ယာဉ်မောင်းလိုင်စင်

May 10, 2019

ယာဉ်ထိန်းရဲကို ယာဉ်မောင်းလိုင်စင်မပြသည့် ထိုင်းတရားသူကြီးရုပ်သံ ဝေဖန်မှုမြင့်တက်

ထိုင်းတောင်ပိုင်း နခွန်းဆီထမရတ်ခရိုင်ထဲမှာ တာဝန်အရ ယာဉ်မောင်းလိုင်စင် စစ်ဆေးတဲ့ ရဲဝန်ထမ်းကို ယာဉ်မောင်းလိုင်စင်မပြဘဲ သြဇာရှိသူဖြစ်ကြောင်း ပြောခဲ့တဲ့ တရားသူကြီးရဲ့ ရုပ်သံ ဝေဖန်မှုတွေ မြင့်တက်နေပါတယ်။ ရဲဝန်ထမ်းလောက ကနေတဆင့် လူမှုကွန်ရက်မှာ ပြန့်သွားတဲ့ အဲဒီဗွီဒီယိုဖိုင်ထဲမှာ တာဝန်ကျ ယာဉ်ထိန်းရဲတဦးက ဟွန်ဒါကားတစီးကို တားပြီး ယာဉ်မောင်းလိုင်စင် တောင်းကြည့်ခဲ့ပါတယ်။ ယာဉ်မောင်းက သူဟာ အမှတ် ၈ တိုင်းဒေသ တရားရုံးက တရားသူကြီးချုပ်ဖြစ်ကြောင်း၊ မြို့နယ်ရဲတပ်ဖွဲ့က ရဲမှူးကြီးရဲ့ သူငယ်ချင်းဖြစ်ကြောင်း ပြောဆိုပြီး သွားလို့ရပြီလားလို့ မေးပါတယ်။ ယာဉ်ထိန်းရဲက ယာဉ်မောင်းလိုင်စင်ကို ဆက်တောင်းနေတာကြောင့် အဲဒီတရားသူကြီးက ကားပေါ်မှာ ဥပဒေနဲ့မကင်းတာ ဘာမှမပါကြောင်း၊ ဒါကို ရအောင်ရှာဖွေမလို့လားလို့ ပြောပြီး တာဝန်ကျရဲရဲ့ အမည်ကိုလည်း မေးမြန်းသွားပါတယ်။ အဲဒီဗွီဒီယိုဖိုင်နဲ့ ပတ်သက်ပြီး လူမှုကွန်ရက်မှာ လူကြီးဖြစ်ရင်၊ လူကြီးနဲ့သိရင် ယာဉ်မောင်းလိုင်စင် ပြဖို့ မလိုဘူးလားလို့ မေးခွန်းထုတ်ပြီး ဝေဖန်မှု မြင့်တက်နေတာပါ။ ချန်နယ်လ် ၃ ထိုင်းတီဗွီသတင်းမှာတော့ အဲဒီဖြစ်ရပ်ဟာ ပြီးခဲ့တဲ့ မေ ၂ ရက်နေ့က နခွန်းဆီထမရတ်ခရိုင် ထုန့်ယိုင်မြို့ပေါ်မှာ ဖြစ်သွားတာလို့ ဆိုပါတယ်။ ဗွီဒီယိုဖိုင် ပြန့်သွားပြီးတဲ့နောက် အဲဒီနေ့က တာဝန်ကျတဲ့ ယာဉ်ထိန်းရဲတွေကို မြို့နယ်ရဲမှူးကြီးက ခေါ်စစ်ပြီး ယာဉ်မောင်းလိုင်းစင် တောင်းကြည့်တဲ့ ရဲတပ်ဖွဲ့ဝင်ကိုလည်း တာဝန်ရွှေ့ပြောင်းလိုက်တယ်လို့ ဆိုပါတယ်။ အဲဒီယာဉ်ထိန်းရဲဟာ ကားပေါ်က တိုင်းတရားသူကြီးကို မချေမငံ ပြောဆိုဆက်ဆံတဲ့ အတွက် ရွှေ့ပြောင်းလိုက်ရတာလို့ မြို့နယ်ရဲမှူးကြီး ချုတ်ဒီ ရတ်ဝပ်ထနဖုန်းက သတင်းထောက်တွေကို ပြောပါတယ်။ အဲဒီကိစ္စကို ဝန်ကြီးချုပ် ပရာယွတ် ချန်အိုချာ သိရှိသွားပြီးတဲ့နောက် ဒီကိစ္စ ပြန်လည်စစ်ဆေးဖို့နဲ့ ရွှေ့ပြောင်းခံရတဲ့ ယာဉ်ထိန်းရဲကို မူလနေရာမှာ ပြန်လည်ခန့်ထားဖို့  သက်ဆိုင်ရာကို ညွှန်ကြားလိုက်ပါတယ်။ ဝန်ကြီးချုပ်က ပြောင်းရွှေ့ခံရတဲ့ ယာဉ်ထိန်းရဲကိုလည်း တာဝန်ကျေပွန်သူအဖြစ် ချီးမွမ်းကာ အားပေးစကားပြောဆိုပြီး မည်သူမဆို အမှန်တရားဘက်ကသာ ရပ်တည်ဖို့၊ မိမိဘက်က မှန်ကန်ရင် ဘယ်သြဇာအာဏာရှိသူကိုမှ ကြောက်ရွံ့ဖို့ မလိုကြောင်းလည်း ပြောဆိုခဲ့ပါတယ်။ နောက်ဆက်တွဲ သတင်းအရတော့ တာဝန်ကျေ ယာဉ်ထိန်းရဲကို ပြောင်းရွှေ့ခဲ့တဲ့ မြို့နယ်ရဲမှူးကြီး ချုတ်ဒီဟာ မူလတာဝန်ကနေ ခရိုင်ရဲဌာနချုပ်ကို ပြောင်းရွှေ့ခံလိုက်ရတယ်လို့  ချန်နယ်လ် ၃ ထိုင်းတီဗွီသတင်းမှာ ဖော်ပြသွားပါတယ်။
2 years Ago

December 19, 2018

ထိုင်းတွင် ယာဉ်မောင်းလိုင်စင်ကတ်အစား ဒစ်ဂျစ်တယ်လ်စနစ်ဖြင့် စစ်ဆေးနည်း အသုံးပြုမည်

ထိုင်းနိုင်ငံရဲ့ လူနေမှုအဆင့်အတန်းကို မြှင့်တင်တဲ့အနေနဲ့ လာမယ့်နှစ်ဆန်းကစပြီး ယာဉ်မောင်းလိုင်စင်ကတ်ပြား ကိုင်ဆောင်စရာ မလိုတော့ဘဲ အွန်လိုင်းကတဆင့် စစ်ဆေးနိုင်တဲ့ ဒစ်ဂျစ်တယ်လ်စနစ်ကို စတင်ကျင့်သုံးသွားတော့မယ်လို့ ထိုင်းကုန်းလမ်းသယ်ယူပို့ဆောင်ရေး ဦးစီးဌာနက ဒီဇင်ဘာ ၁၅ ရက်နေ့မှာ ထုတ်ဖော်ပြောကြားပါတယ်။ လာမယ့် ၂၀၁၉ ဇန်နဝါရီလလယ်လောက်ကစပြီး ယာဉ်မောင်းလိုင်စင် လာရောက်လုပ်ဆောင်သူ လူသစ်တွေအနေနဲ့ ယာဉ်မောင်းလိုင်စင်ကတ်ပြား ကိုင်ဆောင်စရာ မလိုတော့ဘဲ မိမိလက်ကိုင်ဖုန်းထဲမှာ အပလီကေးရှင်း (Application) ထည့်သွင်းထားရမှာဖြစ်ပြီး တာဝန်ရှိ ယာဉ်ထိန်းရဲတွေ တောင်းကြည့်တဲ့အခါ QR Code ကို Scan ဖတ်ပြီး အချက်အလက်တွေကို စစ်ဆေးသိရှိနိုင်မှာဖြစ်တယ်လို့ ထိုင်းကုန်းလမ်းသယ်ယူပို့ဆောင်ရေး ဦးစီးဌာန ညွှန်ကြားရေးမှူး နိုင်းဖိရဖွန်း ထာဝှမ်းဆူဖကျရုန်းက ပြောပါတယ်။ အဲဒီ အပလီကေးရှင်းထဲမှာ ယာဉ်မောင်းလိုင်စင်သက်တမ်း ကုန်ခါနီး ကြိုတင်ပြင်ဆင်ဖို့ အချက်ပေးစနစ် ပါဝင်တဲ့အပြင် ယဉ်စည်းကမ်းဖောက်ဖျက်လို့ ဒဏ်ငွေပေးဆောင်ဖို့၊ မတော်တဆ ယာဉ်ထိခိုက်မှု ဖြစ်ပွားပါက သက်ဆိုင်ရာကို အကြေင်းကြားနိုင်ဖို့ ချိတ်ဆက်နိုင်မယ့်စနစ်ပါ ထည့်သွင်းထားမယ်လို့ ဆိုပါတယ်။ ဒါတင်မကဘဲ ယာဉ်မောင်းသူရဲ့ သွေးအမျိုးအစား၊ မတည့်တဲ့ဆေးဝါး စတဲ့ ကျန်းမာရေးဆိုင်ရာ အချက်အလက်ပါ ထည့်သွင်းပြီး ကျန်းမာရေးအာမခံစနစ်တွေနဲ့ပါ ချိတ်ဆက်လို့ရမယ်လို့ ညွှန်မှူးက ဆက်ပြောပါတယ်။ ဒါဟာ အရင်က အေတီအမ်ကတ်နဲ့ ငွေလွှဲတဲ့စနစ်ကနေ တယ်လီဖုန်းထဲက အပလီကေးရှင်းနဲ့ လွှဲနိုင်တဲ့စနစ်ကို ပြောင်းလဲခဲ့သလိုဘဲ ဒီခေတ်ကလူတွေအတွက် လူနေမှုအဆင့်အတန်း မြှင့်တင်ပေးလိုက်တာဖြစ်တယ်လို့ ကညနညွှန်မှူးက ပြောသွားပါတယ်။
2 years Ago
Up