နမ့်ဆန်

October 29, 2018

နမ့်ဆန်တွင် ပြည်သူ ၁ ဦး မိုင်းနင်းမိ၊ ရက်ပိုင်းအတွင်း မိုင်းနင်းမှု ၄ ကြိမ် ဖြစ်ပွား

ရှမ်းပြည်မြောက်ပိုင်း ကျောက်မဲခရိုင် ပလောင်အုပ်ချုပ်ခွင့်ရဒေသ နမ့်ဆန်မြို့နယ်ထဲမှာ ဒေသခံပြည်သူ ၁ ဦး  မိုင်းနင်းမိခဲ့တာကြောင့် ဒဏ်ရာရရှိခဲ့ပြီး ရက်ပိုင်းအတွင်း မိုင်းနင်းမိတာ ၄ ကြိမ်ရှိသွားပြီ ဖြစ်ပါတယ်။ နမ့်ဆန်မြို့အနောက်ဘက် ၁၇ မိုင်အကွာ ကယားကြီးကျေးရွာအုပ်စု ကယားရွာမှာ နေထိုင်သူ ဦးအိုက်လှော် (အသက် ၆၅) နှစ်မှာ ပြီးခဲ့တဲ့ အောက်တိုဘာ ၂၇ ရက်နေ့က သားသမီးတွေကို နမ့်ဆန်မြိ့ပေါ်  ကျောင်းလိုက်ပို့ပေးပြီးအပြန် ကယားရွာနဲ့ မန်ဆာ ရွာကြားမှာ မိုင်းနင်းမိခဲ့တာလို့ ပလောင်ဒေသဦးစီးအဖွဲ့ဝင်လည်းဖြစ် ပလောင်ပါတီလွှတ်တော်ကိုယ်စား လှယ်လည်းဖြစ်တဲ့ ဦးသိန်းဇော်က ဒီဗွီဘီကို ပြောပါတယ်။ “သီတင်းကျွတ်ကျောင်းပိတ်တော့ သူ့ကလေးတွေက ရွာပြန်တယ်၊ အခုကျောင်းပြန်ဖွင့်တော့ ကလေးတွေကို နမ့်ဆန်မြို့ပေါ်လိုက်ပို့ပေးပြီး  လမ်းလျှောက်ပြန်တုန်း မန်ဆာရွာအောက်ဘက်နား မှာ မိုင်းနင်းမိတာ။ သူဖြစ်တာက တမြန်နေ့ည ၈ နာရီလောက်၊ ဖြစ်ဖြစ်ချင်း သူကမေ့လသွားတယ်။ နောက်တော့မှ ရွာကလူတွေရောက်လာပြီး သူ့ကိုတွေ့လို့ နမ့်ဆန်ဆေးရုံကို ခေါ်လာတာ မနေ့မနက်ကမှ ဆေးရုံရောက်လာတယ်။” ဦးအိုက်လှော်မှာ ခြေထောက်နဲ့ လက်တွေမှာ မိုင်းစထိမှန်ဒဏ်ရာရပြီး အသက်အန္တရာယ်တော့ မစိုးရိမ်ရဘူးလို့ ဆိုပါတယ်။ နမ့်ဆန်မြို့နယ်ထဲမှာ မိုင်းနင်းမိမှုကြောင့် အောက်တိုဘာလအတွင်း  ၁၈ ရက်နေ့က ဟိုချောင်းရွာမှာ အမျိုးသား ၁ ဦး၊ ၁၉ ရက်နေ့က မန်ကန်ရွာမှာ အမျိုးသား ၁ ဦး၊  ၂၄ ရက်နေ့က နမ့်ဆန်ပန်လုံ သွားလမ်း ဟိုက်တမ်ရွာမှာ အမျိုးသမီး ၁ ဦး မိုင်းထိမိပြီး ဒဏ်ရာတွေရခဲ့ကြောင်း၊ ဒီတခေါက်ပါဆိုရင် ၄ ကြိမ်မြောက်  ဒဏ်ရာရသူ ၄ ဦးရှိသွားပြီလို့ ဦးသိန်းဇော်က ဆက်ပြော ပါတယ်။ ပေါက်ကွဲခဲ့တဲ့ မိုင်းတွေမှာ မြေမြှုပ်မိုင်းအမျိုးအစားတွေဖြစ်ကြောင်း၊ မိုင်းပေါက်ကွဲခဲ့တဲ့ နေရာတွေဟာ တိုက်ပွဲလည်း မရှိလို့ ဘာကြောင့် လာမြှုပ်ထားသလဲဆိုတာ စဉ်းစားမရကြောင်း၊ ဘယ်အဖွဲ့ကပဲဖြစ်ဖြစ်၊ ဘယ်သူပဲလုပ်လုပ် အပြစ်မဲ့ပြည်သူတွေရဲ့ အသက်အန္တရာယ်ထိခိုက်စေအောင်၊ မသွားရဲ မလာရဲ အလုပ်ပျက်အကိုင်ပျက်ဖြစ်အောင် မိုင်းတွေထောင်မထားဖို့ မေတ္တာရပ်ခံလိုကြောင်း  ဦးသိန်းဇော်က ပြောပါတယ်။ မိုင်းပေါက်ကွဲတဲ့ ကိစ္စနဲ့ပတ်သက်ပြီး ဒီမတိုင်ခင်က ဒေသဦးစီးအဖွဲ့နဲ့ တအာင်း လူငယ်အ ဖွဲ့တို့ ပူးပေါင်းကာ မြေမြှုပ်မိုင်းအန္တရာယ်ဆိုင်ရာ  ပညာပေးဟောပြောပွဲတွေ လုပ်ခဲ့သေးကြောင်း၊ အခုလိုဖြစ်သွားရတဲ့အပေါ် စိတ်မကောင်းဖြစ်ပြီး ရှမ်းပြည်နယ်အစိုးရထံ အစီရင်ခံစာ ပေးပို့ထား သလို ပြည်သူတွေအနေနဲ့လည်း သွားရေးလာရေးသတိထားဖို့၊ မိမိနယ်မြေထဲမှာ မျက်နှာစိမ်းတွေတွေ့ရင် သတိထားဖို့၊ မသင်္ကာစရာတွေတွေ့လျင် သက်ဆိုင်ရာကို အမြန်ဆုံးအကြောင်းကြားဖို့ ပြည်သူတွေကို မှာထားကြောင်း ဦးသိန်းဇော်က ပြောသွားပါတယ်။
3 years Ago

October 26, 2018

နမ့်ဆန်မြို့နယ်တွင် မိုင်းအန္တရာယ် အထူးသတိထားသွားလာရန် တအာင်းတပ်ဖွဲ့ သတိပေး

ရှမ်းပြည်မြောက်ပိုင်း၊ ပလောင်အုပ်ချုပ်ခွင့်ရဒေသ၊ နမ့်ဆန်မြို့နယ်ထဲမှာ ခုရက်ပိုင်းအတွင်း မိုင်းနင်းမိမှု ၄ ကြိမ်ဖြစ်ပွားခဲ့တဲ့အတွက် ဒေသခံတွေအနေနဲ့  သတိထားသွားလာကြဖို့ တီအန်အယ်လ်အေ တအာင်းတပ်မတော်က သတိပေးထုတ်ပြန်လိုက်ပါတယ်။ အောက်တိုဘာ ၁၉ ရက်က နမ့်ဆန်မြို့နယ်၊ မန်ကန်ကျေးရွာမှာ တကြိမ်၊ ၂၄ ရက်က ဟိုက်တမ်ကျေးရွာမှာ တကြိမ်၊ ၂၁ရက်နေ့က နမ့်ခမ်းမြို့နယ် မန်ပန်ကျးရွာမှာ တကြိမ်၊ ၂၅ ရက်နေ့က ကျောက်မဲ- မိုင်းငေါ့မြို့နယ်ခွဲ မန်ကန်ကျေးရွာမှာ တကြိမ်၊ စုစုပေါင်း လေးကြိမ် ဒေသခံလူထုတွေ  မြန်မာတပ်တော်ထောင်ထားတဲ့ နင်းမိုင်းမိကာ ခြေ - လက်အင်္ဂါ ဆုံးရှုံးခဲ့ရတဲ့အပြင် အသက်အန္တရာယ် စိုးရိမ်စရာ ကြုံတွေ့ခဲ့ရတယ်လို့ ထုတ်ပြန်ချက်မှာ ဖော်ပြ ပါတယ်။ ဒါ့ကြောင့် ဒေသခံပြည်သူတွေအနေနဲ့ မိုင်းအန္တရာယ်ကင်းဝေးစေဖို့ သတိထားပြီးသွား လာကြဖို့၊ အထူးအားဖြင့် မြန်မာတပ်မတော်စခန်းချရာနေရာ အနီးဝန်းကျင်နဲ့ သွားလာလှုပ်ရှားတဲ့ ဝန်းကျင်တွေမှာ နင်းမိုင်းတွေ ထောင်ထားလေ့ရှိတာကြောင့် အထူးသတိထား သွားလာဖို့ အသိပေးနှိုး ဆော်ထားပါတယ်။ ရှမ်းပြည်မြောက်ပိုင်း၊ ပလောင်အုပ်ချုပ်ခွင့်ရဒေသ နမ့်ဆန်မြို့နယ်ထဲမှာ အောက်တိုဘာ ၁၈ နဲ့ ၁၉ နှစ်ရက်ဆက်တိုက် မိုင်းပေါက်ကွဲမှု ဖြစ်ပွားပြီး ပြည်သူ ၂ ဦး ထိခိုက်ဒဏ်ရာရခဲ့ပါတယ်။
3 years Ago
More News
Up