နေအိမ် မီးရှို့ဖျက်ဆီး

November 20, 2021

မြောင်မြို့နယ်တွင် နေအိမ်အချို့ကို စစ်တပ်ကမီးရှို့၊ တိုက်ပွဲကြောင့် ကနီဒေသခံ ၅၀၀၀ ခန့် တိမ်းရှောင်နေရ

‌စစ်ကိုင်းတိုင်း မြောင်မြို့နယ်၊ ဘူကိုင်းကျေးရွာ နေအိမ်တချို့ကို စစ်ကောင်စီတပ်တွေက နိုဝင်ဘာ ၁၉ ရက်‌ ည ၇ နာရီလောက် မီးရှို့ခဲ့တယ်လို့ ဒေသခံတွေဆီက သိရပါတယ်။

“မီးလောင်နေတာက ဘူကိုင်းရွာအနောက်ဖျားက မွေးမြူရေးလုပ်တဲ့ ကိုအောင်ဗလ နေအိမ်ကို ဒီကောင်တွေ မီးရှို့တာဗျ။ ပထမနွားစာထားတဲ့ ဂိုဒေါင်ကို ရှို့တယ်။ နောက်ပြီး နေအိမ်ပါရှို့ တယ်။ အခုလည်း နောက်တစ်အိမ်ကို ရှို့နေပြန်ပြီဗျ။ ဘာကြောင့် အခုလိုလာပြီး မီးရှို့ရတာလဲဆိုတော့ ဒလန်တစ်ယောက်ကို ရှင်းလို့ ကျောက်ရစ်ရွာရဲစခန်းမှာစခန်းချထားတဲ့ စစ်တပ်ကလာပြီး မီးရှို့တာ ဖြစ်နိုင်တယ်” ဒေသခံတစ်ဦးက ပြောပါတယ်။

မီးရှို့ခံရတဲ့ ကိုအောင်ဗလဟာ ဘယ်အဖွဲ့အစည်းမှာမှ မပါဝင်သလို ရွာရေး၊ ရပ်ရေးမှာ အာတက်သရော ပါဝင်လုပ်ကိုင်သူတစ်ဦးဖြစ်တယ်လို့ ဆိုပါတယ်။

ဘူးကိုင်းကျေးရွာဟာ စစ်ကောင်စီ တပ်စွဲထားတဲ့ ကျောက်ရစ်ကျေးရွာနဲ့ အနီးဆုံးမှာရှိတဲ့ ကျေးရွာတစ်ရွာလည်းဖြစ်တယ်လို့ ဒေသခံတွေဆီက သိရပါတယ်။

နိုဝင်ဘာ ၁၈ ရက် ညကလည်း ကျောက်ရစ်ရဲစခန်းကနေ ဘူးကိုင်းရွာကို လက်နက်ကြီးတွေနဲ့ လှမ်းပစ်တာကြောင့် ရွာသားတွေ ထွက်ပြေးတိမ်းရှောင်နေရတယ်လို့ ဆိုပါတယ်။

စစ်ကိုင်းတိုင်း ကနီမြို့နယ်အတွင်းမှာလည်း ပြည်သူ့ကာကွယ်ရေးတပ်တွေနဲ့ စစ်ကောင်စီတပ် တိုက်ပွဲဖြစ်ပွားနေတာကြောင့် ကျေးရွာတွေက ဒေသခံ ၅၀၀၀ နီးပါး ထွက်ပြေးနေရတယ်လို့ သိရပါတယ်။

တဇယ်ချောင်ကျေးရွာအနီးမှာ  နိုဝင်ဘာ ၁၁ ရက်နေ့က ပြည်သူ့ကာကွယ်ရေးတပ်တွေနဲ့ တိုက်ပွဲဖြစ်ပွားခဲ့ပြီး စစ်ကောင်စီတပ်တွေက လေကြောင်းကရော မြေပြင်ကပါ စစ်ကြောင်းထိုးလာတာကြောင့်  ကျေးရွာ ၅ ရွာက ဒေသခံတွေ  ထွက်ပြေးတိမ်းရှောင်နေရပါတယ်။

ဒါ့အပြင် နိုဝင်ဘာ ၁၅ ရက်ကစပြီး ၁၉ ရက်အထိ စစ်ကောင်စီတပ်တွေက  မဲဒင်းအုပ်စုအတွင်းဝင်ရောက် ရှာဖွေနေတာကြောင့် ရွာ ၄ ရွာက ဒေသခံတွေ ဘေးလွတ်ရာကို ထွက်ပြေးနေကြရတယ်လို့ စစ်ဘေးရှောင်တွေကို ကူညီပေးနေတဲ့ ပရဟိတလူငယ်တစ်ဦးက ပြောပါတယ်။

“ကျေးရွာ ၅ ရွာက လူတွေလည်း အခုအချိန်အထိ ရွာထဲမဝင်ရဲသေးဘူးဗျ ။စစ်ကောင်စီက မိုင်းတွေထောင်ထားခဲ့တာတွေလည်း ရှိတာကြောင့် အခုလို မဝင်ရဲတာပေါ့ဗျာ။ ဟိုတစ်နေ့က မင်းကုန်းကျေးရွာမှာ စစ်ကောင်စီတပ်က မိုင်းထောင်ထားခဲလို့ အမျိုးသမီးတစ်ဦးမိုင်းကွဲပြီး သေဆုံးခဲ့တာရှိခဲ့တယ်။ နိုဝင်ဘာလ ၁၅ ရက်နေ့ကနေ့ ဒီနေ့ နိုဝင်ဘာ ၁၉ ရက်နေ့အထိ ကျေးရွာ ၄ ရွာ အတွင်းကို ရှာဖွေတာတွေလုပ်နေတာကြောင့် အဲဒီအုပ်စုက ၄ ရွာက ဒေသခံတွေလည်း ထွက်ပြေးရတာဗျ။ တစ်ချို့ရွာတွေဆိုရင် ညအချိန်တွေဝင်ရောက်တာကြောင့် ညအချိန်ကြီး တောတောင်တွေထဲထွက်ပြေးရတာကြောင့် မြွေအကိုက်ခံရတဲ့ ပြည်သူတစ်ဦးရှိခဲ့တယ်။”

ကနီမြို့နယ်အတွင်း တဇယ်ချောင်ရွာ၊ ပန်းဆိုင်း၊ ညောင်ပင်ဝန်း၊ မင်းကုန်း၊ ရှမ်းမြောင်း၊ ကျွန်း၊ မဲဒင်တောင်၊ မဲဒင်မြှောက်၊ စဖိုကြီး စတဲ့ရွာတွေက ဒေသခံ ၅ ထောင်နီးပါး စစ်ဘေးရှောင်နေရပြီး တချို့က ဘုန်းကြီးကျောင်းတွေမှာ ခိုလှုံနေကြရတယ်လို့ သိရပါတယ်။

2 weeks Ago

November 14, 2021

ခင်ဦးနှင့် ဝက်လက်တွင် ပြည်သူ ၃ ဦးအား စစ်တပ်ကပစ်သတ်၊ နေအိမ်နှင့်ဆိုင်ကယ်အချို့ကို မီးရှို့ဖျက်ဆီး

စစ်ကိုင်းတိုင်း၊ ခင်ဦးမြို့နယ်နဲ့ ဝက်လက်မြို့နယ်တို့မှာ စစ်ကောင်စီတပ်က မြက်ရိတ်နေသူတစ်ဦးအပါအဝင် ပြည်သူ ၃ ဦးအား ပစ်သတ်ပြီး နေအိမ်နဲ့ဆိုင်ကယ် အချို့ကို မီးရှို့ဖျက်ဆီးကာ ဆိုင်ကယ်အစီး ၂၀ ကျော် ယူဆောင်သွားကြတယ်လို့ ဒေသခံတွေက ပြောပါတယ်။

ခင်ဦးမြို့နယ်၊ မရမ်းအင်းရွာက မြက်ရိတ်နေသူအမျိုးသားတစ်ဦးကို နိုဝင်ဘာ ၁၃ ရက် ညနေ ၄ နာရီလောက်မှာ စစ်ကောင်စီစစ်ကြောင်းက သေနတ်နဲ့ပစ်ခတ်ခဲ့တာကြောင့် သေဆုံးသွားတယ်လို့ ဒေသခံတဦးက ပြောပါတယ်။

“ရွာသစ်ကုန်းမှာ တပ်စွဲထားတဲ့ စစ်တပ်က အနီးဝန်းကျင်ရွာတွေကို စစ်ကြောင်းလှည့်ရင်း တောထဲမြက်ရိတ်နေတဲ့ သူကို ပစ်သတ်သွားတာ။ မြက်ရိတ်သွားတာ ပြန်မရောက်လို့ လိုက်ကြည့်မှ ပစ်သတ်ခံရမှန်းသိရတာ။” 

သေဆုံးသူဟာ မရမ်းအင်းရွာသား ဦးသာအေး အသက် ၆၅ နှစ်ခန့်လို့သိရပြီး ရွာတောင်ဘက် မြက်ရိတ်နေစဉ် စစ်ကောင်စီစစ်ကြောင်းက ‌သေနတ်နဲ့ပစ်ခတ်ခဲ့လို့ ဝမ်းဗိုက်ကျည်ထိမှန်ကာ နေရာမှာပဲ လဲကျသေဆုံးနေတယ်လို့ သိရပါတယ်။

ရွာသစ်ကုန်းကျေးရွာမှာ တပ်စွဲထားတဲ့ စစ်ကောင်စီတပ်အင်အား ၃၀ လောက်က မီးရထားသံလမ်းတလျှောက်သွားခဲ့ပြီး ကုန်းသာရွာနဲ့မရမ်းအင်းရွာ ၂ ရွာကြားမှာရှိတဲ့ ကွမ်းခြံတဲ ၂ လုံးနဲ့ဆိုင်ကယ် ၄ စီး ကို မီးရှို့ဖျက်ဆီးခဲ့တယ်လို့ သိရပါတယ်။

အလားတူ ဝက်လက်မြို့နယ်၊ သစ်ဆိမ့်ကျေးရွာမှာ တပ်စွဲထားတဲ့ အကြမ်းဖက်စစ်တပ်ဟာ နိုဝင်ဘာလ ၁၃ ရက် မနက်ပိုင်းက သစ်ဆိမ့်ကျေးရွာအတွင်းက နေအိမ်အချို့ကို ဝင်ရောက်ရှာဖွေ ဖျက်ဆီးသွားပြီး (အရှေ့) ထုံးဘိုကျေးရွာက အပြစ်မဲ့ပြည်သူနှစ်ဦးကို အကြောင်းမဲ့ပစ်သတ်သွားတယ်လို့ ဒေသခံတွေဆီက သိရပါတယ်။

“သူတို့တပ်စွဲထားတဲ့ သစ်ဆိမ့်ရွာက နေအိမ်အချို့ကို ဝင်ရှာပြီး ဘာမှမတွေ့တော့ ဖျက်ဆီးသွားတယ်၊ ဆိုင်ကယ်တွေလည်းယူသွားတယ်။ အဲဒီနောက် ထုံးဘိုရွာဘက် ဆက်သွားပြီး သေနတ်တွေပစ်ဖောက်ပြီးရွာကိုဝင်တော့ ကြောက်အား လန့်အား ပြေးတဲ့သူတစ်ယောက်ကို ပစ်သတ်တယ်။ နောက်တစ်ယောက်ကိုတော့ အိမ်ထဲအထိ လိုက်ပြီးပစ်သတ်လိုက်တယ်” လို့ ဒေသခံတစ်ဦး က ပြောပါတယ်။

အင်အား ၃၀ လောက်ရှိတဲ့ အကြမ်းဖက်စစ်တပ်ဟာ သစ်ဆိမ့်ကျေးရွာက ဆိုင်ကယ် ၂၂ စီးကို မတရားသဖြင့် စီးယူသွားကြသလို လက်နက် ကြီးတွေနဲ့လည်း အချက် ၃၀ လောက် ရမ်းသမ်းပစ်ခတ်ခဲ့ကြပြီး ပြည်သူနှစ်ဦးကို ပစ်ခတ် သတ်ဖြတ်ခဲ့တာလို့ ဆိုပါတယ်။

ဝက်လက်အရှေ့ခြမ်း၊ ဧရာဝတီ‌မြစ်ရိုးတလျှောက်နေ ပြည်သူတွေဆီက လုယူသွားတဲ့ ဆိုင်ကယ်တွေစီးပြီး ဗျူဟာလမ်းအတိုင်း ရွေဘိုဘက်ကို တပ်ဆုတ်သွားတယ်လို့ ဒေသခံတွေဆီက သိရပါတယ်။

3 weeks Ago
More News
Up