နိုင်ဂျီးရီးယား

September 14, 2021

နိုင်ဂျီးရီးယားတွင် ပြန်ပေးဆွဲခံရသည့် ကျောင်းသား ၇၅ ယောက် ပြန်လွတ်မြောက်လာ

နိုင်ဂျီးရီးယားနိုင်ငံ အနောက်မြောက်ပိုင်းက ဇမ်ဖာရာပြည်နယ်အတွင်း ကျောင်းကနေ ပြန်ပေးဆွဲထားတဲ့ ကလေး ၇၅ ယောက် ပြန်လွတ်လာပြီလို့ ပြည်နယ်အရာရှိတွေက စက်တင်ဘာ ၁၂ ရက်မှာ ပြောပါတယ်။

စစ်တပ်က နှိမ်နင်းတာခံရလို့ ပြန်ပေးဆွဲသူတွေက ပြန်လွှတ်ပေးလိုက်တာလို့လည်း ပြောပါတယ်။

စက်တင်ဘာ ၁ ရက်က ကာယာရွာကနေ ကျောင်းသားတွေကို ပြန်ပေးဆွဲခဲ့ပါတယ်။ သေနတ်သမားတွေဟာ ဒေသတလွှားက ကျောင်းတွေကနေ ကလေးတွေကို အစုလိုက် အပြုံလိုက် ပြန်ပေးဆွဲနေခဲ့တာပါ။

မနှစ်က ဒီဇင်ဘာလကနေ ခုထိ ကလေး ၁,၁၀၀ ကျော် ပြန်ပေးဆွဲခံခဲ့ရပြီး လက်နက်ကိုင် ဓားပြဂိုဏ်းက ပြန်ရွေးငွေလိုချင်လို့ ပြန်ပေးဆွဲနေတာလို့ အာဏာပိုင်တွေက ပြောပါတယ်။

အခု လွတ်လာတဲ့ ကလေးတွေအတွက် ပြန်ရွေးငွေ မပေးခဲ့ဘူးလို့ ဇမ်ဖှာရာပြည်နယ် အုပ်ချုပ်ရေးမှူးရုံးရဲ့ ပြောခွင့်ရက ပြောပါတယ်။

ကျောင်းဝတ်စုံနဲ့ ကလေးတွေရဲ့ ဓာတ်ပုံတွေကိုလည်း သတင်းထောက်တွေဆီ ပေးပို့ခဲ့ပေမဲ့ ကလေးတွေ ဘယ်အချိန်က လွတ်လာတယ်ဆိုတာကို သူက မပြောပါဘူး။ 

ဒီပြည်နယ်ဟာ ပြန်ပေးဆွဲမှုဒဏ်ကို အဆိုးဆုံးခံရတဲ့ ပြည်နယ်တွေထဲက တခုဖြစ်ပြီး လုံခြုံရေးတပ်တွေက ဂိုဏ်းတွေကို နှိမ်နင်းချိန်မှာ ပြည်နယ်အတွင်း ဖုန်းနဲ့ အင်တာနက် ဖြတ်တောက်ထားဖို့ အာဏာပိုင်တွေက အမိန့်ပေးခဲ့ပါတယ်။

အဲဒီနောက် ပြည်နယ်အတွင်း ဖြစ်ရပ်တွေ သတင်းမှောင်ကျခဲ့ပြီး စစ်တပ်ကလည်း သတင်းအချက်အလက် နည်းနည်းကိုသာ ပေးခဲ့ပါတယ်။

စက်တင်ဘာ ၁၂ ရက် ညနေကစပြီး ဓားပြတွေက စစ်တပ်အခြေစိုက်စခန်းကို တိုက်ခိုက်ခဲ့တာကြောင့် စစ်သည် ၁၂ ယောက် ကျဆုံးတယ်လို့ နိုင်ဂျီးရီးယား မီဒီယာအတော်များများက ဖော်ပြပေမဲ့ ကာကွယ်ရေးဝန်ကြီးဌာန ပြောခွင့်ရ ဗိုလ်ချုပ်ကြီး ဘင်ဂျမင်ဆော်ယာကတော့ မငြင်းသလို အတည်လည်း မပြုခဲ့ပါဘူး။

1 month Ago

August 28, 2021

နိုင်ဂျီးရီးယားတွင် ပြန်ပေးဆွဲခံကျောင်းသားအချို့ ပြန်လွတ်

နိုင်ဂျီးရီးယားနိုင်ငံအလယ်ပိုင်း နိုင်ဂျာပြည်နယ်ရှိ အစ္စလာမ်မစ်ကျောင်းကနေ လွန်ခဲ့တဲ့ သုံးလက ပြန်ပေးဆွဲခံခဲ့ရတဲ့ ကျောင်းသားတွေကို သေနတ်သမားတွေက ပြန်လွှတ်ပေးလိုက်ပြီလို့ ကျောင်းသားမိဘနှစ်ဦးက ရိုက်တာသတင်းဌာနကို  သြဂုတ် ၂၆ ရက်မှာ ပြောပါတယ်။ 

သြဂုတ် ၂၇ ရက်မနက်အစောပိုင်းမှာ ရိုက်ကူးထားတဲ့ ဗွီဒီယိုဖိုင်ကို ပြသခဲ့ရာမှာ လွတ်မြောက်လာတဲ့ ကလေးတွေ အတူစားသောက်နေကြတာတွေ့ရပါတယ်။

နိုက်ဂျာပြည်နယ်ရဲ့ မြို့တော် မင်နာကို ရောက်ရှိလာတဲ့ အသက် ၅ နှစ်အရွယ် ကျောင်းသားလေးတွေ ဖြစ်ပါတယ်။

မေလတုန်း တဂီနာမြို့ရှိ ကျောင်းကနေ ကျောင်းသား ၁၃၆ ယောက်ကို ပြန်ပေးဆွဲ ခေါ်ဆောင်သွားခဲ့တာ ဖြစ်ပြီး ၆ ယောက်ဟာ နေမကောင်းဖြစ်ပြီး သေဆုံးသွားခဲ့တယ်လို့ သြဂုတ် ၂၃ ရက်မှာ ကျောင်းပိုင်ရှင်က ပြောပါတယ်။ 

အစိုးရက ကလေးတွေ ပြန်ရောက်လာရင် ကြေညာချက်ထုတ်ပြန်ဖို့ စီစဉ်ထားတာကြောင့် ကလေးတွေ ပြန်လွတ်မြောက်လာမှုကို အမည်မဖော်လိုသူ တာဝန်ရှိသူတဦးက အတည်ပြု ပေးပါတယ်။ 

ကျောင်းသားတွေ ပြန်လွတ်လာကြပြီလို့ ကျောင်းသားမိဘတစ်ယောက်က တယ်လီဖုန်းနဲ့ ဖြေကြားပါတယ်။ 

ကျောင်းသား ဘယ်နှယောက် လွတ်လာမလဲဆိုတာတော့ အတည်မပြုနိုင်သေးပါဘူး။ ဒီနှစ်ထဲမှာ ကျောင်းတွေကနေ ပြန်ပေးဆွဲခံရတဲ့ ကျောင်းသားပေါင်း ၁၀၀၀ ကျော်ရှိနေပြီး အဲဒီထဲကမှ အတော်များများ ပြန်လွတ်မြောက်လာခဲ့ပေမယ့် အနည်းဆုံး ကျောင်းသား ၂၀၀ လောက်ဟာ ပြန်ပေးသမားတွေရဲ့လက်ထဲ ဖမ်းဆီးခံထားရဆဲ ဖြစ်ပါတယ်။

2 months Ago
More News
Up