မြန်မာတပ်မတော်

May 13, 2020

တရုတ်စစ်တပ်က မြန်မာတပ်မတော်ကို COVID-19 ကာကွယ်ရေးဆိုင်ရာ ဆေးပစ္စည်းများလှူဒါန်း 

တရုတ်ပြည်သူ့လွတ်မြောက်ရေးတပ်မတော်ကနေ မြန်မာ့တပ်မတော်ကို COVID-19 ရောဂါ ကာကွယ်ထိန်းချုပ်ကုသရာမှာ အသုံးပြုတဲ့ အထောက်အကူပြု ဆေးပစ္စည်းတွေ မနေ့က ပေးပို့လှူဒါန်းတယ်လို့ တပ်မတော်ကွယ်ရေး ဦးစီးချုပ်ရုံးက ထုတ်ပြန်ပါတယ်။ လှူဒါန်းတဲ့ ဆေးပစ္စည်းတွေ မနေ့ကညနေပိုင်းက ရန်ကုန် အပြည်ပြည်ဆိုင်ရာလေဆိပ်ကို တရုတ်ပြည်သူ့ လွတ်မြောက်ရေး တပ်မတော်(လေ)က လေယာဉ်နဲ့ ရောက်ရှိလာတာပါ။ လေယာဉ်နဲ့အတူပါလာတဲ့ မြန်မာ့တပ်မတော်ကို လှူဒါန်းတဲ့ PPE ဝတ်စုံ အစုံ ၁၀,၀၀၀ ကို တရုတ်ပြည်သူ့ လွတ်မြောက်ရေးတပ်မတော်ကိုယ်စား စစ်သံမှူးက ရန်ကုန်တိုင်းစစ်ဌာနချုပ် တိုင်းမှူး ဗိုလ်ချုပ် သက်ပုံကို လွှဲပြောင်းပေးခဲ့တယ်လို့ ဆိုပါတယ်။     အဲဒီလေယာဉ်ဟာ ည ၈ နာရီမှာ ပြန်လည်ထွက်ခွာသွားပြီး COVID-19 ရောဂါ ကာကွယ်ရေး၊ ထိန်းချုပ်ရေးနဲ့ ကုသရေးဆိုင်ရာကိစ္စရပ်တွေအတွက် မြန်မာ့တပ်မတော်ကဆေးဘက်ဆိုင်ရာ ကျွမ်းကျင်ပညာရှင်တွေနဲ့ အမြင်ချင်းဖလှယ်ဆွေးနွေးဖို့ ရန်ကုန်ကိုရောက်နေတဲ့ တရုတ်ပြည်သူ့လွတ်မြောက်ရေး တပ်မတော်က Dr. Bai Chong  ဦးဆောင်တဲ့ ဆေးဘက်ဆိုင်ရာကျွမ်းကျင် ပညာရှင် ၆ ယောက်လည်း ပြန်လိုက်သွားခဲ့ပါတယ်။ သူတို့မပြန်ခင်မှာ ဆေးဘက်ဆိုင်ရာကျွမ်းကျင်ပညာရှင်အဖွဲ့ခေါင်းဆောင် Dr. Bai Chong  နဲ့အဖွဲ့ကို မြန်မာ့တပ်မတော်ကိုယ်စား ကာကွယ်ရေးဦးစီးချုပ်ရုံး (ကြည်း) ဆေးဝန်ထမ်း ညွှန်ကြားရေးမှူးရုံး၊ ညွှန်ကြားရေးမှူး ဗိုလ်ချုပ်စိုးဝင်းက Video Call  နဲ့ ဆက်သွယ်ပြီး COVID-19 ရောဂါကာကွယ်ရေး၊ ထိန်ချုပ်ရေးနဲ့ ကုသရေးလုပ်ငန်းတွေမှာ တပ်မတော်အနေနဲ့ နိုင်ငံတော်ရဲ့ ဆောင်ရွက်မှုထဲကနေ လိုက်ပါဆောင်ရွက်နေတာဖြစ်တယ်လို့ ပြောပါတယ်။ အခုလို မြန်မာနိုင်ငံနဲ့ မြန်မာ့တပ်မတော်ရဲ့ ဆောင်ရွက်ချက်တွေကို ကူညီပေးခဲ့တာတွေ၊ တရုတ်နိုင်ငံနဲ့ဆေးတပ်ဖွဲ့အနေနဲ့ ရောဂါဖြစ်ပွားချိန်ကစပြီး အချိန်တိုအတွင်း အောင်အောင်မြင်မြင် ကုသထိန်းချုပ်နိုင်ခဲ့တဲ့ အတွေ့အကြုံကောင်းတွေကို မျှဝေပေးခဲ့တာနဲ့ အထောက်အကူပြု ဆေးပစ္စည်းတွေ ပေးပို့လှူဒါန်းတာတွေအတွက်မြန်မာ့တပ်မတော်က အထူးကျေးဇူးတင်တယ်လို့ လည်း ပြောခဲ့ပါတယ်။ အဲဒီ တရုတ်ဆေးဘက်ဆိုင်ရာ ကျွမ်းကျင်ပညာရှင်ဆေးအဖွဲ့ဟာ မြန်မာနိုင်ငံမှာ ၂ ပတ်ကြာနေထိုင်ပြီး COVID-19 ရောဂါနဲ့ပတ်သက်ပြီး ကြိုတင်ကာကွယ်ရေး၊ ထိန်းချုပ်ရေးနဲ့ ကုသရေးဆိုင်ရာကိစ္စတွေကို မြန်မာ့တပ်မတော်က ဆေးဘက်ဆိုင်ရာ ကျွမ်းကျင်ပညာရှင်တွေနဲ့ အမြင်ချင်းဖလှယ်ဆွေးနွေးတာ၊ ဆေးဘက်ဆိုင်ရာထောက်ပံ့ရေးပစ္စည်းတွေ လှူဒါန်းတာတွေ လုပ်ခဲ့ပါတယ်။ ဓာတ်ပုံ-CINCDS
1 year Ago

February 28, 2020

အန်စီအေစာချုပ်လက်မှတ်ထိုးထားသည့်  RCSS/SSA နှင့် မြန်မာတပ်မတော် တိုက်ပွဲဖြစ် 

အစိုးရနဲ့ တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူ စာချုပ် (အန်စီအေ) ချုပ်ဆို ထားတဲ့ ရှမ်းပြည်တပ်မတော် တောင်ပိုင်း RCSS/SSA တပ်ဖွဲ့ဝင်တွေနဲ့ မြန်မာ တပ်မတော် လက်အောက်ခံတပ်ဖွဲ့တွေအကြား ရှမ်းပြည်တောင်ပိုင်း မိုင်းကိုင်မြို့နယ် ဟမ်းဟိုင်းကျေးရွာမှာ  တိုက်ပွဲတွေ ဖြစ်နေပါတယ်။ RCSS/SSA တပ်ဖွဲ့ဝင်တွေဟာ လွိုင်တွမ်းတောင်ပေါ်မှာ အခြေချလှုပ်ရှားသွားလာနေစဉ်  မြန်မာ့တပ်မတော်ဘက်က ဖေဖော်ဝါရီ ၂၇ ရက် မနက် ၇ နာရီ ၅၀ မိနစ်လောက်မှာ ဝင်ရောက်ပစ်ခတ်ခဲ့တယ်လို့  ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေးက ဒီဗွီဘီကို ပြောပါတယ်။  “ကျနော်တို့ တပ်ဖွဲ့ဝင်တွေက အဲဒီတောင်ကုန်းနားမှာ ဟိုးအရင် အန်စီအေ လက်မှတ် မထိုးခင်ကတည်းက လှုပ်ရှားသွားလာ အခြေချနေတာပါ။  မနေ့မနက်ကတော့ မြန်မာ့တပ်မတော် ဘက်က မပြောမဆိုနဲ့ လာပြီးပစ်ခတ်တယ်။ အဲဒီတော့ နှစ်ဘက်အပြန်အလှန်ပစ်ခတ်မှု ရှိတယ်။ မနေ့က တနေကုန်၊ လေယာဉ်ပျံ တစီးလည်း လာဝဲပျံသွားတယ်။ ဒီကနေ့ မနက်မှာတော့ တိုက်ပွဲ ရှိတယ်လို့ အစီရင်ခံလာတာ မရှိပေမယ့် တပ်မတော်ဘက်က လူအင်အားထပ်ဖြည့်ပြီး တောင်ကုန်း တဝိုက်မှာ နေရာလာယူထားကြတယ်။ မော်တာနဲ့ ပစ်လာတယ်။ အချိန်မရွေး ပစ်ခတ်မှုပြန်ဖြစ်နိုင်တဲ့သဘောရှိတယ်။” လာရောက်ပစ်ခတ်တဲ့ထဲမှာ ခမရ ၅၂၅၊  ၅၂၀၊ ၅၇၅၊ ၅၇၄ အစရှိတဲ့ တပ်ရင်းလက်အောက်ခံတပ်ဖွဲ့ဝင်တွေပါဝင်ပြီး အင်အား ၄၀၀ ကျော်က အလှည့်အပြောင်းနဲ့ တိုက်နေတယ်လို့ ဆိုပါတယ်။  ပစ်ခတ်မှုကြောင့် ထိခိုက်ဒဏ်ရာရတာ ရှိမရှိတော့ မစိစစ်ရသေးဘူးလို့ ဆိုပါတယ်။  ဒီကိစ္စနဲ့ပတ်သက်ပြီး ခိုလမ်မြို့မှာရှိတဲ့ RCSS ဆက်ဆံရေးရုံးကတော့ အရှေ့အလယ်ပိုင်း တိုင်းစစ်ဌာနချုပ် တာဝန်ရှိသူဆီအကြောင်းကြားထားတယ်လို့ သိရပါတယ်။   ဒီပစ်ခတ်မှုဟာ ယုံကြည်မှုပျက်ပြားစေပြီး ငြိမ်းချမ်းရေးလုပ်ငန်းစဉ်ပါ ထိခိုက်နိုင်တဲ့ အတွက်  နှစ်ဦးနှစ်ဘက် အမြန်ဆုံးတွေ့ဆုံဆွေးနွေး သင့်တယ်လို့ ဆိုပါတယ် ။  သူတို့အနေနဲ့ ငြိမ်းချမ်းရေးကို လိုလားပြီး UPDJC  ပြည်ထောင်စုငြိမ်းချမ်းမှု ဆွေးနွေးရေး ပူးတွဲကော်မတီ အစည်းအဝေးနဲ့ JMC ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲ စောင့်ကြည့်ရေးကော်မတီ အစည်းအဝေးတွေ ဆက်သွားဖို့  ဒီလ ၂၄ ရက်နေ့ ဗဟို ကော်မတီအစည်းအဝေးမှာ ဆုံးဖြတ်ထားပေမယ့်လည်း တပ်မတော်ကလာရောက် ပစ်ခတ်တဲ့ကိစ္စ မဖြေရှင်းနိုင်ရင်တော့ အဆိုပါဆုံးဖြတ်ချက်ကို ပြန်သုံးသပ်ရမယ်လို့ ဗိုလ်မှူးကြီး အုမ်ခေးက ပြောပါတယ်။ ပြည်ထောင်စုငြိမ်းချမ်းရေးညီလာခံ ၂၁ ရာစု ပင်လုံ စတုထ္ထအစည်းအဝေးကို  သတ်မှတ်ထားတဲ့အချိန်ကာလထဲမှာ ကျင်းပနိုင်ဖို့နဲ့ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲတွေ ဆက်ပြီးကျင်းပဖို့ ကြိုးစားနေကြချိန်မှာ ခုလိုပစ်ခတ်မှုတွေ ပေါ်ပေါက် လာတာဖြစ်ပါတယ်။  ရှမ်းပြည်တပ်မတော် RCSS/SSA ဟာ အစိုးရနဲ့ အန်စီအေ စာချုပ်လက်မှတ်ထိုးထားတာ ၄ နှစ်ကျော်ခဲ့ပြီ ဖြစ်ပေမယ့်လည်း ငြိမ်းချမ်းရေးလုပ်ငန်းစဉ်ဆွေးနွေးပွဲမှာ တစ်ဆို့မှုတွေရှိနေဆဲဖြစ်ပြီး အောက်ခြေပိုင်းမှာလည်းထိတွေ့ ပစ်ခတ်မှုတွေ ရှိနေပါတယ်။ ဓာတ်ပုံ- TaiFreedomShan    
1 year Ago
Up