ရေဦးမြို့

September 13, 2021

ရေဦးမြို့က ဖုန်းရောင်းဝယ်ပြုပြင်ရေးဆိုင် ကျပ် သိန်း ၇၀ ဖိုးခန့် ဖောက်ထွင်းခိုးယူခံရ

စစ်ကိုင်းတိုင်း၊ ရေဦးမြို့၊ အောင်ချမ်းသာရပ်ကွက်၊ တရုတ်တန်းလမ်းမှာ ဖွင့်လှစ်ထားတဲ့ APL ဖုန်း ပြုပြင်ရောင်းဝယ်ရေးဆိုင်ကို စက်တင်ဘာ ၁၃ ရက် ဒီ မနက် ၁ နာရီခန့်က ကာလတန်ကြေး ကျပ် သိန်း ၇၀ ကျော်ဖိုးလောက် ဖောက်ထွင်းခိုးယူခံရတယ်လို့ ဒေသခံတွေဆီက သိရပါတယ်။

model မျိုးစုံဖုန်း ၄၁ လုံးနဲ့ lenovo core i7 8th gen laptop တစ်လုံး ပြုပြင်ဖို့ အပ်ထည် ဖုန်း ၈ လုံး ဖောက်ထွင်းခိုးယူခံလိုက်ရတာ ဖြစ်ပါတယ်။

“ညမထွက်ရ အမိန့်ထုတ်ပြန်ထားတာမရှိပေမဲ့ မြို့ပေါ်ဆိုတာ ညပိုင်း ဘယ်သူမှ မထွက်ရဲကြဘူးလေ။ ထွက်ရင်လည်း ပစ်သတ်ခံရမှာပဲ။ ဒီလိုကာလ ဖောက်ထွင်းရဲတယ်ဆိုတာကတော့ တော်တော် အသွားအလာချောင်တဲ့သူမို့လို့ပဲ ပြောရမှာပဲ”လို့ မြို့ခံတစ်ဦးက ပြောပါတယ်။

ရေဦးမြို့နယ်မှာ ငွေကြေးလုယက်မှု တချို့ရှိခဲ့ပေမဲ့ တော်လှန်ရေးကာလအတွင်း မြို့ပေါ် ဖောက်ထွင်းခံရတာဟာ ဒါပထမဆုံး‌ ဖြစ်ပါတယ်။

1 week Ago

September 5, 2021

ရေဦးမြို့နယ်၊ ဖန်းကားစင်ရွာသားတစ်ဦးကို စစ်တပ်က ပစ်သတ်

စစ်ကိုင်းတိုင်း၊ ရေဦးမြို့နယ်၊ ဖန်းကားစင်ကျေးရွာသားတစ်ဦးကို စက်တင်ဘာ ၄ ရက် ည ၉ နာရီလောက်မှာ စစ်တပ်က ပစ်ခတ်သတ်ဖြတ်သွားတယ်လို့ ဒေသခံတစ်ဦးက ပြောပါတယ်။

“ကလေးတွေက သူငယ်ချင်းသုံးယောက် သွားကြတာလို့ ပြောတယ်ဗျ။ ကျေးရွာတွေဆိုတော့ လူငယ်သဘာဝ သွားကြလာကြတာ ဖြစ်ချင်ဖြစ်မှာပေါ့။ အဲဒါ တန့်ဆည်ဘက်က စစ်တပ်နဲ့တွေ့ပြီး ပစ်ခတ်ခံရတာ။ သူတို့သုံးယောက်ထဲက တစ်ယောက်က ရွာပြန်ရောက်တယ်။ တစ်ယောက်က ပစ်ခံရတဲ့အနားမှာပဲ သေဆုံးတယ်။ တစ်ယောက်က ပျောက်နေတာဗျ။ ဖမ်းသွားသလား၊ ပြေးနေသလား မသိရဘူး။ အခုထိ အဆက်အသွယ်မရသေးဘူး” လို့ ဒေသခံတစ်ဦးက ပြောပါတယ်။

သေဆုံးသူဟာ အသက် ၂၁ နှစ်အရွယ် ကိုခိုင်ဇော်လို့ သိရပြီး၊ အင်တောကျေးရွာနဲ့ ပုဏ္ဏကားကျေးရွာအကြား ပစ်ခတ်ခံရတာလို့ ဆိုပါတယ်။

ရေဦးမြို့နယ်၊ ဖန်းကားစင်ကျေးရွာဟာ တန့်ဆည်မြို့နယ်နဲ့ ချုပ်စပ် ရေဦး-တန့်ဆည် ကားလမ်းမဘေးမှာ တည်ရှိတဲ့ရွာကြီးတရွာလည်း ဖြစ်ပါတယ်။

တန့်ဆည်မြို့က ရဲနှစ်ဦး အသတ်ခံရပြီးနောက်ပိုင်း လှည့်ကင်းရဲနဲ့ စစ်တပ်က ရေဦး-တန့်ဆည် ကားလမ်းတလျှောက်က အပြစ်မဲ့ပြည်သူတွေကို ‌ရိုက်နှက်နှိပ်စက် ပစ်ခတ်တာတွေ ပြုလုပ်ခဲ့တယ်လို့ သိရပါတယ်။

2 weeks Ago
More News
Up