ရခိုင်

May 3, 2021

စစ်အာဏာရှင်လက်ထက် ရခိုင်ပြည်နယ်တွင် စားသောက်ကုန်ဈေးနှုန်း အဆမတန်မြင့်တက်

မြန်မာနိုင်ငံမှာ ဖေဖော်ဝါရီ ၁ ရက်နေ့ စစ်အာဏာသိမ်း လိုက်ပြီးနောက် နိုင်ငံရေးမတည်ငြိမ်မှုတွေကြောင့် ရခိုင်ပြည်နယ်မှာ စားသောက်ကုန်စျေးနှုန်း တွေဟာ အဆမတန် မြင့်တက်လာနေတယ်လို့ ဒေသခံတွေက ပြောပါတယ်။

ရခိုင်မှာ စားသောက်ကုန်တွေကို ရန်ကုန်ကတစ်ဆင့် ဝယ်ယူရတာဖြစ်ပြီး ဝယ်ယူ ကတည်းက စျေးမြင့်မားနေသလို သယ်ယူရာမှာလည်း လမ်းခရီးအခက်အခဲတွေကြောင့် ကုန်စျေးနှုန်းတွေဟာ ယခင်ကထက် နှစ်ဆလောက်မြင့်သွားတယ်လို့ စစ်တွေမြို့မှာ ကုန်စုံဆိုင်ဖွင့်လှစ် ရောင်းချတဲ့  ဦးမောင်ထွန်းလှက ပြောပါတယ်။

“ကုန်စိမ်းတွေရော၊ ကုန်ခြောက်တွေရော အကုန်လုံးက စျေးတက်သွားတယ်။ ကုန်ခြောက်တွေဆိုတာကတော့  ဆီတွေ၊ ဟင်းချိုမှုန့်တွေက အစ အကုန်လုံးစျေးတွေ တက်ကုန်တာပေါ့။ ဆေးလိပ်တွေဆိုရင်လည်း အရင်တုန်းက ကျပ် ၆၀၀၀ နဲ့ ရောင်းနေရတာကို အခုဆိုရင် ၁၂၀၀၀ လောက်ထိကို ဖြစ်သွားတယ်။ အကုန်လုံး စျေးတက် ကုန်တယ်။ အဓိကကုန်တွေကို ရန်ကုန်ကယူရောင်းနေရတာဆိုတော့ ရန်ကုန်မှာဆန္ဒပြကတည်း စျေးတွေက တအားထိုးတက်သွားတာ။ ပြီးရင်လမ်းပန်းဆက်သွယ်ရေးကလည်း ခက်သွားတော့ ကုန်တွေရောက်ဖို့ကို သုံး၊ လေး ရက်လောက်ကြာတယ်။ ကုန်စိမ်းတွေဆိုရင် တစ်ဝက်လောက်ကပုပ်သွားတော့ အရင်းရှုံးတာပေါ့။ ဒါကြောင့်အရင်က ကျပ် ၁၀၀၀နဲ့ ရောင်းရတာဟာ အခု ၂၀၀၀ ဖြစ်သွားတော့ ရောင်းချတဲ့သူတွေရော စားသုံးတွေအတွက်ပါ အခက်အခဲဖြစ်သွားတာပေါ့”။

အခုလို အလုပ်အကိုင်ရှားပါးပြီး နိုင်ငံရေးပါမတည်မငြိမ်ဖြစ်နေချိန်မှာ ကုန်စျေးနှုန်းတွေ တက်လာကြောင့် အခြေခံလူတန်းစားတွေအတွက် အဆင်မပြေမှုတွေနဲ့ ဆင်းရဲကျပ်တည်းမှုတွေ ရှိလာနေတယ်လို့ နေ့စားလုပ်ကိုင်နေသူ ဒေါ်ဘုမက ပြောပါတယ်။

“ကျမတို့က တစ်နေ့လုပ်မှ တစ်နေ့စားရတဲ့သူတွေပါ။ အလုပ်အကိုင်တွေက ရှားပါးတဲ့ အထဲမှာ နိုင်ငံရေးမတည်ငြိမ်တော့ ဆန်တွေ၊ ဆီတွေ၊ အခြေခံစားသောက်ကုန်တွေ အကုန်လုံး စျေးတက်ကုန်တာပေါ့။ ကျမတို့က လက်လုပ်လက်စားတွေဆိုတော့ တနေ့တနေ့ကို ထမင်း နပ်မှန်အောင် ကြိုးစားနေရတယ်။ ဒီလိုကုန်စျေးနှုန်းတွေတက်လာလေလေ ကျမတို့လို ဆင်းရဲတဲ့ လက်လုပ်လက်စားတွေအတွက်တော့ အခက်အခဲတွေ ဖြစ်လာလေလေပါပဲ”လို့ ပြောပါတယ်။

ရခိုင်ပြည်နယ်အပြင် မြန်မာနိုင်ငံတဝန်း တခြားပြည်နယ်နဲ့ တိုင်းတွေမှာလည်း စစ်အာဏာရှင်လက်ထက် ကုန်ပစ္စည်းတွေ အဆမတန် စျေးမြင့်မားလာနေတဲ့အတွက် အခြေခံ လူတန်းစားပြည်သူတွေ  စားဝတ်နေရေးအခက်အခဲနဲ့ကြုံတွေ့နေရပါတယ်။

4 days Ago

February 3, 2021

ရခိုင်ပြည်နယ် မြို့နယ်အားလုံး 4G အင်တာနက် ပြန်ရ

ရခိုင်ပြည်နယ်အတွင်း အင်တာနက် 2G သာဖွင့်ပေးထားတဲ့ မြို့နယ်တွေမှာ 4G အင်တာနက်လိုင်း ပြန်ရပြီလို့ သိရပါတယ်။

ရသေ့တောင်နဲ့ပုဏ္ဏားကျွန်းမြို့နယ် အမျိုးသားလွှတ်တော်အမတ် ဦးခင်မောင်လတ်က "4G အပြည့်ပြန်ရပါပြီ။ မြောက်ဦးမြို့နယ်မှာတော ဖေဖော်ဝါရီ ၁ ရက်နေ့ကတည်းက အစမ်းရတယ်လို့ သိရတယ်။ ရသေ့တောင်နဲ့ပုဏ္ဏားကျွန်းကတော့ မနေ့ညက ရတယ်။" လို့ ပြောပါတယ်။

ဘူးသီးတောင်၊ ရသေ့တောင်၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ မြေပုံမြို့နယ်တွေမှာတော့ ဖေဖော်ဝါရီ ၂ ရက်နေ့ ည ၁၂ နာရီလောက်မှာ 4G အင်တာနက် ပြန်ရတာလို့ သိရပါတယ်။

ဘူးသီးတောင်မြို့နယ် စျေးသည် ကိုညီညီတိုးက "အင်တာနက်ပိတ်ထားတော့ ပစ္စည်းတွေ ယူရာမှာ အတော်ဒုက္ခရောက်ခဲ့ရတယ်။ 2G ပြန်ဖွင့်ပေးရင်လည်း ဘာမှကိုသုံးမရခဲ့ဘူး။ အခုလို 4G အင်တာနက်အပြည့်ဖွင့်ပေးတာ ကျေးဇူးတင်ပါတယ်” လို့ ပြောပါတယ်။

အင်တာနက်ပိတ်ထားခဲ့သည့်  ရခိုင်ပြည်နယ်  မြို့နယ် ၇ ခုနဲ့ ချင်းပြည်နယ် ပလက်ဝမြို့နယ်တို့မှာ ၂၀၂၀ ပြည့်နှစ် သြဂုတ် ၁ ရက်နေ့ ည ၁၀ နာရီမှစပြီး 2G Network သာ ရရှိကြတဲ့အတွက် အင်တာနက်လုံးဝ အသုံးပြုမရဖြစ်နေတာပါ။

ရခိုင်ပြည်နယ်မှာ တိုက်ပွဲတွေပြင်းထန်တဲ့အတွက် လုံခြုံရေးအကြောင်းပြကာ ဘူးသီးတောင်၊ မောင်တော၊ ရသေ့တောင်၊ ပုဏ္ဏားကျွန်း၊ ကျောက်တော်၊ မြေပုံ၊ မြောက်ဦး၊ မင်းပြားနဲ့ ချင်းပြည်နယ်ပလက်ဝမြို့နယ်တို့ကို ၂၀၁၉ ခုနှစ် ဇွန် ၂၁ ရက်နေ့က ကြိုတင်အသိမပေးဘဲ အင်တာနက်ဖြတ်တောက်ခဲ့တာပါ။

ဒီနောက် ၂၀၁၉ စက်တင်ဘာလ ၁ ရက်နေ့မှာ ဘူးသီးတောင်၊ မောင်တော၊ ရသေ့တောင်၊ မြေပုံနဲ့ ပလက်ဝ မြို့နယ်တို့ကို အင်တာနက်ပြန်ဖွင့်ပေးခဲ့ပေမယ့် ၂၀၂၀ ခုနှစ် ဖေဖော်ဝါရီ ၃ ရက်နေ့မှာ ထပ်မံဖြတ်တောက်ထားခဲ့တာပါ။

၂၀၂ ပြည့်နှစ် မေလ ၂ ရက်နေ့မှာ မောင်တောမြို့နယ်တစ်မြို့တည်းကိုသာ အင်တာနက်လိုင်းတွေ ပြန်ဖွင့်ပေးခဲ့ပြီး ကျန်မြို့နယ်တွေကို 2G သာပြန်ဖွင့်ပေးခဲ့တာလည်း ဖြစ်ပါတယ်။

ပိတ်ထားတဲ့ အင်တာနက်လိုင်းတွေ ပြန်ဖွင့်ပေးဖို့ တောင်းဆိုခဲ့သူအချို့ တရားစွဲဆိုခံရတာတွေလည်း ရှိခဲ့ပါသေးတယ်။

၂၀၂၁ ဖေဖော်ဝါရီ ၁ ရက်နေ့က တပ်မတော်မက အာသိမ်းပြီးနောက် ဖေဖော်ဝါရီ ၂ ရက်နေ့ ညမှာ အင်တာနက်လိုင်းအားလုံး ပြန်ဖွင့်ပေးလိုက်တာပါ။

သတင်း - လင်းလက်

3 months Ago
More News
Up