ဒေါ်လာဈေး

October 6, 2021

မြန်မာကျပ်ငွေတန်ဖိုး ကျဆင်းနေသဖြင့် ဆေးဝါးပစ္စည်းများဈေးတက်၊ IT ပစ္စည်းရောင်းအားကျ

ကျပ်ငွေတန်ဖိုးကျဆင်းပြီး  ဒေါ်လာဈေးတက်နေတာကြောင့် မရှိမဖြစ် လိုအပ်တဲ့ ဆေးဝါးကုန်ပစ္စည်းတွေဟာ ၃၀ ရာခိုင်နှုန်းအထိ ဈေးတက်လာပြီး IT နည်းပညာပစ္စည်းတွေကတော့ ၄၀ ရာခိုင်နှုန်းအထိ ရောင်းအားကျနေပါတယ်။  

စက်တင်ဘာလကုန်ပိုင်းမှာ အမေရိကန် ၁ ဒေါ်လာကို ငွေကျပ် ၂၈၀၀ အထိ စံချိန်တင် ဈေးမြင့်တက်ခဲ့ပြီးနောက်မှာ ဒေါ်လာပေးပြီး ဝယ်ယူရတဲ့ ပြည်ပသွင်းကုန်နဲ့ လည်ပတ်တဲ့ လုပ်ငန်းအများစုဟာ လုပ်ငန်းရပ်ဆိုင်းရမယ့်အခြေအနေနဲ့ရ င်ဆိုင်လာရတာပါ။ 

လုပ်ငန်းရှင်တွေဟာ ဒေါ်လာဈေးတက်သလို လိုသလောက် ဝယ်လို့မရတဲ့အတွက် ကုန်ပစ္စည်းတွေ မှာယူတင်သွင်းဖို့ အခက်အခဲကြုံနေရပြီး ပြန်ရောင်းတဲ့အခါမှာလည်း ကုန်ပစ္စည်းတွေဟာ ဈေးကြီးနေတာကြောင့် အရောင်းအဝယ်ဖြစ်ဖို့ ခက်ခဲနေပါတယ်။

ဒေါ်လာဈေး ငွေကျပ် ၂၀၀၀ နီးပါး ရောက်လာချိန်ကတည်းက ပြည်ပကတင်သွင်းတဲ့ ဆေးဝါးတွေ ဈေးတက်ခဲ့တဲ့အတွက် အရောင်းအဝယ်လုပ်ဖို့ ချင့်ချိန်လာရတယ်လို့ ဆေးဆိုင်ပိုင်ရှင် တစ်ယောက်က ပြောပါတယ်။

ပြည်သူတွေအတွက် မရှိမဖြစ်လိုအပ်တဲ့ ဆေးဝါးပစ္စည်းတွေဟာ အရင်ကထက် ၃၀ ရာခိုင်နှုန်းလောက်အထိ ဈေးတက်လာတယ်လို့ ဆေးဆိုင်ပိုင်ရှင်က ပြောပါတယ်။

နည်းပညာပစ္စည်းတွေဖြစ်တဲ့ ကွန်ပျူတာနဲ့ ဖုန်း ဈေးကွက်ဟာလည်း ၄၀ ရာခိုင်နှုန်းလောက်အထိ အရောင်းအဝယ်ကျသွားတယ်လို့ အိုင်တီပစ္စည်းအရောင်းဆိုင်ပိုင်ရှင်တစ်ယောက်ကပြောပါတယ်။ 

ငွေဈေးမတည်ငြိမ်တာကြောင့်မှာယူတင်သွင်းတုန်းက ဈေးနှုန်းနဲ့ ပြန်ရောင်းတဲ့ဈေးနှုန်းကို ချင့်ချိန်ဖို့လည်း ခက်ခဲနေတယ်လို့ ဆိုပါတယ်။ ငွေကြေးနစ်နာဆုံးရှုံးတာ များလာတဲ့အတွက် နည်းပညာပစ္စည်း မော်ဒယ်အသစ်တွေကို မှာယူတင်သွင်းတာတွေ ရပ်ဆိုင်းထားတယ်လို့  ဖုန်းနဲ့ အိုင်တီပစ္စည်းအရောင်းဆိုင်ပိုင်ရှင်တစ်ဦးက ဆိုပါတယ်။

ပြည်ပထုတ်ကုန်ပစ္စည်းတွေကို မှာယူရောင်းချနေကြတဲ့ Online Shopping လုပ်ငန်းတွေဟာလည်း ငွေစျေးမတည်ငြိမ်တာကြောင့် လုပ်ငန်းတွေ တဖြည်းဖြည်း ရပ်ဆိုင်းကုန်ပါတယ်။ ငွေဈေးမတည်ငြိမ်တာကြောင့် ကုန်ပစ္စည်းဈေးလည်း မတည်ငြိမ်တော့ဘဲ လုပ်ငန်းလုပ်တဲ့အခါ အခန့်မသင့်ရင် မတရားအမြတ်ယူတယ်ဆိုပြီး နာမည်ကို ထိခိုက်စေနိုင်တယ်လို့ Online Shopping လုပ်ကိုင်သူက ပြောပါတယ်။

ငွေကြေးပညာရှင်တချို့ကတော့ စစ်အာဏာသိမ်းပြီးနောက် နိုင်ငံရေးမတည်ငြိမ်တာကြောင့် ဒေါ်လာဈေးတက်ပြီး ကျပ်ငွေဖောင်းပွတာလို့ သုံးသပ်ပါတယ်။

စစ်ကောင်စီအနေနဲ့ စီးပွားရေးတစ်ခုတည်းကို ကွက်ပြီးဖြေရှင်းချင်လို့မရဘဲ နိုင်ငံရေးမှာ အများလက်ခံနိုင်မယ့် အဖြေတစ်ခုကိုရှာမှ နိုင်ငံရေးနဲ့ စီးပွားရေးကို တည်ငြိမ်အောင် ထိန်းနိုင်မယ်လို့ ဆိုကြပါတယ်။

စစ်ကောင်စီ သတင်းပြန်ကြားရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကတော့ သူတို့လက်ထက်မှာ ဖြစ်တဲ့ပြဿနာကို တာဝန်ယူမှု၊ တာဝန်ခံမှုနဲ့ ဖြေရှင်းမယ်လို့ ပြောဆိုထားပါတယ်။ စီးပွားရေးလုပ်ငန်းရှင်တွေကလည်း စစ်ကောင်စီက ဘယ်လိုဖြေရှင်းမလဲဆိုတာကို စောင့်ကြည့်မယ်လို့ ပြန်လည်ပြောဆိုထားပါတယ်။

2 weeks Ago

October 2, 2021

မော်တော်ယာဉ်တင်သွင်းခွင့်ပိတ်ပြီးနောက် ဒေါ်လာစျေး အနည်းငယ်ကျရိပ်ပြ

ပြည်ပကနေ လူစီးမော်တော်ယာဉ်တင်သွင်းခွင့် အောက်တိုဘာ ၁ ရက်ကစပြီး ပိတ်လိုက်ပြီးနောက်  ငွေကြေးစျေးကွက်မှာ  ဒေါ်လာစျေး အနည်းငယ်ကျရိပ်ပြလာပါတယ်။

စက်တင်ဘာ နောက်ဆုံးပတ် အမေရိကန်ဒေါ်လာစျေးနှုန်းဟာ ပြင်ပစျေးကွက်မှာ ကျပ် ၂၇၀၀ ထိ မြင့်တက်ခဲ့ပြီး အောက်တိုဘာ  ၂ ရက်မှာတော့ တစ်ဒေါ်လာ ၂၄၂၀ ကျပ်ကို ပြန်ကျလာပါတယ်။

ဒါပေမဲ့ စစ်အာဏာသိမ်းမှုနောက်ဆက်တွဲအနေနဲ့ ပြည်တွင်းမှာ မြန်မာကျပ်ငွေ တန်ဖိုးကျဆင်းလာတာနဲ့အတူ ‌ငွေလဲနှုန်းမြင့်လာပြီး ကားတင်သွင်းခွင့် ပိတ်လိုက်တာကြောင့်  ဒေါ်လာ စျေးနှုန်းအပေါ် အနည်းငယ်သာ သက်ရောက်မှု ရှိနိုင်တယ်လို့ စီးပွားရေးလုပ်ငန်းရှင်တစ်ဦးက ပြောပါတယ်။ 

ပြည်တွင်းမှာ ဒေါ်လာသုံးစွဲမှုကို လျှော့ချဖို့ စစ်ကောင်စီရဲ့ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာနက ပြည်တွင်းမှာ ထုတ်လုပ်တပ်ဆင်တဲ့ ကားအမျိုးအစားတွေနဲ့ လုပ်ငန်းသုံးကားတွေကလွဲပြီး ပြည်ပကားတင်သွင်းခွင့်ကို ယာယီရပ်ဆိုင်းခဲ့တာပါ။

ဒါ့အပြင့် မော်တော်ယာဉ်အရောင်းစင်တာအသစ် ဖွင့်လှစ်ခွင့်ကိုလည်း အောက်တိုဘာ ၁ ရက်ကစပြီး ယာယီရပ်ဆိုင်းကြောင်း ကြေညာခဲ့ပါတယ်။  

နိုင်ငံခြားငွေစာရင်း ဖွင့်လှစ်ထားတဲ့ နိုင်ငံသားတိုင်းကို ၂၀၁၂ ခုနှစ် မေလကစပြီး ကားတင်သွင်းခွင့် ပြုခဲ့ပေမဲ့ စစ်တပ်က အာဏာသိမ်းပြီး ရှစ်လအကြာမှာ အခုလို ကားတင်သွင်းခွင့်မူဝါဒ ပြောင်းလဲ လိုက်တာ ဖြစ်ပါတယ်။

ဒီမူဝါဒအပြောင်းအလဲကြောင့် ကားစျေးနှုန်းတွေနဲ့အတူ ဝယ်ယူမှုတွေလည်း မြင့်တက်ခဲ့တယ်လို့  ကားတင်သွင်းတဲ့ လုပ်ငန်းရှင်တွေဆီက သိရပါတယ်။ 

တင်သွင်းပြီး လက်ကျန်ကားတွေလည်း ရှိနေသေးတာကြောင့်  တင်သွင်းခွင့်ပိတ်တဲ့ကာလ အတို၊ အရှည်အပေါ်မှာ မူတည်ပြီး ကားစျေးနှုန်း မြင့်တက်နိုင်တယ်လို့လည်း လုပ်ငန်းရှင်တွေက ဆိုကြ ပါတယ်။ 

စစ်အာဏာသိမ်းပြီးနောက် ကျပ်ငွေနဲ့ ဘဏ်လုပ်ငန်းအပေါ် ပြည်သူတွေရဲ့ ယုံကြည်မှုကျဆင်းလာတာ၊ ပို့ကုန်လုပ်ငန်းနဲ့ နိုင်ငံခြားရင်းနှီးမြှုပ်နှံမှုတွေကနေ နိုင်ငံခြားငွေဝင်ရောက်မှု လျော့ကျ လာတာတွေကြောင့် ဒေါ်လာနဲ့ ရွှေစျေးနှုန်း စံချိန်တင်မြင့်တက်နေပြီး အိမ်၊ ခြံ၊ မြေနဲ့ ကားအရောင်းအဝယ်တွေလည်း  မြင့်တက်နေတာပါ။

အခုနှစ် ဇန်နဝါရီလက  တစ်ဒေါ်လာကို ကျပ် ၁၃၃၇  ဝန်းကျင်သာရှိခဲ့တဲ့ ကန်ဒေါ်လာ ငွေလဲနှုန်းဟာ စစ်တပ်က အာဏာသိမ်းလိုက်ပြီး ၈ လအကြာမှာ အမြင့်ဆုံးစျေး ကျပ် ၂၇၀၀ အထိ ရောက်ရှိခဲ့ပါတယ်။

3 weeks Ago
More News
Up