ရေအခက်အခဲ

December 24, 2020

ဖရူဆိုမြို့နယ်တွင် ရေခမ်းခြောက်မှုကြောင့် ရေအခက်အခဲ ကြုံတွေ့နေရ

ကယားပြည်နယ်မှာ ဖရူဆိုမြို့နယ်မှာ နိုဝင်ဘာလကတည်းက ရေအရင်းအမြစ်တွေ ခမ်းခြောက်နေတဲ့အတွက် ဒေသခံတွေ ရေအခက်အခဲနဲ့ ကြုံတွေ့နေကြရတယ်လို့ မြို့နယ် ပြည်နယ်လွှတ်တော်ကိုယ်စားလှယ် ဦးသဲရယ်က ပြောပါတယ်။  “ဖရူဆိုမြို့နယ်မှာ ဒီနှစ်ကတော့ ရေရှားပါးတာ ခါတိုင်းနှစ်ထက်ပိုဆိုးတာပေါ့နော်။ ခါတိုင်းနှစ်ဆိုရင် မတ်လကနေစတယ်။ အရင်နှစ်ဆိုလို့ရှိရင် ဇန်နဝါရီလကနေ စတာတာပေါ့။ ဒီနှစ်ကတော့ နိုဝင်ဘာကတည်းကိုက ရေအရင်းအမြစ်ခန်းခြောက်တာတွေ ဖြစ်လာတာပေါ့နော်။ ဆိုတော့ နှစ်ထက်တနှစ် ရေပြဿနာတွေက ကြီးလာတဲ့ပေါ်မှာ အစိုးရအနေနဲ့ ပြင်ဆင်မှုဘာတွေရှိလဲ ဆိုတဲ့ဟာမျိုး ကျနော်ကတော့ လွှတ်တော်ထဲမှာ မေးခွန်းမေးမြန်းတာ ရှိတာပေါ့နော်။ အခုဆိုရင် တော်တော်များများကလည်း ရေအခက်အခဲတွေ တော်တော်ကြုံတွေ့နေရပြီရွာတွေက၊ တချို့လည်း အလှူရှင်တွေလာပြီး လှူဒါန်းတာတွေလုပ်တယ်။ အစိုးရဘက်ကနေ သိတဲ့အတိုင်းပေါ့ သတ်မှတ်ကာလ မရောက်သေးဘူးဆိုလို့ရှိရင် ရေလှူဒါန်းတဲ့ကိစ္စတွေက မဆောင်ရွက်နိုင်တဲ့အနေအထားမျိုးရှိနေတာပေါ့။ တချို့ဟာတွေက အစိုးရက ရေလှူဒါန်းမယ့်ရေကိုပဲ စောင့်နေမယ်ဆိုလို့ရှိရင် တော်တော်လေး အခက်အခဲကြုံနေရတဲ့ အနေအထားမျိုးဖြစ်ပါတယ်။ ” ဖရူဆိုမြို့နယ်မှာ မြို့ပေါ်ရပ်ကွက်တချို့အပါအဝင် ကျေးရွာ ၃၀၊ ၄၀ လောက် ရေရှားပါးမှုနဲ့ ကြုံတွေ့နေရပြီး တချို့ကတော့ အလှူရှင်တွေလာရောက်လှူဒါန်းတာတွေရှိသလို တချို့ကတော့ ကိုယ်ထူကိုယ်ထ ရေရှိရာမှာ သွားရောက်ခတ်ယူနေရပါတယ်။ ရေအခက်အခဲကြုံတွေ့နေရတဲ့ ဖရူဆိုမြို့နယ်အတွက် အစိုးရအနေနဲ့ ဘဏ္ဍနှစ်အလိုက် စိစဉ်ဆောင်ရွက်ထားတာကို သိရှိလိုကြောင်း ဒီကနေ့ ကျင်းပပြုလုပ်တဲ့ ကယားပြည်နယ်လွှတ်တော် ၁၉ ကြိမ်မြောက် ပုံမှန်အစည်းအဝေး (ပထမနေ့) မှာ ဦးသဲရယ်က မေးမြန်းခဲ့ပါတယ်။  ဒီမေးမြန်းမှုနဲ့ပတ်သက်ပြီး ပြည်နယ် စီမံကိန်းနှင့် ဘဏ္ဍာရေးဝန်ကြီးဌာနဝန်ကြီး ဦးမော်မော် ဖရူဆိုမြို့နယ်ရေရှားပါးတဲ့ ကျေးရွာတွေကို ပြည်ထောင်စုအစိုးရ ရန်ပုံငွေရော၊ ပြည်နယ်အစိုးရ ရန်ပုံငွေနဲ့ပါ လုပ်ဆောင်ပေးနေကြောင်း ပြောပါတယ်။  “ဖရူဆိုမြို့နယ်မှာရှိတဲ့ကျေးရွာများ၊ ရေရှားပါးကျေးရွာများအပါအဝင် နှစ်စဉ်သောက်သုံးရေ လုံလောက်စွာရရှိဖို့အတွက် ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ ၂၀၁၂-၁၃ ဘဏ္ဍရေးနှစ်ကနေပြီးတော့ ၂၀၁၉-၂၀ ဘဏ္ဍရေးနှစ်အထိ ပြည်ထောင်စုရော၊ ပြည်နယ်ရန်ပုံငွေကျပ် ၉၉၃.၈၆၁ သန်းဖြင့် ကျေးရွာ ၉၇ ရွာကို ရေရရှိရေးအတွက် ၉၆ ခု ဆောင်ရွက်ခဲ့ပြီးဖြစ်ပါတယ်။ ၂၀၂၀-၂၁ ဘဏ္ဍရေးနှစ်မှာ ရေရှားကျေးရွာများအတွက် ကျေးရွာ ၈ ရွာကို ပြည်ထောင်စု ရန်ပုံငွေ ကျပ် ၁၆၂.၁၈ သန်းနှင့် ကျေးလက်ရေရရှိရေး ပြည်နယ်အစိုးရ မူလရန်ပုံငွေတွေနဲ့ ၁၀၈.၁၁၉ သန်းနှင့် ကျေးရွ ၉ ခုတို့ကို ကျေးလက်ရေရရှိရေး ဆောင်ရွက် ပေးနေပြီမိုလို့ အခုလာမယ့် ၂၁-၂၂  ဘဏ္ဍရေးနှစ်မှာလည်း ပြည်ထောင်စုရော ပြည်နယ်ရော အစိုးရရန်ပုံငွေအသီးသီးနဲ့ ရေရှားပါးတဲ့ကျေးရွာတွေကို ကျေးလက်ရေရရှိရေး လုပ်ငန်းရာထားဆောင်ရွက်ပေးသွားမှာဖြစ်ပါတယ်‌။”  ဖရူဆိုမြို့နယ်မှာ ကျေးရွာအုပ်စု ၁၄ အုပ်စု၊ ကျေးရွာ ၁၁၄ ရွာ၊ အိမ်ခြေ ၅၂၃၆၊ လူဦးရေ ၁၇၄၉၅ ဦးရှိပြီး ရေလွှမ်းခြုံမှုကတော့ ၇၀ ရာခိုင်နှုန်းလောက်ရှိကြောင်းလည်း ဦးမော်မော်က ပြောပါတယ်။  ဒါ့အပြင်  ကယားပြည်နယ်မှာ ရေကောင်းရေသန့်ရရှိမှု စစ်တမ်းအရ လူ ၁၀ ဦးမှာ ၆ ဦးသာ ရေကောင်းရေသန့်ရရှိပြီး ၄ ဦးမှာ ရေအခက်အခဲဖြစ်နေတာ လေ့လာတွေ့ရှိရတယ်လို့ စစ်တန်းတွေနဲ့တူ ရှင်းပြခဲ့ပါတယ်။ 
5 months Ago

December 20, 2020

ဝမ်းတွင်းတွင် ကန်ရေထွက်ပေါက်ပြွန် ၁ ခု ပိတ်ထားသဖြင့် လယ်ဧက ၃၀ ခန့် ရေအခက်အခဲဖြစ်

မန္တလေးတိုင်း၊ ဝမ်းတွင်းမြို့နယ် ရွှေဖလားကန်ကျေးရွာအုပ်စု စိန်ပန်းပင်ရွာက ကုန်းကန်ကြီးကန်ရေထွက်ပြွန်ပေါက် ၁ ခုကို ဘိလပ်သရိုးတွေနဲ့ လာရောက်ပိတ်ဆို့ထားတဲ့အတွက် လယ်ယာမြေ ဧက ၃၀ လောက် စိုက်ပျိုးရေ အခက်အခဲ ဖြစ်နေတာကြောင့် သမ္မတကို တိုင်ကြားသွားမယ်လို့ ဒေသခံတောင်သူတွေက ပြောပါတယ်။ စိန်ပန်းပင်ရွာတောင်သူ ဦးမျိုးလှိုင်က “ဘိုးဘွားတွေလက်ထက်ကတည်းက ကျနော်တို့ လယ်ယာမြေတွေကို ဒီကန်ကရေနဲ့ စိုက်ပျိုးလာတာ။ အခုတော့ ဒီကန်ကရေကို သုံးမရအောင် စက်တင်ဘာလလောက်က ဘိလပ်သရိုးတွေနဲ့ လာပိတ်သွားတယ်။ မြို့နယ်လယ်စီကို တိုင်ထားတယ်၊ အခုထိတော့ ဘာမှမထူးသေးဘူး။ နိုင်ငံတော်သမ္မတဆီ ထပ်တိုင်မှာပါ။ စပါးတွေ စိုက်ထားတာ အောင်ရေမရတော့ အနှံပြည့် မထွက်တော့ဘူးပေါ့။ ဆောင်းသီးနှံလည်း စိုက်ပျိုးမရတော့ဘူး” လို့ ပြောပါတယ်။ ဆည်မြောင်းဦးစီးဌာန ဒုဦးစီးမှူးဦးမြတ်စိုးကျော်က “ဌာနထိန်းကန်နဲ့ ဒေသထိန်းကန် နှစ်မျိုး ရှိတဲ့အနက် ကုန်းကန်ကြီးကန်ကတော့ ဒေသထိန်းကန်ပါ။ ဒေသထိန်းကန်ဆိုတော့ ရပ်ရွာက ဖွဲ့ထားတဲ့ ကန်ကော်မတီက ထိန်းသိမ်းပါတယ်။ ရေပြွန်ပိတ်တာကတော့ ပိတ်ခွင့်မရှိပါဘူး။ ကျနော်တို့ဆီ စာတင်လာလို့ မြို့နယ်ကို တင်ပြထားပါတယ်” လို့ ပြောပါတယ်။ ကုန်းကန်ကြီးကန်ဟာ ထီးလှိုင်အနောက်ရွာအုပ်စုနဲ့ ရွှေဖလားကန်ကျေးရွာအုပ်စုက တောင်သူတွေအတွက် စိုက်ပျိုးရေပေးနေတဲ့ကန် ဖြစ်ပါတယ်။ ကန်ထဲကို သင်ပုန်းဆည်က ရေလွှဲပေးပြီး လယ်ယာဧက ၁၀၀ ကျော် စိုက်ပျိုးနိုင်ပါတယ်။  ကန်ကြီးမှာ ရေလွှတ်ပြွန် ၄ ခုရှိတဲ့အနက် ကွင်းအမှတ် ၁၅၂၀ ထဲကို ရေပေးတဲ့ ပြွန်ကို ဘိလပ်သရိုးတွေနဲ့  ကန်ကော်မတီအဖွဲ့တွေက လာပိတ်သွားတယ်လို့ သိရပေမယ့် ဘယ်သူ လာပိတ်တယ်ဆိုတာတော့ မသိရဘူးလို့ ဒေသခံတွေက ဆိုပါတယ်။ ကုန်းကန်ကြီးကန်ကို ၂၀၁၈-၁၉ မှာ ဆည်မြောင်းဦးစီးဌာနက ပြန်လည်ပြုပြင်ပေးထားတယ်လို့ သိရပါတယ်။ သတင်း၊ ဓာတ်ပုံ - မောင်မောင်လင်း
5 months Ago
More News
Up