မကွေးတိုင်း၊ ပခုက္ကူမြို့မှာ ဇန်နဝါရီ ၂၆ ရက် ညနေက မြို့နယ် လ.ဝ.က ရုံး လက်ပစ်ဗုံးနဲ့ တိုက်ခိုက်ခံရပြီး စစ်ကောင်စီဘက်က ၇ ယောက် အပြင်းထန်ဒဏ်ရာရရှိခဲ့တယ်လို့ ပခုက္ကူမြေအောက်တော်လှန်ရေးတပ်ဖွဲ့ (PKU UG) ကနေ သိရပါတယ်။
ပခုက္ကူမြို့ လ.ဝ.က ရုံးကို မနေ့ညနေ ၄ နာရီကျော်လောက်မှာ စစ်ကောင်စီရဲ့ တရားမဝင်ရွေးကောက်ပွဲ ကျင်းပဖို့ လူဦးရေစာရင်းပြုစုနေတာကြောင့် လက်ပစ်းဗုံနဲ့ ပစ်ခတ်တိုက်ခိုက်ခဲ့တာလို့ PKU UG တပ်ဖွဲ့ရဲ့ ပြန်ကြားရေးတာဝန်ခံ ကိုကံကောင်းက ဒီဗွီဘီကို ပြောပါတယ်။
“စစ်ကောင်စီရဲ့ တရားမဝင်ရွေးကောက်ပွဲကျင်းပဖို့ ပြင်ဆင်နေတာကို တိုက်ခိုက်ဖို့ အစီစဥ်ဆွဲခဲ့တာ ၃ ပတ်လောက်တော့ရှိပြီဗျ။ သူတို့ဘက်က ကံဆိုးချင်တော့ မနေ့က ဖြစ်စဥ်မှာ အဲဒီ လ.ဝ.က ရုံးက ဝန်ထမ်းတွေဟာ စစ်ကောင်စီတပ်သားနဲ့ ရဲ ၅ ယောက်အပါအဝင် ပျူစောထီးတွေနဲ့ မြို့ပေါ်ရပ်ကွက်တွေကို လူဦးရေစာရင်းကောက်ပြီး ရုံးကို ပြန်ရောက်တဲ့အချိန်မှာ တိုက်ခိုက်ခဲ့လို့ ရဲနဲ့ပျူစောထီး ၇ ယောက်လောက် အပြင်းထန်ဒဏ်ရာရရှိခဲ့တယ်။”
အကြမ်းဖက်စစ်ကောင်စီဟာ ပြည်သူလူထုစီကနေ မတရားအာဏာသိမ်းပြီး သူတို့ရဲ့ထွက်ပေါက်တခုဖြစ်တဲ့ အတုအယောင်ရွေးကောင်ပွဲ ပြုလုပ်ဖို့ ပြင်ဆင်နေတာကို လုံးဝ လက်မခံနိုင်လို့ "လက်တုံ့ပြန်" စစ်ဆင်ရေးပြုလုပ်လိုက်တာလို့ ကိုကံကောင်းက ပြောပါတယ်။
အဲဒီ တိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မ တွေ့ရသေးပါဘူး။
ပခုက္ကူခရိုင်အတွင်း မြိုင်မြို့နယ်နဲ့ ရေစကြို မြို့နယ်တွေမှာလည်း ဇန်နဝါရီ ၃ ရက်နဲ့ ၁၂ ရက်နေ့တွေမှာ စစ်ကောင်စီရဲ့အတုအယောင်ရွေးကောက်ပွဲအတွက် လူဦးရေစာရင်းကောက်ခံနေတဲ့ မြို့နယ် လ.ဝ.က ရုံးတွေကို ပြည်သူ့ကာကွယ်ရေးတပ်ဖွဲ့တွေက မီးရှို့ဖျက်ဆီးခဲ့ကြပါတယ်။
မကွေးတိုင်း၊ မြိုင်မြို့နယ်မှာလည်း ဇန်နဝါရီ ၂၆ ရက် မနက်ပိုင်းက စစ်ကောင်စီတပ်သားတွေ မိုင်းဆွဲတိုက်ခိုက်ခံရပြီး ၃ ယောက်သေဆုံးကာ ၅ ယောက် ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။
မြိုင်မြို့နယ် ကျောက်ခွက်ရေနံမြေ Well-2 ကျောက်ခွက်ရေနံမြေကနေ တဲကြီးရွာဘက်ကို ခြေလျင် ရှေ့ပြေးစစ်ကြောင်းထွက်လာတဲ့ စစ်ကောင်စီတပ်သား ၁၅ ယောက်ကို ဒေသကာကွယ်ရေး ပူးပေါင်းတပ်ဖွဲ့တွေက မိုင်းပွိုင့် အကြီးအသေး ၇ လုံးနဲ့ ဖောက်ခွဲတိုက်ခိုက်ခဲ့တာလို့ မြိုင်ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။
အဲဒီတိုက်ခိုက်မှုကို ပေါက်မြို့နယ် ကျေးရွာကာကွယ်ရေးတပ်ဖွဲ့နဲ့ ပူပေါင်းတိုက်ခိုက်ခဲ့တာ ဖြစ်ပြီး စစ်သား ၂ ယောက်နဲ့ ပျူ ၁ ယောက် နေရာမှာတင် ပွဲချင်းပြီးသေဆုံးကာ စစ်သား ၃ ယောက်၊ ပျူ ၂ ယောက် ဒဏ်ရာရရှိသွားပြီး လူနေတဲ ၂ လုံးကို မီးရှို့ဖျက်ဆီးသွားတယ်လို့ ဆိုပါတယ်။
“ဖောကား ၄ စီးနဲ့ နောက်ချန်စစ်ကြောင်း အင်အား ၅၀ လောက်ဟာ တဲကြီးရွာ ဘုန်းကြီးကျောင်းမှာ တပ်စွဲထားပြီး ရွာအနီးပတ်ဝန်းကျင်မှာလည်း စစ်ကောင်စီ တပ်သားတွေနဲ့ ပျူစောထီး ၂၀ လောက်ကို ရှေ့ပြေးကင်းထောက်အဖြစ် စေလွှတ်ထားလို့ ကျနော်တို့တပ်ဖွဲ့က ဒရုန်းတွေနဲ့ အီနာဂါဗုံးသီး အများအပြားဖြုတ်ချပြီး တိုက်ခိုက်ခဲ့သလို လက်နက်ငယ်တွေနဲ့ပါ ပစ်ခတ်တိုက်ခိုက်ခဲ့တယ်” လို့ ဗိုလ်လက်ယာက ပြောပါတယ်။
အဲဒီ စစ်ကောင်စီစစ်ကြောင်းက လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ပေမဲ့ ကာကွယ်ရေးတပ်ဖွဲ့က ရဲဘော်တွေ ထိခိုက်မှုမရှိဘဲ စစ်ကြောင်းကလည်း ရှေ့မတိုးရဲလို့ တဲကြီးရွာမှာပဲ တပ်စွဲထားရတယ်လို့ ဆိုပါတယ်။
မြိုင်မြို့နယ်မှာ ဇန်နဝါရီ ၂၅ ရက် မနက်ပိုင်းကလည်း စစ်ကောင်စီစစ်ကြောင်းနဲ့ ရိက္ခာပို့တဲ့ ကားတန်း တိုက်ခိုက်ခံရပြီး စစ်ကောင်စီဘက်က ၅ ယောက်ထက်မနည်း ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ရန်ကုန်တိုင်း၊ ကမာရွတ်မြို့နယ်၊ အမှတ် ၁ ရပ်ကွက်၊ ဆီစက်လမ်းရှိ မြို့နယ်စာရင်းစစ်ရုံးကို ဒီဇင်ဘာ ၂၃ ရက် ဒီနေ့ နေ့လယ် ၁ နာရီလောက်က လက်ပစ်ဗုံးအကြီးစားနဲ့ ပစ်ခတ်တိုက်ခိုက်ခဲ့တယ်လို့ Freeland Attack Force (FLA) ကနေ သိရပါတယ်။
Freeland Attack Force တာဝန်ရှိသူက “လမ်းမတော်ဘက်ကို သူတို့ အကောင်ကြီးကြီး တကောင် လာမယ်ကြားလို့ လုံခြုံရေးကားတွေက မနက်တည်းက တင်းကျပ်နေတာ၊ ခြေရှုပ်နေတာ။ ပထမကတော့ ကျနော်တို့ လမ်းကြောင်းပြောင်းမလို့ လုပ်နေရာကနေ မပြောင်းတော့ဘဲ သူတို့ကိုပတ်ရှောင်ပြီး နေ့လယ်မှာ လုပ်လိုက်တာ။ ကျနော်တို့ မစ်ရှင်လုပ်ပြီးပြီးချင်းပဲ DC နှစ်စီး၊ ဂျစ်ကား ၂ စီးနဲ့ စခတွေ အင်အား ၁၅ ယောက်လောက် ချက်ချင်းရောက်လာတယ်” လို့ ပြောပါတယ်။
ဒီနေ့မစ်ရှင်ကို Freeland Attack Force နဲ့ မဟာမိတ်တပ်ဖွဲ့တွေဖြစ်တဲ့ Emerald Girls Army (EGA)၊ Revolution of 21 Century အဖွဲ့တွေ ပူးပေါင်းလုပ်ဆောင်ခဲ့တယ်လို့ သိရပါတယ်။
တိုက်ခိုက်ရေးအဖွဲ့တွေ ထိခိုက်မှုမရှိပေမဲ့ စစ်ကောင်စီလက်အောက်ခံ စာရင်းစစ်ရုံး အတွင်းမှာတော့ ထိခိုက်မှုရှိနိုင်တယ်လို့ Freeland Attack Force ရဲ့ တာဝန်ရှိသူက ဆိုပါတယ်။
“ဒီနေ့က ရုံးဖွင့်ရက်ဆိုတော့ အထဲမှာ ဝန်ထမ်းတွေရှိတယ်။ သူတို့ကားတွေ ချက်ချင်းရောက်ပုံကြည့်ရင် ထိခိုက်မှုရှိနိုင်တယ်။ စစ်တပ်ရဲ့ လက်အောက်ခံမှန်သမျှက ပြည်သူကို ဒုက္ခပေးနေတာ၊ ကြီးကြီးပေးတာနဲ့ သေးသေးပေးတာပဲ ကွာတာ။ ဘာလို့ စစ်တပ်ကိုပဲ မလုပ်လဲဆိုရင် အဓိကဒေါက်တိုင်တွေ ဖြိုချင်တာ။ သူတို့တောင် ကျနော်တို့ဘက်က ထောက်ပို့တွေကို ဖမ်းဆီးသေးတာပဲ။ စစ်တပ်ကို အင်အားချည့်နဲ့စေချင်လို့ အခုလို ဒေါက်တိုင်တွေကို ဖြိုတာပါ။”
Freeland Attack Force အဖွဲ့နဲ့ မဟာမိတ်အဖွဲ့တွေက ဒီဇင်ဘာ ၂၂ ရက်ကလည်း တာမွေမြို့နယ်ထဲက အရှေ့မြင်းပြိုင်ကွင်းအနီးမှာရှိတဲ့ စစ်ကောင်စီကင်းတဲကို လက်ပစ်ဗုံးနဲ့ ပစ်ခတ်တိုက်ခိုက်ခဲ့ပါသေးတယ်။
