ပုဒ်မ ၅၀၅(က)

June 12, 2021

ပုသိမ်အကျဉ်းထောင်တွင်း ဖမ်းဆီးခံထားရသည့်ပန်းချီဆရာ ဦးသက်နောင် ကျန်းမာရေးဆိုးရွားနေ

ဧရာဝတီတိုင်း၊ ပုသိမ်မြို့မှာ မတ်လ ၇ ရက်က စစ်တပ်ရဲ့ ဖမ်းဆီးခံထားရတဲ့ ပန်းချီဆရာ ဦးသက်နောင်ဟာ ထောင်တွင်းမှာ ကျန်းမာရေးအခြေအနေဆိုးရွားနေတယ်လို့ သိရပါတယ်။

ပန်းချီဆရာ ဦးသက်နောင်ကို အကြမ်းဖက်စစ်ကောင်စီက ပုဒ်မ ၅၀၅ (က)နဲ့ တရားစွဲဆိုထားပြီး ပုသိမ်ထောင်ထဲမှာ ဖမ်းဆီးထားတာ ၃ လကျော်ရှိလာပေမဲ့ ဆေးကုသခွင့်မပေးတာကြောင့် ကျန်းမာရေးအခြေအနေဆိုးရွားလာတာလို့ သူနဲ့ နီးစပ်သူတွေကပြောပါတယ်။

 အရင်ကတည်းက ရောဂါအခံ အူလမ်းကြောင်းဆိုင်ရာရောဂါကို တော်တော်ကို ပြင်းပြင်းထန်ထန် ခံစားနေရတယ်။ သူ့ရောဂါက အချိန်မရွေး အသက်အန္တရာယ်ရှိနိုင်တယ်။ အဲတော့ ဒီရောဂါကြီးနဲ့ ထောင်ထဲမှာတစ်ခုခုဖြစ်သွားမှာ စိုးရိမ်နေရတယ်"လို့ ဦးသက်နောင်ရဲ့ မိတ်ဆွေတဦးက ပြောပါတယ်။

ပန်းချီဆရာ ဦးသက်နောင်မှာ အူလမ်းကြောင်းဆိုင်ရာရောဂါ ပြင်းထန်စွာ ခံစားနေရတာကြောင့် ထောင်တွင်းတရားရုံးမှာ အာမခံလျှောက်ထားခဲ့ပေမယ့် ပယ်ချခံခဲ့ရပါတယ်။ 

ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း စစ်အာဏာရှင်ဆန့်ကျင်ရေး လှုပ်ရှားမှုတွေကြောင့် နိုင်ငံရေးတက်ကြွလှုပ်ရှားသူတွေ ပန်းချီဆရာနဲ့ ကဗျာဆရာတွေအပါဝင် ဖမ်းဆီးခံရသူ  ၅၀ ကျော်ရှိပါတယ်။

2 weeks Ago

June 9, 2021

သရုပ်ဆောင် ပိုင်တံခွန်အမှု တရားလို မြောက်ဒဂုံရဲစခန်းမှူးကို စတင်စစ်ဆေး

စစ်ကောင်စီက ပုဒ်မ ၅၀၅(က) နဲ့ ဖမ်းဆီးတရားစွဲထားတဲ့ သရုပ်ဆောင် မော်ဒယ် ပိုင်တံခွန်အမှုကို ဇွန်လ ၉ ရက် ဒီနေ့ ရုံးချိန်းခေါ်ခဲ့ပြီး တရားလို မြောက်ဒဂုံမြို့မရဲစခန်းမှူး ဒုရဲမှူးဇော်မင်းအောင်ကို အင်းစိန်ထောင်တွင်း တရားရုံးမှာ စတင်စစ်ဆေးခဲ့ပါတယ်။

အမှုကို ပြန်ချေပနိုင်ဖို့ တရားလိုရဲ့စွပ်စွဲချက်တွေ ခိုင်မာမှုရှိမရှိ ပိုင်တံခွန် ရဲ့ဥပဒေအကြံပေးက သုံးသပ်နေပြီး တရားလိုပြသက်သေတွေရဲ့စွဲချက်တွေကို နောက်ရုံးချိန်းမှာ စောင့်ကြည့်ရဦးမယ်လို့  ပိုင်တံခွန်ရဲ့ဥပဒေအကြံပေး  တရားလွှတ်တော် ရှေ့နေ ဦးခင်မောင်မြင့်က ပြောပါတယ်။

သရုပ်ဆောင်ပိုင်တံခွန်ကို အင်းစိန်ထောင်တွင်းသီးသန့်ဆောင်မှာ ထိန်းသိမ်းထားတာဖြစ်ပြီး အခုရုံးချိန်းမှာ ကျန်းမာရေးကောင်းမွန်တာတွေ့ရတယ်လို့ ရှေ့နေကပြောပါတယ်။ ပိုင်တံခွန်ကို စစ်ကောင်စီက စွဲချက်တင်ရာမှာ ဖေ့စ်ဘွတ်ခ် လူမှုကွန်ရက်ပေါ်က အထောက်အထားတွေနဲ့ စွပ်စွဲတာဖြစ်ပါတယ်။

သရုပ်ဆောင်ပိုင်တံခွန်ကို ဧပြီ ၈ရက် နေ့က မြောက်ဒဂုံက သူ့ရဲ့နေအိမ်မှာ ဝင်ရောက်ဖမ်းဆီးခဲ့တာဖြစ်ပါတယ်။ ပိုင်တံခွန်အမှုအတွက် နောက်ရုံးချိန်းကို ဇွန်လ ၂၃ ရက်နေ့မှာပြန်ခေါ်ထားပြီး တရားလိုပြသက်သေတွေကို ဆက်စစ်မှာဖြစ်ပါတယ်။ အင်းစိန်ထောင်ထဲရောက်ပြီး ပုဒ်မ ၅၀၅ နဲ့အစွဲခံထားရသူတွေကို အာမခံပေးလေ့မရှိတဲ့အတွက် ပိုင်တံခွန်အတွက် အာမခံလျှောက်ထားဖို့ကလည်း ခက်ခဲနေတယ်လို့ သူ့ရဲ့ဥပဒေအကြံပေးက ပြောပါတယ်။

2 weeks Ago

သရုပ်ဆောင် ရဲတိုက်ထံမှ စိတ်ကြွဆေးပြားများ ရှာတွေ့ခြင်းမဟုတ်ဟု စစ်ဆေးပေါ်ပေါက်

သရုပ်ဆောင်ရဲတိုက်ကို စွပ်စွဲထားတဲ့ မူးယစ်ဆေးဝါးအမှုမှာ ရဲက တင်သွင်းတဲ့ သက်သေခံ စိတ်ကြွဆေးပြားတွေဟာ  ရဲတိုက်ရဲ့ ကိုယ်ပေါ်ကနေ ရှာတွေ့တာမဟုတ်ဘူးလို့ တရားရုံးမှာ စစ်ဆေးပေါက်ပေါက်တဲ့အကြောင်း  သူ့ရဲ့ ဥပဒေအကြံပေး ရှေ့နေက ပြောပါတယ်။

သရုပ်ဆောင်မင်းသား ရဲတိုက်ကို လသာမြို့မရဲစခန်းက ပုဒ်မ ၅၀၅(က)နဲ့တရားစွဲဆိုပြီး မရမ်းကုန်းမြို့မရဲစခန်းက မူးယစ်ပုဒ်မ ၁၆(ဂ) နဲ့တရားစွဲဆိုထားတာပါ။ ဇွန်လ ၃ ရက်နေ့မှာ မရမ်းကုန်းမြို့မရဲစခန်းက စွဲဆိုထားတဲ့ မူးယစ်အမှုအတွက် အင်းစိန်ထောင်တွင်းတရားရုံးမှာ တရားလိုရဲစခန်းမှူးကို စတင်စစ်ဆေးခဲ့ပါတယ်။

စစ်ဆေးရာမှာ စိတ်ကြွမူးယစ်ဆေးပြား ၁၁ ပြားနဲ့ ဆက်စပ်ပစ္စည်းတွေကို ရဲတိုက်ဆီက ဖမ်းဆီးရမိခဲ့တယ်လို့ တရားလိုရဲက  ထွက်ဆိုခဲ့ပေမယ့် တရားရုံးစစ်ဆေးချက်အရ ရဲတိုက်ရဲ့ကိုယ်ပေါ်က ရှာဖွေတွေ့ရှိတာမျိုးမဟုတ်ခဲ့ဘူးလို့  ရဲတိုက်ရဲ့ ဥပဒေအကြံပေး  ဦးခင်မောင်မြင့်က ပြောပါတယ်။

"တရားလိုစစ်တယ်။ စိတ်ကြွဆေးပြား ၁၁ ပြားမိတယ်လို့ဆိုတယ်။ မိတာက အိမ်မှာလည်း မဟုတ်ဘူး။ ရုံးခန်းမှာလည်းမဟုတ်ဘူး။ သူ ပိုင်ဆိုင်တဲ့ အဆောက်အအုံမှာလည်း မဟုတ်ဘူး။ လူသူလေးပါး ဖြတ်သန်းသွားလာနေတဲ့သမိုင်းလမ်းဆုံမှာ ရပ်တန့်ရှာဖွေတာ ဖြစ်တယ်။ ရှာဖွေတွေ့ရှိတာကလည်း သူ ဝတ်ထားတဲ့ အင်္ကျီဘောင်းဘီတွဲလျက် ဝတ်စုံအိတ်ထဲကလည်း မိတာမဟုတ်ဘဲနဲ့ ကိုရဲတိုက် လွယ်လာတယ်လို့ပြောတဲ့ ပြောက်ကျားအိတ်ကလေးထဲကနေမှ ဆေးပြား ၁၁ ပြားနဲ့ ဆက်စပ်ပစ္စည်းတွေမိတယ်ဆိုတော့ ကိုရဲတိုက်ကတော့ ဒါ သူ့ပစ္စည်း မဟုတ်ဘူးလို့ အကြိမ်ကြိမ် ငြင်းဆိုထားတယ်။ တရားလိုဒုရဲအုပ်ကလည်း သူ ရှာတယ်လို့ ပြောတယ်။ အဓိကပေါ်ပေါက်တာကတော့ ဒီဆေးပြား ၁၁ ပြားသည် ကိုရဲတိုက်ရဲ့ကိုယ်ခန္ဓာပေါ်က အဝတ်အစားတွေထဲက တွေ့တာမဟုတ်ဘူး။ သီးခြားဖြစ်နေတဲ့ အိတ်တအိတ်ထဲက တွေ့ခဲ့တယ်ဆိုတာကို ပေါ်ပေါက်အောင် စစ်ဆေးနိုင်ခဲ့တယ်။ လက်ဝယ်တွေ့ရှိမှု အဓိပ္ပာယ်ဖွင့်ဆိုချက်ကို ချေဖျက်နိုင်ဖို့ ကြိုးစားနိုင်ခဲ့တဲ့ အနေအထားရှိခဲ့ပါတယ်"။

အဲဒီနေ့ရုံးချိန်မှာ သရုပ်ဆောင်ရဲတိုက်ကို မူးယစ်ဆေးဝါးသတင်းအရ စောင့်ဆိုင်းဖမ်းဆီးတာ တမျိုးတည်းမဟုတ်ဘဲ  ပုဒ်မ ၅၀၅(က)နဲ့ ဖမ်းဝရမ်းထုတ်ထားတဲ့ ကြေညာချက်အရသာ ဖမ်းဆီးခဲ့တယ်ဆိုတဲ့အချက်ကို တရားရံးမှာ ပေါ်အောင်စစ်နိုင်ခဲ့တယ်လို့ ဦးခင်မောင်မြင့်ကပြောပါတယ်။

"ကိုရဲတိုက်ကို ဖမ်းဆီးခြင်းသည် မူးယစ်ဆေးဝါးသတင်းအရ စောင့်ဆိုင်းဖမ်းဆီးတာ မဟုတ်ဘူး။ ဖမ်းဆီးတဲ့ ဧပြီလ ၃ ရက်နေ့မနက်ပိုင်းမှာ ကြေးမုံသတင်းစာ စာမျက်နှာ ၁၇ မှာပါတဲ့ ကိုရဲတိုက် အပါအဝင် အနုပညာရှင်တွေကို ပုဒ်မ ၅၀၅(က)နဲ့ ဖမ်းဝရမ်းထုတ်ထားတဲ့ ကြေညာချက်ပါတယ်။ အဲဒီကြေညာချက်အရပဲ ဖမ်းဆီးတာဖြစ်တယ်။ ဒါကို ပေါ်ပေါက်အောင်စစ်နိုင်ခဲ့တယ်"လို့ ဦးခင်မောင်မြင့်က ပြောပါတယ်။

လက်ရှိ သရုပ်ဆောင်ရဲတိုက်ကို အင်းစိန်ထောင်သီးသန့်ဆောင်မှာ ထိန်းသိမ်းထားတာဖြစ်ပြီး ကျန်းမာရေးကောင်းမွန်တယ်လို့ သိရပါတယ်။

ရဲတိုက်ကို အင်းစိန်ထောင်တွင်းအထူးတရားရုံးမှာ စစ်ဆေးနေတာဖြစ်ပြီး လသာမှာစွဲထားတဲ့ ပုဒ်မ ၅၀၅ (က) အမှုအတွက် ဇွန်လ ၁၅ ရက်နေ့မှာ ရုံးချိန်းပြန်ခေါ်ပြီး မရမ်းကုန်းမှာ စွဲထားတဲ့ မူးယစ်အမှုအတွက် ၁၇ ရက်နေ့မှာ ရုံးချိန်းပြန်ခေါ်ထားပါတယ်။

2 weeks Ago
More News
Up