ရန်ကုန်လေဆိပ်

October 13, 2020

Project K  အဖွဲ့ကို ရန်ကုန်လေဆိပ်၌ ကန့်ကွက်ဆန္ဒပြ 

တောင်ကိုရီးယားနိုင်ငံမှာကျင်းပခဲ့တဲ့ အာရှဂီတပွဲတော် Asia Song festival 2020 အပြီး မြန်မာနိုင်ငံကို ပြန်လာတဲ့ Project K အဖွဲ့ကို အောက်တိုဘာ ၁၃ ရက်ညပိုင်းမှာ ရန်ကုန်အပြည်ပြည်ဆိုင်ရာလေဆိပ်အနီး လူတစ်စုက စောင့်ပြီး ကန့်ကွက်ဆန္ဒပြ ကြပါတယ်။ ဆန္ဒပြတဲ့နေရာကို လုံခြုံရေး ရဲတပ်ဖွဲ့ဝင်အင်အား ၂၀ လောက် ရောက်ရှိခဲ့ပြီး စာရွက်တွေ ကိုင်ပြီး ဆန္ဒပြသူတွေဟာ ည ၉ နာရီလောက်မှာ လူစုခွဲသွားခဲ့ပါတယ်။  အောက်တိုဘာ ၁၀ ရက်နေ့က တောင်ကိုရီးယားမှာ ကျင်းပခဲ့တဲ့ အာရှဂီတပွဲတော်မှာ မြန်မာနိုင်ငံ ကိုယ်စားပြုအနေနဲ့ သွားရောက်ဖျော်ဖြေခဲ့တဲ့ Project K  အဖွဲ့ဟာ  ရွှေတိဂုံစေတီတော်ပုံရိပ် LED ပေါ်မှာ သီဆိုကပြ ဖျော်ဖြေခဲ့တယ်ဆိုပြီး  လူမှုကွန်ရက်မှာ ဝေဖန်မှုတွေ မြင့်တက်ခဲ့တာပါ။ ဒီကိစ္စနဲ့ ပတ်သက်ပြီး  ဖျော်ဖြေပြီးမှ သိခဲ့ရတာဖြစ်ကြောင်း Project K  အဖွဲ့က ပရိသတ်တွေကို  တောင်းပန်လိုက်သလို  Asia Song Festival 2020 မှာ သူတို့အဖွဲ့ရဲ့ ဖျော်ဖြေမှု ရုပ်သံဗွီဒီယိုဖိုင်ကိုလည်း ဖေ့စ်ဘွတ်ခ်လူမှုကွန်ရက်ပေါ်ကနေ ပြန်လည်ဖယ်ရှားပစ်ခဲ့ပါတယ်။        “ကျွန်တော်တို့အားလုံးကလည်း ဗုဒ္ဓဘာသာဝင်တွေပါပဲ။ အောက်ခြေမှာ အခုလိုရှိ မှန်းသိရင် ကျွန်တော်တို့လည်း ထည့်ခိုင်းမှာမဟုတ်ပါဘူးဗျ) အောက်ခြေ LED မှာ ရွှေတိဂုံ‌စေတီတော်ပုံ ပေါ်နေတယ်ဆိုတာကို တစ်ကယ့်ဖျော်ဖြေရေးပြီးလို့ video ပြန်ကြည့်မှ သိခဲ့ရတာပါခင်ဗျ၊၊ Rehearsal အချိန်မှာရော ပွဲဖျော်ဖြေနေတဲ့အချိန်မှာပါ နိုင်ငံအတွက် အကောင်းဆုံး ကြိုးစား‌ကြမယ် ဆိုတဲ့ စိတ်နဲ့ပဲ ကြိုးစားပြီးဖျော်ဖြေခဲ့ကြတာပါ။ ပွဲပြီးလို့ ကြည့်မိတော့မှ အခုလိုပဲ ဖြစ်နေခဲ့တာပါဗျာ။ ကျွန်တော်တို့ Project K အဖွဲ့အနေနဲ့ အကောင်းဆုံး ကြိုးစားခဲ့ပေမဲ့ အခုလိုလွဲချော်မှုဖြစ်သွားခဲ့တဲ့ အတွက် တကယ်ကို စိတ်မကောင်းဖြစ်ရပါတယ်... အားလုံးကိုလဲ ဒီကနေ အနူးအညွတ်တောင်းပန်အပ်ပါတယ်” လို့ Project K အဖွဲ့က သူတို့အဖွဲ့ရဲ့ လူမှုကွန်ရက်မှာ တောင်းပန်ထားပါတယ်။  လူငယ် မိန်းကလေးပရိသတ်တွေ အများစု အားပေးမှု အခိုင်အမာရရှိထားတဲ့ Project K အဖွဲ့ဟာ အမျိုးသား လူငယ် ၇ ယောက်နဲ့ ဖွဲ့ စည်းထားတဲ့ အဖွဲ့ဖြစ်ပါတယ်။ သူတို့အဖွဲ့ဟာ ၂၀၁၆ ခုနှစ်က ကိုရီးယာနိုင်ငံမှာ ပြုလုပ်ခဲ့တဲ့ Seoul K-Pop International Cover Dance မှာ မြန်မာနိုင်ငံကိုယ်စားပြုအဖြစ် သွားရောက်ယှဉ်ပြိုင်ခဲ့ပြီး ဒုတိယဆုကို ဆွတ်ခူးနိုင်ခဲ့ပြီးတဲ့နောက်မှာတော့ မြန်မာအကနဲ့ ကိုရီးယားအက ပေါင်းစပ်တီထွင် သရုပ်ဖော်ကပြမှု တွေနဲ့အတူ နာမည်ကြီးလာခဲ့တာပါ။  Photo - Ye Myo Khant / MPA
7 months Ago

February 1, 2020

ရန်ကုန်လေဆိပ်တွင် တရုတ်နိုင်ငံသားတဦးကို အပြင်မထွက်ခိုင်းဘဲ စောင့်ကြည့်နေ 

တရုတ်ကနေ ရန်ကုန်လေဆိပ်ကို ဒီနေ့ လေယာဉ်နဲ့ ရောက်လာတဲ့ တရုတ်နိုင်ငံသား တယောက်ကို သီးသန့်ထားပြီး အပြင်မထွက်ခိုင်းသေးဘဲ ဆက်လက်စောင့်ကြည့်နေတယ်လို့ ကျန်းမာရေးဝန်ကြီးဌာနက အခုနေ့လယ်မှာ ထုတ်ပြန်ပါတယ်။ အဲဒီခရီးသည်ဟာ ကိုယ်အပူချိန်နည်းနည်း မြင့်နေပေမယ့် သေချာစစ်ဆေးရာမှာတော့ သံသယဖြစ်စရာ မတွေ့ရဘူးလို့ ဆိုပါတယ်။ တရုတ်နိုင်ငံ၊ ကွမ်ကျိုးလေဆိပ်ကနေ ရန်ကုန်အပြည်ပြည်ဆိုင်ရာလေဆိပ်ကို ဒီနေ့မနက် ၁၀ နာရီ ၄၅ မိနစ်က ဆိုက်ရောက်လာတဲ့ China Southern လေကြောင်း ခရီးစဉ်အမှတ် CZ 3055 နဲ့ လိုက်ပါလာတဲ့ မြန်မာနိုင်ငံမှာ အလုပ်လုပ်နေသူ အသက် ၄၂ နှစ်အရွယ် တရုတ်နိုင်ငံသား အမျိုးသားခရီးသည်တယောက်ကို လေဆိပ်ဝင်လာချိန်မှာ ကိုယ်ခန္ဓာအပူချိန်တိုင်းတာစက် (Thermal Scanner) နဲ့ တိုင်းတာချက်အရ ကိုယ်အပူချိန် နည်းနည်းမြင့်နေတာကို တွေ့ရတယ်လို့ ဆိုပါတယ်။ ခရီးသည်ကို ၁၅ မိနစ်မှာ တကြိမ်နှုန်းနဲ့ ၃ ကြိမ်တိုင်တိုင် အပူချိန် ပြန်တိုင်းကြည့်ရာမှာတော့ အပူချိန်ဟာ ပုံမှန်ဖြစ်တာကို တွေ့ရတယ်လို့ ဆိုပါတယ်။ ဒါ့အပြင် အသေးစိတ်ထပ်ပြီး စစ်ဆေးကြည့်ရာမှာလည်း ချောင်းဆိုးတာ၊ နှာစေးတာ စတဲ့ လတ်တလော အသက်ရှုလမ်းကြောင်းဆိုင်ရာ ရောဂါလက္ခဏာတွေ အပါအဝင် တခြား သံသယဖြစ်စရာ လက္ခဏာ တစုံတရာ မတွေ့ရဘူးလို့ ထုတ်ပြန်ပါတယ်။ ဒါကြောင့် ကမ္ဘာ့ကျန်းမာရေးအဖွဲ့က ထုတ်ပြန်ထားတဲ့ ရောဂါအဓိပ္ပာယ်သတ်မှတ်ချက်နဲ့ မကိုက်ညီတာကို တွေ့ရပေမယ့် ပိုပြီးသေချာအောင် ကူးစက်ရောဂါ ပါမောက္ခတွေ၊ ကူးစက် ရောဂါဗေဒပညာရှင်တွေနဲ့ တိုင်ပင်ပြီး အဲဒီခရီးသည် နေထိုင်ရာနေရာမှာ သီးသန့်ထားပြီး အပြင်ကို မထွက်ခွာစေဘဲ အခြေအနေကို စနစ်တကျ ဆက်လက်စောင့်ကြပ် ကြည့်ရှုသွားမယ်လို့ ဆိုပါတယ်။ Photo : Myanmar CDC - ပြည်သူ့ကျန်းမာရေးဦးစီးဌာန
1 year Ago
Up