နိုင်ဂျီးရီးယား

December 1, 2022

နိုင်ဂျီးရီးယားမှ သင်္ဘောခိုးစီးလာသည့် ရွှေ့ပြောင်းနေထိုင်သူ ၃ ဦးကို စပိန်ကမ်းခြေစောင့်တပ် ကယ်တင်

နိုင်ဂျီးရီးယားနိုင်ငံကနေ ကနေရီကျွန်းစုကို ရောက်ရှိလာတဲ့ ရေနံနဲ့ဓာတုသင်္ဘော အလီသီနီ -၂ ရဲ့ တက်မပေါ်မှာ ပုန်းခိုလိုက်ပါလာတဲ့ ရွှေ့ပြောင်းနေထိုင်သူ ၃ ဦးကို စပိန်ကမ်းခြေစောင့်တပ်က နိုဝင်ဘာ ၂၈ ရက်မှာ ကယ်ဆယ်ခဲ့ကြောင်း ကမ်းခြေစောင့်တပ်ဖွဲ့က တွစ်တာမှာ ပို့စ်တင်ထားပါတယ်။

မော်လ်တိစ်အလံ လွှင့်ထားပြီး ၁၈၃ မီတာ ရှည်လျားတဲ့ သင်္ဘောဟာ နိုဝင်ဘာ ၁၇ ရက်က နိုင်ဂျီးရီးယားနိုင်ငံ လာဂို့စ်မြို့ကနေ အနောက်အာဖရိက ကမ်းရိုးတန်းကို လမ်းကြောင်းလှည့်ပြီးနောက်မှာ ဂရန်ကနေရီယာရှိ လာစ် ပါးလ်မာစ်ကို ရောက်ရှိခဲ့ကြောင်း ရေကြောင်းသွားလာမှုအရ သိရပါတယ်။

သင်္ဘောဟာ နိုင်ဂျီးရီးယားကနေ ၁၁ ရက်စောပြီး ရွက်လွှင့်လာခဲ့ကြောင်း သင်္ဘောကပ္ပတိန်က ကြက်ခြေနီကို အတည်ပြုခဲ့ပါတယ်။

သင်္ဘောခိုးစီးလာသူတွေဟာ နိုင်ငံတကာ အကာအကွယ်ကို လျှောက်ထားခြင်းမရှိဘူးဆိုရင် ဒါမှမဟုတ် သူတို့မှာ ကျန်းမာရေးဆိုင်ရာ ခြွင်းချက်တခုခုရှိရင် သူတို့ကို ဂရုစိုက်ပေးဖို့က သင်္ဘောရဲ့ အော်ပရေတာအပေါ်မှာ မူတည်ကြောင်း ကနေရီကျွန်းစု ရွှေ့ပြောင်းနေထိုင်ရေး အကြံပေး ဇဲမာ ဆန်တာနာက ရိုက်တာကို ပြောကြားခဲ့ပါတယ်။

ဒီသင်္ဘာကိုပိုင်ဆိုင်တဲ့ Astra Ship Management ကတော့ မှတ်ချက်တောင်းခံဖို့ ဖုန်းခေါ်ဆိုမှုတွေကို ချက်ချင်းတုံ့ပြန်ခြင်း မရှိပါဘူး။

ရွှေ့ပြောင်းနေထိုင်သူတွေကို နိုဝင်ဘာ ၂၈ ရက် ဒေသစံတော်ချိန် ည ၇ နာရီလောက်မှာ ကမ်းခြေစောင့်ရေယာဉ်နဲ့ ကယ်ဆယ်ခဲ့ကြောင်း ကြက်ခြေနီအဖွဲ့က ပြောပါတယ်။

သ‌ေင်္ဘာခိုးစီးလာသူတွေမှာ အလယ်အလတ် ရေဓာတ်ခန်းခြောက်မှုနဲ့ အပူလွန်ကဲမှုတွေအတွက် ကုသပေးနေကြောင်း ကနေရီကျွန်းများ အရေးပေါ်ဝန်ဆောင်မှု အဖွဲ့နဲ့ ကြက်ခြေနီအဖွဲ့တို့က ပြောကြားခဲ့ပါတယ်။ သူတို့ထဲက တဦးဟာ အခြေအနေ ဆိုးရွားလို့ ကျွန်းပေါ်က ဆေးရုံကို ပို့ဆောင်လိုက်တယ်လို့လည်း ဆိုပါတယ်။

2 months Ago

October 21, 2022

နိုင်ဂျီးရီးယားမြို့တော်တွင် ဆန္ဒပြသူများကို မျက်ရည်ယိုဗုံးဖြင့် ဖြိုခွင်း

နိုင်ဂျီးရီးယားမြို့တော် လာဂို့စ်က လက်ကီတိုးလ်ဂိတ်မှာ အောက်တိုဘာ ၂၀ ရက်က ချီတက်ဆန္ဒပြသူတွေကို ရဲတပ်ဖွဲ့က မျက်ရည်ယိုဗုံးတွေနဲ့ ပစ်ခတ်လူစုခွဲခဲ့ပါတယ်။

ရဲတွေရဲ့ ရက်စက်မှုတွေကို ဆန့်ကျင်တဲ့ ငြိမ်းချမ်းစွာ ဆန္ဒပြပွဲ ၂ နှစ်ပြည့် နှစ်ပတ်လည်နေ့ အထိမ်းအမှတ် ချီတက်နေချိန်မှာ ရဲတွေက ပစ်ခတ်ခဲ့တာပါ။

ဆန္ဒပြသူ ယယ်မီ အဒါမိုလ်ကွန်က “ပြည်သူတွေကို ရဲတွေက သတ်ပစ်ခဲ့တဲ့အကြောင်း အစိုးရက မေ့မထားအောင်လို့ ဆန္ဒပြနေကြတာ။ နိုင်ဂျီးရီးယားလူမျိုးတွေကတော့ သူတို့ကို မမေ့ထားဘူး” လို့ ရိုက်တာသတင်းဌာနကို ပြောပါတယ်။

တိုးလ်ဂိတ်မှာ ရဲတွေဟာ နိုင်ဂျီးရီးယားအလံတွေ ဝှေ့ယမ်းပြီးတော့ ထာဝရ စည်းလုံးညီညွတ်ရေး သီချင်းဆိုရင်း ချီတက်နေသူ လူ ၂၀၀ ဆီကို မျက်ရည်ယိုဗုံး ၅ လုံး ပစ်ခတ်ခဲ့တာကို ရိုက်တာမျက်မြင်သက်သေတွေက ပြောပါတယ်။ ရဲတွေဟာ လူနှစ်ဦးကိုလည်း ဖမ်းဆီးထားတယ်လို့ ပြောပါတယ်။

မွန်းလွဲပိုင်းလောက်မှာတော့ ဆန္ဒပြသူအများစုဟာ အခင်းဖြစ်ပွားရာနေရာကနေ ထွက်သွားကြပါတယ်။

၂၀၂၀ ပြည့်နှစ် အောက်တိုဘာ ၂၀ ရက်က အထူးဓားပြနှိမ်နင်းရေးအဖွဲ့ (SARS) ရဲ့ အစုလိုက်အပြုံလိုက် ရက်စက်ကြမ်းကြုတ်မှုတွေ ရပ်တန့်အဆုံးသတ်ပေးဖို့ တောင်းဆိုနေတဲ့ ငြိမ်းချမ်းစွာဆန္ဒပြနေသူတွေကို ရဲလုံခြုံရေးတပ်ဖွဲ့ဝင်တွေက ပစ်ခတ်ခဲ့တာကြောင့် လူ ၁၁ ဦး သေဆုံးခဲ့တာ ဖြစ်ပါတယ်။

3 months Ago
More News
Up