ဗင်နီဇွဲလား

July 23, 2019

ဗင်နီဇွဲလားနိုင်ငံ ပြည်နယ်အများစုတွင် လျှပ်စစ်မီးပျက်နေ

ဗင်နီဇွဲလားနိုင်ငံရဲ့ ပြည်နယ် ၂၃ ခုအနက် ထက်ဝက်ကျော်လောက်မှာ ဇူလိုင် ၂၂ ရက်နေ့က  လျှပ်စစ်မီး ပျက်နေတယ်လို့ မျက်မြင်သက်သေတွေနဲ့ လူမှုမီဒီယာ စာမျက်နှာပေါ်က အချက်အလက်တွေကို ကိုးကားပြီး ရိုက်တာသတင်းဌာနက ဖော်ပြခဲ့ပါတယ်။ ဗင်နီဇွဲလား ပြန်ကြားရေးဝန်ကြီး ဟော်ဟေ ရိုဒရီဂတ်ဇ်က တနင်္လာနေ့က မီးပျက်တာဟာ လျှပ်စစ်သံလိုက်နဲ့ တိုက်ခိုက်တာကြောင့်လို့ ပြောပေမယ့် တိကျတဲ့ သက်သေ အထောက်အထားတွေကိုတော့ မဖော်ပြခဲ့ပါဘူး။ မတ်လကလည်း နိုင်ငံတဝန်း မီးပျက်လို့ သန်းချီတဲ့ ပြည်သူတွေဟာ သောက်သုံးရေနဲ့ ဖုန်းလိုင်းဆက်သွယ်ရေးတွေ ပျက်ခဲ့ပါသေးတယ်။ အဲဒီအချိန်က ဗင်နီဇွဲလား အစိုးရဟာ အတိုက်အခံအဖွဲ့နဲ့ အမေရိကန်နိုင်ငံအပေါ် အပြစ်ဖို့ခဲ့ပါတယ်။ လျှပ်စစ်မီးပျက်တဲ့ ပြဿနာဟာ တိုင်းပြည်စီးပွားရေး အကျပ်အတည်းကို ပိုဆိုးစေခဲ့ပါတယ်။ မြို့တော် ကာရာကတ်စ်မှာ မြေအောက်ရထားလိုင်း ပြေးဆွဲမှုတွေလည်း ရပ်ဆိုင်းလိုက်တာကြောင့် ခရီးသွားပြည်သူတွေ နေအိမ်ပြန်ဖို့ အခက်တွေ့နေရပါတယ်။ နှစ်ပေါင်းများစွာ ရင်းနှီးမြှုပ်နှံမှုနဲ့ ထိန်းသိမ်းမှု အားနည်းတာကြောင့် ဗင်နီဇွဲလားနိုင်ငံရဲ့ အမျိုးသားမဟာဓာတ်အားလိုင်းဟာ တော်တော်လေး ယိုယွင်းပျက်စီးနေတယ်လို့ အတိုက်အခံ အဖွဲ့နဲ့ လျှပ်စစ်ရေးရာ ကျွမ်းကျင်သူတွေက ပြောပါတယ်။ ရေနံကြွယ်ဝတဲ့ ဗင်နီဇွဲလားနိုင်ငံဟာ ငွေကြေးဖောင်းပွမှု မြင့်တက်နေပြီး စားနပ်ရိက္ခာနဲ့ ဆေးဝါးပစ္စည်းတွေ ပြတ်လပ်နေတာကြောင့် နိုင်ငံသား ၄ သန်းကျော်ဟာ ပြည်ပနိုင်ငံတွေကို ထွက်ပြေးနေကြရပါတယ်။
2 years Ago

July 22, 2019

အမေရိကန် စစ်လေယာဉ်ကို ဗင်နီဇွဲလား စစ်လေယာဉ်တစီး နောက်ယောင်ခံလိုက် (ရုပ်သံ)

ဗင်နီဇွဲလား စစ်လေယာဉ်တစီးဟာ အမေရိကန်ရေတပ်ရဲ့ EP-3 စစ်လေယာဉ်ကို နိုင်ငံတကာ လေကြောင်းပိုင်နက်ထဲမှာ ထက်ကြပ်မကွာ နောက်ယောင်ခံလိုက်ခဲ့တယ်လို့ အမေရိကန် အစိုးရက ဇူလိုင် ၂၁ ရက်မှာ စွပ်စွဲလိုက်ပါတယ်။ ဇူလိုင် ၁၉ ရက်နေ့က အမေရိကန်နဲ့ ဗင်နီဇွဲလား စစ်လေယာဉ်နှစ်စီးအကြား အခုလို ထိပ်တိုက်တွေ့ဆုံခဲ့တာဖြစ်ပြီး အဲဒီနေ့မှာပဲ အမေရိကန်အစိုးရက ဗင်နီဇွဲလားစစ်တပ်ရဲ့ ထိပ်တန်းအရာရှိ လေးယောက်ကို ပိတ်ဆို့ဒဏ်ခတ်မှု ချမှတ်လိုက်ပါတယ်။ ၂၀၁၈ ရွေးကောက်ပွဲမှာ ပြန်ပြီး ရွေးကောက်ခံခဲ့ရတဲ့ ဗင်နီဇွဲလားသမ္မတ နီကိုးလပ်စ် မာဒူရိုကို ရာထူးကဖြုတ်ချဖို့ သမ္မတ ဒေါ်နယ်ထရမ့် ဦးဆောင်တဲ့ အမေရိကန် အစိုးရဟာ ဗင်နီဇွဲလားအပေါ် ပိတ်ဆို့ဒဏ်ခတ်မှုတွေ အကြိမ်ကြိမ် ချမှတ်ခဲ့ပါတယ်။ အမေရိကန် အပါအဝင် အနောက်နိုင်ငံ အများစုက သမ္မတ မာဒူရိုရဲ့ ရွေးကောက်ပွဲ အနိုင်ရလဒ်ကို တရားမဝင်ဘူးလို့ သတ်မှတ်ထားကြပါတယ်။ ဗင်နီဇွဲလား အထူးစီးပွားရေးဇုန်ရဲ့ လေကြောင်းပိုင်နက်ထဲကို ဝင်လာတဲ့ အမေရိကန် စစ်လေယာဉ်တစီးကို ကြားဖြတ်ဟန့်တားခဲ့တယ်လို့ ဗင်နီဇွဲလား ကာကွယ်ရေးဝန်ကြီး ဗလာဒီမာ ပါဒရိုက အမေရိကန်ရဲ့ စွပ်စွဲချက်ကို တုံ့ပြန် ပြောကြားခဲ့ပါတယ်။ အဲဒီဖြစ်ရပ်မှာ လေယာဉ်နှစ်စီးစလုံး မတိုက်မိခဲ့တဲ့အပြင် ထိခိုက်ဒဏ်ရာရသူတွေလည်း မရှိခဲ့ဘူးလို့ ရိုက်တာသတင်းဌာနက ဖော်ပြပါတယ်။
2 years Ago
More News
Up