မအူပင်

May 7, 2021

မအူပင်နည်းပညာတက္ကသိုလ်နှင့် ကွန်ပျုတာတက္ကသိုလ်မှ ဆရာဆရာမ ၈၀ တာဝန်မှ ရပ်ဆိုင်းခံရ

 ဧရာဝတီတိုင်း မအူပင်မြို့ရှိ   နည်းပညာတက္ကသိုလ်နဲ့ ကွန်ပျုတာတက္ကသိုလ်မှာ တာဝန်ထမ်းဆောင်နေတဲ့ ဆရာ ဆရာမတွေအပါအဝင် ပညာရေးဝန်ထမ်း အယောက် ၈၀ ကို  အကြမ်းဖက် စစ်အုပ်စုက  တာဝန်မှ ယာယီရပ်ဆိုင်းလိုက်ပါတယ်။

 မအူပင်နည်းပညာတက္ကသိုလ်မှာ  တာဝန်ထမ်းဆောင်နေသူတဲ့ ဆရာ ဆရာမနဲ့ ပညာရေးဝန်ထမ်း   ၄၉ ဦးကို စစ်ကောင်စီက တာဝန်မှ ယာယီရပ်ဆိုင်းကြောင်း  မေလ ၆ ရက်နေ့မှာ စစ်ကောင်စီရဲ့ ပညာရေးဝန်ကြီးဌာနအောက်ရှိ အဆင့်မြင့်ပညာဦးစီးဌာနက ထုတ်ပြန်ပါတယ်။

တာဝန်မှယာယီရပ်ဆိုင်းခံရသူတွေအထဲမှာ ပါမောက္ခ၊ တွဲဘက်‌ပါမောက္ခ၊ ကထိက၊ လက်ထောက်ကထိက၊ သရုပ်ပြနဲ့ ဌာနမှူးတွေအပြင်  အကြီးတန်းစာရေးတွေလည်း ပါဝင်ပါတယ်။

“ဆရာမတစ်ယောက်အနေနဲ့ လုပ်သင့်လုပ်ထိုက်တာကိုလုပ်ခဲ့တဲ့အတွက် ဒီစာက ကျမအတွက် ဂုဏ်ယူစရာပါ”လို့ တာဝန်မှ ယာယီရပ်ဆိုင်းခံရတဲ့ ဆရာမတစ်ဦးက ပြောပါတယ်။

အလားတူ မအူပင်ကွန်ပျုတာတက္ကသိုလ်က ပါမောက္ခအပါအဝင် ဆရာဆရာမ ၃၁ ဦးကိုလည်း  မေလ ၆ ရက် နေ့မှာ  တာဝန်မှ ယာယီရပ်ဆိုင်းကြောင်း  ထုတ်ပြန်ခဲ့ပါတယ်။

တက္ကသိုလ်ဆရာဆရာမတွေဟာ ပြီးခဲ့တဲ့ ဖေဖော်ဝါရီလ စစ်အာဏာသိမ်းကတည်းကစပြီး အကြမ်းမဖက် အာဏာဖီဆန် CDM လှုပ်ရှားမှုပြုလုပ်နေကြတာဖြစ်တယ်။

6 days Ago

April 19, 2021

မအူပင်မြို့တွင် ဆရာဝန် ၄ ဦးနှင့် စေတနာ့ဝန်ထမ်း ၁ ဦးကို အကြမ်းဖက်စစ်တပ်က ဖမ်းဆီး

ဧရာဝတီတိုင်း၊ မအူပင်မြို့နယ်မှာ ဧပြီလ ၁၈ ရက်ည သန်းခေါင်ကျော်လောက်က  ဆရာဝန် ၄ ဦးကို အကြမ်းဖက်စစ်တပ်နဲ့ရဲက နေအိမ်တွေမှာ ဝင်ရောက်ဖမ်းဆီးခေါ်ဆောင်သွားပါတယ်။

ဖမ်းဆီးခံထားရတဲ့ ဆရာဝန်တွေဟာ  CDM လှုပ်ရှားမှုမှာ ပါဝင်ထားကြသူတွေဖြစ်တယ်ဆိုပြီး  အကြမ်းဖက်စစ်တပ်နဲ့ရဲက မနေ့ည သန်းခေါင်ကျော် ည ၁ နာရီလောက်မှာ နေအိမ်တွေမှာ လိုက်လံဖမ်းဆီးခဲ့တာဖြစ်တယ်လို့ မိသားစုဝင်တွေကပြောပါတယ်။

" ဆရာက ညဘက် အိမ်မှာနေတာ အောက်က ခေါ်သံကြားလို့ တံခါးဖွင့်ပေးမိတာ စစ်ကားတွေနဲ့ စစ်သားတွေရောက်လာပြီ ခေါ်သွားတာ''လို့ပြောပါတယ်။

ဖမ်းဆီးခံလိုက်ရတဲ့ ဆရာဝန် ၄ ဦးကတော့  ဒေါက်တာ နိုင်ထူး၊ ဒေါက်တာ ဝေယံဦး၊ ဒေါက်တာ ဆုလာဘ်နွယ်နဲ့ ဒေါက်တာ ထက်ပိုင်ဖြိုးတို့ ဖြစ်ကြပါတယ်။

တစ်ညတည်းမှာပဲ ဆရာဝန် ၄ ဦးကို အကြမ်းဖက်စစ်တပ်နဲ့ရဲက ဖမ်းဆီးသွားတဲ့အပြင် ဂရုဏာလူမှုရေးအသင်းရဲ့ စေတနာ့ဝန်ထမ်း ကိုသန်းထွဋ်ဦးကိုလည်း ဖမ်းဆီးခဲ့တာပါ။

ဖမ်းဆီးခံရတဲ့  ဆရာဝန် ၄ ဦးနဲ့ စေတနာဝန်ထမ်း ၁ ဦးကို မအူပင်မြို့မရဲစခန်းမှာ ပုဒ်မ ၅၀၅ နဲ့အမှုဖွင့်ဖို့ ထိန်းသိမ်းထားတယ်လို့ သိရပါတယ်။

3 weeks Ago
More News
Up