မိုးကုတ်မြို့

January 25, 2022

မိုးကုတ်မြို့ ပိန်းပြစ်မူလတန်းကျောင်းကို စစ်ကောင်စီက ဖိအားပေးဖွင့်ခိုင်း

မန္တလေးတိုင်း၊ မိုးကုတ်မြို့နယ်၊ ပိန်းပြစ်ကျေးရွာ မူလတန်းလွန်ကျောင်းပြန်ဖွင့်ဖို့နဲ့ ကျောင်းမအပ်တဲ့ နေအိမ်တွေကို မီးရှို့မယ်ဆိုပြီး စစ်ကာင်စီတပ်က ခြိမ်းခြောက်ခဲ့တယ်လို့ ဒေသခံတွေက ပြောပါတယ်။

“ကျောင်းနေအရွယ်ကလေးရှိတဲ့အိမ်တိုင်း ကျောင်းအပ်ရမယ်၊ ကျောင်းမအပ်တဲ့အိမ်ကို မီးရှို့မယ်၊ ပုဒ်မ ၅၀၅ နဲ့လည်း တရားစွဲမယ်လို့ ပြောတယ်" လို့ ရွာသားတစ်ဦးက ပြောပါတယ်။

ဇန်နဝါရီ ၂၁ ရက်နေ့ကလည်း ပိန်းပြစ်ကျေးရွာ မူလတန်းလွန်ကျောင်း ကျောင်းအုပ်ဆရာမကြီး ဒေါ်ပန်းနုကြွယ်နဲ့ လီဆူရွာအတွင်းက ကျောင်းဆရာမတို့ကို မိုးကုတ်ဗျူဟာမှူးနဲ့ ပိန်းပြစ်ရွာမှာ တာဝန်ကျနေတဲ့ သုံးပွင့်အရာရှိ ဇော်နိုင်ထွန်းတို့က  ကျောင်းဖွင့်ဖို့ အတင်းအားဓမ္မ ဖိအားပေးခဲ့တယ်လို့ ဒေသခံတွေက ပြောပါတယ်။

“ကျောင်းအုပ်ဆရာမကြီးက CDM ဝင်ထားတော့ ကျောင်းမဖွင့်ရင် ဖမ်းဆီးအရေးယူမယ်လို့ ပြောသွားတယ်" လို့ ဒေသခံတစ်ဦးက ပြောပါတယ်။

ဇန်နဝါရီ ၂၂ ရက်နေ့က ပိန်းပြစ်လီဆူရွာအတွင်းမှာရှိတဲ့ တအိမ်တစ်ယောက်အစည်းဝေးတက်ဖို့၊ မတက်ပါက အာဏာဖီဆန်မှုနဲ့ အရေးယူပြီး  မတက်ရောက်တဲ့နေအိမ်တွေကို ချိပ်ပိတ်ဆိုပြီး ခြိမ်းခြောက်ခဲ့တယ်လို့ ဆိုပါတယ်။

အစည်းအဝေးပြုလုပ်နေချိန်မှာ စစ်ကောင်စီတပ်တွေက ရွာအဝင်အထွက် လမ်းတိုင်းကို ပိတ်ထားပြီး ကျောင်းကော်မတီနဲ့ ရာအိမ်မှူးအသစ်တွေ ခန့်အပ်ခဲ့တယ်လို့ သိရပါတယ်။

မူလတန်းလွန်ကျောင်းက ကျောင်းအုပ်ဆရာမကြီးကိုလည်း လစာထုတ်ဖို့ ဖိအားပေးပြီး  မှတ်ပုံတင်ကိုလည်း သိမ်းဆည်းထားကာ စစ်ကောင်စီတပ်က ပေးတဲ့ စာအိတ်ကိုလည်း အများရှေ့မှာ ဖွင့်ဖတ်ဖို့ ဖိအားပေးခဲ့တယ်လို့ ဒေသခံတွေကဆိုပါတယ်။

စစ်ကောင်စီတပ်ရဲ့ ဖိအားပေးမှုကြောင့် ဇန်နဝါရီ ၂၄ ရက်နေ့မှာ လီဆူတိုင်းရင်းသားတွေ နေထိုင်တဲ့ ပိန်းပြစ်ကျေးရွာက မူလတန်းလွန်ကျောင်းမှာ ကျောင်းအပ်သူ ၁၂၀ ကျော်ရှိခဲ့ပြီး အဲဒီထဲက အရပ်ဝတ်နဲ့ ကျောင်းတက်ရောက်သူ ၃၀ ဝန်းကျင်သာရှိတယ်လို့ ဒေသခံတွေက ပြောပါတယ်။

ပိန်းပြစ်ကျေးရွာက မိုးကုတ်မြို့နဲ့ ၈ မိုင်ဝေးတဲ့နေရာက ရွာဖြစ်ပြီး မိုးကုတ်မြို့တွင်းမှာတော့ အထက်တန်းကျောင်း ၄ ကျောင်း ပေါင်းပြီး အရပ်ဝတ်နဲ့ တက်နေကြတယ်လို့ သိရပါတယ်။

1 day Ago

January 18, 2022

မိုးကုတ်မြို့က ကျောက်မျက်တူးဖော်သူများကို စစ်ကောင်စီက ဖမ်းဆီးငွေတောင်း

မန္တလေးတိုင်း၊ မိုးကုတ်မြို့မှာ ဇန်နဝါရီ ၁၂ ရက်နေ့ကစတင်ပြီး စစ်ကောင်စီတပ်က ကျောက်မျက်တူးဖော်သူတွေကို ကျောက်မျက်တူးဖော်ခွင့်မရှိဘူးလို့ ဆိုကာ ဖမ်းဆီးပြီး ငွေတောင်းခံနေတယ်လို့ ဒေသခံတွေက ပြောပါတယ်။

“တွင်းသွားတဲ့လမ်းမှာ တွေ့တာ၊ မင်းတို့ လုပ်ခွင့်မရှိဘူး၊ လုပ်မယ်ဆို ပိုက်ဆံပေးရမယ်လို့ ပြောတယ်။ ပေးဖို့ပိုက်ဆံက မရှိတော့ လှည့်ပြန်ခဲ့ရတယ်” လို့ တနိုင်တပိုင်ကျောက်မျက်တွင်း လုပ်ကိုင်သူတစ်ဦးက ပြောပါတယ်။

ကျောက်မျက်တွင်းတွေမှာ စစ်ကောင်စီတပ်တွေက ကျောက်မျက်လုပ်ပိုင်ခွင့်တွေ ပိတ်ထားပြီး လုပ်ငန်းခိုးလုပ်သူတွေကို ဖမ်းဆီးမိပါက ငွေတောင်းခံပြီး ပြန်လွှတ်ပေးတယ်လို့ ဆိုပါတယ်။

“ခိုးလုပ်ကြရတာ၊ ခိုးလုပ်လို့ မိရင် ဆိုင်ကယ်တစ်စီးဆို တစ်သိန်း ပေးရတယ်၊ လူကတော့ ဆယ်သိန်းကနေစပြီး တောင်းချင်သလို တောင်းတယ်၊ ရှာဖွေလုပ်စားရတာ တော်တော်လေး ခက်ခဲလာတယ်။”

မိုးကုတ်မြို့နေသူတွေဟာ ကျောက်မျက်တူးဖော်မှုလုပ်ငန်းနဲ့ အသက်မွေးဝမ်းကျောင်းပြုနေကြတာ ဖြစ်ပြီး ကိုဗစ်-၁၉ ရောဂါတွေကြောင့် ကျောက်မျက်ထာပွဲစျေးတွေကို ပိတ်ထားရတဲ့အတွက် မြို့နေပြည်သူတွေအနေနဲ့ စီးပွားရေးအခြေအနေ ကျပ်တည်းနေကြတယ်လို့ ဒေသခံတစ်ဦးက ပြောပါတယ်။

မိုးကုတ်မြို့ ဂေါက်ကွင်းက ကျောက်မျက်တွင်းတွေမှာ ကျောက်မျက်တူးဖော်ခွင့်ရဖို့ ဒေသခံတွေအနေနဲ့ ငွေပေးခဲ့ရပေမဲ့ စစ်ကောင်စီတပ်က ကျောက်မျက်လုပ်ကိုင်ခွင့် မပေးတော့တာကြောင့် ကျောက်မျက်တူးဖော်သူတွေမှာ အခက်ခဲတွေရှိနေတယ်လို့ သိရပါတယ်။

မိုးကုတ်မြို့ ပန်းခြံထာပွဲစျေးနဲ့ မဏိမင်္ဂလာထာပွဲစျေးတွေ ပိတ်ထားရတဲ့အပြင် ကျောက်မျက်လုပ်ကိုင်သူတွေဆီကနေ အမည်မသိအဖွဲ့က စာပို့ပြီး ငွေတောင်းခံတာတွေေ ရှိနေတယ်လို့ သိရပါတယ်။

မိုးကုတ်မြို့က ကျောက်မျက်လုပ်ငန်း လုပ်ကိုင်သူတွေအနေနဲ့ စီးပွားရေးအဆင်မပြေမှုတွေ ကြုံတွေ့နေရတဲ့အပြင် ကျောက်မျက်လုပ်ငန်း လုပ်ကိုင်ရဖို့ စစ်ကောင်စီတပ်ကို ငွေကြေးပေးနေရတဲ့အပြင် အမည်မသိအဖွဲ့ရဲ့ ခြိမ်းခြောက်ငွေတောင်းခံမှုတွေကိုပါ ကြုံတွေ့ရင်ဆိုင်နေရတယ်လို့ ဒေသခံတွေဆီက သိရပါတယ်။

1 week Ago
More News
Up