မြန်မာ

May 6, 2021

အကြမ်းဖက်စစ်ခေါင်းဆောင်များကို လူသတ်မှုဖြင့် အမှုဖွင့်ရန် ဂျပန်ရောက် မြန်မာများ ကြိုးပမ်း

မြန်မာပြည်သူ ၇၀၀ ကျော်ကို သတ်ဖြတ်ခဲ့တဲ့   အကြမ်းဖက်စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်အပါအဝင် စစ်ခေါင်းဆောင်ဆောင်တွေကို  လူသတ်မှုနဲ့ အမှုဖွင့်ပေးဖို့ တိုကျိုမြို့ ချီယိုဒရှိ ဂျပန်ရဲချုပ်ရုံးကို ဂျပန်နိုင်ငံရောက်မြန်မာတွေက မေလ ၆ ရက် ဒီနေ့ညနေပိုင်းကသွား ရောက်တောင်းဆို ဆန္ဒပြခဲ့ကြပါတယ်။

“ဒီနေ့အထိအကြမ်းဖက်လူသတ်နေတဲ့ အာဏာသိမ်းစစ်ကောင်စီက မြန်မာပြည်သူတွေကို အကြောင်းမဲ့ မတရားသတ်နေကြတာ ပြည်သူ ၇၀၀ ကျော်ရှိနေပြီ ဒါကို ဂျပန်ရဲတွေအနေနဲ့ နိုင်ငံတကာအင်တာပိုရဲတွေနဲ့ပေါင်းပြီး ဖမ်းဝရမ်းထုတ်ပေးဖို့ လာရောက်တောင်းဆိုတာ”လို့  ဆန္ဒပြသူတဦးဖြစ်တဲ့  ဒေါက်တာစန်းစန်းမေဖြိုးအောင်က ပြောပါတယ်။

ဗိုလ်ချုပ်မှူးကြီး မင်းအောင်လှိုင်အပါအဝင် စစ်ခေါင်းဆောင်တွေ ဂျပန်နိုင်ငံကို လာရင်  ချက်ချင်းဖမ်းဆီးပေးဖို့လည်း  ဆန္ဒပြသူတွေက ကြွေးကြော်နေကြတာကိုလည်း တွေ့ရပါတယ်။

ဦးဆောင်သူတဦးဖြစ်တဲ့ ဦးမြင့်ဆွေက “ အခုဒီနေ့ စာရွတ်စာတမ်းတွေ အပြည့်အစုံပါပါတယ်။ ဒါပေမဲ့ ဒီရဲချုပ်ရုံးက ညွှန်ပြပေးလို့ အဆင့်ဆင့်လုပ်ဖို့ရှိပါတယ်။ ဒါပေမဲ့ ကျနော်တို့ မြန်မာပြည်သူတွေအတွက် မဖြစ်ဖြစ်အောင် ဂျပန်ရှေ့နေတွေနဲ့ ပူးပေါင်းပြီးအဆုံးထိရအောင် လုပ်သွားမယ်” လို့  ဒီဗွီဘီကို ပြောပါတယ်။ 

ပြီးခဲ့တဲ့ ဧပြီ ၂၄ ရက်နေ့က အင်ဒိုနီးရှားမှာကျင်းပတဲ့  အာဆီယံခေါင်းဆောင်များ အစည်းအဝေးတက်ဖို့လာတဲ့ အကြမ်းဖက်စစ်ခေါင်းဆောင်ဗိုလ်ချုပ်မှူးကြီး မင်းအောင်လှိုင်ကို ဖမ်းဆီးနိုင်ဖို့အတွက် အမျိုးသားညီညွတ်ရေးအစိုးရ NUG က  နိုင်ငံတကာရဲတပ်ဖွဲ့ INTERPOL ထံ တောင်းဆိုခဲ့ပါသေးတယ်။ 

1 week Ago

May 5, 2021

မြန်မာပြည်သူများကို အားပေးသည့် စာရေးသားလှုပ်ရှားမှု ဂျပန်နိုင်ငံသားများ ပြုလုပ်

အကြမ်းဖက်စစ်အာဏာရှင်လက်အောက်မှာ မြန်မာပြည်သူတွေနေ့စဉ် အနိုင့်ကျင့် သတ်ဖြတ် နှိပ်စက်ခံနေရတာကို ဂျပန်ပြည်သူတွေက သိရှိပြီး အားပေးတဲ့ စာရေးသားလှုပ်ရှားမှု ကမ်ပိန်းကို  မေလ ၂ ရက်က တိုကျို Musashi koganei မူဇရှိခိုခနဲအိဘူတာမှာ ပြုလုပ်ခဲ့ပါတယ်။

မြန်မာပြည်သူတွေက စစ်အာဏာရှင်ကို လက်မလျှော့ပဲ ကြံ့ကြံ့ခံတော်လှန်နေတာကို အားပေးတဲ့ ဂျပန်စကားကို  မြန်မာလိုပြန်ရေးပြီး ဓာတ်ပုံရိုက်ဖြန့်ချိတဲ့ လှုပ်ရှားမှုဖြစ်ပြီး ခိုခနဲအိ တိုင်းလွှတ်တော် အမတ်မစ္စ Katayama Kaoru နဲ့ မြို့နယ်ကောင်စီဝင်တွေကလည်း ဒီလှုပ်ရှားမှုမှာ ပါဝင်ကူညီခဲ့ပါတယ်။ 

ဂျပန်ပြည်သူတွေဟာ မြန်မာနိုင်ငံမှာ စစ်အာဏာသိမ်းတဲ့နေ့ကစလို့ မြန်မာနိုင်ငံအကြောင်း ရုပ်သံကနေတဆင့်တွေ့ မြင်သိနေရလို့ စာနာ သနားနေမိကြောင်းနဲ့ အခုလိုသူတို့ရဲ့ အားပေးစကား ကို မြန်မာပြည်သူတွေထံ သတင်းစကားပေးပို့ခွင့်ရလို့ ဝမ်းသာမိတယ်လို့မျက်ရည်တွေကျပြီး ပြောခဲ့ကြတဲ့ ဂျပန်လူမျိုးတွေလည်း ရှိပါတယ်။

ဒီလှုပ်ရှားမှုမှာ လုပ်အားပေးပါဝင်သူတဦးဖြစ်တဲ့ မခင်စန္ဒာက မြန်မာနိုင်ငံကိုချစ်တဲ့ ဂျပန်လူမျိုး ကိုမျိုးမျိုးလို့ခေါ်တဲ့ မစ္စတာ စူဇူခီးအပါအဝင်မြန်မာနိုင်ငံကိုချစ်တဲ့ ဂျန်လူမျိုးတွေနဲ့ ပူးပေါင်း ပြုလုပ်ကြတာဖြစ်ပြီး အခုလို တိုကျိုက လူစည်ကားတဲ့နေရာတွေမှာ လုပ်တာ ဒုတိယအကြိမ်လို့လည်း ပြောပြပါတယ်။

စစ်အာဏာရှင်လက်အောက်  မြန်မာနိုင်ငံနဲ့ပတ်သတ်တဲ့ အခြေအနေတွေကို ထင်ဟပ်တဲ့ ဓာတ်ပုံပြပွဲကိုလည်း ဂျပန်လူမျိုးအငြိမ်းစားကျောင်းဆရာ ဦးကျော်က မြို့နယ်နေ့ ဂျပန်ပြည်သူတွေကို ရှင်းလင်းပြခဲ့တဲ့ပွဲလည်း ပူးတွဲကျင်းခဲ့ပါတယ်။

အကြဖမ်းဖက်စစ်အုပ်စု လက်အောက်မြန်မာပြည်သူတွေခံစားနေရတာတွေ ဂျပန်ပြည်သူတွေသိရှိအောင် တခြားမြို့နယ်တွေမှာလည်း အလားတူ လှုပ်ရှားမှုတွေ ဆက်လက် ပြုလုပ်သွားမယ်လို့လည်း ဦးဆောင်သူ မစ္စတာစူဇူခီး က ဒီဗွီဘီကို ပြောပါတယ်။

သတင်း၊ ဓာတ်ပုံ- ဇော်ဇော်လှိုင်

1 week Ago
More News
Up