ပခုက္ကူရဲစခန်း

October 27, 2020

အန်အယ်လ်ဒီယာဉ်တန်းအား အော်ဟစ်ဆဲဆို ခဲဖြင့်ပစ်ပေါက်ခဲ့သူ ၁ ဦးကို ပခုက္ကူရဲစခန်း၌ အမှုဖွင့်

မကွေးတိုင်းဒေသကြီး၊ ပခုက္ကူမြို့နယ်မှာ အောက်တိုဘာ ၂၄ ရက်နေ့က အန်အယ်လ်ဒီပါတီ အောင်နိုင်ရေး လှည့်လည်တဲ့ယာဉ်တန်းကို ကားနဲ့ပိတ်ဆို့ကာ ခဲနဲ့ ပစ်ပေါက်ခဲ့တဲ့ အမျိုးသား ၁ ဦးကို  ပုဒ်မ ၄ ခုနဲ့ အမှုဖွင့်ထားတယ်လို့ ပခုက္ကူ မြို့နယ်ရဲတပ်ဖွဲ့ကနေ သိရပါတယ်။ ပခုက္ကူမြို့နယ်ရဲတပ်ဖွဲ့မှူး ရဲမှူးကျော်ဌေးက "အန်အယ်လ်ဒီ ပါတီ လှည့်လည်စည်းရုံးရေး လုပ်တဲ့ အချိန်မှာ လူတစ်ယောက်က ဖြတ်မောင်းလို့ ပါတီစည်းရုံးရေးမှာ ပါဝင်တဲ့ ကောင်မလေး တစ်ယောက်ရဲ့ ခြေထောက်ကို ဆိုင်ကယ်နဲ့ တက်နင်းမိပြီး မောင်းပြေးတယ်"လို့  ပြောပါတယ်။ အဲဒီလိုမောင်းပြေးပြီးနောက် အန်အယ်လ်ဒီ ပါတီအောင်နိုင်ရေးလှည့်လည်တဲ့ လမ်းရှေ့ကနေ လိုက်ထရပ်ကားနဲ့ ပိတ်ရပ်ပြီးတော့ သံတုတ်တစ်ချောင်းကိုင်ထားကာ အော်ဟစ် ဆဲဆို ခဲနဲ့ပစ်ပေါက်ခဲ့လို့  အမျိုးသမီးတစ်ဦးကို ထိမှန်သွားကာ ကားမောင်းထွက်ပြေး သွားတယ်လို့ ဆိုပါတယ်။ ပခုက္ကူမြို့နယ် တိုင်းဒေသကြီး လွှတ်တော်ကိုယ်စားလှယ် ဒေါ်ဇင်နီနီဝင်းက "အဲဒီလူက ပခုက္ကူမြို့ အမှတ်(၃)ရပ်ကွက် ပါတီအောင်နိုင်ရေး လှည့်လည်တာကို ပထမအကြိမ်မှာ ဆိုင်ကယ်နဲ့ နှောင့်ယှက်ပြီး ကားယူလာပြီး နှောင့်ယှက်လို့ ပါတီ ဒုဥက္ကဋ္ဌက အဖွဲ့ဝင်တစ်ဦးကို ဓာတ်ပုံမှတ်တမ်း ယူဖို့ခိုင်းတဲ့အချိန်မှာ လမ်းကျောက်ခဲနဲ့ ပစ်ပေါက်လို့ နောက်ကျောကို ထိမှန်ခဲ့တဲ့အတွက် ပခုက္ကူမြို့မရဲစခန်းမှာ အမှုဖွင့်ထားတယ်"လို့ ပြောပါတယ်။ အဲဒီဖြစ်စဉ်နဲ့ ပတ်သက်လို ပခုက္ကူမြို့မရဲစခန်းမှာ ယာဉ်မဆင်မခြင်မောင်းနှင်မှု ပုဒ်မ ၃၃၇၊ အများပြည်သူသွားတဲ့လမ်းကို ပိတ်ဆို့တဲ့အတွက် ပုဒ်မ ၃၄၁၊ မကြားဝံ့​မနာသာ ဆဲဆိုမှု ပုဒ်မ ၂၉၄၊ ခဲနဲ့ ပစ်ပေါက်လို့ဒဏ်ရာရတဲ့အတွက် ပုဒ်မ ၃၂၃ နဲ့အမှုဖွင့် အရေးယူထားတယ်လို့ ပခုက္ကူမြို့နယ် ရဲတပ်ဖွဲ့ကနေ သိရပါတယ်။ သတင်း - မင်းထီး
6 months Ago

May 26, 2020

ရန်ကုန်တိုင်းအစိုးရအဖွဲ့ကို အရေးယူပေးရန် ပခုက္ကူရဲစခန်း၌ ဒေသခံ ၁ ဦးတိုင်ကြား

ရန်ကုန်တိုင်းအစိုးရအဖွဲ့ကို အရေးယူပေးဖို့ ပခုက္ကူဒေသခံ ကိုသာထက်အောင်က  ဒီကနေ့ ပခုက္ကူမြို့မရဲစခန်းမှူးဆီမှာတိုင်ကြားပြီး  အမှုဖွင့်ဖို့ကြိုးစားခဲ့ရာမှာ ရဲစခန်းက အမှုဖွင့်မပေးဘဲ  ပယ်ချလိုက်ပါတယ်။ မေ ၂၄ ရက်မနက်က ရန်ကုန် ဗိုလ်တထောင်ဆိပ်ကမ်းမှာ ရန်ကုန်တိုင်းအစိုးရအဖွဲ့က ဦးဆောင်ပြီး ရှင်ဥပ္ပဂုတ္တမထေရ်မြတ် ဖောင်တော်ရေချပူဇော်ပွဲကိုလုပ်ခဲ့တာနဲ့ ပတ်သက်ပြီး သဘာဝဘေးအန္တရာယ်ဆိုင်ရာဥပဒေကိုချိုးဖောက်မှုနဲ့ ရန်ကုန်တိုင်းအစိုးရအဖွဲ့ကို လိုအပ်သလို အရေးယူပေးဖို့ဆိုပြီး တိုင်ကြားခဲ့တာပါ။ “ဒါကို ရဲအရေးမပိုင်ဘူးလို့ ပြောတယ်။ ဒါကြောင့် သူတို့က စာရေးပေးလိုက်မယ်။ တရားရုံးကို ဦးတိုက်လျှောက်ပါလို့ ပြောတယ်။ ကျနော်က ဒီလိုမလုပ်ချင်ဘူးဆိုတော့ တိုင်ကြားတယ်ဆို တဲ့နေရာမှာ အသိပေးအကြောင်းကြားတယ်ဆိုရင်တော့ သူတို့ အထက်ကို တင်ပြပေးမယ်လို့ ပြောတယ်။ ကျနော်ပြင်ပေးလိုက်တော့ တိုင်းကို ဆက်ပို့ပေးတာကို တွေ့ရပါတယ်” လို့ ကိုသာထက်အောင်က ပြောပါတယ်။ သူ့အနေနဲ့ တာဝန်ရှိသူတွေ သိရှိစေဖို့ ကြိုးစားတာဖြစ်လို့ တရားရုံးကို ဦးတိုက်လျှောက်တာ မလုပ်ဘဲ အခုလိုလုပ်ခဲ့တာလို့ ဆိုပါတယ်။ “ကျနော်က Information ပေးရုံ သက်သက်ပါပဲ။ ကျနော့်အနေနဲ့ ဗဟိုကော်မတီကို တင်ပြရင်လည်း စာက ရောက်ချင်မှ ရောက်မှာလေ။ ဒီလိုလုပ်ရင်တော့ ရောက်နိုင်တယ်ထင်လို့ လုပ်တာပါ” လို့ ပြောပါတယ်။ သဘာဝဘေးအန္တရာယ်ဆိုင်ရာ ဥပဒေ ပုဒ်မ ၄၀ မှာတော့ ဒီဥပဒေပါ ပြစ်မှုတွေကို ရဲအရေးယူပိုင်ခွင့်ရှိတဲ့ ပြစ်မှုတွေလို့ သတ်မှတ်ပြီး ပြစ်မှုတရပ်ရပ်ကို ကျူးလွန်ရင် သက်ဆိုင်ရာ တိုင်း၊ ပြည်နယ် သဘာဝဘေးအန္တရာယ် ဆိုင်ရာစီမံခန့်ခွဲမှုအဖွဲ့ရဲ့ ကြိုတင်ခွင့်ပြုချက်နဲ့ပဲ တရားစွဲဆိုရမယ်လို့ ပြဋ္ဌာန်းထားပါတယ်။ ရန်ကုန်တိုင်းဝန်ကြီးချုပ် ဦးဖြိုးမင်းသိန်းအပါအဝင် အစိုးရအဖွဲ့တာဝန်ရှိသူတွေဟာ ဗိုလ်တထောင်ဘုရားဝင်းထဲမှာရှိတဲ့ အစ်မတော်မြနန်းနွယ် ယာယီနန်းဆောင်ရွှေ့ပြောင်းတာ ကိုလည်း ပြုလုပ်ခဲ့ကြပါတယ်။ ဒါပေမယ့် ဦးဖြိုးမင်းသိန်းကတော့  ပွဲတော်ကျင်းပခဲ့ခြင်းမရှိသလို့ သူတို့အနေနဲ့ ဥပဒေမဲ့ ဆောင်ရွက်ခဲ့တာ လုံးဝ မရှိဘူးလို့ ဒီဗွီဘီကို ပြောထားပါတယ်။  ကိုဗစ်-၁၉ ရောဂါပျံ့နှံ့တာကို ဆက်လက်ထိန်းချုပ်ဖို့လိုတာကြောင့် ပြည်ထောင်စုအဆင့် အဖွဲ့အစည်းတွေ၊ ပြည်ထောင်စုဝန်ကြီးဌာနတွေက မေ ၁၅ ရက်အထိ ထုတ်ပြန်ခဲ့တဲ့ အမိန့်၊ အမိန့်ကြော်ငြာစာ၊ ပြည်သူသို့ ပန်ကြားချက်၊ ဖြေလျှော့ပေးဖို့ လမ်းညွှန်ထားတာတွေမပါဘဲ အမိန့်ညွှန်ကြားချက်တွေကို မေ ၃၁ ရက်အထိ ရက်တိုးမြှင့်သတ်မှတ်လိုက်တယ်လို့ ကိုဗစ်-၁၉ ကာကွယ်၊ ထိန်းချုပ်၊ ကုသရေးအမျိုးအဆင့်ဗဟိုကော်မတီက ထုတ်ပြန်ထားပါတယ်။ ကျန်းမာရေးနဲ့ အားကစားဝန်ကြီးဌာနကလည်း ဗိုလ်တထောင်မြို့နယ်အပါအဝင် မြို့နယ် ၅ ခုမှာ နေထိုင်သူတွေနဲ့ ဒေသဆိုင်ရာ တာဝန်ရှိသူတွေအနေနဲ့ လူ ၅ ယောက်နဲ့ ၅ ယောက်ထက်ပိုပြီး မစုဝေးဖို့၊ ပွဲလမ်းသဘင်နဲ့ အခမ်းအနားတွေ မလုပ်ကြဖို့ မေ ၁၅ ရက်နေ့က ပန်ကြားစာတစောင်ထုတ်ထားပါတယ်။
12 months Ago
Up