ဗိုလ်ချုပ်မှူးကြီးမင်းအောင်လှိုင်

September 19, 2021

အကြမ်းဖက်စစ်ခေါင်းဆောင်အား ဦးခက်ထိန်နန်က ကချင်အမျိုးသား ခေါင်းပေါင်းပေးအပ်

အာဏာသိမ်းအကြမ်းဖက်စစ်ကောင်စီ ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ဦးခက်ထိန်နန်က ကချင်အမျိုးသားဝတ်စုံနဲ့ ခေါင်းပေါင်း ပေးအပ်လိုက်တယ်လို့ အမည်မဖော်လိုသူ တစ်ဦးက ပြောပါတယ်။

စက်တင်ဘာ ၁၈ ရက်က အာဏာသိမ်းစစ်ခေါင်းဆောင်  ကချင်ပြည်နယ်ခရီးစဉ် လာရောက်စဉ် စစ်ကောင်စီခန့် ကချင်ပြည်နယ်၀န်ကြီးချုပ် ဦးခက်ထိန်နန်က   ကချင်အမျိုးသား ရိုးရာဝတ်စုံ၊  ခေါင်းပေါင်း၊ ဓားနဲ့ လွယ်အိတ် လက်ဆောင်ပေးအပ်ခဲ့တာဖြစ်ပါတယ်။ 

ကချင်တစ်မျိုးသားလုံးက တန်ဖိုးထားတဲ့ ကချင်အမျိုးသား ခေါင်းပေါင်းအား အကြမ်းဖက်ခေါင်းဆောင်တစ်ဦးကို ပေးအပ်လိုက်တဲ့အပေါ် ကချင်လူငယ်တစ်ဦးက "ကချင်လူမျိုးတစ်ယောက်အနေနဲ့ အမည်ကင်ပွန်းမတပ်ရသေးဘဲ တခြားသူစိမ်းတစ်ယောက်ကို  ခုလို ကချင်အမျိုးသားခေါင်းပေါင်းပေးအပ်လိုက်တာက ကချင်တစ်မျိုးသားလုံးကို စော်ကားလိုက်တာပါဘဲ။ ကချင်ရိုးရာယဉ်ကျေးမှုကို မထီမဲ့မြင် ပြုလိုက်တာပါ"လို့ ပြောပါတယ်။

ဦးခက်ထိန်နန်ဟာ စစ်တပ်အာဏာသိမ်းပြီးနောက်ပိုင်း အကြမ်းဖက်စစ်ကောင်စီဘက်က ကချင်ပြည်နယ် ၀န်ကြီးချုပ်အဖြစ် ခန့်အပ်ခံထားရသူဖြစ်ပါတယ်။

အာဏာသိမ်း စစ်ကောင်စီခေါင်းဆောင်ဟာ မနေ့မွန်းလွဲပိုင်းက ကချင်ပြည်နယ် မြစ်ကြီးနားမြို့မှာ  ဌာနဆိုင်ရာဝန်ထမ်းတွေ၊ ခရိုင်၊ မြို့နယ်စစ်ကောင်စီအဖွဲ့တွေ၊  မြို့မိမြို့ဖ တွေနဲ့ ကချင်ပြည်နယ်အစိုးရအဖွဲ့ရုံး မလိခခန်းမမှာ တွေ့ဆုံခဲ့ပါတယ်။

ဒီလိုတွေ့ဆုံရာမှာ ဒေသခံ စီးပွားရေးသမားတွေက စက်မှုဇုန်လုပ်ငန်း၊ ကျောက်စိမ်းလုပ်ငန်း၊ ခရီးသွား လုပ်ငန်းတွေ ခွင့်ပြုပေးဖို့နဲ့  အဆင့်မြှင့်တင်ပေးဖို့ တင်ပြခဲ့ကြတယ်လို့ စစ်ကောင်စီပြန် ကြားရေးက သတင်းထုတ်ပါတယ်။

ဒါနဲ့ ပတ်သက်ပြီး စစ်ခေါင်းဆောင်က “ သယံဇာတကို အခြေခံသည့် ကုန်ထုတ်လုပ်မှုလုပ်ငန်းများသည် ရေရှည်တည်တံ့နိုင် သည့် လုပ်ငန်းများမဟုတ်ဘဲ ရေတိုအတွက်သာ အဆင်ပြေနိုင်မည်ဖြစ်သဖြင့် မြေပေါ်မြေအောက်သယံဇာတများကို ထုတ်ယူခြင်းလုပ်ငန်းများကို အားမပေးလို ကြောင်း၊ မိမိတို့နိုင်ငံသည် သယံဇာတများကို ထုတ်ယူပြီး အကြမ်းထည်များကို တင်ပို့သောကြောင့် ဈေးနှုန်းရသင့်သည်ထက် နည်းပါးစွာ ရရှိသဖြင့် အချောထည် များကို ထုတ်လုပ်တင်ပို့နိုင်ရေးကြိုးပမ်းဆောင်ရွက်ရမည်ဖြစ်ကြောင်း၊ အချို့သော သယံဇာတများသည် ပြည့်ဖြိုးမြဲသယံဇာတမဟုတ်သည့်အတွက် ကုန်ခမ်းသွားနိုင် ကြောင်း၊ ပြည်ဖြိုးမြဲသယံဇာတများကိုမူ ပြန်လည် ဖြည့်တင်းရေးနှင့် ထိန်းသိမ်းရေး လုပ်ငန်းများကို လုပ်ဆောင်ရမည်ဖြစ်ကြောင်း။” ပြောကြားခဲ့တယ်လို့ဆိုပါတယ်။

ကချင်ပြည်နယ်မာ ဆန်၊ ပဲ ဖူလုံမှုရှိပေမဲ့  ဆီဖူလုံမှုလိုအပ်နေလို့ ဆီထွက်သီးနှံတွေ စိုက်ပျိုးထုတ်လုပ်ကြဖို့၊ ကချင်ပြည်နယ်ဟာ နေစပ်ဒေသတစ်ခုဖြစ်လို့  နာရီပိုင်းအတွင်း စိုက်ပျိုးမွေးမြူရေး ထုတ်ကုန်တွေ ဈေးကွက်သို့တင်ပို့ရောင်းချနိုင်မည်ဖြစ်ပြီး ဒေသထုတ်ကုန်တွေကို အဆင့်မြှင့်တင်ပြီး တင်ပို့ရောင်းချနိုင်ရန်လိုတယ်လို့ ပြောပါတယ်။

အာဏာသိမ်း စစ်ကောင်စီခေါင်းဆောင် ပူတာအိုဘက်ကို ခရီးဆက်မှာဖြစ်တယ်လို့သိရပါတယ်။

Photo-DSINFO

1 week Ago

September 10, 2021

တရုတ်၊ ကမ္ဘောဒီးယားနှင့် ထိုင်းတို့ကို ကျေးဇူးတင်ကြောင်း အကြမ်းဖက်စစ်ခေါင်းဆောင်ပြော

ကိုဗစ်-၁၉ ထိန်းချုပ်ရေးအတွက် လိုအပ်တဲ့ဆေးဝါးနဲ့ဆေးပစ္စည်းတွေ ကမ္ဘောဒီးယားနိုင်ငံမှ အထူးလေယာဉ်တွေနဲ့ ပို့ဆောင်လှူဒါန်းပေးမှုနဲ့ နယ်စပ်ကတစ်ဆင့်တင်သွင်းနိုင်ရေး စီစဉ်ဆောင်ရွက်ပေးနေတဲ့  တရုတ်နိုင်ငံနဲ့ ထိုင်းနိုင်ငံကိုလည်း အထူးကျေးဇူးတင်ရှိကြောင်း အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောပါတယ်။ 

စက်တင်ဘာ ၉ ရက်က အွန်လိုင်းကနေ ကျင်းပတဲ့ သတ္တမအကြိမ် GMS မဟာမဲခေါင်ဒေသခွဲထိပ်သီးအစည်းအဝေး (7th Greater Mekong Subregion Summit) မှာ ပြောကြားခဲ့တာပါ။

အနာဂတ်မှာ GMS ပူးပေါင်းဆောင်ရွက်မှုအစီအစဉ်အတွက် လမ်းပြမြေပုံအဖြစ် ဖော်ဆောင်ပေးမယ့် ထိပ်သီး အစည်းအဝေးမှာ အတည်ပြုထုတ်ပြန်မယ့်  GMS စီးပွားရေးပူးပေါင်း ဆောင်ရွက်မှုအစီအစဉ် မဟာဗျူဟာမူဘောင် ၂၀၃၀ ကို ကြိုဆိုပါကြောင်း၊ GMS ကိုဗစ်-၁၉ တုံ့ပြန်ရေးနဲ့ ပြန်လည်ထူထောင်ရေး စီမံချက်(၂၀၂၁-၂၀၂၃)ကို မြန်မာနိုင်ငံအနေနဲ့ ကြိုဆိုပါကြောင်းပြောပါတယ်။

ဒေသတွင်းကုန်ထုတ်ပစ္စည်းတွေ ထုတ်လုပ်တင်ပို့နိုင်ဖို့နဲ့  ဖွံ့ဖြိုးမှုအတွက် GMS အစီအစဉ်အရ ဆောင်ရွက်နေတဲ့  စီးပွားရေးစင်္ကြံတွေဟာ  အလွန် အရေးပါကြောင်းနဲ့  ဒီအထဲက အရှေ့-အနောက် စီးပွားရေးစင်္ကြံလမ်းကြောင်းဟာ မြန်မာ နိုင်ငံအတွက်အလွန်အရေးပါသည့် လမ်းကြောင်းကြောင်း၊ ဗီယက်နမ်(ဒါနန်း) မှ ရန်ကုန်(သီလဝါ)အထိ ဆက်သွယ်ထားတဲ့ အဆိုပါစင်္ကြံဟာ မဟာမဲခေါင် ဒေသခွဲ နိုင်ငံတွေအတွင်း ချိတ်ဆက်မှုအားကောင်းစေပြီး ကုန်သွယ်မှုပိုမို အဆင်ပြေချောမွေ့ စေမှာဖြစ်ကြောင်းလည်း ပြောပါတယ်။

နိုင်ငံတော်ကို ဒီမိုကရေစီ လမ်းကြောင်းပေါ်က သွေဖီမသွားစေရေးအတွက် ရှေ့လုပ်ငန်းစဉ်(၅)ရပ်ချမှတ် ဆောင်ရွက်နေကြောင်းနဲ့ ပြည်ထောင်စုရွေးကောက်ပွဲကော်မရှင်ကို ပြန်လည်ဖွဲ့စည်းပြီး မဲစာရင်း စစ်ဆေးခြင်းအပါအဝင် လုပ်ဆောင်သင့် လုပ်ဆောင်ထိုက်သည်များကို ဥပဒေနဲ့အညီ ဆက်လက်ဆောင်ရွက်သွားမယ်လို့လည်း ပြောသွားပါတယ်။

အဆိုပါအစည်းအဝေးသို့ မဟာမဲခေါင်ဒေသခွဲနိုင်ငံတွေက ခေါင်းဆောင်တွေဖြစ်တဲ့ ကမ္ဘောဒီးယား၊ တရုတ်၊ လာအို၊ ထိုင်း၊ ဗီယက်နမ် စတဲ့ နိုင်ငံတွေက  ဝန်ကြီးချုပ်တွေနဲ့ ဝန်ကြီးတွေ၊ အဆင့်မြင့်အရာရှိကြီးတွေ၊ အာရှဖွံ့ဖြိုးရေးဘဏ်ဥက္ကဋ္ဌနဲ့  ဖွံ့ဖြိုးမှု မိတ်ဖက်အဖွဲ့အစည်းတွေက ကိုယ်စားလှယ်တွေနဲ့ ပုဂ္ဂလိကကဏ္ဍမှ ကိုယ်စားလှယ်များ တက်ရောက်ကြပါတယ်။'

Photo-DSINFO

2 weeks Ago
More News
Up