နမ္မတူမြို့နယ်

September 13, 2021

နမ္မတူမြို့နယ်တွင် သံဃာအပါး ၆၀ ကျော် ကိုဗစ်-၁၉ ကူးစက်ခံရ

ရှမ်းပြည်မြောက်ပိုင်း၊ ကျောက်မဲခရိုင်၊ နမ္မတူမြို့နယ်ထဲမှာ ပြီးခဲ့တဲ့ စနေနေ့ကစ  ကျန်းမာရေး ဆိုင်ရာတာဝန်ရှိသူတွေက ဘုန်းကြီးကျောင်းနဲ့စာသင်တိုက်တွေကို ကွင်းဆင်းပြီး ကိုဗစ်-၁၉ ရောဂါပိုးရှာဖွေစစ်ဆေးပေးနေရာမှာ စက်တင်ဘာ ၁၂ ရက် အထိ အပါး ၆၀ ကျော် ကူးစက်ခံထားရပါတယ်။ 

အထူးသဖြင့် သံဃာတော် ၂၅ ပါးနဲ့အထက်ရှိတဲ့ ဘုန်းကြီးကျောင်းတွေ လိုက်လံ စစ်ဆေးပေးနေတာဖြစ်ပြီး နမ္မတူမြို့ပေါ်ရှိ ရွှေမြင်သာကျောင်းတိုက်၊ နမ္မတူ ဘုရားတောင်ပေါ်ဝေယျာဝိစ္စကျောင်းတိုက်၊ ရွှေတောင်ချမ်းသာကျောင်းတိုက်၊ ဆိုက်ခေါင်ရွာ တုန့်ဟုန်းခမ်း ကျောင်းတိုက်၊ ဣစ္ဆာသယမြို့လယ်ကျောင်းတိုက်တွေမှာ သွားရောက်စစ်ဆေးရာက သံဃာ အပါးပေါင်း ၆၀ ကျော်မှာ ကိုဗစ်-၁၉ ကူးစက်ခံထားရတာလို့ နမ္မတူမြို့ မေတ္တာရှင်ပရဟိအသင်းမှ ကိုချစ်မွှေးက ဒီဗွီဘီကို ပြောပါတယ်။ 

“စပြီးသွားစစ်တာကတော့ ၁၁ ရက်နေ့ကပေါ့နော်၊ နမ္မတူ ပန်ဟိုက်ရပ်ကွက်ရွှေမြင်သာကျောင်းမှာ  သံဃာ ၉၁ ပါးနဲ့ သီလရှင် ၂ ပါးကိုစစ်တာ အဲဒီထဲက ပိုးတွေ့တာ ၄၆ ပါး ၊ မနေ့က နမ္မတူတောင်ပေါ်ဘုရား ဝေယျာဝစ္စကျောင်းတိုက်မှာ ၆၆ ပါးစစ်တယ်။ သာမဏေ ၆ ပါးပိုးတွေ့တယ်။ ရွှေတောင်ကျောင်းမှ ၃၅ ပါးစစ်တာ အကုန်နက်ကတစ်ပ်။ ပြီးတော့ ဒီကနေ့ ဆိုက်ခေါင်ရွာတုန့်ဟုန်းခမ်းကျောင်းတိုက်မှာ ၃၆ ပါးစစ်တာ သာမဏေ ၃ ပါးပိုးတွေ့ပြီး မြို့ လယ်ကျောင်းမှာ ၃၇ ပါးစစ်တဲ့ထဲက ဦးဇင်း ၄ ပါးနဲ့ သာမဏေ ၂ ပါးမှာ ပိုးတွေ့ပါတယ် ၊ စုစုပေါင်း ၆၁ ပါးကူးစက်ခံထားရပါတယ်  ”

ကူးစက်ခံရတဲ့ သံဃာတွေမှာ အခြေအနေဆိုးတဲ့လက္ခဏာမရှိကြောင်း၊ သူတို့တွေအတွက် သတ္တုတွင်းသင်တန်းကျောင်းယာယီကုသရေးစင်တာမှာ နေရာထိုင်ခင်း ပြင်ဆင်ပေးထားပေးပါတယ်။

ဒါပေမဲ့ ကျောင်းတိုက်တိုင်းမှာ ကျယ်ဝန်းတဲ့နေရာ၊ သီးသန့်အဆောင်တွေလည်းရှိလို့ သက်ဆိုင်ရာကျောင်းက ဆရာတော်တွေဆန္ဒအရ အဆိုပါကျောင်းတိုက်တွေမှာပဲ ထားရှိတယ်လို့ ဆိုပါတယ်။ 

ပိုးတွေ့သံဃာရှိရာ ကျောင်းတိုက်တွေကို ပရဟိတအဖွဲ့တွေက ပိုးသတ်ဆေးဖျန်းထားပြီး အသွားအလာကန့်သတ်ထားကြောင်း ၊ နောက်ရက်တွေမှာလည်း ကျန်ရှိသေးတဲ့ ကျောင်းတိုက်တွေ သီလရှင်ကျောင်းတွေကို ဆက်လက်စစ်ဆေးသွားဖို့ အစီအစဉ်ရှိပါတယ်။

နမ္မတူမြို့နယ်ထဲမှာ ပြီးခဲ့တဲ့ ဇွန်လကစပြီး စက်တင်ဘာ ၁၂ ရက် အထိ ကိုဗစ်-၁၉ ပိုးတွေ့လူနာစုစုပေါင်း ၄၈၉ ဦး ၊ သက်သာပျောက်ကင်းလို့ ဆေးရုံဆင်းခွင့်ရသူ ၃၁၆ ဦးနဲ့ သေဆုံးသူ ၁၅ ဦး၊ ကုသဆဲလူနာ ၁၅၈ ဦးရှိပါတယ်။ 

ရှမ်းပြည်မြောက်ပိုင်းမှာ နမ္မတူမြို့နယ်အပြင် လားရှိုး၊ ကျောက်မဲ၊ စတဲ့မြို့နယ်တွေမှာလည်း ဘုန်းတော်ကြီးကျောင်း၊ သီလရှင်ကျောင်းတွေမှာလိုက်ပြီး ကိုဗစ် -၁၉ စစ်ဆေးပေးနေပါတယ်။   

3 months Ago

June 24, 2021

နမ္မတူမြို့နယ်၌ ရွာသူကြီး ၁ ဦးနှင့် ရွာသား ၂ ဦးကို TNLA တပ်ဖွဲ့က ရိုက်နှက်ဖမ်းဆီးသွား

ရှမ်းပြည်မြောက်ပိုင်း၊ နမ္မတူမြို့နယ်၊ ပန်လုံကျေးရွာအုပ်စုထဲမှာ ဇွန်လ ၂၃ ရက် မနေ့ညက ရွာသူကြီး ၁ ဦးနဲ့ ရွာသား ၂ ဦးတို့ကို TNLA  ပလောင်တပ်ဖွဲ့က လာရောက်ရိုက်နှက်ပြီး ဖမ်းဆီးခေါ်ဆောင်သွားတယ်လို့  သက်ဆိုင်ရာဆွေမျိုးနီးစပ်သူက  ပြောပါတယ်။ 

ပန်လုံကျေးရွာအုပ်စု နားခိုလျံကျေးရွာက သူကြီးဖြစ်သူ ဦးစိုင်းလူး၊ ရွာသား စိုင်းအိုက်မုန့်နဲ့ နားစဖော့ရွာသား စိုင်းကျော်လူတို့ ၃ ဦးဟာ မနေ့ည ၈ နာရီခွဲအချိန်က ခေါက်ဆွဲ ဆိုင်ဖွင့်ထားတဲ့ ဦးစိုင်းလူးတို့အိမ်မှာ အိမ်ထောင်စုစာရင်းတွေ ပြုစုနေစဉ် TNLA တပ်ဖွဲ့ဝင် ၇ ယောက်လောက်  ကားနဲ့ရောက်လာပြီး သူတို့ ၃ ဦးကို ရိုက်နှက်ခေါ်ဆောင်သွားတယ်လို့ ဆွေမျိုးနီးစပ်သူက ဒီဗွီဘီကို ပြောပါတယ်။ 

“သူတို့က ဆိုင်ထဲဝင်လာပြီး အကျိုးအကြောင်းဘာမှမပြောဘဲ သေနတ်နဲ့ချိန်တယ်။ သူကြီးက ဘာဖြစ်လို့လဲလို့မေးတာကို မမေးနဲ့ဆိုပြီး ပါးရိုက်တယ်။ အိုက်မုန့်က ငါလည်း ပလောင်လူမျိုးပဲလေလို့ ပြန်ပြောတော့ ဘာပလောင်လဲဆိုပြီး နားရင်းအုပ်တယ်။ ၃ ယောက်လုံးကိုပါးရိုက်နားရိုက်လုပ်ပြီး လက်ထိပ်ခတ်ခေါ်သွားတာ၊ သူတို့တယ်လီဖုန်းတွေကိုလည်း အကုန်သိမ်း၊ အိုက်မုန့်နဲ့ ကျောက်လူတို့ရဲ့ ဆိုင်ကယ်တွေပါ ယူသွားတယ်”။

 ဘာကြောင့်ရိုက်နှက်ဖမ်းဆီးတာလည်းမသိရသလို  ဘယ်နေရာခေါ်သွားမှန်းမသိလို့  သက်ဆိုင်ရာမိသားစုဝင်တွေ စိုးရိမ်ပူပန်နေရကြောင်းနဲ့ ပန်လုံကျေးရွာအုပ်ချုပ်ရေးမှူးထံ အကူအညီတောင်းထားတယ်လို့ ဆိုပါတယ်။ 

ပန်လုံကျေးရွာအုပ်စုထဲမှာ  TNLA တပ်ဖွဲ့က တအိမ်တက်ဆင်း အိမ်ထောင်စုစာရင်း ကောက်ခံစစ်ဆေးနေပြီး အိမ်ထောင်စုဇယားမရှိသူတွေလည်း အမည်စာရင်းတွေစုပြီး တင်ပြရတယ်လို့ ရွာသားတွေက ပြောပါတယ်။ 

နမ္မတူမြို့နယ်ထဲမှာ ပြီးခဲ့တဲ့ မတ်လကုန်ကစ TNLA နဲ့ SSPP ပါ တပ်ပေါင်းစုကတစ်ဘက် RCSS က တစ်ဘက် တိုက်ပွဲတွေဖြစ်ပြီး  မန်လီ ၊ ပန်လုံ ၊ ရေအိုး ၊ မန့်ဆာ ရွာထဲက အိမ်ခြေ ၁၀၀ ကျော် လက်နက်ကြီးထိမှန်မီးလောင်သွားခဲ့ပါတယ်။

တိုက်ပွဲကြောင့် ရွာသားပေါင်းထောင်နဲ့ချီ စစ်ပြေးတိမ်းရှောင်ခဲ့ပြီး ပြီးခဲ့တဲ့အပတ်ကမှ အခြေအနေပြန်ငြိမ်သွားလို့ အိမ်ကိုပြန်ခဲ့ပါတယ်။  တိုက်ပွဲတွေကြားမှာ ရွာသား တချို့လည်း  နှစ်ဘက်တပ်ရဲ့ ဖမ်းဆီးစစ်ဆေးတာ ခံခဲ့ရပါတယ်။ 

5 months Ago
More News
Up