မအူပင်

May 9, 2022

မအူပင်တွင် သွေးသောက်အဖွဲ့က ပြည်သူ ၁ ဦးကို ပစ်ခတ် ၊ လွှတ်တော်အမတ်နေအိမ်ကို ခြိမ်းခြောက် စာကပ်

ဧရာဝတီတိုင်း၊ မအူပင်မြို့မှာ မေ ၈ ရက်ည ၁၁ နာရီလောက်က သွေးသောက်လူသတ်အဖွဲ့က ဧည့်စာရင်း စစ်မယ်လို့ပြောဆိုကာ ဒေသခံပြည်သူတယောက်ရဲ့နေအိမ်ကို ဝင်ပြီး သေနတ်နဲ့ ပစ်ခတ်သွားသလို လွှတ်တော်ကိုယ်စားလှယ်တယောက်ရဲ့  နေအိမ်ကိုလည်း ခြိမ်းခြောက်စာ ကပ်သွားပါတယ်။ 

အမှတ် ၉ ရပ်ကွက်မှာ နေထိုင်တဲ့ ကိုဇော်ဝင်းမြင့်နေအိမ်ကို ဆိုင်ကယ် ၂ စီးနဲ့ လူ ၄ ယောက်ရောက်ပြီး အိမ်ရှေ့ကနေ ဧည့်စာရင်းစစ်မယ်ပြောလို့ တံခါးဖွင့်ပေးချိန်မှာ သေနတ်နဲ့ပစ်သွားတာဖြစ်ပြီး အိပ်နေလိုက်တာကြောင့် လက်မောင်းကိုသာ ထိမှန်ခဲ့တယ်လို့ ဒေသခံတဦးက ပြောပါတယ်။

“ဧည့်စာရင်း လာစစ်တယ်ကြားလို့ အိမ်ပိုင်ရှင်က တံခါးဖွင့်ပေးတဲ့အချိန်မှာ ပစ်သွားတာ။ ကိုဇော်ဝင်းမြင့်က အိပ်နေတော့ လက်မောင်းကို ထိသွားတာ။ ပစ်တာက သူ့ကို သေချာပစ်တာ။ ပြီးတော့ စာတွေလည်း ကပ်သွားတယ်။ လွှတ်တော်ကိုယ်စားလှယ် ဒေါ်အိအိပြုံး နေအိမ်ကိုလည်း စာကပ်သွားတယ်”လို့ ဒေသခံတဦးက ပြောပါတယ်။ 

ကိုဇော်ဝင်းမြင့်ကို သေနတ်နဲ့ပစ်သွားပြီးနောက်ပိုင်း ဆိုင်ကယ် ၂ စီးနဲ့ လူ ၄ ဦးက ခြံရှေ့မှာ “မအူပင် သွေးသောက်” အဖွဲ့ဆိုတဲ့ စာပါတဲ့ သတိပေးစာကို ချသွားပြီး မအူပင်မြို့နယ်က လွှတ်တော်ကိုယ်စားလှယ် ဒေါ်အိအိပြုံးရဲ့ အိမ်ရှေ့မှာလည်း “နင် အေးဆေးနေ မနေရင် နင့်မိသားစုကို နင်ပြန်သတ်တာပဲ” ဆိုတဲ့ ခြိမ်းခြောက်စာချသွားတယ်လို့ ဆိုပါတယ်။ 

မအူပင်မြို့မှာ မေလ ၄ ရက် ညပိုင်းကလည်း NLD ပါတီရဲ့ တိုင်းဒေသကြီး လွှတ်တော်ကိုယ်စားလှယ် ဦးဇော်မိုးအိမ်ကို သွေးသောက်အဖွဲ့က လာရောက်မီးရှို့ခဲ့ပါတယ်။

မီးရှို့တဲ့အချိန်မှာ ပတ်ဝန်းကျင်က မီးငြှိမ်းသတ်ခဲ့တာကြောင့် အိမ်မလောင်ခဲ့ပေမယ့် လာလုပ်တဲ့ သူတွေက အာဏာသိမ်းစစ်ကောင်စီနဲ့ ရဲတပ်ဖွဲ့ကို သတင်းပေးပြီး ပေါင်းနေတဲ့သူတွေဖြစ်တယ်လို့ မျက်မြင်တွေ့သူတွေက ပြောပါတယ်။

သွေးသောက်လူသတ်အဖွဲ့ဟာ ရန်ကုန်နဲ့ မန္တလေးမှာလည်း  အန်အယ်လ်ဒီပါတီဝင်တွေနဲ့ ထောက်ခံသူတွေကို ပစ်မှတ်ထားပြီး လိုက်လံသတ်ဖြတ်နေတဲ့ အဖွဲ့ဖြစ်ပြီး စစ်ကောင်စီက သူတို့ဖွဲ့ပေးထားတဲ့အဖွဲ့မဟုတ်ဘူးလို့ ငြင်းဆိုထားပေမဲ့  လူသတ်သမားတွေကို ဖမ်းဆီး အရေးယူတာလည်း မရှိပါဘူး။

2 weeks Ago

May 3, 2022

မအူပင်တွင် လေပြင်းတိုက်ခတ်၊ နေအိမ် ၄၀ ကျော်ပျက်စီးဆုံးရှုံး

ဧရာဝတီတိုင်း၊ မအူပင်မြို့မှာ မေ ၂ ရက် ညပိုင်းက မိုးရွာပြီး လေပြင်းတိုက်ခတ်မှုကြောင့် နေအိမ် ၄၀ ကျော် အမိုးလန်ပျက်စီးဆုံးရှုံးသွားပါတယ်။ 

မိုးရွာပြီး ရုတ်တရက် လေပြင်းတိုက်ခတ်တာကြောင့် မအူပင်မြို့ပေါ်နဲ့ ကျေးရွာတချို့မှာ နေအိမ်တွေ အမိုးလန် ပျက်စီးပြီး သစ်တွေ လမ်းမပေါ် လဲကျခဲ့တာလို့ ဒေသခံတွေကပြောပါတယ်။ 

“မိုးရွာတာလည်း များတယ်။ အဲဒီမှာ လေပြင်းပါ ထပ်တိုက်တော့ အခြေအနေ တော်တော်ဆိုးသွားတယ်။ အိမ်တွေ ပြိုတာ အမှတ် ၁ ရပ်ကွက်ဘက်မှာတင် အလုံး ၃၀ ကျော်တယ်။ တခြားနေရာတွေ မသိသေးဘူး။ သစ်ပင်လဲတာတွေလည်း ရှိတယ်” လို့ ဒေသခံတဦးက ပြောပါတယ်။ 

မအူပင်မြို့ အမှတ် ၁ ရပ်ကွက်အပါအဝင်  ကျေးရွာတချို့မှာ လေပြင်းတိုက်ခတ်ခဲ့တာကြောင့် လူနေအိမ် အနည်းဆုံး ၄၀ ကျော် အမိုးလန်ပျက်စီးတာတွေရှိခဲ့သလို သစ်ပင်ကြီးတချို့ လမ်းမပေါ်ပိတာကြောင့် လမ်းပိတ်ဆို့တာတွေရှိလို့ ဒီမနက်ပိုင်းမှ လိုက်လံရှင်းလင်းရပါတယ်။ 

မိုးရွာပြီး လေပြင်းတိုက်ခတ်မှုကြောင့် လူနေအိမ်တွေအပြင် ကွမ်းခြံတချို့နဲ့ ငှက်ပျောခြံတချို့ ပျက်စီးဆုံးရှုံးခဲ့ပေမယ့် လူနဲ့ တိရစ္ဆာန်ထိခိုက်သေဆုံးတာ မရှိဘူးလို့ သိရပါတယ်။

3 weeks Ago
More News
Up