မြို့သစ်မြို့နယ်

November 16, 2021

မြို့သစ်မြို့နယ်က မှုခင်းသတင်းထောက်နှင့်ဇနီး ပစ်ခတ်ခံရ

မကွေးတိုင်း၊ မြို့သစ်မြို့မှာနေထိုင်တဲ့ မှုခင်းသတင်းထောက်နဲ့ဇနီးတို့ဟာ နိုဝင်ဘာ ၁၄ ရက်နေ့ မွန်းလွဲပိုင်းက ပစ်ခတ်ခံရတယ်လို့ သိရပါတယ်။

မြို့သစ်မြို့မှာ နေထိုင်တဲ့ မှုခင်းသတင်းထောက် ဦးလှိုင်မြင့်ထွန်း(ခ)လှိုင်ဘွားနဲ့ ဇနီးဖြစ်သူတို့ဟာ သူတို့ပိုင်ဆိုင်တဲ့ ဘိုက်ထရပ်မော်တော်ယာဉ်နဲ့ မြို့သစ်မြို့ကိုပြန်လာစဉ် လမ်းမှာပစ်ခတ်ခံခဲ့ရတာလို့ သိရပါတယ်။

အမည်မဖော်လိုတဲ့ မိသားစုဝင်တဦးက “လှိုင်ဘွားကော သူ့မိန်းမကော ဒဏ်ရာအနည်းငယ်ပဲရတယ်။ သူ့မိန်းမကတော့ နည်းနည်းပိုပြင်းတာပေါ့။ ကားမှာတော့ ကျည်ဆံရာ ၁၅ ချက်လောက်တွေ့တယ်။ သူက အရင်ကတည်းက ရဲတွေနဲ့ပေါင်းနေတာ။ အာဏာသိမ်းပြီးနောက်ပိုင်းလည်း စစ်တပ်သတင်းပေးလုပ်နေလို့ သတိပေးနေရတာ။ အဲ့ဒါလည်း သူက မဆင်ခြင်ဘူးလေဗျာ။ တော်သေးတာပေါ့၊ အသက်မသေတာ ကံကောင်းတယ်ပြောရမှာ” လို့ ပြောပါတယ်။

ပစ်ခတ်ခံရ ဦးလှိုင်မြင့်ထွန်းဟာ ရဲထွက်တဦးဖြစ်ပြီး ယခင်ကတည်းက လှိုင်ဘွားအမည်နဲ့ မှုခင်းသတင်းဂျာနယ်အပါအဝင် အခြားဂျာနယ်တွေမှာလည်း သတင်းရေးသားခဲ့သူတဦး ဖြစ်တယ်လို့ နီးစပ်သူတွေဆီက သိရပေမယ့် လက်ရှိအချိန်မှာ သတင်းရေးသားနေသူ ဟုတ်၊ မဟုတ်ဆိုတာကိုတော့ ဒီဗွီဘီက သီးခြားအတည်မပြုနိုင်သေးပါဘူး။

ဒေသခံတဦးက “ဒီကောင်က မြို့အတွက်မရှိသင့်တဲ့ ဒလန်ကောင်။ ကိုယ့်အခြေအနေ ကိုယ်သိသင့်ပြီ။ မြို့အတွက် ဘာကောင်းကျိုးမှပြုခဲ့တာမရှိဘူး။ သတင်းထောက်လိုလို ဘာလိုလိုနဲ့ သူများ မသထာရေစာစားနေတဲ့ကောင်။ ရဲနဲ့ပေါင်းစားနေတဲ့ ဒလန်လောင်” လို့ မှတ်ချက်ပြုပြော ပါတယ်။

အဆိုပါပစ်ခတ်မှုကို ဘယ်အဖွဲ့အစည်းက ပြုလုပ်ခဲ့တယ်ဆိုတာတော့ သတင်းထုတ်ပြန်ထားတာ မရှိသေးပါဘူး။

မြို့သစ်မြို့နယ်အတွင်းမှာ စစ်ကောင်စီသတင်းပေးတွေနဲ့ အုပ်ချုပ်ရေးမှူးတွေ မကြာခဏဆိုသလို သတ်ဖြတ်ခံနေရတာဖြစ်ပြီး အကြမ်းဖက်စစ်ကောင်စီတပ်တွေကလည်း သံသယတွေနဲ့ မြို့သစ်မြို့နယ်ထဲက ကျေးရွာတချို့ကို ဝင်ရောက်စီးနင်းတာတွေရှိနေလို့ ဒေသခံတွေ အခက်တွေ့နေရကြောင်း သိရပါတယ်။

2 weeks Ago

November 10, 2021

မြို့သစ်မြို့နယ်တွင် ပထမနှစ်ကျောင်းသူ တစ်ဦးကို အကြမ်းဖက်စစ်အုပ်စုက ဖမ်းဆီး

မကွေးတိုင်းဒေသကြီး မြို့သစ်မြို့နယ်မှာ နိုဝင်ဘာ ၉ ရက်နေ့ ညနေပိုင်းက ပထမနှစ်တက္ကသိုလ် ကျောင်းသူတစ်ယောက်ကို အကြမ်းဖက်စစ်အုပ်စုက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

မြို့သစ်မြို့နယ်၊ မန်ကျည်းကုန်းကြီး ကျေးရွာမှာ မနေ့ညနေ ၃ နာရီကျော်လောက်မှာ မကွေးတက္ကသိုလ်က ပထမနှစ်ကျောင်းသူ မအေးသက်မွန်ကို အကြမ်းဖက်စစ်အုပ်စုက အိမ်စီးကားလေး ၂ စီးနဲ့ လာရောက်ဖမ်းဆီးသွားတာလို့ ရွာခံတစ်ယောက်က DVB ကို ပြောပါတယ်။

မအေးသက်မွန်ဟာ PDF တပ်ဖွဲ့နဲ့ ဆက်သွယ်တယ်ဆိုပြီးတော့ မန်ကျည်းကုန်းကြီးကျေးရွာက ဒလန်တွေက သတင်းပေးတာကြောင့် အခုလို အဖမ်းခံရတာလို့ ဆိုပါတယ်။

မအေးသက်မွန်ဟာ NLD ပါတီ ထောက်ခံဝန်းရံသူသာဖြစ်ပြီး PDF နဲ့ ဆက်သွယ်တာမျိုး မရှိဘဲ ဒလန်ကသတင်းပေးတာကြောင့် မတရားဖမ်းဆီးခံလိုက်ရတာလို့ ပြောပါတယ်။

ဖခင်ဖြစ်သူနဲ့ မိသားစုဝင်တွေကို ဆက်သွယ်ပေမယ့်လည်း မိသားစုဝင်တွေရဲ့ လုံခြုံရေးအရ ပြန်လည်ဖြေကြားခြင်းမရှိဘဲ စစ်အုပ်စုတွေက မအေးသက်မွန်ကို ဘယ်ကိုခေါ်သွားလဲ ဆိုတာကိုတော့ အတည်မပြုနိုင်သေးပါဘူး။

3 weeks Ago
More News
Up