မွန်ပြည်နယ်

May 21, 2022

မွန်ပြည်နယ်တွင် မုန်တိုင်းဒဏ်ကြောင့် လူ ၁ ဦးသေဆုံးပြီး နေအိမ်အဆောက်အအုံများ ပျက်စီး

မွန်ပြည်နယ်မှာ မုန်တိုင်းဒဏ်ကြောင့် လူ ၁  ယောက်သေဆုံးပြီး တချို့ ဒဏ်ရာရခဲ့ကာ သစ်ပင်တွေနဲ့ လျှပ်စစ်ဓာတ်မီးတိုင်တွေလဲကျခဲ့သလို လူနေအိမ်တွေ စာသင်ကျောင်းတွေ အပါအဝင် အဆောက်အအုံ  ရာနဲ့ချီ ထိခိုက်ပျက်စီးခဲ့တယ်လို့ ကယ်ဆယ်ရေးအဖွဲ့တွေနဲ့ ဒေသခံတွေထံက သိရပါတယ်။ 

မေလ ၂၀ ရက်က မော်လမြိုင်မြို့ကို ဦးတည်တိုက်ခတ်လာတဲ့ ကုန်းတွင်းမုန်တိုင်းငယ် (Land Depression) ကြောင့် ပြည်နယ်တဝန်းမှာ မိုးသက်လေပြင်းတွေ ကျရောက်ခဲ့တဲ့အတွက် ထိခိုက်ပျက်စီးမှုတွေ ဖြစ်ပေါ်ခဲ့တာပါ။

ကုန်းတွင်းမုန်တိုင်းငယ်ကြောင့် မော်လမြိုင်၊ ပေါင်၊ ကျိုက်မရော၊ သထုံ၊ ချောင်းဆုံနဲ့ မုဒုံမြို့နယ်တို့မှာ လူနေအိမ်တွေ၊ အဆောက်အဦးတွေ အပါအဝင် သစ်ပင်ကြီးတွေနဲ့ ဓာတ်မီးတိုင်တွေ ပြိုကျပျက်စီးခဲ့ပါတယ်။

ဒီဗွီဘီကကောက်ယူထားတဲ့ အချက်အလက်တွေအရ ကုန်းတွင်းမုန်တိုင်းငယ်ကြောင့် မော်လမြိုင်မှာ လူနေအိမ်နဲ့ အဆောက်အအုံ ၆၀ နီးပါး၊ သထုံနဲ့ပေါင်မြို့နယ် ၃၀ ကျော်၊ မုဒုံမြို့နယ်မှာ နေအိမ် ၁၃ လုံး၊ ကျိုက်မရောနဲ့ ချောင်းဆုံမြို့နယ်တို့မှာ လူနေအိမ် ၁၀ နီးပါး ထိခိုက်ပျက်စီးခဲ့ပါတယ်။

မော်လမြိုင်မှာတော့ မုပွန်ရပ်ကွက်က အရက်ချက်စက်ရုံ ခေါင်တိုင် ပြိုကျသွားတဲ့အတွက် လူတယောက်သေဆုံးပြီး တယောက် ထိခိုက်ဒဏ်ရာရရှိခဲ့တယ်လို့ လူမှုကယ်ဆယ်ရေးအဖွဲ့ တာဝန်ရှိသူ တစ်ဦးကပြောပါတယ်။

မုန်တိုင်ငယ်ကြောင့် မော်လမြိုင်မြို့ တောင်ဝိုင်းရပ်မှာ ဓာတ်မီးတိုင် ၁၀ တိုင်ထက်မနည်း ပြိုကျပျက်စီးခဲ့သလို မြို့နယ်တချို့မှာလည်း စာသင်ကျောင်း အဆောက်အဦး အမိုးလန်တာ၊ ကျေးလက်ဆေးပေးခန်း ခြံစည်းရိုး အုတ်နံရံ ပြိုကျ ပျက်စီးခဲ့ပါတယ်။

မော်လမြိုင်မြို့က လေဘေးသင့်ပြည်သူ ၁၅၀ ကျော်အတွက် သာယာရေးနဲ့ ဇေယျာသီရီရပ်ကွက်က ယာယီကယ်ဆယ်ရေး စခန်းဖွင့်ပြီး အရေးပေါ် ရွှေ့ပြောင်းခဲ့ရတယ်လို့ လေဘေးသင့်ပြည်သူအရေး ကူညီပေးနေသူတယောက်က ပြောပါတယ်။

လေဘေးသင့်ပြည်သူတွေကို လက်ရှိအချိန်ထိ စစ်ကောင်စီဘက်က တစ်စုံတစ်ရာ ထောက်ပံ့ကူညီတာ မရှိသေးဘူးလို့ ပြောပါတယ်။

မုန်တိုင်းငယ်ကြောင့် မြို့နယ်အများစုမှာ ဓာတ်မီးတိုင်တွေ ပြိုကျပျက်စီးသွားတဲ့အတွက် မေလ ၂၁ ရက်နေ့ မွန်းလွဲပိုင်းထိ လျှပ်စစ်မီးပြန်မလာ သေးဘူးလို့ ဒေသခံတွေက ပြောပါတယ်။

လူမှုကယ်ဆယ်ရေးအဖွဲ့တွေအဆိုအရ စစ်ကောင်စီဟာ မုန်တိုင်းဝင်ရောက်လာမှုကို ချက်ချင်း အရေးတယူ ဆောင်ရွက်တာ မရှိသလို ကူညီထောက်ပံ့မှု မရှိသလောက် နည်းပါးခဲ့တယ်လို့ ဆိုကြပါတယ်။

ကုန်းတွင်းမုန်တိုင်းကြောင့် ဖြစ်ပေါ်ခဲ့တဲ့ ထိခိုက်ပျက်စီးမှုတွေကို လူမှုကယ်ဆယ်ရေးအဖွဲ့တွေနဲ့ ဒေသခံတွေက ကိုယ်အားကိုယ်ကိုးပြီး ဖြေရှင်းခဲ့ရတာပါ။

လေပြင်း မုန်တိုင်း ဒဏ်ကို ကရင်ပြည်နယ်နဲ့ တနင်္သာရီတိုင်းအတွင်းက မြို့နယ်တွေမှာလည်း ခံစားခဲ့ကြရပါတယ်။

Photo-MFS 

6 days Ago

ရေးချောင်းဖျားတွင် ရေတက်လာသဖြင့် အနိမ့်ပိုင်းရှိ နေအိမ်များ ပြင်ဆင်ထားရန် သတိပေး

မွန်ပြည်နယ်၊ ရေးမြို့နယ်မှာ  မိုးမဆက်ပြက်ရွာသွန်းမှုကြောင့် ရေးချောင်းဖျားမှ စီးဆင်းလာနေတဲ့ ရေတွေမှာ မေ ၂၁ ရက် မနက်က  ရေအမြင့် ၆  ပေလောက်အထိ တိုးလာနေပြီး ကျောင်းရွာကျေးရွာ ချောင်းကြီးအနီးရပ်ကွက်တွေထဲ ရေစတင်၀င်ရောက်နေတဲ့အတွက် အနိမ့်ပိုင်းက နေအိမ်တွေ အသင့်ပြင်ဆင်ထားကြဖို့ သက်ဆိုင်ရာတာဝန်ရှိသူတွေက ပြောပါတယ်။

ဒီနေ့ည မိုးအားဆက်လက်ကောင်းနေနိုင်ပြီး ပင်လယ်ဒီရေဆွဲအားနှေးတဲ့ရက်ဖြစ်တဲ့ အတွက်ရေးမြို့ မြစ်ချောင်းအနီး အနိမ့်ပိုင်းနေကြသူတွေ ချောင်းရေလျှံ ရေမြုပ် ရေကျော်နိုင်တယ်လို့ အထူးသတိပေးထားပါတယ်။

ချောင်းဖျားချောင်းရေက ဆက်လက် ရေဆင်းအားကောင်းနေပြီး ညက  မိုးသက်လေပြင်းတွေတိုက်ခတ်ခဲ့တာကြောင့် ရေးမြို့နယ်ကို လျှပ်စစ်မီးပါ ယာယီဖြတ်တောက်ထားပြီး သစ်ပင်ပြိုလဲနေတာကြောင့် လမ်းပိတ်ဆို့နေကာ လမ်းသွားလမ်းလာတွေ အခက်တွေ့နေပါတယ်။

မနေ့မနက်က မိုးသည်းထန်စွာရွာသွန်းပြီး လေပြင်းတိုက်ခတ်လို့   ရေး - မော်လမြိုင်သွား ကားလမ်းမပေါ်တွေမှာလည်း သစ်ပင်ပြိုလဲ လမ်းပိတ်ဆို့ခဲ့ရာမှာ ကားတွေ နာရီအနည်းငယ်ကြာ ယာဉ်ကြောပိတ်ဆို့နဲ့ ကြုံရတယ်လို့ ကားသမားတယောက်က  ပြောပါတယ်။

မွန်ပြည်နယ်မှာ မေ ၂၀ ရက် မနက်ပိုင်းကစပြီး လေဖိအားနည်းရပ်ဝန်းပိုမို အားကောင်းလာပြီး မုန်တိုင်းငယ်အဆင့်ကို ပြောင်းလဲလာကာ  နေ့လယ်ပိုင်းမှာ မိုးဇလက အနီရောင်အဆင့် သတ်မှတ်ခဲ့ရပါတယ်။

လက်ရှိမှာတော့ မုန်တိုင်းငယ် အရှိန်ကြောင့် မွန်ပြည်နယ်ရဲ့ မော်လမြိုင်- ချောင်းဆုံ - ကျိုက်မရော -ပေါင် - မုဒုံ - သံဖြူဇရပ်နဲ့ ရေးမြို့နယ်တို့မှာ မိုးသက်လေပြင်းတွေ ကျရောက်ပြီး သစ်ပင်ကြီးတွေ ပြိုလဲပြီးနောက် လမ်းပိတ်ဆို့မှု ဖြစ်ပေါ်တာ နေအိမ်တွေ ထိခိုက်ပျက်စီးတာတွေ ရှိလာနေပြီး မွန်ပြည်နယ်အတွင်းမှာ ထိခိုက်ဒဏ်ရာရသူ ၂ ဦး ရှိပါတယ်။

မုန်တိုင်းငယ်အရှိန်ကြောင့် လေပြင်းတိုက်ခတ်တာ ဒေသအလိုက်မိုးကြီးတာ  မုတ္တမကွေ့၊ မွန်-တနင်္သာရီ ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့ရှိ ကမ်းနီးကမ်းဝေး ငါးဖမ်း ရေယာဉ်တွေ သင်္ဘောတွေအနေနဲ့  ကြိုတင်သတိပြုကြဖို့ မိုးဇလက သတိပေးထားပါတယ်။

ရုတ်တရက်ရေကြီးရေလျှံတာ၊ တောင်ပြိုတာ၊မြေပြိုတာ စတဲ့အန္တရာယ်တွေ ကျရောက်နိုင်တာကြောင့် အနိမ့်ပိုင်းကလူတွေ စတင်ပြောင်းရွှေ့ထားကြဖို့ မိုးဇလက ထုတ်ပြန်ထား ပါတယ်။

6 days Ago

April 25, 2022

မွန်ပြည်နယ် ဖွဲ့စည်းပုံအခြေခံဥပဒေရေးဆွဲမည့် မွန်အမျိုးသားညီလာခံ ကျင်းပမည်

မွန်ပြည်သစ်ပါတီက ဦးဆောင်ကျင်းပမယ့် မွန်အမျိုးသားကွန်ဖရင့်ကို မွန်ပြည်သစ်ထိန်းချုပ်နယ်မြေ ရေးချောင်းဖျားဒေသရှိ မွန်အမျိုးသားပညာရေးဌာနဗဟို ညီစားစခန်းမှာ ကျင်းပသွားမယ်လို့ မွန်ပြည်သစ်ပါတီ ဗဟိုအလုပ်အမှုဆောင်အဖွဲ့ဝင် နိုင်ဗညားလယ်က ပြောပါတယ်။

မွန်အမျိုးသားကွန်ဖရင့်ကို လာမယ့် မေလ ၂ ရက်မှ  ၅ ရက်အထိ ၄ ရက် ကျင်းပသွားဖို့ စီစဉ်ထားပြီး အဲဒီကွန်ဖရင့်မှာ  ဖက်ဒရယ်ပြည်ထောင်စုအခြေခံမူနဲ့ မွန်ပြည်နယ် ဖွဲ့စည်းပုံအခြေခံဥပဒေ တစ်ရပ် ရေးဆွဲသွားဖို့ ရှိနေတာပါ။

ဒါ့အပြင် ကွန်ဖရင့်မှာတော့ မွန်အမျိုးသားရေးရာတွေအပြင် သက်ဆိုင်ရာကဏ္ဍအလိုက် မူဝါဒတွေကိုလည်း ထည့်သွင်ဆွေးနွေးသွားဖို့ စီစဉ်ထားတယ်လို့ မွန်ပြည်သစ်ပါတီက မွန်ဘာသာနဲ့ ထုတ်ပြန်တဲ့ အင်တာဗျူးအစီအစဉ်မှာ နိုင်ဗညားလယ်က ပြောဆိုခဲ့တာပါ။

မွန်အမျိုးသားကွန်ဖရင့်ကိုတော့ မွန်ပြည်သစ်ပါတီ အယောက် ၃၀ ၊  မွန်ညီညွတ်ရေးပါတီ အယောက် ၃၀ ၊ အရပ်ဖက် မွန်အဖွဲ့အစည်းတွေ ၄၅ ယောက်၊ မွန်သံဃာတော် ၃၀ ပါး၊ တခြားပညာရှင်တွေ အပါအဝင် စုစုပေါင်း အယောက် ၂၅၀ ကျော်ကို တက်ရောက်ဖို့ ဖိတ်ကြားထားတာပါ။

ပြီးခဲ့တဲ့ ၂၀၁၆ ခုနှစ်က ကျင်းပခဲ့တဲ့ မွန်အမျိုးသားကွန်ဖရင့်ကိုတော့ မွန်ပြည်သစ်ပါတီထိန်းချုပ်နယ်မြေ ကရင်ပြည်နယ် ကြာအင်းဆိပ်ကြီးမြို့နယ် ပေါလောကုန်းကျေးရွာမှာ ကျင်းပခဲ့ပါတယ်။

1 month Ago
More News
Up