ရှမ်းပြည်တပ်မတော်

July 13, 2021

ရှမ်းပြည်တပ်မတော်ချင်း တိုက်ပွဲကြောင့် မိုင်းကိုင်တွင် စစ်ဘေးရှောင် ၇၀၀ ကျော်ထပ်မံရောက်ရှိ

ရှမ်းပြည်တောင်ပိုင်း ကျေးသီးမြို့နယ်၊ လွိုင်ဟွန်းတောင်ကြောတလျှောက်မှာ ပြီးခဲ့တဲ့ အပတ်က ရှမ်းပြည်တပ်မတော် RCSS နဲ့ SSPP  တို့အကြား တိုက်ပွဲဖြစ်လို့ ဒေသခံရွာသားထောင်ချီ စစ်ဘေးတိမ်းရှောင်ထွက်ပြေးနေရပါတယ်။

လွိုင်ဟွန်းတောင်ကြောအရှေ့ဘက် ကျေးသီးမြို့နယ်ထဲက ရွာသား ၂၀၀၀ ကျော် ကျေးသီးမြို့နယ်ရှိ ဘုန်းကြီးကျောင်းတွေမှာ ထွက်ပြေးခိုလှုံနေသလို တောင်ကြောအနောက်ဘက် မိုင်းကိုင်မြို့ နယ်ထဲက ရွာသား ၇၀၀ ကျော်ဟာလည်း ဟွေ့လုံကျေးရွာအုပ်စုမှာ လာရောက်တိမ်းရှောင်နေ ကြပါတယ်။ 

ကျေးသီးမြို့နယ်ထဲက စစ်ဘေးရှောင်တွေဟာ ပြီးခဲ့တဲ့ ဇွန်လဆန်းပိုင်းကတည်းက တိမ်းရှောင်ခဲ့ပြီး မိုင်းကိုင်မြို့နယ်ထဲမှာတော့ ဒီဇူလိုင်လ ၆ ရက်နေ့ကမှ စရောက်လာတာဖြစ်ပါတယ်။ 

အဲဒီနေ့ကစ ရွာသားတွေ တစစတိမ်းရှောင်လာရာမှာ မနေ့ကအထိ ၇၀၀ ကျော်သွားပြီလို့ စစ်ဘေးရှောင်တွေကို သွားရောက်ကူညီခဲ့တဲ့ မိုင်းကိုင်ဒေသခံ စိုင်းဆိုင်ဟန်က ဒီဗွီဘီကို ပြောပါတယ်။ 

“ကျနော်တို့က ဒေသခံဆိုတော့ လာကူတဲ့အဖွဲ့တွေကို လိုက်ပို့တာပါခင်ဗျ၊ မနေ့က ကျနော်တို့ ရောက်သွားတော့ စစ်ဘေးရှောင် ရွာသားတွေဟာ ဟွေ့လုံကျေးရွာအုပ်စုက ဝမ်လျန့် ၊ ဟွေ့လုံနဲ့ နောင်လီဘုန်းကြီးကျောင်းမှာရော ဟွေ့လုံကျေးရွာစာသင်ကျောင်းတွေမှာပါ ခိုလှုံနေကြပါတယ်၊ စုစုပေါင်း ၇၀၀ ကျော်ရှိသွားပြီ၊ သူတို့က တိုက်ပွဲဖြစ်တဲ့ လွိုင်ဟွန်းတောင်ခြေ အနောက်တကြော မိုင်းခွန်ကျေးရွာအုပ်စုထဲကပါ။ ရွာတွေက အများကြီးပါ။ ဖတ်းဖစ်၊ လွိုင်ဟွန်း၊ ပန်လော့၊ ကုန်းမုန့်၊ နမ့်တောက်၊ မတ်ခီနူ စတဲ့ရွာတွေပေါ့။ တိုက်ပွဲက မနေ့နဲ့ ဒီကနေ့ ငြိမ်နေတယ်၊ တမြန်နေ့ညထိတော့ သေနတ်သံ ကြားရတယ်လို့ ပြောတယ်။”

တိုက်ပွဲရှောင်ရွာသားတွေကို SNLD ပါတီက အလှူရှင်တွေထံက ထောက်ပံ့ကူညီရေးတွေ စုစည်းပေးအပ်ခဲ့ပြီး တခြားအဖွဲ့တွေလည်း သွားရောက်ကူညီနေတယ်လို့ ဆိုပါတယ်။ 

RCSS နဲ့ SSPP နှစ်ဘက်တပ်တွေဟာ နယ်မြေစိုးမိုးရေးနဲ့ ပတ်သက်ပြီး အဆိုပါ လွိုင်ဟွန်းတောင်ခြေတဝိုက်မှာ ပစ်ခတ်နေတာ တစ်လကျော်ကြာမြင့်ခဲ့ပါတယ်။ တိုက်ပွဲအခြေ အနေနဲ့ ပတ်သက်ပြီး နှစ်ဘက်တပ်ပြောရေးဆိုခွင့်ရှိသူတွေကို ဆက်သွယ်မေးမြန်းလို့ မရသေးပါဘူး။

SSPP တာဝန်ရှိသူတယောက်ကတော့ လွိုင်ဟွန်းတောင်တိုက်ပွဲ ဇူလိုင်လ ၁၀ ရက်နေ့က ပြီးဆုံး သွားတဲ့အကြောင်း သူ့ရဲ့ ကိုယ်ပိုင်လူမှုကွန်ရက်မှာ ရေးသားထားပါတယ်။ အဲဒီနောက် တောင်ထိပ်မှာ SSPP ဝင်ရောက်နေရာယူပုံတွေ ထွက်ပေါ်နေပါတယ်။ 

RCSS ဘက်ကတော့ လတ်တလောတိုက်ပွဲတွေကြောင့် ဒေသခံကျေးလက်ပြည်သူတွေ ဆင်းရဲဒု က္ခရောက်နေရတဲ့အပေါ် စိတ်မကောင်းဖြစ်မိကြောင်း၊ နိုင်ငံရေးပြဿနာကို ငြိမ်းချမ်းစွာ တွေ့ဆုံဆွေးနွေးတဲ့နည်းလမ်းနဲ့အဖြေရှာဖို့ ဇူလိုင်လ ၈ ရက်နေ့စွဲနဲ့ ထုတ်ပြန်ထားပါတယ်။

လွိုင်ဟွန်းတောင်တိုက်ပွဲမှာ  RCSS  ဘက်က နောက်ဆုတ်ပေးလိုက်တယ်လို့ ကျေးသီးမြို့ ခံက ပြောပါတယ်။ 

3 months Ago

January 26, 2021

တပ်မတော်နှင့် ရှမ်းပြည်တပ်မတော် RCSS တို့ တိုက်ပွဲဖြစ်ပွား

ရှမ်းပြည်တောင်ပိုင်း၊ လင်းခေးခရိုင် မိုင်းပန်မြို့နယ်ထဲမှာ မြန်မာ့တပ်မတော် နဲ့ RCSS/SSA ရှမ်းပြည်တပ်မတော် လက်အောက်ခံတပ်ဖွဲ့တွေကြား ဇန်နဝါရီ ၂၅ ရက်က  ထိတွေ့ပစ်ခတ်မှုတွေ ဖြစ်ပွားခဲ့ပါတယ်။

RCSS/SSA တပ်ဖွဲ့ဝင်တွေဟာ မိုင်းပန်မြို့နယ် နမ့်တိုင်းကျေးရွာအုပ်စု မိုင်းဟောင်း ကျေးရွာအနီးရှိ တောထဲမှာစခန်းချနေစဉ် မနေ့ မနက် ၈ နာရီခွဲလောက်မှာ မြန်မာ့တပ်မတော်ဘက်က လာပစ်ခတ်တာဖြစ်တယ်လို့ RCSS/SSA ပြောခွင့်ရ ဒု -ဗိုလ်မှူးကြီး စိုင်းအုမ်ခေးက ဒီဗွီဘီကို ပြောပါတယ်။ 

“ ကျနော်တို့တပ်ဖွဲ့ဝင်တွေက သူတို့စခန်းမှာရှိနေတုန်း မထင်မှတ်ဘဲ မြန်မာ့တပ်မတော် ခမရ ၅၇၅ လက်အောက်ခံတပ်ဖွဲ့ဝင် အင်အား ၆၀ လောက်က လာပြီးပစ်တယ်။ သူတို့က အဲလို လာပစ်တော့ ကျနော်တို့ဘက်ကလည်း လန့်ပြီး ပြန်ပစ်ရတာပေါ့။ သိပ်တော့ မကြာပါဘူး  ၁၀ မိနစ်လောက်ပါပဲ။ နောက်တော့ သူတို့တောင်အောက်ဘက်ပြန်ဆုတ်သွားပြီး ခဏငြိမ်သွားတယ်။ ညနေ ၃ နာရီလောက်ခါကျတော့ သူတို့က ၈၀ မမ လက်နက်ကြီးတွေနဲ့ ပစ်ခတ်တယ်။ တိုက်ပွဲဖြစ်သလိုပေါ့။ ကျနော်တို့ဘက်ကတော့ ပြန်မပစ်ဘူး။ သူက တောထဲမှာပဲဆိုတော့ အိမ်တွေ ရွာတွေထိတာမရှိပါဘူး။ မနက်ပိုင်းပစ်ခတ်မှုမှာ ထိခိုက်ဒဏ်ရာရသူနည်းနည်းရှိတယ်လို့တော့ ပြော တယ်။ ”

အဲဒီနယ်မြေထဲမှာ RCSS/SSA နဲ့   ခမရ ၅၇၅ တို့ လှုပ်ရှားသွားလာနေတာ ကြာပြီဆိုတာကို တဘက်နဲ့တဘက်လည်းသိနေကြပြီး မြန်မာ့တပ်မတော်ဘက်က အခုလိုလာပြီး ပစ်ခတ်တာကို အံ့ဩမိတယ်လို့လည်း ပြောပါတယ်။

ပစ်ခတ်မှုနဲ့ ပတ်သက်ပြီး မိုင်းပန်မြိုနယ် RCSS/SSA ဆက်ဆံရေးရုံးကနေပြီး မိုင်းပန်အခြေစိုက် မြန်မာ့တပ်မတော်ဗျူဟာမှူးဆီ အကြောင်းကြား မေးမြန်းထားပါတယ်။ 

ဒီကနေ့ ဇန်နဝါရီ ၂၆ ရက်နေ့မှာတော့ ပစ်ခတ်မှုတွေမရှိပေမယ့် နှစ်ဘက်တပ်တွေ အဲဒီ နယ်မြေထဲမှာရှိနေတုန်းဘဲလို့  ဆိုပါတယ်။

RCSS/SSA ဟာ အစိုးရနဲ့ NCA တနိုင်ငံလုံးဆိုင်ရာအပစ်ခတ်ရပ်စာချုပ် လက်မှတ်ထိုးထားတဲ့အဖွဲ့ဖြစ်ပါတယ်။

အန်စီအေစာချုပ်အရ တဘက်နဲ့တဘက် လက်နက်နဲ့ နယ်မြေကျော်ဖြတ်သန်းသွား လာမယ်ဆိုရင် ကြိုတင်အကြောင်းကြားရမှာဖြစ်ပြီး အခုလို သတင်းမပို့ဘဲ ပစ်ခတ်တာဟာ မြန်မာ့တပ်မတော်အနေနဲ့ NCA စာချုပ်ကို ချိုးဖောက်ရာကျသလို  တပ်မတော်ဘက်က ၂၀၂၁ ဇန်နဝါရီလ ၁ ရက် ကနေ ၃၁ ရက်နေ့ထိ အပစ်ခတ်ရပ်နားထားမယ်ဆိုတဲ့ ကြေညာချက်နဲ့လည်း လျော်ညီမှုမရှိဘူးလို့ ဒု - ဗိုလ်မှူးကြီး စိုင်းအုမ်ခေးက ပြောသွားပါတယ်။ 

မနေ့က ပစ်ခတ်မှုနဲ့ပတ်သက်ပြီး မြန်မာ့တပ်မတော်ဘက်က ထုတ်ပြန်ချက်ကိုတော့ မတွေ့ရသေးပါဘူး။  

ဓာတ်ပုံ - RCSS/SSA 

9 months Ago
More News
Up