မကွေးတိုင်း

March 8, 2021

မကွေးတိုင်းက တရားသူကြီး ၃ ဦး CDM လှုပ်ရှားမှုတွင် ပါဝင်လာ

မကွေးတိုင်းဒေသကြီးအတွင်းက မြို့နယ် ၃ ခုမှာ မတ် ၇ ရက်နေ့ကစလို့ တရားသူကြီး ၃ ဦး CDM လှုပ်ရှားမှုမှာ ပူးပေါင်းပါဝင်လာတယ်လို့ သိရပါတယ်။

အဲဒီတရားသူကြီးတွေကတော့ တောင်တွင်းကြီးမြို့နယ်တရားသူကြီး ဒေါ်စန်းသီတာအောင်၊ အထက်မင်းလှမြို့နယ် ဒုတိယမြို့နယ်တရားသူကြီး ဦးဒွန်းအောင်နဲ့ အောင်လံမြို့နယ် တွဲဖက်မြို့နယ်တရားသူကြီး ဦးသော်ဇင်ထက်တို့ ဖြစ်တယ်လို့ သိရပါတယ်။

CDM လှုပ်ရှားမှုမှာ ပူးပေါင်းပါဝင်ရတာဟာ မည်သူတစ်ဦးတစ်ယောက်ရဲ့ လှုံ့ဆော်စည်းရုံးမှုမပါဘဲ မိမိသဘောဆန္ဒအရ ပြုလုပ်တာဖြစ်ပြီးတော့ ဌာန၊ လုပ်ဖော်ကိုင်ဖက်တွေနဲ့ အကြီးအကဲများအပေါ် မထီမဲ့မြင်ပြုလုပ်တာ မဟုတ်ဘူးလို့ သူတို့ရဲ့ Facebook လူမှုကွန်ရက်စာမျက်နှာပေါ်မှာ ရေးသားထားပါတယ်။

တရားရေးဌာနမှာ ပြည်သူတွေကို ဥပဒေဘောင်အတွင်းက အကာကွယ်ပေးမယ်ဆိုတဲ့ ခံယူချက်နဲ့ တာဝန်ထမ်းဆောင်ခဲ့တာဖြစ်ပြီး စစ်တပ်က အာဏာသိမ်းပြီးနောက်ပိုင်းမှာ ဥပဒေ ဘောင်အတွင်းမှ အကာကွယ်ပေးနိုင်ခြင်းမရှိတော့ဘူးလို့ ယူဆပြီး CDM လှုပ်ရှားမှုမှာ ပူးပေါင်းပါဝင်ရတာလို့ ရေးသားထားပါတယ်။

2 months Ago

February 15, 2021

မကွေးတိုင်းတွင် ညမထွက်ရအမိန့် ချိုးဖောက်သူ ၁၈ ဦးကို အမှုဖွင့်အရေးယူ

မကွေးတိုင်းဒေသကြီးအတွင်းမှာ ဖေဖော်ဝါရီ ၉ ရက်မှ ၁၄ ရက်အထိ ညမထွက်ရ အမိန့်ချိုးဖောက်တဲ့သူ ၁၈ ယောက်ကို အမှုဖွင့် အရေးယူထားတယ်လို့ တိုင်းဒေသကြီးရဲတပ်ဖွဲ့ကနေ သိရပါတယ်။

အမျိုးသား ၁၆ ယောက်နဲ့ အမျိုးသမီး ၂ ယောက် စုစုပေါင်း ၁၈ ယောက်ကို ညမထွက်ရအမိန့် ချိုးဖောက်မှု ပုဒ်မ ၁၈၈ နဲ့ အမှုဖွင့် တရားစွဲဆိုထားပြီး အာမခံပေးထားတယ်လို့ တိုင်းဒေသကြီးရဲတပ်ဖွဲ့ တာဝန်ရှိသူတစ်ဦးက ပြောပါတယ်။

မကွေးတိုင်းမှာ စစ်တပ်ကအာဏာသိမ်းပြီး ဖေဖော်ဝါရီ ၈ ရက်နေ့ကစလို့ ည ၈ နာရီကနေ မနက် ၄ နာရီအထိ ညမထွက်ရ အမိန့်နဲ့ လူ ၅ ယောက်ထက်ပိုမစုဝေးရ ဆိုပြီ ပုဒ်မ ၁၄၄ ထုတ်ပြန်ထားတာဖြစ်ပါတယ်။

မကွေးမြို့ပေါ်ရပ်ကွက်တချို့မှာတော့ ညပိုင်းလုံခြုံရေးအတွက် ရပ်ကွက်အလိုက်၊ လမ်းအလိုက် ကင်းတာဝန်တွေချထားပြီး လမ်းအလိုက် ဝါးကတ်တွေ ကာရံထားတာလည်း တွေ့ရပါတယ်။

သတင်း - မင်းထီး

3 months Ago
More News
Up