မာရာဒိုနာ

December 15, 2020

ဘလွန်းဒီအော ကမ္ဘာ့အကောင်းဆုံးအသင်းတွင် ပီလီ၊ မာရာဒိုနာနှင့်အတူ မက်ဆီနှင့် ရော်နယ်ဒို ပါဝင်

ပြင်သစ်ဘောလုံးမဂ္ဂဇင်းက ထုတ်ပြန်လိုက်တဲ့ ဘလွန်းဒီအောအိပ်မက်အသင်း Ballon d’Or Dream Team မှာ ပီလီနဲ့ မာရာဒိုနာတို့နဲ့အတူ ရော်နယ်ဒိုနဲ့ မက်ဆီတို့လည်း ရွေးချယ်ခံခဲ့ရပါတယ်။  အခုနှစ်မှာ ဘလွန်းဒီအောဆု ချီးမြင့်မယ့် အစီအစဉ် ဖျက်သိမ်းခဲ့ပေမယ့် ဘလွန်းဒီအော အိပ်မက်အသင်းကိုတော့ ရွေးချယ်ခဲ့တာပါ။ ဘလွန်းဒီအော အိပ်မက်အသင်းကို ကမ္ဘာတဝန်းက ဂျာနယ်လစ် ၁၇၀ ရဲ့ မဲပေးမှုနဲ့ ရွေးချယ်ခဲ့တာပါ။  ဂိုးသမားနေရာမှာ ရုရှားဂန္ထဝင်ဂိုးသမားကြီး ရာရှင်ကို ရွေးချယ်ခဲ့ပြီး သူက ၁၉၆၃ ခုနှစ်မှာ ဘလွန်းဒီအောဆု ရရှိခဲ့ဖူးပါတယ်။  ခံစစ် သုံးဦးနေရာမှာ  ကာဖူး၊ ဘက်ကင်ဘောင်ဝါနဲ့ မာဒီနီတို့ ရွေးချယ်ခံခဲ့ရပါတယ်။ ဂျာမနီ ဂန္ထဝင် ဘင်ကင်ဘောင်ဝါက ဘလွန်းဒီအော ၂ ကြိမ် ရယူခဲ့ဖူးပြီး  ဘလွန်းဒီအော ရယူဖူးတဲ့ တစ်ဦးတည်းသော နောက်ခံလူအဖြစ် လက်ရှိအချိန်အထိ မှတ်တမ်းတင်ထားဆဲ ဖြစ်ပါတယ်။  ကွင်းလယ်မှာတော့ လိုသာမားသီးယက်စ်၊ ဇာဗီ၊ ပီလီနဲ့ မာရာဒိုနာတို့ကို ရွေးချယ်ခဲ့ပါတယ်။ တိုက်စစ် သုံးဦးနေရာမှာ ဘရာဇီးတိုက်စစ်မှူးဟောင်း ရော်နယ်ဒို၊ ပေါ်တူဂီအသင်း ခေါင်းဆောင် စီရော်နယ်ဒိုနဲ့ အာဂျင်တီးနားအသင်းခေါင်းဆောင် မက်ဆီတို့ ရွေးချယ်ခံခဲ့ရပါတယ်။
5 months Ago

December 12, 2020

မက်ဆီအနေဖြင့် နာပိုလီကိုပြောင်းပြီး မာရာဒိုနာကို ဂုဏ်ပြုပေးသင့်ဟု ဘိုတန် တိုက်တွန်း

အာဂျင်တီးနားနဲ့ ဘာစီလိုနာအသင်းရဲ့ ဂန္ထင်ကစားသမားကြီး မာရာဒိုနာကို ဂုဏ်ပြုဖို့အတွက်မက်ဆီအနေနဲ့ နာပိုလီအသင်းကို ပြောင်းကစားသင့်တယ်လို့ ကီဗင်ပရင့်စ်ဘိုတန်က တိုက်တွန်းလိုက်ပါတယ်။ သမိုင်းတလျှောက် အကောင်းဆုံးဘောလုံးသမားအဖြစ် သတ်မှတ်ခံထားရတဲ့ မာရာဒိုနာဟာ ပြီးခဲ့တဲ့လမှာ နှလုံးရောဂါဖောက်ပြီး အသက် ၆၀ အရွယ်မှာ ကွယ်လွန်သွားပြီ ဖြစ်ပါတယ်။ မာရာဒိုနာဟာ ၁၉၈၄ ခုနှစ်မှာ ဘာကာအသင်းကနေ နာပိုလီအသင်းကို ရောက်ရှိလာခဲ့သူ ဖြစ်ပြီး အသင်းမှာ ကစားခဲ့တဲ့ ၃ နှစ်တာကာလအတွင်း အသင်းကို စီးရီးအေဖလားရရှိဖို့ ကူညီပေးနိုင်ခဲ့ပါတယ်။ ဒါ့ကြောင့် နာပိုလီအသင်းကလည်း သူတို့ရဲ့အိမ်ကွင်းနာမည်ကို စတာဒီယို ဒီယေဂို အာမန်ဒို မာရာဒိုနာလို့ ပြောင်းလဲကာ ကစားသမားကို ဂုဏ်ပြုခဲ့ပါတယ်။ မက်ဆီဟာလည်း ပြီးခဲ့တဲ့လ အိုဆာဆူနာနဲ့ပွဲမှာ ဂိုးသွင်းယူပြီးတဲ့နောက် သူ့ရဲ့ ဘာကာအင်္ကျီအောက်မှာ ဝတ်ဆင်ထားတဲ့ မာရာဒိုနာရဲ့ နံပါတ်နဲ့ နယူးဝဲလ်အိုးဘွိုင်းဂျာစီကို ပြသ အောင်ပွဲခံခဲ့ပါတယ်။  ဒါပေမဲ့ မက်ဆီရဲ့ ဘာစီလိုနာအသင်းဖော်ဟောင်းတစ်ဦးဖြစ်တဲ့ ဘိုတန်ကတော့ မက်ဆီအနေနဲ့ တနိုင်ငံတည်းသား ဘောလုံးသူရဲကောင်းအတွက် ဒီထက်ပိုပြီး လုပ်ဆောင်ပေးဖို့ လိုအပ်တယ်လို့ ပြောပါတယ်။  “မက်ဆီနဲ့ မာရာဒိုနာတို့ နှစ်ဦးကို နှိုင်းယှဉ်တာမျိုး မကြာခဏ ကြားရလေ့ရှိပါတယ်။ ဒါကြောင့် မက်ဆီကို ဒီလိုလုပ်ပေးဖို့ ကျနော် တောင်းဆိုရတာပါ” လို့ ဘိုတန်က ပြောပါတယ်။ ဘိုတန်ဟာ လက်ရှိအချိန်မှာ ဘာလော့တယ်လီနဲ့အတူ စီးရီးဘီကလပ် မွန်ဇာအသင်းမှာ ကစားနေသူ ဖြစ်ပါတယ်။ “မက်ဆီအနေနဲ့ ဘာကာနဲ့ စာချုပ်သက်တမ်းကုန်သွားရင် နာပိုလီအသင်းကို သွားသင့်ပါတယ်။ သူကိုယ်တိုင် နာပိုလီဥက္ကဋ္ဌကို ဖုန်းခေါ်ပြီး လာမယ်ဆိုတဲ့အကြောင်းကို ပြောရင် ပိုကောင်းပါတယ်။ သူတို့ဘက်က နံပါတ် ၁၀ ကို အနားပေးလိုက်တယ်ဆိုရင်တောင် ကျနော်ကတော့  ပိုက်ဆံအကြောင်းကို မတွေးဘဲ နှလုံးသားနဲ့ နာပိုလီမှာ ၁ နှစ်၊ ၂ နှစ်လောက် ကစားပြီး မာရာဒိုနာရဲ့ နံပါတ် ၁၀ ကို ဂုဏ်ပြုချင်ပါတယ်။ အဲဒီနောက် နာပိုလီနဲ့ ဖလားတွေ ဆွတ်ခူးနိုင်မယ်ဆိုရင် မက်ဆီဟာ ရုပ်ရှင်ထဲမှာပဲ မြင်တွေ့ရတဲ့ ဇာတ်လမ်းတွေထဲကလို အထွတ်အထိပ်ကို ရောက်ရှိသွားမှာ ဖြစ်ပါတယ်။ ကျနော်သာ မက်ဆီသာဆိုရင် ဒီအကြောင်းကို စဉ်းစားမှာ ဖြစ်ပါတယ်။ အခုလက်ရှိအနေအထားမှာ မက်ဆီဟာ ကလပ်အသင်းနဲ့အတူ အရာအားလုံးကို ဆွတ်ခူးပြခဲ့ပြီး ဖြစ်တာကြောင့် သူ့ကစားသမားဘဝကို တမူထူးခြားနဲ့ပုံစံနဲ့ အဆုံးသတ်သင့်ပါတယ်” လို့ ဘိုတန်က ပြောပါတယ်။ မက်ဆီဟာ သူ့နဲ့စာချုပ်သက်တမ်းကုန်ရင် ဘာကာအသင်းကနေ ထွက်ခွာမယ်လို့ သတင်းကြီးနေသူ ဖြစ်ပြီး မန်စီးတီး ဒါမှမဟုတ် ပီအက်စ်ဂျီအသင်းကို ရောက်ရှိနိုင်တယ်လို့ ခန့်မှန်းခံထားရသူ ဖြစ်ပါတယ်။
5 months Ago
More News
Up