မိုင်းဆွဲ

January 24, 2023

မြိုင်နှင့် ရေစကြိုတွင် စစ်ကောင်စီတပ် မိုင်းဆွဲတိုက်ခိုက်ခံရ၊ ရေစကြို အုပ်ချုပ်ရေးမှူး ၁ ဦး ပစ်သတ်ခံရ

မကွေးတိုင်း၊ မြိုင်မြို့နယ်မှာ ဇန်နဝါရီ ၂၃ ရက် ညနေပိုင်းက စစ်ကောင်စီတပ်သားတွေ မိုင်းဆွဲတိုက်ခိုက်ခံရပြီး သေဆုံးဒဏ်ရာရရှိသူများပြားတယ်လို့ မြိုင် ပ.က.ဖ ကနေ သိရပါတယ်။

ပခုက္ကူကနေ မြိုင်မြို့နယ် ကျောက်ခွက်ရေနံမြေ Well2 စစ်စခန်းကို ရိက္ခာလာပို့တဲ့ စစ်ကောင်စီယာဥ်တန်းအတွက်လုံခြုံရေးယူထားတဲ့ ခြေလျင်ရှေ့ပြေးကင်းတန်းကို မနေ့က ညနေ ၃ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက ကိုင်းတောမရဲစခန်းနဲ့ Well2ကြားမှာ မိုင်းဆွဲတိုက်ခိုက်ခဲ့တာလို့ မြိုင် ပ.က.ဖ တပ်ရင်း(၁) တပ်ရင်းမှူး ဗိုလ်ယာက ပြောပါတယ်။

“အဲဒီစစ်သားတွေဟာ ကျနော်တို့တပ်ဖွဲ့တွေ ချထားတဲ့ မိုင်းအကြီး/အသေး ၁၅ လုံး၊ မိုင်းပွိုင့် ၃ ပွိုင့်အပေါ်ကို တည့်တည့်ရောက်လာတဲ့ အချိန်မှာ ဖောက်ခွဲတိုက်ခိုက်လိုက်လို့ စစ်ကောင်စီတပ်သား အယောက် ၂၀ လောက်သေဆုံးနိုင်ပြီး အများအပြား ဒဏ်ရာရရှိခဲ့တယ်။”

အထိနာသွားတဲ့ စစ်ကြောင်းဟာ ရှေ့ဆက်တိုးလာပြီး ဒီနေ့ ဇန်နဝါရီလ ၂၄ ရက်နေ့မနက်ပိုင်းမှာ အနီးပတ်ဝန်းကျင်ကျေးရွာတွေကို လက်နက်ကြီးလက်နက်ငယ်တွေနဲ့ ပစ်ခတ်နေတယ်လို့ ဗိုလ်လက်ယာကပြောပါတယ်။

မြိုင်မြို့နယ်မှာ ဇန်နဝါရီ ၂၁ ရက်နဲ့ ၂၂ ရက်တွေတုန်းကလည်း  ပျူစောထီးစခန်း ၂ ခုနဲ့ ကင်းပုန်းဝပ်နေတဲ့ စစ်ကောင်စီတပ်သားတွေတိုက်ခိုက်ခံရပြီး စစ်ကောင်စီဘက်က ၂ ယောက်သေဆုံးကာ ၈ ယောက် လောက် ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။

မကွေးတိုင်း၊ ရေစကြိုမြို့မှာလည်း ဇန်နဝါရီ ၂၄ ရက် မနက်ပိုင်းက စစ်ကောင်စီတပ်သားတွေ မိုင်းဆွဲတိုက်ခိုက်ခံရပြီး ၂ ယောက်သေဆုံးခဲ့တယ်လို့ ရေစကြို ပ.က.ဖ ကနေ သိရပါတယ်။

ရေစကြိုမြို့ပေါ်မှာ ဆိုင်ကယ်တွေနဲ့ လှည့်လည်သွားလာနေတဲ့ စစ်ကောင်စီ တပ်သားတွေကို  ဒီမနက် ၄ နာရီလောက်မှာ ရေစကြို ပ.က.ဖ က မိုင်းဆွဲတိုက်ခိုက်ခဲ့တာလို့ ရေစကြို ပ.က.ဖ ခေါင်းဆောင် ရဲဘော်ဝေကြီးက ဒီဗွီဘီကို ပြောပါတယ်။

“ဆိုင်ကယ် ၂ စီးနဲ့  ၄ ယောက် ကင်းလှည့်နေတာ။ ရေစကြိုမြို့အဝင်က ရဲစခန်းနဲ့ ရွှေဂူကြီးဘုရား ကြားမှာ မိုင်းဆွဲလိုက်တော့ ဆိုင်ကယ်တစီးထိမှန်ပြီး ၂ ယောက် ပွဲချင်းပြီး သေဆုံးခဲ့တာ။ အဲဒီနောက်မှာ စစ်ကောင်စီဘက်က ပစ်ခတ်ပေမဲ့ ကျနော်တို့ဘက်က ရဲဘော်တွေ ထိခိုက်မှုမရှိဘဲ အောင်အောင်မြင်မြင် ဆုတ်ခွာနိုင်ခဲ့ကြတယ်။”

ရေစကြိုမြို့နယ်မှာ ဇန်နဝါရီ ၁၆ ရက် နေ့လယ်ပိုင်းကလည်း စစ်ကောင်စီတပ်သားတွေနဲ့ ပျူစောထီးတွေ ဒရုန်းနဲ့ ဗုံးကြဲတိုက်ခိုက်ခံရပြီး ၅ ယောက်သေဆုံးကာ အများအပြား ဒဏ်ရာရရှိခဲ့ တယ်လို့ Super Fighter (ရေစကြို) တပ်ဖွဲ့ကနေ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ရေစကြိုမြို့နယ်မှာ ဇန်နဝါရီ ၂၃ ရက် မွန်းလွဲပိုင်းကလည်း စစ်ကောင်စီခန့် အုပ်ချုပ်ရေးမှူးတယောက် သေနတ်နဲ့ပစ်သတ်ခံခဲ့ရတယ်လို့ ဒေသခံတွေဆီကနေ သိရပါတယ်။

ရေစကြိုမြို့နယ် ကံသစ်ကျေးရွာက စစ်ကောင်စီခန့် အုပ်ချုပ်ရေးမှူး ဦးအောင်နိုင်ကို မနေ့ ဇန်နဝါရီ ၂၃ ရက် မွန်းလွဲ ၂ နာရီလောက်မှာ လက်နက်ကိုင်အဖွဲ့တဖွဲ့က လာရောက်ပစ်ခတ်ခဲ့လို့ နေရာမှာတင် ပွဲချင်းပြီးသေဆုံးခဲ့တယ်လို့ ရေစကြိုမြို့ ဒေသခံတယောက်က ပြောပါတယ်။

အဲဒီအုပ်ချုပ်ရေးမှူးဟာ စစ်ကောင်စီနဲ့ပူးပေါင်းပြီး ပြည်သူတွေကို မတရားဖမ်းဆီး၊ ငွေညှစ်နေသလို စစ်ကောင်စီရဲ့ အတုအယောင် ရွေးကောက်ပွဲအတွက် လူဦးရေစာရင်း ကောက်ခံရာမှာ တက်တက်ကြွကြွ ပါဝင်နေလို့ အသတ်ခံလိုက်ရတာဖြစ်ပြီး ဘယ်အဖွဲ့အစည်းရဲ့ လက်ချက်လဲ ဆိုတာကိုတော့ မသိရသေးဘူးလို့ ဆိုပါတယ်။

အဲဒီအုပ်ချုပ်ရေးမှူး အသတ်ခံရပြီးတော့ စစ်ကောင်စီတပ်သားတွေနဲ့ ရဲတွေ ရောက်လာပြီး စစ်ဆေးတာတွေပြုလုပ်ကာ အလောင်းကိုတော့ ရေစကြိုပြည်သူ့ဆေးရုံကို သယ်သွားကြတယ်လို့ ဆိုပါတယ်။

စစ်ကောင်စီရဲ့ တရားမဝင် ရွေးကောက်ပွဲ ကျင်းပနိုင်ဖို့ လူဦးရေစာရင်း ကောက်ခံတာတွေ၊ အားပေးကူညီတာတွေ လုံးဝမပြုလုပ်ဖို့နဲ့ ဆက်လက်ပြုလုပ်ပါက ပြင်းပြင်းထန်ထန် အရေးယူမယ်လို့ တော်လှန်ရေးတပ်ဖွဲ့တွေနဲ့ ပြည်သူ့အုပ်ချုပ်ရေးအဖွဲ့တွေကလည်း သတိပေး ထုတ်ပြန်ထားပါတယ်။

2 weeks Ago

January 21, 2023

တကောင်းနှင့်နွားထိုးကြီးမြို့နယ်တို့တွင် စစ်ကောင်စီတပ်များ မိုင်းဆွဲတိုက်ခိုက်ခံရ

မန္တလေးတိုင်း သပိတ်ကျင်းမြို့နယ်၊ တကောင်းမြို့၊ ၄ မိုင် အခင်းတောစုနားမှာ နယ်မြေ ရှင်းလင်းပြီး ပြန်ဆုတ်သွားတဲ့ စစ်ကောင်စီယာဉ်တန်းကို ဇန်နဝါရီ ၂၁ ရက် မွန်းလွဲပိုင်းက မိုင်းဆွဲတိုက်ခိုက်ခဲ့တယ်လို့ ပကဖ(တကောင်း) က ပြောပါတယ်။

တကောင်းမြို့ အရှေ့ဘက်၊ ပီလောပြစ်အခင်းတောမှာ စခန်းချပြီး နယ်မြေရှင်းလင်းရေးလုပ်နေတဲ့ စစ်ကောင်စီတပ်ဖွဲ့ဝင်တွေ ပြန်လည်ဆုတ်ခွာလာချိန် မိုင်းဆွဲတိုက်ခိုက်ခဲ့တာလို့ ဆိုပါတယ်။

ပကဖ (တကောင်း) တပ်ဖွဲ့ဝင်တဦးက "နှစ်စီး မြောက်နဲ့ နောက်ဆုံး အစီးကို ဆွဲတာ။ ပထမဆုံးတစီးကို လွှတ်လိုက်တာ၊ သုံးစီးပဲ"လို့ ပြောပါတယ်။

မိုင်းဆွဲမှုကြောင့် ထိခိုက်ဒဏ်ရာရသွားတဲ့ စစ်ကောင်စီတပ်ဖွဲ့ဝင်တွေကို လူနာတင်ကားနဲ့ ငါးခေါက်က်လောက် သယ်ယူရတယ်လို့ ဒေသခံတွေက ပြောပါတယ်။

မိုင်းဆွဲခံရပြီးတဲ့နောက် တကောင်းမြို့တွင်းမှာ စခန်းချထားတဲ့ စစ်ကောင်စီတပ်တွေ ရောက်လာပြီ အဲဒီနေရာတဝိုက် စခန်းချကာ နယ်မြေရှင်းလင်း ပစ်ခတ်ခဲ့တာကြောင့် ၃ မိုင်သစ်ခွဲစက် လိုင်းခန်းမှာ နေထိုင်သူ ၃ ဦးကို ကျည်ထိမှန်ခဲ့တယ်လို့ သိရပါတယ်။

ပစ်ခတ်မှုကြောင့် တယောက်မှာ ရင်ဘက်ကျည်ထိမှန်ခဲ့ပြီး တယောက်ကတော့ လက်မောင်းကျည်နဲ့ တယောက်ကတော့ ခြေထောက်မှာ ကျည်ထိမှန်ခဲ့ပြီး တကောင်းဆေးရုံကို ပို့ထားတယ်လို့ ဆက်လက်သိရပါတယ်။

မန္တလေးတိုင်း မြင်းခြံခရိုင်၊ နွားထိုးကြီးမြို့နယ် ဝက်လူးရဲစခန်းမှ ဘဗက်တောကျေးရွာဘက်ကို ကင်းလှည့်လာတဲ့ စစ်ကောင်စီတပ်ဖွဲ့ဝင်တွေနဲ့ Natogyi People Defence Force မြင်းခြံခရိုင်အမှတ်-၄တပ်ရင်း တို့ကြားတိုက်ပွဲဖြစ်ပွားပြီး စစ်ကောင်စီတပ်ကြပ်ကြီး ၁ ယောက် သေဆုံးကာ လက်နက်ခဲယမ်းတချို့ သိမ်းဆည်းရမိတယ်လို့ သိရပါတယ်။ 

ဇန်နဝါရီ ၂၀ ရက်  မနက် ၁၁ ခွဲဝန်းကျင်က ဝက်လူးကျေးရွာအနောက်ဘက်က ဗဘက်တော ကျေးရွာနားမှာ ကင်းလှည့်လာတဲ့ စစ်ကောင်စီတပ်သား ၁၅ ယောက်နဲ့ အပြန်အလှန် ပစ်ခတ်မှု ဖြစ်ပွားပြီး မိတ္ထီလာ (၄)တပ်မှ စစ်ကောင်စီတပ်ကြပ်ကြီး ၁ ယောက် သေဆုံးကာ MA 3 သေနတ် ၁ လက်၊ ကျည် ၁၉ တောင့်၊ ကျည်ကာ ၁ ခု နဲ့ ကျည်ဘောက် ၁ ခု သိမ်းဆည်းရမိတယ်လို့  NPDF -မြင်းခြံခရိုင် တပ်ရင်း ၄ မှတာဝန်ရှိသူက ပြောပါတယ်။ 

အဲဒီနေ့ နေလယ် ၁ နာရီလောက်မှာပဲ တိုက်ပွဲဖြစ်ပွားရာ နေရာမှာ အလောင်းကောက်ရင်း စစ်ကူလာတဲ့ စစ်ကောင်စီတပ်ဖွဲ့ကို နွားထိုးကြီး - ဝက်လူး လမ်းမကြီးပေါ် ရှိ သဲခြပ်ရွာနားမှာ မိုင်းဆွဲတိုက်ခိုက်ခဲ့သလို  ညနေ ၄ နာရီအချိန်မှာလည်း မိုင်းကွင်းထဲကို ဝင်ရောက်လာတဲ့ စစ်ကောင် စီတပ်ဖွဲ့ကို ထန်းဇင်ကျေးရွာနားမှာ မိုင်းဆွဲတိုက်ခိုက်မှု ထပ်မံပြုလုပ်ခဲ့တာကြောင့် ထိခိုက် သေဆုံးမှု များနိုင်တယ်လို့ ဆိုပါတယ်။ 

NPDF - မြင်းခြံခရိုင် တပ်ရင်း ၄ မှ တာဝန်ရှိသူက "ထိပ်တိုက်တွေ့ကြတာ။ သေဆုံးသွားတဲ့ တပ်ကြပ်ကြီးက မိတ္ထီလာ ၄ တပ်ကပါ။ သူကိုင်ထားတဲ့ MA 3 သေနတ် နဲ့ ကျည်တချို့ရယ်၊ ကျည်ကာ တခုရယ် သိမ်းဆည်းရမိပါတယ်။ သူ့အလောင်းကို ကား ၄ စီး နဲ့ လာကောက်သွားတယ်။ အလောင်းကောက်ပြီး နောက်တခေါက် ကျနော်တို့ မိုင်းကွင်းထဲကို ပြန်ဝင်လာလို့ မိုင်းထပ် ဆွဲခဲ့တာ။ ဒေသခံတွေ ပြောပြချက်အရ ထိခိုက်သေဆုံးမှုတော်တော်များတယ်” လို့ ပြောပါတယ်။ 

မြင်းခြံခရိုင် နွားထိုးကြီးမြို့နယ်ကို စစ်ကောင်စီတပ်က နယ်မြေရှင်းလင်းရေး ပြုလုပ်ပြီး Natogyi People Defence Force မြင်းခြံခရိုင်အမှတ်-၄တပ်ရင်း မှ PDF ခေါင်းတောင် ကိုစိုးအောင်ကို ဖမ်းဆီးဖို့ နည်းမျိုးစုံနဲ့ ကြိုးစားနေတယ်လို့ သိရပါတယ်။

3 weeks Ago
More News
Up