မြစ်ကြီးနား

January 31, 2023

မြစ်ကြီးနားတွင် ဆိုင်ကယ်စီး လူငယ် ၂ ဦးကို စစ်တပ်က ဖမ်းဆီး၊ ရှမ်းမြောက်‌ဒေသ၌ CDM ဝန်ထမ်းများကို လိုက်လံဖမ်းဆီးနေ

ကချင်ပြည်နယ်၊ မြစ်ကြီးနားမြို့၊ သီတာရပ်ကွက်မှာ ဇန်နဝါရီ ၃၀ ရက် နေ့လယ်ပိုင်းက  ဆိုင်ကယ်မောင်းနှင်လာတဲ့ လူငယ်နှစ်ယောက်ကို စစ်ကောင်စီတပ်က ဖမ်းဆီးသွားတယ်လို့ ဒေသခံတွေက ပြောပါတယ်။

သီတာရပ်ကွက် အုပ်ချုပ်ရေးမှူးရုံးနားက လမ်းသွယ် ၅ အတွင်း ဆိုင်ကယ်နဲ့လာတဲ့ လူငယ် ၂ ယောက်ကို အရပ်ဝတ် လက်နက်ကိုင် စစ်ကောင်စီတပ်ဖွဲ့တွေက ပိတ်ဆို့ ဖမ်းဆီးခဲ့တာပါ။

သီတာရပ်ကွက်မှာ နေထိုင်သူတဦးက “သီတာရပ်ကွက် အုပ်ချုပ်ရေးမှူးရုံးနား လမ်းသွယ် ၅ ထဲမှာ နေ့လယ် ၂ နာရီလောက်က ဆိုင်ကယ်နှစ်စီးနဲ့ လူငယ်လေးယောက်ကို ဖမ်းတာ။ နှစ်ယောက်လွတ်သွားပြီး နှစ်ယောက် ဖမ်းမိသွားတယ်။ ဖမ်းမိတဲ့ နှစ်ယောက်ကိုလည်း ကြိုးတုပ်ပြီး အိမ်စီးကားနဲ့ ခေါ်သွားတယ်” လို့ ပြောပါတယ်။

စစ်ကောင်စီတပ်က ဖမ်းဆီးခံရသူ မောင်စိုးသီဟထွန်းနဲ့ မောင်နိုင်ထက်လင်းတို့ကို နာမည်အတိအကျနဲ့ ဘာကြောင့်ဖမ်းတယ်ဆိုတာကို ဆက်လက်စုံစမ်းဆဲ ဖြစ်ပါတယ်။

ရှမ်းပြည်နယ်မြောက်ပိုင်းမှာတော့ လားရှိုးမြို့ အပါအဝင် ဒေသတွင်းက CDM ဝန်ထမ်းတွေကို အခုနှစ် ဇန်နဝါရီလကစပြီး စစ်ကောင်စီက ဖမ်းဆီးနေတာကြောင့် လုံခြုံရာ ထွက်ပြေးနေရတယ်လို့ CDM ဆရာဝန်တဦးက ပြောပါတယ်။

ရှမ်းမြောက်ဒေသအတွင်း CDM လုပ်သူ ၂၅၀ လောက်ရှိပြီး CDM တွေကို ဖမ်းဆီးဖို့ အမိန့်ကျလာပြီး လားရှိုးနဲ့ တန့်ယန်းမြို့တွေမှာ ပြီးခဲ့တဲ့ နှစ်ပတ်ကျော်ကတည်းက စတင်ဖမ်းဆီးတာတွေ ရှိပေမဲ့ CDM ဝန်ထမ်းတချို့ တိမ်းရှောင်နေကြရတာပါ။

လားရှိုးက ထွက်ပြေးတိမ်း‌ရှောင်လာတဲ့ သွားဆရာဝန်တဦးက “ကျနော့်အသိတွေထဲက တချို့ ဖမ်းခံရပြီ။ ကျနော်ကတော့ လွတ်လာတယ်။ ရှမ်းမြောက်မှာ CDM လုပ်သူ ၂၅၀ ကို ဖမ်းဖို့ ရှိတယ်။ အခု‌ထက် ပိုလုံခြုံတဲ့‌နေရာကို ရောက်ဖို့လိုတယ်” လို့ ပြောပါတယ်။

တန့်ယန်းမြို့ဟာ စစ်တပ်ထိန်းချုပ်မှုအားကောင်းတဲ့မြို့ ဖြစ်တာ‌ကြောင့် အာဏာသိမ်းပြီးတဲ့နောက် ဆန္ဒပြမှုတွေကို ရက်တိုသာ ပြုလုပ်နိုင်ခဲ့တယ်လို့ ဒေသခံတွေက ဆိုပါတယ်။

၂၀၂၁ ဖေဖော်ဝါရီ ၁ ရက် စစ်အာဏာသိမ်းပြီးနောက် လားရှိုးမြို့ဟာ ရှမ်းမြောက်‌ဒေသ ဆန္ဒပြမှုတွေမှာ လူအင်အားထောင်နဲ့ချီ ပါဝင်ဆန္ဒပြတဲ့ မြို့ဖြစ်ပြီး ဆန္ဒပြချိန်က တိုင်းရင်းသား အင်အားများစွာ ပါဝင်တဲ့အပြင် နိုင်ငံရေးတက်ကြွလှုပ်ရှားသူ၊ လူမှုရေးအသင်းအဖွဲ့နဲ့ CDM ဝန်ထမ်းတွေလည်း အများအပြား ပါဝင်ခဲ့ပါတယ်။

1 week Ago

January 25, 2023

မြစ်ကြီးနားတွင် နေအိမ် ၄ လုံး မီးလောင် အိမ်ထောင်စု ၈ စု အိုးမဲ့အိမ်မဲ့ဖြစ်

ကချင်ပြည်နယ်၊ မြစ်ကြီးနားမြို့၊ ရန်ကြီးအောင်ရပ်ကွက်၊ မြို့ဦးကျောင်းရှေ့မှာ ဇန်နဝါရီ ၂၅ ရက် ဒီကနေ့မနက်က နေအိမ် ၄ လုံး မီးလောင်သွားပြီး  အိမ်ထောင်စု ၈ စု အိုးမဲ့အိမ်မဲ့ ဖြစ်သွားပါတယ်။ 

ဒီကနေ့မနက် ၈ နာရီခွဲလောက်က ၅ ခန်းတွဲပါ နေအိမ် ၁ လုံးရဲ့ အခန်း ၁ ခန်းကနေမီးစတင် လောင်ကျွမ်းပြီး မြို့နယ်မီးသတ်တပ်ဖွဲ့က ကား ၄ စီး၊ ရေတိုင်ကီ ၆ စီးနဲ့ လာရောက် ငြှိမ်းသတ်ခဲ့သလို လူမှုကူညီရေးအဖွဲ့နဲ့ ရပ်ကွက်ထဲကလူတွေ ဝိုင်းဝန်းငြှိမ်းသတ်ရာမှာ မနက် ၉ နာရီ ၁၀ မိနစ်မှာ မီးထိန်းနိုင်ခဲ့တယ်လို့  မြစ်ကြီးနားမြို့ မျိုးဆက်သစ်လူမှုကယ်ဆယ်ရေးအသင်း အထွေထွေအတွင်းရေးမှူး ကိုမင်းရာဇာကျော်က ဒီဗွီဘီကို ပြောပါတယ်။

“၅ ခန်းတွဲအိမ်ကနေ စလောင်ပြီး ဘေးအိမ်တွေကူးသွားတာပါခင်ဗျ။  ၅ ခန်းတွဲက ထရံကာ အိမ်ဖြစ်ပြီး ဘေးအိမ် ၃ လုံးက နှစ်ထပ်ပျဉ်ထောင်အိမ်တွေဖြစ်ပါတယ်။ မီးကူးတာ မြန်တော့ အားလုံးလောင်သွားတယ်။ အထဲကပစ္စည်းတွေ နိုင်သလောက်သယ်ထုတ်လို့ရတာတွေပဲ ပြန်ရ တယ်။”

မီးလောင်မှုမှာ ထိခိုက်ဒဏ်ရာရသူမရှိပေမဲ့ အိမ်ထောင်စုပေါင်း ၈ စု အိုးမဲ့အိမ်မဲ့ ဖြစ်သွားပါတယ်။ မီးလောင်ရတဲ့အကြောင်းရင်းနဲ့ ပတ်သက်လို့ သက်ဆိုင်ရာကစိစစ်နေဆဲ ဖြစ်ပါတယ်။

2 weeks Ago

မြစ်ကြီးနားရှိ စစ်တပ်ပိုင် မြဝတီဘဏ်ခွဲတွင် ဗုံးကွဲ

ကချင်ပြည်နယ်၊ မြစ်ကြီးနားမြို့ရှိ စစ်တပ်ပိုင် မြဝတီဘဏ်ခွဲမှာ  ဇန်နဝါရီ ၂၄ ရက် မနေ့ ညနေပိုင်းက ဗုံးပေါက်ကွဲမှုဖြစ်ပွားပြီး ဘဏ်လုံခြုံရေးဝန်ထမ်းတစ်ဦး ထိခိုက်သေဆုံးခဲ့တယ်လို့ ဒေသခံတွေထံက သိရပါတယ်။

မြေမြင့်ရပ်ကွက်မှာရှိတဲ့ မြဝတီဘဏ်ခွဲမှာ ဗုံးတစ်လုံးပေါက်ကွဲခဲ့ကာ ဘဏ်လုံခြုံရေး ဝန်ထမ်းတစ်ယောက်  ထိခိုက်သေဆုံးပြီး ၂ ဦးထက်မနည်း ထိခိုက် ဒဏ်ရာ ရခဲ့ပါတယ်။

ဘဏ်အနီးနေထိုင်သူ တစ်ဦးက “ညနေ ၅ နာရီလောက်က  ဘဏ်အရှေ့အပေါက်ဝကို လာပစ်သွားတာ။ အဲ့ ဘဏ်ရှေ့ကင်းတဲမှာ စစ်တပ်က အမြဲလုံခြုံရေးယူထားတယ်။ နောက်ပြီး ဘဏ်ရှေ့မှာလည်း သွပ်ဆူးကြိုးတွေ အမြဲကာထားတာ အဲ့ဒါကို လာပစ်သွားတယ်။ ဗုံးကတော့ တစ်လုံးထဲပေါက်တာ။ ဝန်ထမ်းတစ်ဦးသေတယ်။ နှစ်ဦးလောက်လည်း ထိခိုက်မှုရှိတယ်။ ဗုံးပေါက်ကွဲပြီး ဆိုင်ကယ်တွေကို သေနတ်နဲ့ ပစ်တာတွေ့ရတယ်" လို့ ပြောပါတယ်။

ဗုံးပေါက်ကွဲအပြီး စစ်ကောင်စီတပ်က လုံခြုံရေးတင်းကျပ်ကာ ဘဏ်ရှေ့ လမ်းမကြီးကနေ ဖြတ်သွားတဲ့ ဆိုင်ကယ်တွေကို စစ်ဆေးရန် ရပ်တန့်ခိုင်းပြီး မရပ်ပေးခဲ့တဲ့ ဆိုင်ကယ်တွေကို သေနတ်နဲ့ ပစ်ခတ်ခဲ့တာပါ။

ဘဏ်အနီး ဈေးရောင်း ချနေသူ တစ်ဦးက"ဘဏ်ရှေ့မှာ လုံခြုံရေးအင်အားတိုးချထားပြီး ဆိုင်ကယ်တွေကိုစစ်တယ်။ ယောကျ်ားလေးတွေမောင်းတဲ့ဆိုင်ကယ် အများစုကို သေချာကို စစ်နေတာ။ အဲ့ဒီမှာ ကောင်လေး နှစ်ယောက်မောင်းလာတဲ့ဆိုင်ကယ်က ရပ်မပေးဘဲ မောင်းသွားလို့ သေနတ်နဲ့ နှစ်ချက်လှမ်းပစ်တယ်။ လူတော့ မထိဘူး" လို့ ပြောပါတယ်။

မြဝတီဘဏ် ဗုံးကွဲပြီးနောက်  စစ်ကောင်စီတပ်က   အခင်းဖြစ်ပွားခဲ့တဲ့နေရာ    အေးမြသာယာ ရထားသံလမ်းဆုံနဲ့ တပ်ကုန်းရပ်ကွက် မြစ်ကြီးနား - ဆွမ်ပရာဘွမ်လမ်းမကြီးက ရွှေလမ်းမထိပ် မီးပွိုင့်စတဲ့နေရာတွေမှာ မော်တော်ယာဉ်တွေကို  လိုင်စင်စစ်ဆေးပြီး ဖမ်းဆီးနေတာပါ။

မြစ်ကြီးနားမြို့ရှိ စစ်ကောင်စီခြေလျင်တပ်ရင်း ခ.လ.ရ (၂၁) မှာ ဇန်နဝါရီ ၂၁ရက် မနက်ပိုင်းက  ဗုံးသီးနဲ့ ပစ်ခတ်တိုက်ခိုက်ခံခဲ့ရပြီးနောက်  စစ်ကောင်စီတပ်ဖွဲ့ဝင်တွေက ဗလမင်းထင်တံတားအနီးနဲ့ အေးမြသာယာ သံလမ်းဆုံအနီးမှာ  မော်တော်ယာဉ်တွေကို စစ်ဆေး ဖမ်းဆီးခဲ့ပါတယ်။

2 weeks Ago
More News
Up