စီတပ်တွေက ကျေးရွာအတွင်းဝင်ရောက်ပြီး ကျေးရွာလုံးကျွတ် မီးရှို့ဖျက်ဆီးခဲ့ဖူးတယ်လို့ ဒေသခံတွေက ပြောပါတယ်။

ကလေးမြို့နယ် တောင်းပိုင်း ကျေးရွာတွေမှာ စစ်ကောင်စီတပ်က တပ်စွဲထားပြီး ဒီဇင်ဘာလ ၂၂ ရက်နေ့ကတည်းက ဝင်ရောက်ကာ  နေအိမ်တွေကို မီးရှို့ဖျက်ဆီးတာ ပြုလုပ်နေတာလို့ ဆိုပါတယ္။

နေအိမ်တွေကို မီးရှို့ဖျက်ဆီးရုံမက နေအိမ်အတွင်းက အဖိုးတန်ပစ္စည်းတွေကိုလည်း ယူဆောင်သွားကြပြီး ကျေးရွာအတွင်းက ပြည်သူတွေမွေးမြူထားတဲ့ တိရစ္ဆာန်တွေကိုလည်း သတ်ဖြတ်စားသောက်ကြပါတယ်။

ဇန်နဝါရီ ၁၁ ရက်နေ့ကလည်း ကလေးမြို့နယ် တောင်ပိုင်းမှာရှိတဲ့ သာစည်ကျေးရွာထဲကို စစ်ကောင်စီတပ်က ဝင်ရောက်ပစ်ခတ်မှုကြောင့် ကျေးရွာပြည်သားတစ်ဦး သေဆုံးခဲ့ပြီး နေအိမ်နှစ်လုံးကို မီးရှို့ဖျက်ဆီးခဲ့ပါသေးတယ်။

ကလေးမြို့နယ်တောင်ပိုင်းမှာရှိတဲ့ နတ်ချောင်းကျေးရွာ၊ ချောင်းခွ၊ သာစည်၊ နတ်မြောင်း၊ စတဲ့ကျေးရွာတွေမှာ စစ်ကောင်စီက ဝင်ရောက်ပစ်ခတ်ပြီး နေအိမ်တွေကို မီးရှို့ဖျက်ဆီးတာကြောင့် ဒေသခံပြည်သူ့ကာကွယ်ရေးတပ်ဖွဲ့တွေနဲ့ မကြာခဏ တိုက်ပွဲဖြစ်ပွားလေ့ရှိပါတယ်။

Photo  ဒေသခံတစ်ဦး

2 weeks Ago

January 7, 2022

လွိုင်ကော်မြို့ပေါ် တိုက်ပွဲပြင်းထန်နေ၊ KNPP ဌာနချုပ်အနီး လေယာဉ်ဖြင့် ဗုံးကြဲ

ကယား (ကရင်နီ) ပြည်နယ် လွိုင်ကော်မြို့မှာ ဒီကနေ့ မနက် ၇ နာရီလောက်စပြီး စစ်ကောင်စီတပ်နဲ့ ပြည်သူ့ကာကွယ်ရေးတပ်တွေအကြား တိုက်ပွဲတွေ ပြင်းပြင်းထန်ထန်ဖြစ်ပွားနေပါတယ်။

လွိုင်ကော်မြို့ မိုင်းလုံး၊ ပန်ကန်းနဲ့ ရွာတန်းရှည်ရပ်ကွက်တွေမှာ တိုက်ပွဲတွေ ဖြစ်ပွားနေပြီး လက်နက်ကြီးကျည် ရပ်ကွက်ထဲ ကျရောက်ပေါက်ကွဲတာကြောင့် ဒေသခံပြည်သူတွေ ထိခိုက်သေဆုံးမှုတွေ ရှိနေပါတယ်။

မိုင်းလုံးရပ်ကွက်နေသူတဦးက “ကျနော့်အိမ်အောက်ဘက် အိမ်မှာ လက်နက်ကြီးကျည်ကျလို့ တယောက်ထိသွားတယ်။ ပြီးတော့ ဟိုဘက် ပအို့ဝ့်အမျာ်စုနေတဲ့ဘက်မှာ လက်နက်ကြီး အိမ်မှာကျလို့ မိသားစုဝင် ၅ ယောက်ဒဏ်ရာပြီး တယောက်ဆုံးသွားတယ်လို့ ပြောတယ်။ ကျနော်တို့ အပြင်မထွက်ရဲဘူး အိမ်မှာပဲ နေနေကြတယ်။ အိမ်မှာ ဗုံးခိုကျင်းတူးပြီးနေနေရတယ်” လို့ ပြောပါတယ်။

ဒါ့အပြင် စစ်ကောင်စီဘက်က အထပ်မြင့်အဆောက်အဦတွေအပေါ်ကနေလည်း စနိုက်ပါနဲ့ စောင့်ကြည့်ပစ်ခတ်တာတွေ ရှိနေတယ်လို့ သိရပါတယ်။

အလားတူ မိုင်းလုံး သံလမ်းဘက်မှာလည်း အလောင်း ၃ လောင်း တွေ့ရကြောင်းနဲ့ အဲဒီအလောင်းတွေက ပြည်သူတွေအလောင်းဖြစ်တယ်လို့ ဒေသခံတွေက ပြောပါတယ်။

တိုက်ပွဲကြား ပိတ်မိနေတဲ့ ပြည်သူတွေကို ကူညီကယ်ထုတ်နေတဲ့ ပရဟိတ လပ်ဆောင်သူ မရိုစလင်းအိအိက  သူ့ရဲ့လူမှုကွန်ရက်စာမျက်နှာမှာ အခုလို ဖော်ပြထားပါတယ်။

“မနက်ကနေ အခုထိ မပြီးသေးပါဘူး။ ထပ်ခေါ်ယူဖို့ အများကြီးကျန်ပါသေးတယ်။ သေလောက်ပြီ ထင်ရတဲ့ မနက်ခင်း လက်နက်ကြီးကျတာ ကံကောင်းလို့ လွတ်ခဲ့ပေမယ့် ထိသွားတဲ့ သူငယ်ချင်းတွေအတွက် စိတ်မကောင်းဖြစ်ရပါတယ်။ ကြောက်လည်းကြောက်၊ တုန်လဲတုန်နေတာမို့၊ အမှားနည်းအောင် မနည်းထိန်းလုပ်နေရပါတယ်။ အရေးပေါ်စစ်ရှောင်တွေအတွက် စောင်အိပ်ရာခင်း ခြင်ထောင်လိုပါတယ်နော။”

စစ်ကောင်စီဘက်က လက်နက်ကြီးတွေနဲ့ ရမ်းသမ်းပစ်ခတ်မှုကြောင့် ရပ်ကွက်ထဲက ပြည်သူ ၇ ဦး ထိခိုက်ဒဏ်ရာရရှိခဲ့တယ်လို့ လူနာတွေကို ပို့ဆောင်ပေးနေသူတဦးက ပြောပါတယ်။

“ဒီမနက် လက်နက်ကြီးကျည်ကျလို့ ကျနော်တို့လူနာတွေ ပို့ပေးနေတာ ၇ ယောက်ရှိပြီ။ အခု တိုက်ပွဲကြား ပိတ်မိနေတဲ့သူတွေကိုလည်း ကျနော်တို့ပူးပေါင်းတပ်တွေက ကယ်ထုတ်နေရတယ်။”

အလားတူ ဒီကနေ့မနက်ပိုင်း သံလွင်အရှေ့ဘက်ခြမ်းရှိ ကရင်နီအမျိုးသားတိုးတက်ရေးပါတီ (ကေအန်ပီပီ) ဌာနချုပ်နဲ့ သိပ်မနီးမဝေးမှာ  တိုက်ပွဲတွေဖြစ်ပွားပြီး စစ်ကောင်စီက လေယာဉ်နဲ့ လာရောက်ပစ်ခတ်မှုရှိခဲ့တယ်လို့ ကေအန်ပီပီ အထေထွေအတွင်းရေးမှူး ၂ ဦးအောင်ဆန်းမြင့်က ပြောပါတယ်။

“ဒီမနက်ကတည်းကတော့ တိုက်ပွဲဖြစ်နေတယ်။ တိုက်ပွဲဖြစ်တော့ သူတို့ဘက်တော့ လေယာဉ်နဲ့လာပြီးမှ တလုံးနှစ်လုံး လာပစ်သွားတာတော့ရှိတယ်။ လက်နက်ကြီးတွေလည်း ထုနေတာပေါ့နော်။ ဒါလေးတွေတော့ ရှိတယ်။ အခုအခြေအနေက မပြီးသေးဘူးဆိုတော့လေ။”

Karenni Army Center Kn.A.C ရဲ့လူမှုကွန်ရက်စာမျက်နှာမှာတော့ ထိုင်း-ကရင်နီ နယ်စပ် နန်းပန်ချောင်းအနီး စစ်ကောင်စီ ခြေကုပ်တပ်စခန်းဖြစ်တဲ့ နတ်တောင်စခန်းကို ကရင်နီတပ်မတော်က ဒီကနေ့ မနက်သွားရောက်သိမ်းပိုက်ခဲ့ပြီး စစ်ကောင်စီဘက်က အသေအပျောက်များခဲ့တယ်လို့ ဖော်ပြပါတယ်။ 

“ကရင်နီတပ်မတော်မှ ထိုစခန်းကို အောင်မြင်စွာသိမ်းပိုက်နိုင်ခဲ့ပြီး။ စခန်းသိမ်းပွဲအပြီး နာရီဝက်အလွန်မှာ ရဟတ်ယာဥ်ဖြင့် စစ်ကူလာရောက်ပစ်ခတ်ဗုံးကြဲခဲ့သည့်အပြင်...ဆက်လက်ပြီး ကရင်နီတပ်မတော် ဌာနချုပ် ညာမူတပ်စခန်းကို ထိုရဟတ်ယာဥ်ဖြင့်လာရာက် ဗုံးကြဲခဲ့သော်လည်း ၎င်းတို့၏ ကာကင်းကုန်းတစ်ခုကိုသာ မှားယွင်းဗုံးကြဲခဲ့ပါသည်” လို့ ဖော်ပြထားပါတယ်။ 

လူဦးရေက သုံးသိန်းဝန်းကျင်သာရှိတဲ့ ကယားပြည်နယ်မှာ လက်ရှိလူဦးရေ ၁ သိန်းခွဲကျော်က စစ်ဘေးရှောင်နေကြရသလို လက်ရှိ လွိုင်ကော်မြို့ပေါ်ရပ်ကွက်တချို့ကပါ  စစ်ရှောင်နေရတဲ့အတွက် ကယားပြည်နယ်မှာ ဘေးကင်းလုံခြုံတဲ့နေရာ မရှိတော့တဲ့အနေအထားနဲ့ ရင်ဆိုင်နေပါတယ်။

ကယားပြည်နယ် တပြည်နယ်လုံးအတိုင်းအတာနဲ့ တိုက်ပွဲတွေ ဖြစ်ပွားနေတဲ့အတွက် လုံခြုံတဲ့နေရာ မရှိတော့တဲ့အနေအထားမှာ နိုင်ငံတကာအနေနဲ့ Save Zone တခု သတ်မှတ်ပြီး လူသားချင်းစာနာမှုအကူအညီတွေပေးဖို့လည်း ကေအန်ပီပီ အထွေထွေအတွင်းရေးမှူး ၂ ဦးအောင်ဆန်းမြင့်က ပြောပါတယ်။

“အခုက ပြောမယ်ဆိုရင် လွိုင်ကော်၊ ဒီးမော့ဆို၊ ၅ မိုင်၊ ၆ မိုင်၊ ပန်ကန်း၊ ၃ မိုင် အကုန်လုံးပေါ့နော်။ အဲဒါအပြင်ကို ဖရူဆို၊ ရှားတော့ အကုန်လုံးဖြစ်နေပြီးတာမကဘူး၊ ကျနော်တို့ ဒီနယ်စပ်ဘက်တောင်မှဖြစ်တယ်ဆိုတော့ တပြည်နယ်လုံး အတိုင်းအတာဖြစ်တယ်လို့ ပြောရမှာပေါ့နော်။ အဲတော့ ကျနော်တို့က အဲဒါကို နိုင်ငံတကာနဲ့ ယူအန်ကနေပြီးမှ ဖိအားပေးဖို့ လိုတယ်။ အဲဒါကတော့ save zone တခုပေါ့။ အခုက လူထုက စိတ်ချရတဲ့ နေရာက မရှိတော့ဘူး။ နယ်စပ်ပဲဖြစ်ဖြစ်၊ ဟိုးအထဲထဲမှာပဲဖြစ်ဖြစ်ပေါ့နော်။ အဲတော့ လူထုအတွက် save zone တခုပေါ်ပေါက်ရေးကို နိုင်ငံတကာက ဖိအားပေးဖို့တော့လိုတယ်။ save zone ဆိုတာက လူထုတွေ အကာအကွယ်ပေးထားတဲ့နေရာပေါ့။ အဲလိုမျိုးတခုတော့ ကျနော်တို့ အမြန်ဆုံးဖန်တီးပေးဖို့ လိုအပ်နေပြီလို့ အဲဒါတော့ ကျနော် ပြောချင်တာပေါ့။”

၂၀၂၂ ခု ဇန်နဝါရီ ၁ ရက်နေ့ကနေ ဒီကနေ့အထိ ဒီးမော့ဆိုနဲ့ လွိုင်ကော်မြို့နယ်တွေမှာ ရက်ဆက်တိုက်ပွဲတွေ ပြင်းထန်နေပြီး မနေ့ဇန်နဝါရီ ၆ ရက်နေ့ လွိုင်ကော်မြို့ပေါ်တိုက်ပွဲ စတင်ဖြစ်ပွားခဲ့တာဖြစ်ပြီး ရပ်ကွက်နေပြည်သူ ၃၀၀ ကျော် ထွက်ပြေးတိမ်းရှောင်နေရတယ်လို့ စစ်ရှောင်တွေကို ကူညီပေးနေသူတွေက ပြောပါတယ်။ 

ကယားပြည်နယ်အတွင်းမှာ စစ်ကောင်စီတပ်တွေနဲ့ ကယားပြည်နယ် အခြေပြု လက်နက်ကိုင်တပ်ဖွဲ့တွေဖြစ်တဲ့ KDF၊ KNDF၊ GZ-21 Loikaw တပ်ဖွဲ့တို့အကြား လွိုင်ကော်မြို့ပေါ်အထိ တိုက်ပွဲတွေပြင်းထန်လာနေတာပါ။

3 weeks Ago
More News
Up