ရေမွန်

September 23, 2021

ပြည်သူ့အချစ်တော် ရေမွန်ကွယ်လွန်ခြင်း ၃ လပြည့် အမှတ်တရ “ကြယ်တံခွန်”သီချင်း(ရုပ်သံ)

“မင်း… နောက်ထပ် မတွေ့ရတော့ဘူး… ကြယ်တံခွန်လို မိုးသားထဲ ခရီးထွက်သွားတော့ … တကယ်ဆို အကောင်းဆုံး ပေးဆပ်သွားခဲ့တာပဲ… ကျန်တာတွေ အားလုံးနှုတ်ဆက် ထားခဲ့လိုက်တော့… သူငယ်ချင်း”

ပြည်သူ့အချစ်တော် အဆိုတော် ရေမွန်ကွယ်လွန်ခြင်း အမှတ်တရအနေနဲ့ Eternal Gosh အဖွဲ့က သီဆိုထားခဲ့တဲ့ သီချင်းတပုဒ်ကို သူကွယ်လွန်တာ ၃ လပြည့်တဲ့ ဒီကနေ့မှာ ပရိသတ်တွေအတွက် တင်ဆက်ပေးလိုက်ပါတယ်။

“အဆင်ပြေနေတဲ့ သတင်းတွေကို ကြားတော့… မနက်ဖြန်တွေမှာ တွေ့ရဦးမယ် ထင်မိခဲ့တာပေါ့… အချိန်ကို နောက်ပြန်လှည့်လို့ရရင် ဘယ်လောက်ကောင်းမလဲ… နေဝင်ချိန် ရောက်ခဲ့မယ် မထင်ဘူးပေါ့… ဒီနွေရာသီ ခရီးထွက်မသွားခင် တွေ့တာနောက်ဆုံးပေါ့… ပြန်လာဦးမလား မင်းကို စောင့်မျှော်နေမိခဲ့… ခွဲခွာခြင်းဆိုတဲ့ ကံတရားတွေပဲ… လူတ ယောက်တန်ဖိုးက မရှိချိန်မှ နားလည်”

 “ကြယ်တံခွန်”လို့ အမည်ပေးထားတဲ့ ဒီသီချင်းထဲမှာတော့ ရေမွန်နဲ့အတူ ဖြတ်သန်းမှု အမှတ်တရ လွမ်းစရာပုံရိပ်တွေနဲ့အတူ ဖန်တီးတင်ဆက်ထားခဲ့တာကို တွေ့ရပါတယ်။

ရေမွန်ဟာ အဆိုတော် ခင်မြတ်မွန်ရဲ့ ရင်သွေး၊ အဆိုတော် လပြည့်ကဗျာရဲ့ အစ်ကိုတော်စပ်ပြီး လူငယ်ပရိသတ်တွေကြားမှာ အောင်မြင်တဲ့ တေးရေး၊ တေးဆိုတယောက်အဖြစ် ထင်ရှားသူ ဖြစ်ပါတယ်။

ကရင်လက်နက်ကိုင် ထိန်းချုပ်နယ်မြေအတွင်း လာရောက်ခိုလှုံကာ စစ်အာဏာရှင်စနစ် ပျက်သုဉ်းရေးအတွက် နိုင်ငံရေး/စစ်ရေးအတွက် လှုပ်ရှားဆောင်ရွက်နေတဲ့ လူငယ်အဆိုတော် ရေမွန်ခေါ် တွတ်ပီဟာ ဇွန်လ ၂၃ ရက်က အစာအိမ်သွေးကြောပေါက်ပြီး ရုတ်တရက် ကွယ်လွန်သွားခဲ့တာ ဖြစ်ပါတယ်။

အဆိုတော် ရေမွန်ရဲ့ ဈာပနအခမ်းအနားကိုတော့ KNU တပ်မဟာ ၆ ဘဲဟိကလော် ကျေး ရွာသုသာန်မှာ ကျင်းပပြုလုပ်ခဲ့ပြီး ဒေသတွင်း တေးချစ်သူ ပရိသတ်တွေ၊ မိသားစုဝင်တွေနဲ့ မိတ်ဆွေတော်လှန်ရေး ရဲဘော်ရဲဘက်တွေ စုစုပေါင်း ၂၀၀ နီးပါး လိုက်ပါပို့ ဆောင်ပေးခဲ့ကြတာ ဖြစ်ပါတယ်။

3 months Ago

June 26, 2021

ရေမွန်(Idiots)ဝတ်ခဲ့သည့်အင်္ကျီ နာရီပိုင်းအတွင်း ငွေကျပ် ၂၄ သိန်းဖြင့် လေလံအောင်

Idiots တေးဂီတအဖွဲ့က ကွယ်လွန်သူ အဆိုတော် ရေမွန် ဝတ်ခဲ့တဲ့ အင်္ကျီတထည်ကို လေလံတင်ရောင်းချခဲ့ရာမှာ နာရီပိုင်းအတွင်း ငွေကျပ်  ၂၄ သိန်းနဲ့ လေလံအောင်မြင်ခဲ့တယ်လို့ သိရပါတယ်။

Idiots အဖွဲ့ရဲ့ လိုဂိုနဲ့ ဓာတ်ပုံပါ အနက်ရောင်အင်္ကျီကို လေလံကြမ်းခင်းစျေး ၃၂,၀၀၀ ကျပ်က စတင်ထားခဲ့တာဖြစ်ပြီး Myoma Makyaw အမည်နဲ့ ဖေ့စ်ဘွတ်ခ်အကောင့်ကနေ တင်ထားခဲ့တာ ဖြစ်ပါတယ်။

“ကျန်ခဲ့တဲ့ Idiots Members တွေရယ်… လက်မှတ်ပါပါမယ်ခင်​ဗျာ… ဒီအင်္ကျီလေးကို တွတ်ပီက ဝတ်ထားရင်း လူတစ်ယောက်ကို ပေးခဲ့တယ်တဲ့… အဲ့သူက ဒီအင်္ကျီလေးကို လိုချင်တဲ့သူရှိရင် ရောင်းမယ်တဲ့… ရောင်းရပိုက်ဆံကို အမကိုပေးပြီး တွတ်ပီအလှူအတွက် ပေးခိုင်းနေပါတယ်… အဲ့အင်္ကျီကို တွတ်ပီဝတ်ခဲ့တဲ့ သက်သေလည်း ရှိပါတယ်… လိုချင်တဲ့သူတွေ အတွက်ပါ… လေလံစျေးကို ည ၉ နာရီမှာ ပိတ်ပါမယ်”

ပို့စ်တင်ပြီးပြီးချင်းမှာပဲ ရေမွန်ရဲ့ ပရိသတ်တွေက ဒီအင်္ကျီကို အပြိုင်လေလံဈေး ပေးဝယ် ယူမှုတွေ ရှိနေပြီး နောက်ဆုံးအမြင့်ဆုံးလေလံဈေး ကျပ် ၂၄ သိန်းနဲ့ Yan Naung Win အကောင့်က ရရှိသွားခဲ့တာပါ။

အသက် ၃၂ နှစ်အရွယ် ရှိနေပြီဖြစ်တဲ့ ရေမွန်ဟာ အဆိုတော် ခင်မြတ်မွန်ရဲ့ ရင်သွေး၊ အဆိုတော် လပြည့်ကဗျာရဲ့ အစ်ကိုတော်စပ်ပြီး လူငယ်ပရိသတ်တွေကြားမှာ အောင်မြင်တဲ့ တေးရေး၊ တေးဆိုတယောက်အဖြစ် ထင်ရှားသူ ဖြစ်ပါတယ်။

       အဆိုတော် ရေမွန်ရဲ့ ဈာပနအခမ်းအနားကိုတော့ မေ ၂၅ ရက်နေ့က KNU တပ်မဟာ ၆ ဘဲဟိကလော် ကျေးရွာသုဿန်မှာ ကျင်းပပြုလုပ်ခဲ့ပါတယ်။

ကရင် လက်နက်ကိုင် ထိန်းချုပ်နယ်မြေအတွင်း လာရောက်ခိုလှုံကာ စစ်အာဏာရှင် စနစ်ပျက်သုဉ်းရေးအတွက် နိုင်ငံရေး/စစ်ရေးအတွက် လှုပ်ရှားဆောင်ရွက်နေတဲ့ လူငယ်အဆိုတော် ရေမွန် ခေါ် တွတ်ပီဟာ ဇွန်လ ၂၃ ရက်က အစာအိမ်သွေးကြောပေါက်ပြီး ရုတ်တရက် ကွယ်လွန်ခဲ့ပါတယ်။

ရေမွန်ရဲ့ နာရေးမှာ ဒေသတွင်း တေးချစ်သူ ပရိသတ်တွေ၊ မိသားစုဝင်တွေနဲ့ မိတ်ဆွေတော်လှန်ရေး ရဲဘော်ရဲဘက်တွေ စုစုပေါင်း ၂၀၀ နီးပါး လိုက်ပါပို့ဆောင်ပေးခဲ့ကြ ပါတယ်။

5 months Ago
More News
Up