မြောက်ဥက္ကလာပ

March 4, 2021

မြောက်ဥက္ကလာပတွင် ရဲနှင့် စစ်တပ်က ကျည်အစစ်ဖြင့် ပတ်ခတ်မှုကြောင့် ဆန္ဒပြသူ ၂၀ ဝန်းကျင် သေဆုံး

ရန်ကုန်၊ မြောက်ဥက္ကလာပမြို့နယ်မှာ  စစ်အာဏာရှင်ဆန့်ကျင်ရေး ဆန္ဒပြသူတွေကို မတ် ၃ ရက်နေ့က အာဏာသိမ်းစစ်ကောင်စီရဲ့ စစ်တပ်နဲ့ရဲတပ်ဖွဲ့ဝင်တွေက ကျည်အစစ်တွေနဲ့  ပစ်သတ်ခဲ့တာကြောင့် မနေ့ည ၉ နာရီခွဲလောက်အထိ  ၁၈ ဦးသေဆုံးတယ်လို့ ဆေးရုံ ဆရာဝန်တွေက အတည်ပြုပြောပါတယ်။

ရန်ကုန် မြောက်ဥက္ကလာပမြို့နယ်မှာမနေ့ညနေပိုင်းကစပြီး  ပြည်သူလူထုကို စစ်တပ်နဲ့ ရဲက သေနတ်နဲ့  အကြမ်းဖက်ပစ်ခတ်သတ်ဖြတ်ခဲ့တာဖြစ်ပြီး မြောက်ဥက္ကလာပ ဆေးရုံမှာ သေနတ်ဒဏ်ရာသူတွေလည်း အများကြီး ရှိနေပြီး လူနာတချို့က စိုးရိမ်ရတဲ့ အခြေအနေမှာ ရှိတယ်လို့ ဆိုပါတယ်။

နာရေးကူညီမှုအသင်း ရန်ကုန်ရုံးချုပ်ကိုလည်း ရဲနဲ့စစ်တပ်က မနေ့ည ၁၁ နာရီကျော်လောက် ဝင်ရောက်စီးနင်းခဲ့ပြီး ကားတွေကို ရိုက်ခွဲတာ၊ ပစ္စည်းတချို့ကို ဖျက်ဆီးပြီး တချို့ကို သိမ်းဆည်းသွားပါတယ်။

တခြားဖြစ်စဉ်တခုမှာတော့ရတဲ့ လုံခြုံရေး ကင်မရာမှတ်တမ်းတခုမှာတော့ ရဲတွေဟာ လူမှုကူညီရေးအသင်းတခုရဲ့ လူနာတင်ကားကိုလည်း ရိုက်နှက်ဖျက်ဆီးပြီး ကျန်းမာရေး စေတနာ့ ဝန်ထမ်းတွေကို ခြေထောက်နဲ့ ခေါင်းကို ကန်တာ၊ တုတ်တွေနဲ့ ရိုက်တာ၊ သေနတ်ဒင်နဲ့ ထုရိုက်တာကို တွေ့ရပါတယ်။

စစ်တပ်နဲ့ရဲက စက်သေနတ်နဲ့ ဆက်တိုက်အချက်တွေအများကြီး ပစ်ခတ်ခဲ့တာကြောင့် အခုလို အများအပြား သေဆုံး ဒဏ်ရာရခဲ့တာလည်း ဖြစ်ပါတယ်။

မတ် ၃ ရက်နေ့ မနက်ပိုင်းကစလို့ မြောက်ဥက္ကလာပ ဃ ဈေးနားမှာ ဆန္ဒပြနေသူတွေ စုရုံးနေချိန်ကပဲ ရဲနဲ့ စစ်တပ်က ရောက်ရှိ ပိတ်ဆို့ထားခဲ့ပြီး နေ့လယ်ပိုင်းမှာတော့ အကြမ်းဖက် ဖြိုခွင်းခဲ့သလို ကျန်းမာရေးစေတနာ့ဝန်ထမ်းတွေကိုလည်း ရိုက်နှက်ခဲ့ပါတယ်။

ပုံစာ - မတ်လ ၃ ရက် ညက ရဲနှင့်စစ်တပ်က ကျည်အစစ်ဖြင့် ဆန္ဒပြပြည်သူများအား ပစ်သတ်ခဲ့သည့် မြောက်ဥက္ကလာပမြို့နယ် ယနေ့နံနက် မြင်ကွင်း 

2 months Ago

March 3, 2021

မြောက်ဥက္ကလာပတွင် ပစ်ခတ်ခံရမှုကြောင့် ၃ ဦးသေဆုံး

ရန်ကုန် မြောက်ဥက္ကလာပမြို့နယ်မှာ ဒီကနေ့  စစ်အာဏာရှင် ဆန့်ကျင်ဆန္ဒပြနေသူတွေကို စစ်တပ်နဲ့ရဲက  ပစ်ခတ် အကြမ်းဖက်ဖြိုခွင်းခဲ့တာကြောင့် ၃ ဦးသေဆုံးခဲ့တယ်လို့ သိရပါတယ်။

ဒီမနက်ပိုင်းက စလို့ မြောက်ဥက္ကလာပ (ဃ) ဈေးနားမှာ ဆန္ဒပြနေသူတွေ စုရုံးနေချိန် ရဲနဲ့ စစ်တပ်က ရောက်ရှိ ပိတ်ဆို့ထားခဲ့တာပါ။

“အစက ရဲက ၃၀ ပဲ ရှိတယ်။ ၁၁ နာရီကျော်လောက်မှာ ရဲတွေက အင်အားထပ်တိုးတယ်။ မျက်ရည်ယိုဗုံးတွေနဲ့ ပစ်တယ်။ သေနတ်နဲ့လည်း ပစ်တယ်။ ရှေ့မှာ ယောက်ျားလေးတွေက နေရာယူထားတော့ သူတို့အင်အားကို သေချာမသိရဘူး။ ညီမ သိသလောက် မိန်းကလေးတွေ အပါအဝင် ဒဏ်ရာရသူ ၇ ယောက်လောက်ရှိတယ်”လို့ တိမ်းရှောင်ရင်း အိမ်ကိုပြန်ခဲ့သူ တယောက်က ပြောပါတယ်။

ဆန္ဒပြသူတွေကို လမ်းထဲကို တိမ်းရှောင်ကြတဲ့အခါ လမ်းထဲက အိမ်တွေကို သေနတ်နဲ့ပစ်ပြီး လူတွေကို ထုတ်ပေးဖို့ ခြိမ်းခြောက်တယ်လို့လည်း ပြောပါတယ်။

လုံခြုံရေး ကင်မရာမှတ်တမ်းတခုမှာတော့ ရဲတွေဟာ လူမှုကူညီရေးအသင်းတခုရဲ့ လူနာတင်ကားကိုလည်း ရိုက်နှက်ဖျက်ဆီးပြီး ကျန်းမာရေး စေတနာ့ဝန်ထမ်းတွေကို ခြေထောက်နဲ့ ခေါင်းကို ကန်တာ၊ တုတ်တွေနဲ့ ရိုက်တာ၊ သေနတ်နဲ့ ရိုက်တာကို တွေ့ရပါတယ်။

“အိန္ဒြာလမ်းမှာ လူနာတင်ကားကို ရဲတွေက ဝိုင်းရိုက်တယ်။ အိမ်စီးကားတစီးကိုလည်း ရိုက်တယ်။ ပြီးတော့ လိမ္မော်ရောင်ဝတ်စုံ ဝတ်ထားသူတွေကို ရဲတွေက ခြေထောက်နဲ့ ကန်၊ ရိုက်နေတာ တွေ့တယ်။ ဆန္ဒပြသူတွေထဲက ဒဏ်ရာရသူ ၃ ယောက် တွေ့တယ်။ ကျဆုံးတာ ၃ ယောက်ပါ။ သူတို့က ကျည်အစစ်တွေနဲ့ ပစ်တာ။ ဒဏ်ရာရသူတွေကို ဆေးကုခွင့်မပေးဘူး” လို့ သူက ပြောပါတယ်။ 

ဒါ့အပြင် (ဃ) ဈေးနားက သန္တာလမ်းထဲမှာတော့ လမ်းပေါ်မှာ သွားလာနေသူတွေကိုလည်း ဖမ်းဆီးထားတယ်လို့ အဲဒီနေရာမှာ ရှိနေသူက ပြောပါတယ်။

လက်ရှိ ညနေ ၄ နာရီခွဲအချိန်ထိ ဆန္ဒပြနေသူတွေ ရှိနေသေးသလို ဆက်လက် ပစ်ခတ်နေတာကြောင့် သေဆုံး ဒဏ်ရာရသူ အရေအတွက် အတိအကျ မသိရသေးပါဘူး။

အဲဒီနေရာဝန်းကျင်က လမ်းတွေအားလုံးကိုလည်း ရဲနဲ့ စစ်တပ်က ပိတ်ထားတယ်လို့ ဒေသခံတွေက ပြောပါတယ်။

2 months Ago
More News
Up