ဖမ်းဆီးသတ်ဖြတ်

November 19, 2021

စစ်ရှောင်များအား ကူညီနေသူ ၁ ဦးကို စစ်တပ်က ဖမ်းဆီးသတ်ဖြတ်၊ ကျဆုံးပြည်သူ ၁၂၇၅ ဦး ရှိလာ

မြန်မာနိုင်ငံမှာ မတရားအာဏာသိမ်းကာလ ၉ လခွဲကျော်အကြာ အကြမ်းဖက်စစ်တပ် ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁,၂၇၅ ယောက်ထိရှိလာပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ နိုဝင်ဘာ ၁၈ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ပြည်သူ ၁၀,၂၈၅ ယောက် ဖမ်းဆီးခံခဲ့ရပြီး ၇,၃၉၀ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၂၉၆ ယောက်ကတော့ ထောင်ဒဏ်ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၂၆ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

အမှုဖွင့်ခံထားရပြီး ဖမ်းဝရမ်းထုတ်ခံထားရတဲ့အတွက် တိမ်းရှောင်နေသူ အရေအတွက်ကတော့ ၁၉၅၄ ယောက်ရှိနေပြီး သူတို့ထဲက မျက်ကွယ်သေဒဏ်ချမှတ်ခံထားရသူ ၃၉ ယောက်အပါအဝင် ၁၁၈ ယောက်ဟာ မျက်ကွယ်ပြစ်ဒဏ်ချမှတ်ခံထားရကာ  သေဒဏ်ချ မှတ်ခံထားရသူ စုစုပေါင်း ၆၅ ယောက် ရှိခဲ့ပြီဖြစ်ပါတယ်။

ရှမ်းပြည်နယ်၊ ဖယ်ခုံမြို့က စစ်ဘေးရှောင်တွေကို အကူအညီပေးနေတဲ့ ဦးညီခင်ကို အ ကြမ်းဖက်စစ်အုပ်စုက နိုဝင်ဘာ ၁၅ ရက်နေ့က ဖမ်းဆီးသွားခဲ့ပြီးနောက် ဖယ်ခုံမြို့ရှိ အ မှတ် (၇) စစ်ဆင်ရေးကွပ်ကဲမှုဌာနချုပ်မှာ ချုပ်နှောင်ကာ ညှဉ်းပန်းနှိပ်စက် စစ်ကြောခဲ့တာကြောင့် ဦးညီခင်ဟာ ၂ ရက်အကြာ နိုဝင်ဘာ ၁၇ ရက်က ကျဆုံးသွားခဲ့ကြောင်း သိရှိရပါတယ်။

မန္တလေးတိုင်းဒေသကြီး၊ သပိတ်ကျင်းမြို့နယ်၊ မြင်သာကျေးရွာမှ အာဏာဖီဆန်ရေးလှုပ် ရှားမှု(CDM)ပြုလုပ်ထားတဲ့ ကျောင်းဆရာ ဦးဇော်မင်းအောင်နဲ့ အရပ်သားတယောက်တို့ ကို အကြမ်းဖက်စစ်အုပ်စုက နိုဝင်ဘာ ၁၇ ရက်မနက် ၁၁ နာရီလောက်က  ဖမ်းဆီးသွားခဲ့ ပြီးနောက် စစ်ကြောရေးမှာ ညှဉ်းပန်းနှိပ်စက်တာကြောင့် ဦးဇော်မင်းအောင်မှာ အဲဒီနေ့ ညနေ ၅ နာရီမှာ ကျဆုံးသွားခဲ့ကြောင်း သိရှိရပါတယ်။ သူတို့ ၂ ယောက်ကို ပြည်သူ့ကာ ကွယ်ရေးတပ်ဖွဲ့ (PDF)နဲ့ အဆက်သွယ်ရှိတယ်လို့ စွပ်စွဲကာ ဖမ်းဆီးသွားခဲ့ခြင်းဖြစ်တယ်လို့ သိရပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူ တွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရတာတွေနဲ့ ပတ်သက်လို့ နွေဦး တော်လှန်ရေးကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေ အေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီး မေးလ်နဲ့ အဖမ်းအဆီးအချက်အလက်တွေကို [email protected] အီးမေးလ် တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

3 weeks Ago

November 17, 2021

သပိတ်ကျင်းမြို့နယ်တွင် CDM ကျောင်းဆရာ ၁ ဦးကို စစ်ကောင်စီက ဖမ်းဆီးသတ်ဖြတ်

မန္တလေးတိုင်း၊ သပိတ်ကျင်းမြို့နယ်၊  မြင်သာကျေးရွာက အာဏာဖီဆန် CDM လုပ်ထားတဲ့ ကျောင်းဆရာတယောက်ကို စစ်ကောင်စီတပ်က   ဖမ်းဆီးသွားပြီး သတ်ပစ်လိုက်ပါတယ်။

ဆရာ ဦးဇော်မင်းအောင်နဲ့ ရွာသားတယောက်ကို ဒီနေ့ မနက် ၁၁ နာရီခွဲမှာ စစ်ကောင်စီတပ်သားတွေက နေအိမ်မှာ လာရောက်ဖမ်းဆီးခဲ့တာပါ။

"PDF နဲ့ ပတ်သက်တယ်ဆိုပြီး လာဖမ်းတာ။ အိမ်တွေကိုလည်း မွှေတယ်။ ကြာညှပ်ရဲစခန်းကို ခေါ်သွားတယ်။ ညနေ ၅ နာရီမှာတော့ ဆရာအလောင်းက ကြာညှပ်ရင်ခွဲရုံကိုရောက်လာတယ်။ ခု မီးသင်္ဂြိုလ်နေပါတယ်" လို့ ဒေသခံတယောက်က ပြောပါတယ်။

ဒါ့အပြင်"အမေစု ကျန်းမာပါစေ"လို့ အော်ခိုင်းပြီး ရိုက်နှက်နှိပ်စက်ခဲ့တယ်လို့သိရပါတယ်။

အသက် ၄၀ ဝန်းကျင်အရွယ် ဆရာဦးဇော်မင်းအောင်ဟာ ရွှေစကာကျေးရွာ (အထက)ခွဲက ကျောင်းဆရာတယောက်ဖြစ်ပြီး သူနဲ့အတူဖမ်းခံရတဲ့ ကိုမိုးကျော်ဟာလည်း ရိုက်နှက်ခံထားရလို့ နားထဲ သွေးထွက်နေတယ်လို့ သိရပါတယ်။

3 weeks Ago
Up