ပယ်မဲ

December 1, 2015

ရွေးကောက်ပွဲတွင် ပယ်မဲနှင့် ပျောက်မဲ ၁ သန်းကျော်ရှိဟု ကော်မရှင်ထုတ်ပြန်

၂၀၁၅ ရွေးကောက်ပွဲမှာ ဆန္ဒမဲပေးပိုင်ခွင့်ရှိသူ ၃၄ သန်းကျော်ထဲက ၇၀ ရာခိုင်နှုန်းနီးပါး လာရောက်မဲပေးခဲ့ကြပြီး ပယ်မဲနဲ့ပျောက်မဲ အရေအတွက်က ၁ သန်းကျော်ရှိတယ်လို့  ပြည်ထောင်စုရွေးကောက်ပွဲကော်မရှင်က ထုတ်ပြန်တဲ့ စာရင်းဇယားအရ သိရပါတယ်။ ပြီးခဲ့တဲ့ နိုဝင်ဘာ ၈ ရက်နေ့က ပြည်သူ့လွှတ်တော် မဲဆန္ဒနယ် ၃၂၃ နယ်၊ အမျိုးသားလွှတ်တော် မဲဆန္ဒနယ် ၁၆၈ နယ်နဲ့ တိုင်းရင်းသားလူမျိုး မဲဆန္ဒနယ် ၂၉ ခု အပါအ၀င် ပြည်နယ်နဲ့ တိုင်းဒေသကြီးလွှတ်တော် မဲဆန္ဒနယ် ၆၅၉ နယ်အတွက် နိုင်ငံတ၀န်း  ရွေးကောက်ပွဲတွေ ကျင်းပခဲ့တာပါ။ ဆန္ဒမဲပေးပိုင်ခွင့်ရှိသူ ၃၄ သန်းကျော်ရှိတဲ့အနက် ပြည်သူ့လွှတ်တော်နဲ့ အမျိုးသားလွှတ်တော်အတွက် မဲပေးသူဦးရေ ၂၄ သန်းနီးပါးနဲ့ ပြည်နယ်နဲ့ တိုင်းဒေသကြီးလွှတ်တော်အတွက် မဲပေးသူ ၂၆ သန်းကျော်ရှိပြီး ရာခိုင်နှုန်းအားဖြင့် လွှတ်တော် အသီးသီးအတွက် မဲလာပေးသူ ၆၉ ရာခိုင်နှုန်းကျော် ရှိတယ်လို့ နိုဝင်ဘာ ၃၀ ရက် ကော်မရှင် ထုတ်ပြန်ချက်မှာ ဖော်ပြပါတယ်။ မဲလာပေးကြတဲ့အထဲမှာ ပယ်မဲ ပျောက်မဲ အရေအတွက်ကတော့ ပြည်သူ့လွှတ်တော်မှာ မဲ ၁ သန်းခွဲခန့် (၆ ရာခိုင်နှုန်းကျော်)၊ အမျိုးသားလွှတ်တော်မှာ ၁ သန်း ၂ သိန်းကျော် (၅ ရာခိုင်နှုန်းကျော်) နဲ့ ပြည်နယ်၊ တိုင်းဒေသကြီး လွှတ်တော်မှာ မဲ ၁ သန်း ၂ သိန်းခွဲကျော် (၃ ရာခိုင်နှုန်းကျော်) ရှိတယ်လို့ ဆိုပါတယ်။ ၂၀၁၅ အထွေထွေရွေးကောက်ပွဲ ကျင်းပပြီးစီးမှု အခြေအနေနဲ့ ပတ်သက်တဲ့ အစီရင်ခံစာကိုတော့ ရွေးကောက်ပွဲ ပြီးစီးတဲ့နေ့ကစပြီး ရက်ပေါင်း ၄၅ ရက်အတွင်း  ထုတ်ပြန်သွားဖို့ ဆောင်ရွက်နေတယ်လို့လည်း ကော်မရှင်က ကြေညာထားပါတယ်။
5 years Ago

November 7, 2015

စုတ်ပြဲစွန်းထင်း မဲလက်မှတ်များ အသစ်လဲလှယ် မဲပေးကြရန် ကော်မရှင် တိုက်တွန်း

မဲဆန္ဒရှင်ပြည်သူတွေအနေနဲ့ ပယ်မဲမဖြစ်စေဖို့ ဆန္ဒမဲလက်မှတ် ထုတ်ယူချိန်မှာ မဲလက်မှတ်တွေ စုတ်ပြဲနေတာ၊ အမှတ်အသား အစွန်းအထင်းတွေ ပါနေတာတွေ့ရင် မဲလက်မှတ် ပြန်လဲလှယ်ပေးဖို့ တောင်းဆိုနိုင်တယ်လို့ ကော်မရှင်က အသိပေး ကြေညာလိုက်ပါတယ်။ နိုဝင်ဘာလ ၈ ရက်နေ့ မနက်ဖြန် နိုင်ငံတ၀န်း ဆန္ဒမဲပေးကြမယ့် ပြည်သူတွေကို  ပြည်ထောင်စုရွေးကောက်ပွဲကော်မရှင်က နိုဝင်ဘာ ၆ ရက် နေ့စွဲနဲ့ ထုတ်ပြန် ပြောကြားလိုက်တာပါ။ မဲလက်မှတ်တွေကို မဲမထည့်ရသေးခင်မှာသာ လဲလှယ်ပေးမှာဖြစ်ပြီး  ဆန္ဒမဲ ပေးပြီးသွားချိန်ကျရင်တော့ လဲလှယ်ပေးမှာ မဟုတ်တော့ဘူးလို့ ကော်မရှင်ကြေညာချက်မှာ ဖော်ပြပါတယ်။ မဲလက်မှတ်တွေမှာ မဲရုံမှူးလက်မှတ်တွေ ပါဖို့လိုသလို မဲလက်မှတ်တွေ စုတ်ပြဲနေတာ၊ အမှတ်အသားတွေ ပါနေတာနဲ့ အစွန်းအထင်းတွေ ပါနေရင်လည်း ပယ်မဲအဖြစ် သတ်မှတ်ခံရမှာလည်း ဖြစ်ပါတယ်။ သတင်းဓာတ်ပုံ - ဖိုးဉာဏ်ဖေ့စ်ဘွတ်ခ်  
6 years Ago
Up