ယင်းမာပင်နဲ့ ဆားလင်းကြီ

March 29, 2021

ယင်းမာပင်နှင့် ဆားလင်းကြီး ပြည်သူများပူးပေါင်းပြီး စစ်အာဏာရှင်ကို ဆန့်ကျင်သပိတ်မှောက်

စစ်ကိုင်းတိုင်း ယင်းမာပင်မြို့နယ်နဲ့ ဆားလင်းကြီးမြို့နယ်တို့က ပြည်သူတွေ  ပူး​ပေါင်းပြီး မတ်လ ၂၉ ရက်​နေ့မှာလည်း အကြမ်းဖက်တပ်ဖွဲ့တွေကို ရှောင်ရှားကာ စစ်အာဏာရှင်ကျဆုံး​ရေးသပိတ် ဆက်လက်ပြုလုပ်ခဲ့ကြတာပါ။

ပူး​ပေါင်းသပိတ်အဖွဲ့ကို ရဲနဲ့စစ်တပ်က ပစ်ခတ်ဖြိုခွင်းခဲ့လို့ ဆန္ဒပြပြည်သူ ၁ ဦးကျဆုံးအပြီး အရင်ပုံမှန် ဆန္ဒပြပွဲလုပ်တဲ့​နေရာမှာ လက်နက်ကိုင်တပ်တွေ နေရာယူထားတာ​ကြောင့် ​​တစ်ခြား​နေရာတွေမှာ ရှောင်လွှဲကာ ​ဆက်လက် ဆန္ဒပြနေကြတာ ဖြစ်ပါတယ်။

မြို့နယ်ပူး​ပေါင်းသပိတ်အဖွဲ့ဟာ မနက်ဖန် မတ်လ ၃၀ ရက်​နေ့မှာ​တော့ ယခင်​နေ့​တွေကလို လမ်း​လျှောက်ဆန္ဒထုတ်​ဖော်မှုမပြုလုပ်ဘဲ  ရုံးမသွား-အလုပ်မသွား-အပြင်မထွက်ဘဲ ကိုယ့်အိမ်ထဲမှာ အသံတိတ်ပုံစံနဲ့  စစ်အာဏာရှင်ကို ဆန့်ကျင်​တော်လှန်သွားမယ်လို့ ဆိုပါတယ်။

ယင်းမာပင်မြို့နယ်နဲ့ ဆားလင်းကြီးမြို့နယ်တို့ ပူး​ပေါင်းသပိတ်ဟာ မတ်လ ၂၇ ရက်​နေ့က အကြမ်းဖက်စစ်တပ်နဲ့ ရဲတွေရဲ့ ​သေနတ်နဲ့ပစ်သတ်ခံရလို့ ဆန္ဒပြပြည်သူ ၁ ဦး ကျဆုံးခဲ့ပါတယ်။

1 month Ago

February 23, 2020

ယင်းမာပင်နှင့် ဆားလင်းကြီးတွင် လုပ်ငန်းရှင် ၃၅ ဦးကိုသာ မြစ်သဲကျောက်လုပ်ခွင့်ပေးထား

စစ်ကိုင်းတိုင်း၊ ယင်းမာပင်နဲ့ ဆားလင်းကြီးမြို့နယ်တို့မှာ ၂၀၁၉-၂၀၂၀ ဘဏ္ဍာနှစ်အတွင်း မြစ်သဲကျောက်လုပ်ငန်းအတွက် လုပ်ငန်းရှင် ၃၅ ဦးကိုသာ လိုင်စင်ထုတ်ပေးထားပြီး တရားမဝင် မြစ်သဲကျောက်နဲ့ အုတ်ထုတ်လုပ်ငန်းတွေမရှိအောင် ဘက်စုံစောင့်ကြပ်စိစစ်ရေးအဖွဲ့တွေနဲ့ လစဉ်စစ်ဆေးဆောင်ရွက်နေတယ်လို့ စီမံ/ဘဏ္ဍာဝန်ကြီးက ပြောပါတယ်။ အဲဒီဒေသတွေမှာ မြစ်သဲကျောက်ဂျင်းမြေ ထုတ်လုပ်နေတာနဲ့ပတ်သက်ပြီး အခွန်ရရှိမှု၊ လုပ်ငန်းလိုင်စင်ချထားပေးမှု အခြေအနေတွေကို ယင်းမာပင်မြို့နယ် တိုင်းဒေသကြီး လွှတ်တော်ကိုယ်စားလှယ် ဒေါ်ခင်နှင်းရီက ဖေဖော်ဝါရီ ၂၁ ရက်နေ့ကကျင်းပတဲ့ တိုင်းဒေသကြီးလွှတ်တော် ၂၂ ကြိမ်မြောက်ပုံမှန်အစည်းအဝေးမှာ မေးမြန်းခဲ့တာပါ။  ဒီကိစ္စနဲ့ပတ်သက်ပြီး စစ်ကိုင်းတိုင်းအစိုးရအဖွဲ့ဝင် စီမံ/ဘဏ္ဍာဝန်ကြီး ဦးစိုးဦးက အခွန်ရရှိမှုအနေအထား၊ လိုင်စင်ထုတ်ပေးထားမှုအခြေအနေတွေကို ပြန်လည်ဖြေကြားခဲ့တာပါ။ “မြစ်သဲကျောက်လိုင်စင်တွေကို တိုင်းဒေသကြီးရေအရင်းအမြစ်နှင့် မြစ်ချောင်းများဖွံ့ဖြိုးတိုးတက်ရေးဦးစီးဌာနက ကွင်းဆင်းစစ်ဆေးပြီး သဘောထားထောက်ခံချက်နဲ့ ခွင့်ပြုပေးနေတယ်။ လမ်းခင်းကျောက်ကို တိုင်းအစိုးရက သတ်မှတ်အတည်ပြုပေးတဲ နေရာတွေမှာ သတ္တုတွင်းဥပဒေ ၂(င)ပါ စက်မှုတွင်းထွက် ကုန်ကြမ်းပစ္စည်းနှင့် ၂ (စ)ပါ အလှဆင်ကျောက်တို့နဲ့ ညိစွန်းမှု မရှိတာအပြင် အနာဂတ်စီမံကိန်းတွေနဲ့ လွတ်ကင်းရတယ်။ အဲဒါကိုတော့ သတ္တုတွင်း ဦးစီးဌာနနှင့် သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနတွေရဲ့ သဘောထားထောက်ခံံချက်တွေနဲ့ ချပေးနေတာပါ။ သဲတကျင်းကို ၅၀၀ ကျပ်၊ ကျောက်စရစ်နှင့် လမ်းခင်းကျောက်၊ ဂျင်းမြေ တကျင်းကို ၂၅၀၀ ကျပ်စည်းကြပ်ကောက်ခံနေပါတယ်။” ဒီလုပ်ငန်းတွေနဲ့ပတ်သက်လို့ အခွန်အခတွေကို အထွေထွေအုပ်ချုပ်ရေးဦးစီးဌာနက တာဝန်ယူကောက်ခံနေတာဖြစ်ပါတယ်။ ၂၀၁၈-၁၉ ခုနှစ်အတွင်း ယင်းမာပင်မြို့နယ်မှာ သဲ၊ ကျောက်စရစ်၊ လမ်းခင်းကျောက်ထုတ်လုပ်ခွင်လိုင်စင် ၂၈ ခု ချထားပေးခဲပြီး အခွန်ငွေ ၁၆၆ သိန်းကျော် ရရှိခဲ့ကာ ဆားလင်းကြီးမြို့နယ်မှာတော့ လိုင်စင် ၃၁ ခုကနေ အခွန်ငွေ ၂၄၂ သိန်းကျော် ရရှိခဲ့ပါတယ်။ ၂၀၁၉-၂၀၂၀ ဘဏ္ဍာနှစ်အတွက် ယင်းမာပင်မြို့နယ်မှာ လုပ်ငန်းရှင် ၂၂ ဦးကို ခွင့်ပြုထားပြီး အခွန်ငွေ ကျပ်သိန်း ၁၂၀နှင့် ဆားလင်းကြီးမြို့နယ်က လုပ်ငန်းရှင် ၁၃ ဦးထံကနေ အခွန်ငွေ ၄၂ သိန်းကျော်ကို စည်းကြပ်ကောက်ခံထားတယ်လို့ သိရပါတယ်။  တရားမဝင် မြစ်သဲကျောက်နှင့် အုတ်ထုတ်လုပ်ငန်းတွေမရှိအောင်လည်း ဘက်စုံစောင့်ကြပ်စိစစ်ရေးအဖွဲ့တွေနဲ့ လစဉ်စစ်ဆေးဆောင်ရွက်နေတယ်လို့လည်း ဝန်ကြီးက ပြန်လည်ဖြေကြားခဲ့ပါသေးတယ်။
1 year Ago
Up