နယ်ခြားစောင့်တပ်ဖွဲ့ဝင် ၂ ဦး

April 16, 2020

မောင်တောမြောက်ပိုင်းတွင် အာဆာတိုက်ခိုက်မှုကြောင့် နယ်ခြားစောင့်တပ်ဖွဲ့ဝင် ၂ ဦးသေဆုံး

ရခိုင်ပြည်နယ်၊ မောင်တောမြို့နယ်မြောက်ပိုင်း ခမောင်းဆိပ်မြို့အနီးမှာ   ဧပြီ ၁၅ ရက် မနက်က အာဆာအကြမ်းဖက်အဖွဲ့ရဲ့ တိုက်ခိုက်မှုကြောင့် နယ်ခြားစောင့်တပ်ဖွဲ့ဝင် ၂ ဦး သေဆုံးသွားတယ်လို့ အောင်ဇူနယ်ခြားစောင့်စခန်း တာဝန်ရှိသူ တဦးကပြောပါတယ်။ သေဆုံးသူ ၂ ဦးမှာ အောင်ဇူနယ်ခြားစောင့်စခန်းက ဒုတပ်ကြပ်အောင်အောင်နဲ့ တပ်သား စည်သူအောင်တို့ဖြစ်ပြီး သူတို့ကိုင်ဆောင်တဲ့ BA 63 သေနတ် ၂ လက်ပါ ပျောက်ဆုံးနေတယ်လို့ သိရပါတယ်။ အောင်ဇူနယ်ခြားစောင့်စခန်းမှ တာဝန်ရှိသူတဦးက "မနေ့က သူတို့ ၄ ဦးက ခမောင်းဆိပ်ကို အရပ်ဝတ်တွေနဲ့ ချောစာလာပို့တာ အနော်ဗလီအနီးမှာ အင်အား ၃၀ လောက်ရှိတဲ့ အာဆာအဖွဲ့နဲ့ ထိတွေပြီးတိုက်ပွဲဖြစ်ကြတော့ လူစုကွဲသွားကြတယ်။ အောင်ဇူစခန်းက စစ်ကူလိုက်ပြီးရှာကြတဲ့ အခါ သူတို့ အလောင်း ၂ လောင်း တွေ့တယ်။ သူတို့ကိုင်တဲ့ BA 63 သေနတ် ၂ ပါပျောက်နေတယ် ကျန် ၂ ဦးကိုတော့ သူတို့ကိုင်တဲ့ လက်နက်တွေနဲ့အတူပြန်တွေ့တယ်”လို့ ပြောပါတယ်။ တပ်သား စည်သူအောင်နဲ့ သက်ဖြိုးအောင်တို့ ၂ ဦးကိုတော့ သူတို့ ကိုင်ဆောင်တဲ့ BA 63 သေနတ်တွေနဲ့အတူ ရှာဖွေတွေ့ရှိကြောင်း သိရပါတယ်။ မောင်တောခရိုင် အထွေထွေ အုပ်ချုပ်ရေးမှူး ဦးစိုးအောင်ကလည်း "အောင်ဇူစခန်းက နယ်ခြားစောင့်တပ်ဖွဲ့ဝင် ၄ ဦး ခမောင်းဆိပ်ကို ဆိုက်ကယ်နဲ့အလာမှ ပျောက်ဆုံးနေတာ။ ပြန်ရှာတော့ နယ်ခြားစောင့် ၂ ဦးအလောင်းကိုတွေ့တယ်လို့ သိရတယ်။ တိုက်ခိုက်ခံရတာ ပေါ့ဗျာ။ အာဆာ အဖွဲဖြစ်ဖို့များတယ်။ လက်နက်တွေပါ ပါသွားမှာပေါ့"လို့ ပြောပါတယ်။ ပြီးခဲ့တဲ့ မတ်လ ၃၀ ရက်ကလည်း ခမောင်းဆိပ်မြို့နဲ့ ၂ မိုင်ခန့်ဝေးကွာတဲ့ ဆင်သေပြင်ကျေးရွာ အနာဝါဗလီ အနီးတောဝက်သွားထောင်တဲ့ ဒေသခံတွေ အာဆာအကြမ်းဖက်အဖွဲ့ရဲ့ လက်လုပ်မိုင်းဆွဲတိုက်ခိုက်မှုကြောင့်  ၂ ဦးသေဆုံးပြီး ၃ ဦး ဒဏ်ရာရရှိခဲကာ သူတို့စီးနင်းလာတဲ့ ဆိုင်ကယ်တွေပါ မီးရှို့ဖျက်ဆီးခံခဲ့ရပါတယ်။ သတင်း- လင်းလက်
1 year Ago

October 19, 2019

ပေါင်မြို့နယ် ကျွဲခြံရွာအတွင်း သေနတ်ပစ်ဖောက်ခဲ့သည့် နယ်ခြားစောင့်တပ်ဖွဲ့ဝင် ၂ ဦးကို ဖမ်းဆီး

မွန်ပြည်နယ်၊ ပေါင်မြို့နယ်၊ ကျွဲခြံကျေးရွာမှာ အောက်တိုဘာ ၁၉ ရက်နေ့၊ နေ့လယ်ပိုင်းက ကျေးရွာအတွင်း သေနတ်ပစ်ဖောက်ခဲ့တဲ့ နယ်ခြားစောင့်တပ်ဖွဲ့ဝင် ၂ ယောက်ကို ဖမ်းဆီးခဲ့တယ်လို့ သိရပါတယ်။ ပေါင်မြို့နယ်ရဲတပ်ဖွဲ့မှူး ရဲမှူးဝင်းနိုင်ထွန်းက "သူတို့ ၂ ဦးက သူတို့ရဲ့ ဗိုလ်မှူးနဲ့အတူ လပတ် အစည်းအဝေးတက်ဖို့ လိုက်လာရာကနေ သူတို့ ဗိုလ်မှူးနေရာချပေးတဲ့ အိမ်မှာ တည်းခိုနေထိုင်နေတာပါ။ မနက်က တောလည်ထွက်မယ်ဆိုပြီး တည်းခိုတဲ့အိမ်ကနေ ထွက်သွားပြီး သောက်စားလာတယ်။ တည်းခိုအိမ်ပြန်ရာ လမ်းတလျှောက် ရန်ကုန်-မော်လမြိုင်လမ်းပေါ်မှာ မူးပြီးတော့ မိုးပေါ်ထောင်ပြီး သေနတ်ပစ်ဖောက်လာတာ။ သူတို့ ၂ ဦးကိုတော့ ရဲတပ်ဖွဲ့နဲ့ ပြည်သူနဲ့ ပူးပေါင်းဖမ်းဆီးနိုင်ခဲ့ပါတယ်။” နယ်ခြားစောင့်တပ်ဖွဲ့ဝင် ၂ ဦးကို ကျည်မပါ MA 13 သေနတ်တစ်လက်၊ ကျည် ၁၇ တောင့်ပါ M 16 သေနတ်တလက်တို့နဲ့အတူ ဖမ်းမိခဲ့တယ်လို့ သိရပါတယ်။ ဒေသခံကိုဖြိုးက "သူတို့ ၂ ယောက်က မနက်ပိုင်း အရက်ဆိုင်မှာဝင်သောက်ပြီး ပိုက်ဆံမရှင်းလို့ ဆိုင်ရှင်နဲ့ ပြဿနာဖြစ်ပြီး ဆိုင်အပြင်မှာ သေနတ် ၂ ချက်ဖောက်လိုက်တယ်။ ပြီးတော့ ဘုန်းကြီးကျောင်းထဲကိုဝင်ပြီး အဲ့မှာကစားနေတဲ့ကလေးတွေကို အတင်းဆွဲပြီး သေနတ်ပစ်ခိုင်းတယ်။ ကလေးတွေလည်း ကြောက်ကြောက်နဲ့ပစ်ရတာပေါ့။ ကလေးမိဘတွေကလည်း ထိတ်လန့်နေကြတာပေါ့ဗျာ" လို့ ဒီဗွီဘီကိုပြောပါတယ်။  သေနတ်ပစ်ဖောက်ခဲ့တဲ့သူ ၂ ဦးဟာ အမှတ် (၁၀၁၃) နယ်ခြားစောင့်တပ်၊ ကတိုက်ထိမြို့နယ်ခွဲ ကရင်ပြည်နယ်မှ တပ်ကြပ်အဆင့်ရှိ လှထွန်းနဲ့ တပ်သားအဆင့်ရှိ အောင်ဇေလင်း (ခ) သာပိုတို့ ဖြစ်တယ်လို့ သိရပါတယ်။ ကျေးရွာအတွင်း ဒေသခံပြည်သူတွေ စိုးရိမ်ထိတ်လန့်မှုဖြစ်အောင် သေနတ်ပစ်ဖောက်ခဲ့တဲ့သူ ၂ ဦးကို သက်ဆိုင်ရာအဖွဲ့အစည်းက ညနေ ၄ နာရီအချိန် ပြန်လည်ခေါ်ဆောင်သွားပြီး ဘယ်လို အရေးယူမှု ပြုလုပ်မယ် ဆိုတာတော့ မသိရသေးဘူး။ ယူမင်းစိုး
2 years Ago
Up