ဖားကန့်

September 19, 2021

ဖားကန့်မြို့နယ် ဆိုင်းတောင်ရွာရှိ မိုင်တဲလ် တာဝါတိုင် ဖျက်ဆီးခံရ

ကချင်ပြည်နယ် ဖားကန့်မြို့နယ်၊ ဆိပ်မူကျေးရွာအုပ်စု ဆိုင်းတောင်ကျေးရွာမှာ စက်တင်ဘာ ၁၈ ရက်နေ့ ည ၇ နာရီခွဲလောက်က  မိုင်တဲလ်တာဝါတိုင်တစ်ခု မိုင်းခွဲဖျက်ဆီးခံရတယ်လို့ သိရပါတယ်။

ဆိပ်မူကျေးရွာအုပ်စုမှာ ရှိတဲ့ မိုင်တဲလ်တာဝါတိုင်ဟာ အခုအကြိမ်နဲ့ဆိုရင် ဒုတိယအကြိမ် မိုင်းခွဲခံရတာလည်းလို့ ဒေသခံတွေက ပြောပါတယ်။

“တိုင်တွေ ဘာတွေ လဲသွားတာတော့ မရှိဘူး။ အောက်က အထိုင်စက်ကိုပဲ  မိုင်းခွဲတာ။ ဘယ်သူ လာခွဲတာလဲတော့ မသိဘူး” လို့ ဒေသခံတစ်ဦးက ပြောပါတယ်။

ဆိပ်မူကျေးရွာမှာရှိတဲ့  Mytel တာဝါတိုင်ဟာ စက်တင်ဘာ ၁၆ ရက်က တစ်ကြိမ်၊ အခု တစ်ကြိမ် ဖောက်ခွဲ ဖျက်ဆီးခံခဲ့ရပေမဲ့ မည်သူမည်ဝါ လာရောက်မိုင်းခွဲတယ်ဆိုတာ မသိရဘူးလို့လည်း ဒေသခံတွေက ပြောပါတယ်။

ဖားကန့်မြို့နယ်အတွင်းမှာ စစ်အာဏာရှင်စနစ်ကို ဆန့်ကျင်ကြောင်း နေ့စဉ်ဆန္ဒပြနေပြီး  သြဂုတ် ၂၀ ရက်ကနေ ဒီနေ့အထိ အော်ပရေတာ အသီးသီးရဲ့ အင်တာနက်လိုင်းတွေကို ဖြတ်တောက်ထားတာ ဖြစ်ပါတယ်။

5 days Ago

September 11, 2021

ဖားကန့်မြို့နယ်တွင် စစ်ရဟတ်ယာဉ်အချို့ ပျံသန်း

အင်တာနက် ဖြတ်တောက်ထားတဲ့ ကချင်ပြည်နယ် ဖားကန့်မြို့နယ်မှာ စက်တင်ဘာ ၁၁ ရက်နေ့ ညနေ ၃ နာရီလောက်က စစ်ရဟတ်ယာဉ်တွေ ပျံသန်းနေပြီး ဗျူဟာကုန်းပေါ် လက်နက်လာချသွားတယ်လို့ ဒေသခံတွေဆီက သိရပါတယ်။

“စစ်ရဟတ်ယာဉ် စုစုပေါင်း ၃ စီး ပျံနေတာ။ တစ်စီးက အပေါ်ကနေ ကင်းစောင့်ပေးနေတာလား မသိဘူး။ တစ်စီးအရင်ဆင်းလာပြီး လက်နက်လာချသွားတယ်။ ပထမတစ်စီးက ပစ္စည်းချတာ ၁၅ မိနစ်ကြာတယ်။ နောက်တစ်စီးက ၈ မိနစ်ကြာတယ်။ အရင်ရက်ကလည်း အဲ့လိုပဲ။ လက်နက်လာချတာထင်တယ်။ ဒီမှာတော့ အင်တာနက်လည်း မရနဲ့။ စစ်ရေးတင်းမာလာမှာလားဆိုပြီး အားလုံး စိုးရိမ်နေကြတယ်” လို့ ဒေသခံတစ်ဦးက ပြောပါတယ်။

ပြီးခဲ့တဲ့ စက်တင်ဘာ ၉ ရက်နေ့ကလည်း ဖားကန့်မြို့ပေါ် စစ်ရဟတ်ယာဉ်တွေ ပျံဝဲနေပြီး ဗျူဟာကုန်းပေါ် ဆင်းသက်မှုတွေ ရှိခဲ့တယ်လို့ ဒေသခံတွေဆီက သိရပါတယ်။

ဖားကန့်ပြည်သူတွေဟာ ဒီကနေ့ စက်တင်ဘာ ၁၁ ရက်နေ့ ညနေပိုင်းမှာလည်း လူအင်အား ၁၀၀ ကျော်လောက်နဲ့ မှော်တွင်းလှည့်လည် ဆန္ဒထုတ်ဖော်ခဲ့တယ်လို့ ဒေသခံတစ်ဦးက ပြောပါတယ်။

“စစ်ရဟတ်ယာဉ်တွေ ပျံနေလည်း မတတ်နိုင်ဘူး။ စစ်အာဏာရှင်ကိုတော့ အဆုံးထိ တော်လှန်ရမှာပဲ။ ကျနော်တို့ KIA နဲ့ PDF တိုက်ပွဲတိုင်းမှာ နိုင်ပါစေ၊ God Bless KIA ၊ NUG အစိုးရ တို့ အစိုးရ၊ သံအမတ် ဦးကျော်မိုးထွန်းကို ကြိုဆိုပါတယ်။ အဲ့ဒီကြွေးကြော်သံတွေနဲ့ လုပ်ခဲ့တယ်။ အင်တာနက်ဖြတ်လည်း စစ်အာဏာရှင်ကျဆုံးတဲ့အထိ တော်လှန်မယ်” လို့ ဒေသခံတစ်ဦးက ပြောပါတယ်။

ဖားကန့်မြို့ကို ဩဂုတ်လ ၂၀ရက် ည ၈နာရီကစပြီး ဖုန်းအင်တာနက်၊ ဝိုင်ဖိုင်အင်တာနက်တွေကို ဖြတ်တောက်ထားတာ ဖြစ်ပါတယ်။

2 weeks Ago
More News
Up