မြန်မာနိုင်ငံ

July 16, 2021

မြန်မာနိုင်ငံတွင်းရှိ ကိုရီးယားနိုင်ငံသားများကို သံရုံးက Mask နှင့် ကိုဗစ်-၁၉ Test Kit များ ပေးရန် စီစဉ်

မြန်မာနိုင်ငံထဲမှာ ရှိနေကြတဲ့ ကိုရီးယားနိုင်ငံသားတွေကို သံရုံးက နှာခေါင်းစည်း Mask တွေနဲ့ ကိုဗစ်-၁၉ Test Kit တွေ ပေးသွားဖို့ ရှိနေတယ်လို့ ကိုရီးယားနိုင်ငံခြားရေးဝန်ကြီးက ပြောပါတယ်။

အဆိုပါ အစီအစဉ်ကိုတော့ လာမယ့် သီတင်းပတ်ထဲမှာ ပေးသွားဖို့ ရှိနေပြီး ဒါဟာ ပြီးခဲ့တဲ့ ရက်တွေအတွင်း မြန်မာနိုင်ငံမှာ ကိုဗစ်-၁၉ ရောဂါကူးစက်ခံရပြီး ကိုရီးယားနိုင်ငံသား ၃ ယောက် သေဆုံးခဲ့ပြီးတဲ့နောက်မှာ ဆုံးဖြတ်ခဲ့တာလို့ ဆိုပါတယ်။

မြန်မာနိုင်ငံမှာတော့ လတ်တလောအခြေအနေမှာ နေ့စဉ်ရက်ဆက်ဆိုသလို ကိုဗစ်-၁၉ ရောဂါကူးစက်မှုနှုန်းတွေ မြင့်တက်နေပြီး သေဆုံးမှုတွေလည်း မြင့်တက်နေတာပါ။

“မြန်မာနိုင်ငံရဲ့ ဆိုးရွားတဲ့ ကိုဗစ်-၁၉ ရောဂါ အခြေအနေကို သုံးသပ်ရာမှာ နိုင်ငံခြားရေး၀န်ကြီးဌာနအနေနဲ့ ထိခိုက်လွယ်အုပ်စုထဲက ပြည်သူတွေကို နှာခေါင်းစည်း Mask တွေနဲ့ ကိုဗစ်-၁၉ Test Kit တွေ ပေးဝေသွားဖို့ စီစဉ်ထားပါတယ်။”

လာမယ့်တပတ်ထဲမှာတော့ ဝန်ကြီးဌာနက အောက်ဆီဂျင်စက် ၂၆ လုံးကို မြန်မာ နိုင်ငံတွင်းက ကိုရီးယားနိုင်ငံသားတွေဆီ ပို့ဆောင်ပေးသွားဖို့ ရှိနေတယ်လို့လည်း ပြောပါတယ်။

ပြီးခဲ့တဲ့ ဖေဖော်ဝါရီလက စတင်ကာ စစ်အာဏာသိမ်းမှုကြောင့် ဆေးဘက်ဆိုင်ရာ ဝန်ထမ်း တော်တော်များများဟာ အာဏာရှင်စနစ်ဆန့်ကျင်ဆန္ဒပြပွဲတွေမှာ ပါဝင်ခဲ့ကြပြီး ဆေးဝါးကုသမှုတွေ ထိန်းချုပ်ကန့်သတ်ခံထားရတာကြောင့် လက်ရှိ ကိုဗစ်-၁၉ တတိယလှိုင်းမှာ လူနာတွေ ရောဂါကူးစက်ခံရပြီး သေဆုံးရတာတွေ၊ လိုအပ်တဲ့ အောက်ဆီဂျင် မလုံလောက်တဲ့ ပြဿနာတွေ၊ ဆေးရုံနဲ့ ဆေးကုသရေးစင်တာတွေ လိုအပ်ချက်တွေ ရှိနေတာ ဖြစ်ပါတယ်။

လက်ရှိမှာတော့ ပိုးတွေ့နှုန်းတွေ မြင့်တက်နေတဲ့ ရန်ကုန်မှာ နေထိုင်ကြတဲ့ ကိုရီး ယားနိုင်ငံသား ၂ ထောင်လောက် ရှိနေတယ်လို့ ဆိုပါတယ်။

1 week Ago

July 14, 2021

မြန်မာနိုင်ငံတွင် ဒီမိုကရေစီပြန်ရရေး အရေးယူဆောင်ရွက်ရန် အာဆီယံကို အမေရိကန် တောင်းဆို

မြန်မာနိုင်ငံရဲ့ စစ်တပ်အာဏာသိမ်းမှုနဲ့ပတ်သက်ပြီး နက်နက်ရှိုင်းရှိုင်း စိုးရိမ်ပူပန်နေပြီး မြန်မာနိုင်ငံမှာ အကြမ်းဖက်မှုတွေကို အဆုံးသတ်ဖို့နဲ့ ဒီမိုကရေစီပြန်လည်ထူထောင်ဖို့အတွက် အရေးယူဆောင်ရွက်ရန် အာဆီယံနိုင်ငံတွေကို တောင်းဆိုတယ်လို့ အမေရိကန်နိုင်ငံခြားရေး၀န်ကြီး အန်တိုနီဘလင်ကန်က ပြောပါတယ်။ 

အရှေ့တောင်အာရှနိုင်ငံများအသင်း (အာဆီယံ) ဟာ ဖေဖော်ဝါရီ ၁ ရက်ကတည်းက စစ်တပ်အာဏာသိမ်းမှုကြောင့် မငြိမ်မသက်ဖြစ်နေခဲ့ရတဲ့ အာဆီယံအဖွဲ့ဝင် မြန်မာနိုင်ငံအပေါ် အဓိကသံတမန်ရေး အရဦးဆောင်ကြိုးပမ်းနေပါတယ်။

ဗုဒ္ဓဟူးနေ့က အာဆီယံနိုင်ငံခြားရေး၀န်ကြီးတွေနဲ့  အွန်လိုင်းကနေဆွေးနွေးရာမှာ  ဝန်ကြီးဘလင်ကန်က ပြီးခဲ့တဲ့ ဧပြီလက သဘောတူခဲ့တဲ့ အချက် ၅ ချက်ပါ အာဆီယံ သဘောတူညီချက်နဲ့ပတ်သက်ပြီး ချက်ချင်းအရေးယူဖို့ အာဆီယံကို တိုက်တွန်းခဲ့တယ်လို့ အမေရိကန်နိုင်ငံခြားရေး၀န်ကြီးဌာန ပြောခွင့်ရပုဂ္ဂိုလ် နက်ဒ်ပရိုက်စ်က ထုတ်ပြန်ကြေညာချက်ထဲမှာ ပြောပါတယ်။

မြန်မာနိုင်ငံဟာ စစ်တပ်အာဏာသိမ်းပြီးကတည်းက ပရမ်းပတာ ဖြစ်ခဲ့ရပြီး လုံခြုံရေးတပ်ဖွဲ့တွေက ရာနဲ့ချီတဲ့ ဆန္ဒပြသူတွေကို သတ်ဖြတ်ခဲ့ပြီး လူပေါင်းထောင်ချီပြီး ထောင်သွင်းအကျဉ်းချခဲ့ပါတယ်။ ဆန္ဒပြသပိတ်တွေကို ချည့်နဲ့အောင်လုပ်ပြီး နယ်စပ်ဒေသတွေမှာလဲ တိုက်ပွဲတွေ အနှံ့အပြားဖြစ်နေရပါတယ်။ 

တိုင်းပြည်အတွင်းမတရား ဖမ်းဆီးထားသူများ အားလုံးကိုလွှတ်ပေးဖို့နဲ့ မြန်မာနိုင်ငံရဲ့ ဒီမိုကရေစီအသွင်ကူးပြောင်းရေးကို ပြန်လည်ထူထောင်ဖို့ ဝန်ကြီး ဘလင်ကန်က တောင်းဆိုခဲ့ပါတယ်။ 

ဒါ့အပြင် တောင်တရုတ်ပင်လယ်ပြင်မှာ တရုတ်ရဲ့ တရားမ၀င် ရေပြင်ပိုင်ဆိုင်မှု ပြောဆိုချက်ကို အမေရိကန်ကပယ်ချခဲ့တယ်ဆိုတာကိုလည်း အလေးအနက် ပြောကြားသွားပြီး ဝါရှင်တန်ဟာ တရုတ်နိုင်ငံရဲ့ အတင်းအကျပ်ဖိအားပေးမှုကို ရင်ဆိုင်နေရတဲ့ အရှေ့တောင်အာရှမှ ဥပဒေအကူအညီ တောင်းခံထားသူတွေနဲ့အတူ ရပ်တည်နေပါတယ်လို့လည်း ဝန်ကြီးက ပြောသွားပါတယ်။

1 week Ago

မြန်မာပြည်သူများအတွက် ဂျပန်က အရေးပေါ်လူသားချင်းစာနာမှုအကူအညီ ဒေါ်လာ ၅ ဒသမ ၈ သန်း ပေးမည်

ဖေဖော်ဝါရီ ၁ ရက် စစ်အာဏာသိမ်းမှုအပြီးမှာ အစားအစာနဲ့ နေ့စဉ်လိုအပ်တဲ့ပစ္စည်းတွေ ရှားပါးလာတဲ့ မြန်မာနိုင်ငံအတွက်  ဂျပန်နိုင်ငံက အရေးပေါ်လူသားချင်းစာနာမှုအကူအညီ ဒေါ်လာ ၅ ဒသမ၈ သန်းပေးမှာဖြစ်တယ်လို့ နိုင်ငံခြားရေးဝန်ကြီး တိုရှိမိဆုမိုတဲဂီက ပြောပါတယ်။

ကမ္ဘာ့စားနပ်ရိက္ခာအစီအစဉ် (WFP) နဲ့ ကုလသမဂ္ဂကလေးများရန်ပုံငွေတို့လို U.N. အေဂျင်စီတွေကနေတဆင့် ပေးအပ်မယ့်အကူအညီဟာ စစ်တပ်က အာဏာသိမ်းပြီးကတည်းက လူနေမှုအခြေအနေ သိသိသာသာဆိုးရွားလာခဲ့တဲ့ ထိုင်းနိုင်ငံနယ်စပ်အနီးက မြန်မာနိုင်ငံရဲ့ အရှေ့တောင်ပိုင်းမှာ ထိခိုက်နစ်နာရသူပေါင်း ၁၃၆၀၀၀  လောက်အတွက် ထောက်ပံ့ကူညီမှုပေးနိုင်ဖို့ မျှော်လင့်ထားပါတယ်။

ဂျပန်နိုင်ငံက နောက်ဆုံး ထောက်ပံ့ပေးခဲ့တာဟာ မြန်မာနိုင်ငံရဲ့အကြီးဆုံးမြို့ဖြစ်တဲ့ ရန်ကုန်မြို့ရှိ လူပေါင်း ၆ သိန်းလောက်အတွက် WFP မှတဆင့် အစားအစာတွေ ထောက်ပံ့ဖြန့်ဖြူးပေးဖို့ ကနဦး ဒေါ်လာ ၄ သန်း ပေးလှူခဲ့တာပါ။ 

မြန်မာနိုင်ငံရဲ့ ဒီမိုကရေစီနည်းကျ ရွေးကောက်တင်မြှောက်ထားတဲ့ အစိုးရနဲ့ အရပ်သား ပြည်သူလူထုခေါင်းဆောင် ဒေါ်အောင်ဆန်းစုကြည်ကို ဖြုတ်ချလိုက်ပြီးနောက်ပိုင်းမှာ အခုနောက်ဆုံး ပံ့ပိုးမှုအပါအဝင် မြန်မာနိုင်ငံကို ဂျပန်က လူသားချင်းစာနာထောက်ထားတဲ့ အကူအညီအဖြစ် ဒေါ်လာသန်း ၂၀ လောက် လှူဒါန်းထားပါတယ်။ 

ဂျပန်အစိုးရအနေနဲ့ မြန်မာပြည်သူလူထုအတွက် အကူအညီတွေကို ဆက်လက်ပံ့ပိုးပေးသွားမှာဖြစ်တယ်လို့ ဂျပန်နိုင်ငံခြားရေးဝန်ကြီးက သတင်းစာရှင်းလင်းပွဲမှာ ပြောပါတယ်။ 

မြန်မာစစ်တပ်ရဲ့ ငြိမ်းချမ်းစွာဆန္ဒပြသူများကို အကြမ်းဖက်ဖြိုခွဲနှိမ်နင်းခြင်းကို ဂျပန်အစိုးရက ရှုတ်ချခဲ့ပြီး အကြမ်းဖက်မှုတွေကိုရပ်တန့်ဖို့၊ ဒေါ်အောင်ဆန်းစုကြည်နဲ့ တခြားထိန်းသိမ်းခံထားရသူတွေကို လွှတ်ပေးဖို့နဲ့ ဒီမိုကရေစီလုပ်ငန်းစဉ်ကို ပြန်သွားဖို့ တောင်းဆိုခဲ့ပါတယ်။

ဂျပန်အစိုးရဟာ စစ်တပ်အာဏာသိမ်းမှုကို တုံ့ပြန်တဲ့အနေနဲ့ မြန်မာနိုင်ငံအတွက် တရားဝင် ဖွံ့ဖြိုးတိုးတက်ရေးဆိုင်ရာ အထောက်အပံ့အသစ်တွေကို ရပ်ဆိုင်းထားပါတယ်။ 

ဒါပေမဲ့ စစ်အုပ်စုဝင် လူပုဂ္ဂိုလ်တဦးချင်းနဲ့ ပါဝင်ပတ်သက်သူတွေအပေါ်  ပိတ်ဆို့ဒဏ်ခတ်ဖို့ကိုတော့ အမေရိကန်ပြည်ထောင်စုနဲ့ တခြားဒီမိုကရေစီနိုင်ငံတွေနဲ့အတူ ပူးပေါင်းလုပ်ဆောင်တာတော့ မရှိသေးပါဘူး။

1 week Ago
More News
Up