မလေးရှား ပြန်

June 17, 2020

မလေးရှားတွင်ပိတ်မိနေသည့် မြန်မာနိုင်ငံသား ၁၃၄ ဦးကို  လေယာဉ်ဖြင့်ပြန်ခေါ် 

မလေးရှားနိုင်ငံမှာ အခက်အခဲကြုံတွေ့နေရတဲ့  မြန်မာနိုင်ငံသား ၁၃၄ ဦးကို ဒီကနေ့ ဇွန်လ ၁၇ ရက်မနက်က  ကယ်ဆယ်ရေးလေယာဉ်နဲ့ မြန်မာနိုင်ငံသို့ ပြန်လည်ခေါ်ဆောင်ခဲ့တယ်လို့ နိုင်ငံခြားရေးဌာနက ထုတ်ပြန်ပါတယ်။  မလေးရှားနိုင်ငံ၊ ENRA Group Bhd ရဲ့ MT Ratu Chemical/Oil Products Tankerမှ ထားဝယ်မြို့၊ ရဲတံခွန်ရေနံတူးစင်မှာ လုပ်ငန်းတာဝန်ပြီးဆုံးတဲ့  ကျွမ်းကျင်ဝန်ထမ်းတွေကို Malindo Air လေယောဉ်နဲ့ မလေးရှားနိုင်ငံသို့ ပြန်လာခေါ်ဖို့ရှိနေတဲ့အတွက် အလာခရီးစဉ်မှာ မလေးရှားရောက် မြန်မာနိုင်ငံသား ၁၃၄ ဦး လိုက်ပါနိုင်ဖို့ မြန်မာသံရုံးက ညှိနှိုင်းဆောင်ရွက် ပြန်ခေါ်ခဲ့တာလို့ ဆိုပါတယ်။ နေရပ်ပြန်လာတဲ့ မြန်မာနိုင်ငံသားတွေကို ဒီနေ့မနက် ၁၁ နာရီ မိနစ် ၄၀ လောက်က ရန်ကုန်လေဆိပ်ကို ပြန်လည်ရောက်ရှိခဲ့ကြပြီး ကျန်းမာရေးစစ်ဆေးမှုခံယူကာ သူတို့ကို သတ်မှတ်နေရာမှာ  ၂၁ ရက် အသွားအလာ ကန့်သတ် ထားရှိမှာဖြစ်ပါတယ်။ ကိုဗစ်-၁၉ ကပ်ဘေးကာလ နိုင်ငံတကာခရီးသည်တင် လေယာဉ်ပျံသန်းမှု ယာယီရပ်ဆိုင်းထားတာကြောင့် ပြည်ပနိုင်ငံအသီးသီးမှာ ရောက်ရှိနေပြီး မြန်မာပြည် ပြန်လာဖို့ အခက်အခဲရှိနေတဲ့ မြန်မာနိုင်ငံသားတွေကို အစိုးရက ကယ်ဆယ်ရေးလေယာဉ်တွေ စီစဉ်ပေးပြီး ပြန်လည်ခေါ်ဆောင်နေတာ ဖြစ်ပါတယ်။ ခုအကြိမ်နဲ့ဆိုရင် မလေးရှားနိုင်ငံကနေ ကယ်ဆယ်ရေးလေယာဉ်တွေနဲ့ ပြန်လည်ခေါ်ဆောင်ခဲ့တာ  သုံးကြိမ်ရှိပြီဖြစ်ပြီး   မြန်မာနိုင်ငံသား စုစုပေါင်း ၃၃၄ ဦး နေရပ် ပြန်လာ နိုင်ခဲ့ကြပါတယ်။  လာမယ့် ဇွန်လ ၁၉ ရက်နဲ့ ဇွန်လ ၂၇ ရက်တွေမှာလည်း မလေးရှားရောက် မြန်မာတွေကို ထပ်မံ ခေါ်ဆောင်ဖို့ရှိတယ်လို့ နိုင်ငံခြားရေး ဌာန ထုတ်ပြန်ချက်အရ သိရပါတယ်။  ဓာတ်ပုံ- MOFA
11 months Ago

June 9, 2020

မလေးရှားက ပြန်လာသူ ၃၅ ဦးကို ကျန်းမာရေး အသေးစိတ်စစ်ဆေးမည်

မလေးရှားနိုင်ငံကနေ ပြန်လာသူတွေဆီကနေ ကိုဗစ်-၁၉ ရောဂါပိုးတွေ့ရှိတဲ့အတွက် မလေးရှားပြန် မြန်မာနိုင်ငံသား ၃၅ ဦးကို ကျန်းမာရေး အသေးစိတ် စစ်ဆေးသွားမယ်လို့ ဘားအံခရိုင် ကိုဗစ်-၁၉ ရောဂါ ကာကွယ်ထိန်းချုပ်၊ ကုသရေးခရိုင်အဆင့်ကော်မတီ ဥက္ကဋ္ဌ ဦးတေဇာအောင်က ပြောပါတယ်။ ဇွန်လ ၈ ရက်က မလေးရှားနိုင်ငံကနေ ပြစ်ဒဏ်ရက်စေ့ပြီး ပြန်လည်လွှတ်မြောက်လာတဲ့ မြန်မာနိုင်ငံသား ၃၅ ယောက်ဟာ ​ထိုင်းနိုင်ငံကနေတဆင့် မြဝတီမြို့ အမှတ် ၂ ချစ်ကြည်ရေး တံတားကို ဝင်ရောက်လာတာ​ဖြစ်ပြီး ကျန်းမာရေးစစ်ဆေးမှုတွေ ဆောင်ရွက်ခဲ့ပေမယ့် ပိုမိုသေချာစေဖို့အတွက် အသေးစိတ်စစ်ဆေးသွားဖို့ ရှိနေတာပါ။ အခုလို ကျန်းမာရေးစစ်ဆေးရတာဟာ မလေးရှားနိုင်ငံကနေ ပြန်လည် ဝင်‌ရောက်လာသူ ၃၄ ယောက်စီကနေ Positive တွေ့ရှိခဲ့တဲ့အပြင် အဆိုပါအုပ်စုနဲ့ တစ်အုပ်စု တည်းဖြစ်တဲ့အတွက် Quarantine ဝင်ရောက်ပြီး ၅ ရက်မြောက်နေ့မှ စစ်ဆေးသွားမယ်လို့ တာဝန်ရှိသူက ဆိုပါတယ်။ ဦးတေဇာအောင်က “ရောက်ရှိလာရင် ဓာတ်ခွဲနမူနာ မယူသေးဘူး။ ပိုပြီးတော့ ထိရောက်အောင် ၅ ရက်မြောက်နေ့ကျမှ ကိုဗစ် စစ်ဆေးမယ်၊၊ ကျန်တာတွေကိုတော့ အသေးစိတ်စစ်ဆေးပြီးတော့မှ ဆောင်ရွက်သွားမယ်”လို့ ပြောပါတယ်။ ပြန်လည်ဝင်ရောက်လာသူတွေဟာ ထိုင်းနိုင်ငံတောင်ပိုင်း မလေးရှားနယ်စပ်ကနေ တရားမဝင် နယ်စပ်ဖြတ်ကျော်ဝင်ရောက်မှုနဲ့  Immigration Detention Center(IDC)မှာ ထိန်းသိမ်းခံရပြီး ပြစ်ဒဏ်ရက်စေ့လို့  ပြန်လည်လွတ်မြောက်လာသူတွေပါ။ မဲဆောက်မြို့ အလုပ်သမားသံအရာရှိ ဦးဝေလင်းမောင်က “အကြောင်းအမျိုးမျိုးနဲ့ အဖမ်းခံရတဲ့အတွက် သံရုံးတွေနဲ့ အပေါ်မှာစိစစ်ပြီးမှာ သက်ဆိုင်ရာ ခရိုင်အုပ်ချုပ်ရေးမှူးတွေ ညှိနှိုင်းပြီးတော့မှ ပြန်လည် လွှဲ‌ပြောင်းပေးပို့တာ ဖြစ်တယ်”လို့ ပြောပါတယ်။ ဇွန်လ ၈ ရက်နေ့မှာပဲ ဘားအံမြို့ မူးယစ်ဆေးဖြတ်ပြီးသူများပြန်လည် ထူထောင်ရေးစခန်းမှာ သီးခြား Quarantine ၂၁ ရက် ဝင်ရောက်မှာဖြစ်ပြီး ကျန်းမာရေး စစ်ဆေးဆောင်ရွက်သွားမှာပါ။ မြဝတီမြို့ အမှတ် ၂ ချစ်ကြည်ရေးတံတားကနေ မေလ ၂၃ ရက်နေ့မှစတင်ပြီး ဒီကနေ့အထိ မလေးရှားနိုင်ငံနဲ့ ထိုင်းနိုင်ငံတွေမှာ အကြောင်းအမျိုးမျိုးနဲ့ ပြစ်ဒဏ်ရက်စေ့လွတ်မြောက်လာသူ ၄၀၀ နီးပါးရှိတယ်လို့ တာဝန်ရှိသူက ပြောပါတယ်။ သတင်း- ရဲမင်းခေါင်
11 months Ago
Up