မွန်ပြည်နယ်

April 26, 2021

မွန်ပြည်နယ်ရှိ ပညာရေးဝန်ထမ်းများ ရုံးပြန်တက်ရန် ဆက်တိုက်ဖိအားပေးခံရ

မွန်ပြည်နယ်အတွင်းက ပညာရေးဝန်ထမ်းတွေကို ရုံးပြန်တက်ဖို့ ပြည်နယ်ပညာရေးမှူးရုံးက ဆက်တိုက် ဖိအားပေးနေတယ်လို့ CDM လှုပ်ရှားမှုမှာ ပါဝင်ထားတဲ့ ဆရာ၊ဆရာမတွေက ပြောပါတယ်။

ပြည်နယ်ပညာရေးမှူးရုံးရဲ့ ဧပြီ ၂၅ ရက်စွဲနဲ့ ထုတ်ပြန်စာမှာတော့ ပြည်နယ်၊ ခရိုင်၊ မြို့နယ် ပညာရေးမှူးရုံးက ဝန်ထမ်းတွေနဲ့ အခြေခံပညာကျောင်းက ဆရာ ၊ ဆရာမတွေဟာ မေလ ၃ ရက် နောက်ဆုံးထား ရုံးပြန်တက်ပေးကြဖို့ ဖိအားပေးလာတာ ဖြစ်ပါတယ်။

မေ ၃ ရက်မှာ ရုံးပြန်မတက်တဲ့ ဝန်ထမ်းတွေရဲ့ အချက်အလက်တွေကို နေ့လည် ၁ နာရီ နောက်ဆုံးထားပြီး သက်ဆိုင်ရာရုံးတာဝန်ရှိသူတွေက ပြည်နယ်ပညာရေးမှူးရုံးစီမံဌာနကို ပေးပို့ ကြဖို့ အကြောင်းကြားထားပါတယ်။

မွန်ပြည်နယ်မှာတော့ စစ်အာဏာရှင် ဆန္ဒပြပွဲပါဝင်တဲ့ ပညာရေးဝန်ထမ်းတချို့ကို တာဝန်မှ ယာယီရပ်ဆိုင်းနေသလို အကြမ်းဖက် စစ်ကောင်စီကလည်း ကျောင်းဆရာ ၊ ဆရာမတချို့ကို ရာဇသတ်ကြီး ပုဒ်မ ၅၀၅(က)နဲ့ အမှုဖွင့် အရေးယူနေတာပါ။

မွန်ပြည်နယ်ပညာရေးဝန်ထမ်းတွေနဲ့ ဆရာ၊ဆရာမတွေဟာ စစ်အာဏာရှင် တော်လှန်ရေး လှုပ်ရှားမှုမှာ လမ်းပေါ်ထွက် ဆန္ဒထုတ်ဖော်ခဲ့တဲ့ ဝန်ထမ်းတွေလည်း ဖြစ်ပါတယ်။

2 weeks Ago

April 17, 2021

မွန်ပြည်နယ်၌ မူးယစ်မှုဖြင့်ထောင်ကျသူ အများစုအပါအဝင် အကျဉ်းသား ၂၄၀၀ ကျော် ပြန်လွတ်

မွန်ပြည်နယ်ရှိ အကျဉ်းထောင်၊ အချုပ်ထောင်နဲ့ အလုပ်စခန်း အသီးသီးက အကျဉ်းသား ၂၄၀၀ ကျော်ကို အကြမ်းဖက်စစ်ကောင်စီက ဧပြီ ၁၇ ရက် နှစ်ဆန်းတစ်ရက်နေ့မှာ ပြန်လွှတ်ပေးလိုက်ပါတယ်။

ဒီကနေ့ ပြန်လွတ်လာတဲ့ အကျဉ်းသားတွေအထဲမှာ မော်လမြိုင်အချုပ်ထောင်က ၅၂၀ ကျော်၊ သထုံထောင်က ၁၀၀ ကျော်၊ ကျိုက်ထိုအလုပ်စခန်းက ၅၄၀ ကျော်၊ ကျိုက်မရောထောင်က ၇၀၀ နီးပါး၊ ဇင်းကျိုက်အလုပ်စခန်းက ၁၉၀ ကျော်၊ ရင်ငြိမ်းကုန်ထုတ်စခန်းက ၁၆၀ နီးပါး၊ အင်းဗြောင်အလုပ်စခန်း ၁၈၀ ကျော် ၊ စုစုပေါင်း ၂၄၀၀ ကျော်ပါဝင်ပါတယ်။

လွတ်မြောက်လာတဲ့  အကျဉ်းသား အများစုဟာ မူးယစ်ဆေးဝါးမှုနဲ့ အကျဉ်းချခံထားရသူ အများဆုံး ပါဝင်လာပါတယ်။

ဒီကနေ့ မြန်မာနှစ်ဆန်း ၁ ရက်နေ့မှာ  အာဏာသိမ်းစစ်ကောင်စီက နိုင်ငံတဝန်း အကျဉ်းထောင်တွေ အသီးသီးကနေ အကျဉ်းသား၊ အကျဉ်းသူပေါင်း နှစ်သောင်းကျော်လွှတ်ပေးခဲ့ တာဖြစ်ပါတယ်။

3 weeks Ago
More News
Up