နိုက်ဂျာ

January 4, 2021

နိုက်ဂျာတွင် တိုက်ခိုက်ခံရမှုကြောင့် ရွာသား ၁၀၀ သေဆုံးဟု ဝန်ကြီးချုပ် ပြော

နိုက်ဂျာနိုင်ငံအနောက်ပိုင်းက ရွာနှစ်ရွာ တိုက်ခိုက်ခံရပြီး လူ ၁၀၀ သေဆုံးခဲ့တယ်လို့ ဇန်နဝါရီ ၃ ရက်မှာ ဝန်ကြီးချုပ် ဘရီဂီရာဖီနီက ပြောပါတယ်။ အစ္စလာမစ် အကြမ်းဖက်မှု ထူပြောနေတဲ့နိုင်ငံမှာ လတ်တလောကာလအတွင်း လူအသေအပျောက် အများဆုံး တိုက်ခိုက်မှုလည်း ဖြစ်ပါတယ်။ မာလီနိုင်ငံနဲ့ နယ်စပ်နားက အခင်းဖြစ်ရာနေရာကို ဝန်ကြီးချုပ်ကိုယ်တိုင် သွားခဲ့ပြီး တနင်္ဂနွေနေ့က တနိုင်ငံလုံးကို လွှင့်တဲ့ ရုပ်သံအတွင်း သူက သေဆုံးသူ အရေအတွက်ကို ကြေညာခဲ့တာပါ။ တီချုံဘမ်ကို့ရွာက လူ ၇၀ နဲ့ ဇာရောင်ဒါရေယေရွာက လူ ၃၀ သေဆုံးတယ်လို့ ဝန်ကြီးချုပ်က ပြောပါတယ်။ တိုက်ခိုက်မှုတွေအတွက် တာဝန်ရှိသူ ဘယ်သူဆိုတာကိုတော့ သူက မပြောပါဘူး။ နိုက်ဂျာနိုင်ငံဟာ အယ်လ်ကိုင်ဒါနဲ့ အိုင်အက်စ် စစ်သွေးကြွတွေနဲ့ ပတ်သက်တဲ့ အစ္စလာမစ် စစ်သွေးကြွတွေရဲ့ တိုက်ခိုက်မှုကို မကြာခဏ ခံနေရတာပါ။ ပြိုင်ဘက် တိုင်းရင်းသားလူ့အဖွဲ့အစည်းတွေကြား အပြန်အလှန် သတ်ဖြတ်မှုတွေက ဘာသာရေး စစ်ဝါဒီတွေရဲ့ အကြမ်းဖက်မှုနဲ့ ရှားပါးတဲ့ သယံဇာတရင်းမြစ်တွေအတွက် ပြိုင်ဆိုင်မှုတွေကို မီးထိုးပေးနေသလို မြင်ရတယ်လို့ မီဒီယာတွေက ဖော်ပြပါတယ်။
7 months Ago

August 10, 2020

နိုက်ဂျာနိုင်ငံတွင် ပြင်သစ်နိုင်ငံသား ၆ ဦးအပါအဝင် ၈ ဦး အသတ်ခံရ

အာဖရိကအနောက်ပိုင်း နိုက်ဂျာနိုင်ငံမှာ မော်တော်ဆိုင်ကယ်စီး သေနတ်သမားတွေက ကမ္ဘာလှည့် ပြင်သစ်ခရီးသည် ၆ ယောက် နိုက်ဂျာနိုင်ငံသား ဧည့်လမ်းညွှန် ၁ ယောက်နဲ့ ကားမောင်းသူတို့ကို သြဂုတ် ၉ ရက်က သတ်ဖြတ်ခဲ့တယ်လို့ ဒေသန္တရ အုပ်ချုပ်ရေးမှူးကို ကိုးကားပြီး AFP သတင်းမှာ ဖော်ပြပါတယ်။ တိုက်ခိုက်သူတွေဟာ ကူရေဒေသမှာ လျှပ်တပြက်တိုက်ခိုက်ခဲ့တာဖြစ်ပြီး ဒီကိစ္စကို စုံစမ်းစစ်ဆေးနေပြီလို့ ပြင်သစ် နိုင်ငံခြားရေး ဝန်ကြီးဌာနက ပြောပါတယ်။ နိုက်ဂျာ အစိုးရဘက်ကတော့ မှတ်ချက်တစုံတရာ မတုံ့ပြန်သေးပါဘူး။ နီယာမေမြို့တော် အရှေ့တောင်ဘက်က သစ်ကုလားအုတ် ဘေးမဲ့တောဟာ နိုက်ဂျာနိုင်ငံရဲ့ လူကြိုက်များတဲ့ ဆွဲဆောင်မှု တရပ်လည်း ဖြစ်ပါတယ်။ ပြင်သစ်အစိုးရဟာ နိုက်ဂျာနိုင်ငံရဲ့ မြို့တော် နီယာမေရဲ့ အပြင်ဘက် ကျယ်ပြန့်တဲ့ အစိတ်အပိုင်းတွေမှာ ခရီးမသွားကြဖို့ လူထုကို သတိပေးထားပါတယ်။ အဲဒီဒေသတွေမှာ ဘိုကိုဟာရမ် အပါအဝင် အစ္စလာမ္မစ် စစ်သွေးကြွအုပ်စုတွေ လှုပ်ရှားနေပါတယ်။  တချိန်က ဒီဒေသအတွင်း ကိုလိုနီသြဇာရှိခဲ့တဲ့ ပြင်သစ်ဟာ နိုက်ဂျာအပါအဝင် ဆာဟဲလ် ဒေသတွင်းက အစ္စလာမ္မစ် စစ်သွေးကြွတွေကို တိုက်ထုတ်ဖို့ အနောက်အာဖရိက မဟာမိတ်တွေနဲ့ ဥရောပ မဟာမိတ်တွေကြား ဇွန်လမှာ မဟာမိတ်ဖွဲ့ခဲ့ပါတယ်။ ၂၀၁၃ နောက်ပိုင်း ဆာဟာရကန္တာရတောင်ပိုင်း ခြောက်သွေ့ရပ်ဝန်းမှာ ထောင်ချီတဲ့ စစ်တပ်ကို ပြင်သစ်အစိုးရက တပ်ချထားပေမဲ့ အယ်လ်ကိုင်းဒါး၊ အိုင်အက်စ်တို့နဲ့ ပတ်သက်နေတဲ့ စစ်သွေးကြွအုပ်စုတွေ ကျူးလွန်တဲ့  ရာဇဝတ်မှုတွေ ပိုတိုးလာနေပါတယ်။
12 months Ago
Up