မဲဆောက်

August 17, 2021

မဲဆောက်တွင် မြန်မာရွှေ့ပြောင်းလုပ်သားများကို ကိုဗစ်-၁၉ ကာကွယ်ဆေး စထိုးပေး

ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မြို့မှာ ရွှေ့ပြောင်းအလုပ်သမားတွေအတွက် ထိုင်းအစိုးရက  ကိုဗစ်-၁၉ ကူးစက်ရောဂါကာကွယ်ဆေးကို ဩဂုတ် ၁၇ ရက် ဒီကနေ့မနက်မှာ ပထမဆုံးအကြိမ်အဖြစ် စတင်ထိုးပေးနေပါတယ်။

မဲဆောက်မြို့ အာရှလမ်းမကြီးပေါ်ရှိ ရော်ဘင်ဆန်ကုန်တိုက်နားမှာ  မနက် ၈ နာရီခွဲမှ ညနေ ၅ နာရီထိ ထိုးနှံပေးမှာဖြစ်တယ်လို့  အဆိုပါနေရာကို သွားရောက်ကြည့်ရှုခဲ့သူ မဲဆောက်အခြေစိုက် မြန်မာပြည်သားများအရေးပူးတွဲလှုပ်ရှားမှုကော်မတီ JACBA ဥက္ကဋ္ဌ ဦးမိုးကြိုးက ဒီဗွီဘီကို ပြောပါတယ်။

“ဒီနေ့ကတော့ ကျနော်တို့ မြန်မာရွှေ့ပြောင်းလုပ်သားတွေ ပထမဆုံး ကာကွယ်ဆေးစထိုးရတဲ့ နေ့ပေါ့ခင်ဗျာ၊ ကျနော်သွားကြည့်တဲ့အချိန် လူကတော့သိပ်မများပါဘူး။ တစ်ဦးနဲ့ တစ်ဦးလည်း ၆ ပေခွာခွာတန်းစီနေကြတယ်၊ ဒီမတိုင်ခင် နာမည်ကြိုပေးထားတဲ့သူတွေကို ထိုးပေးနေတာပါခင်ဗျ၊  စက်ရုံဆိုလည်း စက်ရုံအလိုက်၊ အဖွဲ့အစည်းက ဆိုရင်လည်းအဖွဲ့အလိုက် စာရင်းပေးထားသူတွေပေါ့။  တနေ့ကို ၂၀၀ ကနေ ၃၀၀ ထိ ထိုးပေးမယ်လို့ သိရတယ်။”

ကာကွယ်ဆေးထိုးခွင့်ရတဲ့ မြန်မာရွှေ့ပြောင်းလုပ်သားတွေဟာ ထိုင်းနိုင်ငံမှာ တရားဝင် နေထိုင်ခွင့်အထောက်အထားပြည့်စုံ သူတွေဖြစ်ကြပါတယ်။ အခုပထမအကြိမ်ထိုးပေးရာမှာ စျေးဆိုင်ခန်းတွေ၊ အလှပြင်ဆိုင်တွေ၊ စားသောက်ဆိုင်တွေ စတဲ့ လူများနဲ့ ဆက်ဆံရတဲ့နေရာတွေမှာ အလုပ်လုပ်ကိုင်ကြတဲ့ ရွှေ့ပြောင်းလုပ်သားတွေကို အဓိက ဦးစားပေးပြီး ထိုးပေးနေတာဖြစ်ပါတယ်။

ကိုဗစ်ကာကွယ်ဆေးလာထိုးတဲ့ အလှပြင်ဆိုင်က အလုပ်သမတဦးက “ကျမတို့ အလုပ်သမားတွေဟာ အန္တရယ်ရှိတဲ့ နေရာမှာအလုပ်လုပ်ရတယ်၊ အလှပြင်ဆိုင်ဆိုတော့ပိုဆိုးတာပေါ့။ ဒီနေ့မှာ ကိုဗစ် ကာကွယ်ဆေး လာထိုးပေးရတဲ့အခါ အတိုင်းမသိဝမ်းသာတယ်။ ဒါမှ ကိုယ့်အတွက်ရော တခြားသူအတွက်ပါ ကိုဗစ် မကူးစက်တော့ဘူးလေ။”လို့ ပြောပါတယ်။

မြန်မာလုပ်သားတွေ ခုလို ကိုဗစ်ကာကွယ်ဆေးထိုးခွင့်ရတဲ့ အပေါ် ထိုင်းနိုင်ငံသားအလုပ်ရှင်တစ်ဦးကလည်း “ဝမ်းသာစရာပါ။ ဒါက ထိုးသင့်တဲ့ ကာကွယ်ဆေးပဲ။ သူတို့(အလုပ်သမားတွေ) ကိုဗစ်ကူးစက်ရင် ကျတော်တို့ကိုပါ အန္တရာယ်ပေးတယ်လေ။ ဒါကြောင့်လာထိုးပေးတယ်။ သူတို့လည်း လူပဲလေ။ ဖြစ်နိုင်ရင်တော့ မဲဆောက်မှာ နေထိုင်တဲ့  ထိုင်း၊ မြန်မာလူမျိုး မရွေး အားလုံးကို ထိုးပေးစေချင်တယ်” လို့ ပြောပါတယ်။

ဒါပေမဲ့ ရွှေ့ပြောင်းလုပ်သားတွေအတွက်ထိုးနှံပေးတဲ့ တရုတ်နိုင်ငံထုတ် Sinovac ကာကွယ်ဆေးအပေါ် ယုံကြည်မှုနည်းနေတာကြောင့် ရာခိုင်နှုန်းအနည်းငယ်သာ ထိုးနှံလိမ့်မယ်လို့ ဦးမိုးကြိုးက ပြောပါတယ်။ 

မြန်မာရွှေ့ပြောင်းအလုပ်သမားတွေအတွက်  ကိုဗစ်ကာကွယ်ဆေးထိုးပေးတဲ့ အစီအစဉ်ဖြစ်ပေါ်လာဖို့ ထိုင်းနိုင်ငံအစိုးရ ကျန်းမာရေးဝန်ကြီးဌာနက ပုဂ္ဂိလက အဖွဲ့အစည်းတွေ ပူးပေါင်းဆွေးနွေမှုနဲ့ အကောင်အထည်ဖော်ခဲ့တာဖြစ်ပါတယ်။

မဲဆောက်မြို့မှာ ကိုဗစ်-၁၉ ကူးစက်ပြန့်ပွားမှု လျော့နည်းရလေအောင် ထိုင်း-မြန်မာ မခွဲခြားဘဲ  ကိုဗစ်ကာကွယ်ဆေးကို အားလုံးအတွက် ထိုးပေးသွားမှာဖြစ်ပြီး လက်ရှိထိုးပေးတဲ့ ကာကွယ်ဆေးဟာ အခမဲ့ ဖြစ်ကြောင်းလည်း သိရပါတယ်။

မဲဆောက်မြို့နယ်မှာ မနေ့က ကိုဗစ်-၁၉ ကူးစက်ခံရသူ လူနာသစ် နောက်ထပ် ၉၄ ဦးရှိပြီး ၊  ဇွန်လ ၁ ရက်မှ ဩဂုတ် ၁၆ ရက်ထိ ကိုဗစ် - ၁၉ ကူးစက်ခံရသူစုစုပေါင်း ၃၃၈၂ ဦးရှိပါတယ်။  မဲဆောက်ဆေးရုံကြီးမှာ ၅၀၁ ဦး၊ ပုဂ္ဂလိကဆေး ရုံတွေမှာ ၁၃၀ ဦး၊ ယာယီဖွင့်လှစ်ထားတဲ့ ဆေးရုံမှာ ၂၈၅ ဦးကုသနေပြီး ရောဂါမပြင်းထန်ဘဲ စက်ရုံအလုပ်ရုံတွေမှာ ကွာရန်တင်းဝင်နေရသူ ၅၆၆ ဦးရှိတယ်လို့ မဲဆောက်ဆေးရုံကြီးရဲ့ လူမှုကွန်ရက်စာမျက်နှာမှာ ဖော်ပြထားပါတယ်။

1 month Ago

July 29, 2021

ထိုင်း-မြန်မာနယ်စပ် တာ့ခ်ခရိုင် ၄ မြို့နယ်တွင် ရေကြီးရေလျှံ၊ လူပေါင်း ၁၅၀၀ ကျော် ရေဘေးသင့်

ထိုင်း-မြန်မာနယ်စပ် တာ့ခ်ခရိုင်ရှိ ၄ မြို့နယ်မှာ မိုးအဆက်မပြတ်ရွာသွန်းပြီး သောင်ရင်းမြစ်ရေလျှံကျလာတဲ့အတွက် မြစ်ကမ်းနားနီး ကျေးရွာနဲ့ ရပ်ကွက်ထဲက နေအိမ်ပေါင်း ၆၀၀ ကျော် ရေဝင်ကာ ပြည်သူပေါင်း ၁၅၀၀ ကျော် ရေဘေးသင့်ရတယ်လို့ ထိုင်းရတ်သတင်းမှာ ဖော်ပြပါတယ်။

တာ့ခ်ခရိုင်ထဲမှာ တစ်ပတ်လောက် မိုးရွာသွန်းနေတာကြောင့် သောင်ရင်းမြစ်နဲ့ မြစ်လက်တက် ချောင်းတွေ ရေလျှံပြီး မဲ့လမတ်၊ ထာ့ဆောင်ယန်း၊ ဖုတ်ဖရနဲ့ မဲဆောက်မြို့နယ်ရှိ ကျေးရွာနဲ့ ရပ်ကွက်တချို့ ရေတွေဝင်ရောက်လာတာလို့ ဆိုပါတယ်။

ခုတပတ်တွင်း သောင်ရင်းမြစ်ရေ ၁ မီတာထိ မြင့်တက်နေပြီး ဇူလိုင် ၂၈ ရက်နေ့က မိုးထပ်ရွာတာကြောင့် နောက်ထပ် ၁ မီတာမြင့်လာလို့ ၂ မီတာထိ မြင့်တက်လာကြောင်း၊ သောင်ရင်းမြစ်ကမ်းနဘေး မဲဆောက်မြို့ ထာ့ဆိုင်လွတ်ရပ်ကွက်ထဲကို ရေတွေဝင်လာလို့ ပြည်သူတွေ အမြင့်ရပ်ကွက်ထဲကို ခဏရွှေ့ပြောင်းကြရပြီး ဓာတ်လိုက်မှာစိုးတဲ့အတွက် သက်ဆိုင်ရာက လျှပ်စစ်ဓာတ်အားလိုင်းတွေ ဖြတ်တောက်ထားရတယ်လို့ ဆိုပါတယ်။

မဲ့လမတ်မြို့နယ်ထဲမှာတော့ တောင်ကျရေတွေဟာ မယ်လမော့ချောင်းရေထဲကို စီးဝင်လာပြီး သောင်ရင်းမြစ်ထဲ စီးဆင်းလို့ မရတော့တဲ့အတွက် အနီးနား ရပ်ကွက်နဲ့ ‌ကျေးရွာထဲကို ရေတွေလျှံကျလာတာလို့ ဆိုပါတယ်။ မယ်လမတ်မြို့ နယ်ထဲမှာ အိမ်ခြေပေါင်း ၆၇၀ က ပြည်သူ ၁၅၀၀ ကျော်ရေဘေးသင့်ခဲ့ပါတယ်။ 

မဲဆောက်မြို့နယ် မယ်ပအုပ်စု ပါဟွေ့ကျေးရွာမှာ မြန်မာခြံအလုပ်သမား ၁၁ ဦး ရေထဲ ပိတ်မိနေတဲ့အတွက် ကယ်ဆယ်ရေးအဖွဲ့တွေက လှေနဲ့သွားခေါ်ကာ ဘုန်းကြီးကျောင်းမှာ ယာယီ ရွှေ့ပြောင်းပေးခဲ့ရတယ်လို့ ချနယ်လ် ၃ သတင်းမှာ ဖော်ပြပါတယ်။ 

ဒါ့အပြင် မဲ့ကာဆာအုပ်စုထဲမှာလည်း မြန်မာလုပ်သားနဲ့ ရွာသား စုစုပေါင်း ၃၀ ကျော် ရေထဲပိတ်မိ နေပြီး ၂ ရက်တာ ထမင်းမစားရတဲ့အတွက် ကယ်ဆယ်ရေးအဖွဲ့က လှေနဲ့ ထမင်းထုတ်တွေ သွား ဝေပေးခဲ့ရတယ်လို့ ဆိုပါတယ်။

တာ့ခ်ခရိုင်နဲ့ ဆက်စပ်နေတဲ့ ဗိဿနုလုတ်ခရိုင်ထဲမှာလည်း ရေကြီးရေလျှံလို့ မြို့နယ် ၂ ခုက ရပ်ကွက် နဲ့ ကျေးရွာပေါင်း ၄၆ ခု ရေဘေးသင့်ရတယ်လို့ ထိုင်းရုပ်သံသတင်းမှာ ဖော်ပြပါတယ်။ 

ဇူလိုင် ၂၉ ရက် မနက် ၆ နာရီမှ ဇူလိုင် ၃၀ ရက် မနက် ၆ နာရီထိ ထိုင်းနိုင်ငံ ခရိုင် ၁၁ ခုမှာ မိုးကြီးနိုင်ပြီး တောင်ကျရေတွေ သတိထားဖို့၊ ကမ်းခြေနားနီးခရိုင်တွေမှာ ဘင်္ဂလားပင်လယ်မှာ လှိုင်းလုံးအမြင့် ၂ မီတာမှ ၃ မီတာထိ တက်လာနိုင်တာကြောင့် လှေငယ်တွေ ကမ်းမထွက်ဖို့ ထိုင်းမိုးလေဝသဌာနက ထုတ်ပြန်ထားပါတယ်။

အဆိုပါ ၁၁ ခရိုင်မှာ မယ်ဟောင်ဆောင်၊ တာ့ခ်၊ ဘင်ကန်၊ စကွန်းနခွန်း၊ နခွန်းပထုန်၊ ချိုင်းယဖွန်း၊ ဘူရီလမ်၊ ရယောင်း၊ ကျန်ထပူရီ၊ ဘန်ကောက်၊ ချွန်းဖွန်းစတဲ့ခရိုင်တွေပါဝင်ပြီး ဒေသရဲ့ ၄၀ မှ ၆၀ ရာခိုင်နှုန်းထိ မိုးရွာနိုင်တယ်လို့ ဆိုပါတယ်။

2 months Ago
More News
Up