မြန်မာလုပ်သား

February 17, 2021

ချင်းမိုင်မှ မြန်မာရွှေ့ပြောင်းလုပ်သား ၁ ဦး ထိုင်းထီ ပထမဆုပေါက်

ချင်းမိုင်မှ မြန်မာရွှေ့ပြောင်းလုပ်သား ၁ ဦး ထိုင်းထီ ပထမဆုပေါက်

ဒီဗွီဘီ

ထိုင်းနိုင်ငံမြောက်ပိုင်း ချင်းမိုင်ခရိုင်ထဲက မြန်မာရွှေ့ပြောင်းလုပ်သား ၁ ဦး ထိုင်းထီပထမ ဆုပေါက်ပြီး  ဘတ်ငွေ ၆ သန်းရရှိမှာဖြစ်ပါတယ် ။ 

မြန်မာနိုင်ငံကနေ ချင်းမိုင်ခရိုင် ဆန်ဆိုင်းမြို့နယ်ထဲမှာ လာပြီးအလုပ်လုပ်နေတဲ့ အသက် ၁၉ နှစ်ရွယ်ရှိ  စိုင်းအွန် ခေါ် ခွန်အောင်ပြည့် ဆိုသူမှာ မနေ့ကထွက်သွားတဲ့ ထိုင်းထီပထမဆုပေါက်ဂဏန်း ၄၂၄၆၀၃ ကို ပေါက်ကြောင်း ဆန်ကမ်ဖဲင်းမြို့နယ်ရဲစခန်းမှာ လာ ရောက်အကြောင်းကြားခဲ့တယ်လို့  ချင်းမိုင်နယူးစ်သတင်းမှာ ဖော်ပြပါတယ်။ 

စခန်းမှူးကလည်း ရဲစခန်းမှာမှတ်တမ်းတင်ထားပေးပြီး ဝမ်းမြောက်ကြောင်းပြောကြားကာ ထီပေါက်သူ စိုင်းအွန်ကလည်း သူဟာ လစဉ်ထီအနည်းအကျဉ်းသာထိုးလေ့ရှိကြောင်း ၊ ဒီတခေါက် ပထမဆုရတော့ အလွန်ဝမ်းသာပြီး ထီပေါက်တဲ့ငွေတွေကို မြန်မာပြည်က မိဘဆီပြန်ပို့ပေး မှာဖြစ်ကာ တချို့ကိုတော့ ထိုင်းမှာနေစဉ် သုံးစွဲဖို့ သိမ်းထားကြောင်း ၊ လောလောဆယ် မြန်မာပြည်ပြန်လို့လည်းမရသေးတာကြောင့် ထိုင်းမှာဘဲနေပြီး လုပ်မြဲအလုပ်ကိုဘဲ ဆက်လုပ်သွား မယ်လို့ ပြောသွားပါတယ်။ 

3 months Ago

February 10, 2021

မြန်မာလုပ်သားအများစုရှိရာ စမွတ်စာခွန်ခရိုင်တွင် ကိုဗစ်-၁၉ ပိုးတွေ့သူ ၇၀၀၀ ရှိ

မြန်မာရွှေ့ပြောင်းအလုပ်သမားတွေ အများစု အလုပ်လုပ်ကိုင်နေကြတဲ့ ထိုင်းနိုင်ငံ၊ စမွတ်စာခွန်းခရိုင်ထဲက စက်ရုံတွေမှာ ကိုဗစ်-၁၉ ရောဂါပိုးတွေ့လူနာ ၇,၀၀၀ လောက် စစ်ဆေးတွေ့ရှိခဲ့ရတယ်လို့ ဘန်ကောက်ပို့စ်သတင်းမှာ ဖော်ပြပါတယ်။

အဆိုပါဒေသတွင်းက စက်ရုံအလုပ်သမား ၁ သိန်းကျော်ကို ကိုဗစ်-၁၉ ရောဂါပိုးရှိ မရှိ စမ်းသပ်စစ်ဆေးခဲ့ချိန်မှာ ခုလိုတွေ့ရှိရတာ ဖြစ်တယ်လို့ ထိုင်းကျန်းမာရေးဝန်ကြီးဌာန၊ ကိုဗစ်-၁၉ ရောဂါအခြေအနေ စီမံခန့်ခွဲရေးစင်တာ ပြောရေးဆိုခွင့်ရှိသူ ဒေါက်တာ ထဝီဆစ်လ်ပ်က ပြောပါတယ်။

ရောဂါပိုးတွေ့ရှိရသူတွေထဲက အလုပ်သမားတွေအများစုကတော့ စက်ရုံကြီး ၉ ခု ကဖြစ်ပြီး အဲဒီထဲက ၄ ရုံမှာတော့ ပိုးတွေ့အလုပ်သမား ၁၀,၀၀၀ နဲ့အထက်ပါဝင်နေတာ ဖြစ်ပါတယ်။

ဒေါက်တာ ထဝီဆစ်လ်ပ်ကတော့ တချို့စက်ရုံတွေမှာ အလုပ်သမား ၂၆ ရာခိုင်နှုန်း ကနေ ၂၇ ရာခိုင်နှုန်းထိ ကိုဗစ်-၁၉ ရောဂါကူးစက်ခံထားရတယ်လို့ ပြောပါတယ်။

စမွတ်စာခွန်းခရိုင်ဟာ ထိုင်းနိုင်ငံမှာ ကိုဗစ်-၁၉ ရောဂါကူးစက်ခံရမှု ဒုတိယလှိုင်း ကာလမှာ အဓိကကူးစက်ပျံ့နှံ့ရာ ဗဟိုချက်ဖြစ်ပြီး ကူးစက်ပျံ့နှံ့မှုဟာ ပြီးခဲ့တဲ့ ဒီဇင်ဘာလ တုန်းက ပုစွန်ဈေးကတဆင့် စတင်ခဲ့တာလို့ ဆိုပါတယ်။

ကိုဗစ်-၁၉ ရောဂါကူးစက်ပျံ့နှံ့မှု လှိုင်းသစ်စတင်ချိန်ကတည်းက စမွတ်စာခွန်းခရိုင် တွင်းမှာ ရောဂါကူးစက်ခံရသူအရေအတွက် ၁၅,၁၈၆ ယောက်ရှိလာခဲ့ပြီး ဒါဟာ စုစုပေါင်း ရေဂါကူးစက်ခံရသူအရေအတွက်ရဲ့ ၈၀ ဒသမ ၄၉ ရာခိုင်နှုန်း ရှိနေတာ ဖြစ်ပါတယ်။       ထိုင်းတနိုင်ငံလုံးမှာတော့ လက်ရှိအချိန်ထိ ကိုဗစ်-၁၉ ရောဂါကူးစက်ခံရသူစုစုပေါင်း ၂၃,၉၀၃ ယောက်၊ သေဆုံးသူ အယောက် ၈၀ ရှိနေခဲ့ပြီ ဖြစ်ပါတယ်။

3 months Ago
More News
Up