ဒီပဲယင်း

July 5, 2021

ဒီပဲယင်းမြို့နယ် ကျည်ရွာတွင် စစ်ကောင်စီအကြမ်းဖက်တပ်များ စခန်းချနေ၊ ပြည်သူများ ထွက်ပြေး

အာဏာသိမ်းစစ်ကောင်စီရဲ့လက်နက်ကိုင်အဖွဲ့တိုက်ခိုက်လို့ ထွက်ပြေးသွားတဲ့ ဒီပဲယင်းမြို့နယ်က ကျေးရွာသားတွေ ပုန်းခိုတဲ့ တောထဲကို စစ်ကောင်စီတပ်တွေက လိုက်လံရှင်းလင်းပြီး ဇူလိုင်လ ၅ ရက်နေ့ မနက်ပိုင်းမှာ ဒီပဲယင်းမြို့ကိုပြန်ဖို့ ကျည်ရွာမှာ စခန်းချကာ အရှင်ဖမ်းထားတဲ့သူတွေကိုလည်း တွေ့ရတယ်လို့ ဒေသခံတွေဆီကနေ သိရပါတယ်။  

စစ်ကိုင်းတိုင်းဒေသကြီး ရွှေဘိုခရိုင် ဒီပဲယင်းမြို့နယ်က ကျေးရွာတွေကို ဝင်ရောက်တိုက်ခိုက်ခဲ့တဲ့ အာဏာသိမ်း စစ်ကောင်စီရဲ့တပ်က တပ်မ ၄၄ လက်အောက်ခံတပ်တွေဖြစ်ပြီး ပြည်သူ ၃၀ နီးပါးကို လက်နက်ကြီးတွေသုံးပြီး သတ်ဖြတ်ခဲ့တာပါ။ 

ဒဏ်ရာရနေတဲ့သူတွေကိုလည်း ကုသမပေးဘဲ အနီးကပ်သတ်ဖြတ်မှုတွေရှိခဲ့သလို သူတို့တပ်ချထားတဲ့  ကျွန်းတောလေးရွာ ဘုန်းကြီးကျောင်းထဲက ဒဏ်ရာရတဲ့သူတွေကို သွားတောင်းတဲ့ ရွာသားနှစ်ယောက်ကိုလည်း သေနတ်နဲ့ပစ်သတ်ပြီး ဘုန်းကြီးကျောင်းအပြင်ကို ထုတ်ထားခဲ့ပါတယ်။ 

ဆပ်ပြာကျင်းရွာက ၅ ယောက်၊ ဘုတ်ရွာက ၂ ယောက်၊ အင်ပင်ကြီးရွာက ၁ ယောက် ၊ မကျည်းစောက်ရွာက ၂ ယောက် ၊နဘဲလှရွာက ၁ ယောက်၊ စက်ခေါင်းရွာ ၁ ယောက်၊ သရက်သန်ကျေးရွာအရှေ့က ၁ ယောက် အနောက်ရွာက ၂ ယောက် ၊ လျော်ဖြူရွာက ၂ ယောက်၊ အင်ဘုတ်ရွာက ၁ ယောက်၊ အုန်းတစ်ပင်က ၁ ယောက်သေဆုံးခဲ့ပြီး ရေဦးနယ် ပလူဇဝရွာက ပြည်သူတစ်ယောက်လည်း ဆိုင်ကယ်စီးနေစဉ် ပစ်သတ်ခံခဲ့ရတယ်လို့ သေဆုံးစာရင်းပြုစုနေတဲ့ ကျေးရွာသားတွေဆီကသိရပါတယ်။ 

ဒီစာရင်းတွေက လက်ရှိရသလောက် ကောက်ထားတာဖြစ်ပြီး ထိခိုက်သေဆုံးမှု အတိအကျ စာရင်း မသိရသေးပါဘူး။ အဲဒီကျေးရွာတွေအားလုံးမှာ ပြည်သူ ၁၀၀၀၀ ကျော်နေထိုင်ပြီး တောထဲကိုထွက်ပြေးသွားတဲ့သူက ၆၀၀၀ ကျော်နီးပါးရှိနေသလို တစ်ချို့ရွာတွေက ရွာလုံးကျွတ် ထွက်ပြေးသွားကြပြီလို့ ဒေသခံတွေကပြောပါတယ်။

အာဏာသိမ်းစစ်ကောင်စီတပ်တွေက အဲဒီရွာတွေမှာ ပြည်သူ့ကာကွယ်ရေးတပ်တွေ ရှိတယ်ဆိုတဲ့ ဒလန်ရဲ့ သတင်းအမှားပေးမှုကြောင့် နယ်မြေရှင်းလင်းဖို့လာကြတာဖြစ်ပြီး လက်ရှိအချိန်မှာလည်း ကျည်ရွာမှာ လူပြန်စုနေပြီလို့ ဒလန်က သတင်းပေးတဲ့အတွက် စစ်ကောင်စီတပ်တွေ ကျည်ရွာမှာ စခန်းချထားတာဖြစ်ပါတယ်။

ကျည်ရွာက ပြည်သူတွေကတော့ ဘေးလွတ်ရာကို ထွက်ပြေးသွားကြပါပြီ။

3 weeks Ago

July 3, 2021

ဒီပဲယင်း ဆပ်ပြာကျင်းရွာတိုက်ပွဲ PDF အဖွဲ့ဝင် ၁၈ ဦး ကျဆုံး

စစ်ကိုင်းတိုင်း၊ ဒီပဲယင်းမြို့နယ်၊ ဆပ်ပြာကျင်းကျေးရွာမှာ ဇူလိုင် ၂ ရက်နေ့မနက်ပိုင်းကစပြီး ညပိုင်းအထိ ဖြစ်ပွားခဲ့တဲ့တိုက်ပွဲမှာ မြို့နယ်ပြည်သူ့ကာကွယ်ရေးအဖွဲ့က ၁၈ ဦးကျဆုံးခဲ့တယ်လို့ အခုညနေပိုင်း D PDF ပြန်ကြားရေးက စိစစ်အတည်ပြုပြောပါတယ် ။

“ကျနော်တို့ အားလုံးစိစစ်အတည်ပြုပြီးပါပြီ၊ မနက်ပိုင်းက ၉ ဦးကျဆုံးတယ်လို့ ပထမ သတင်းထုတ်ပြန်ခဲ့ပြီး ဆက်လက် စုံစမ်းစိစစ်လိုက်တော့ နောက်ထပ် ၉ ဦးထပ်တိုးတယ်။ အားလုံး ၁၈ ဦး ကျဆုံးဖြစ်သွားပါပြီ” လို့ ပြောပါတယ်။

ကျဆုံးသူတွေဟာ သေနတ်ကျည်ထိမှန်ခံရတာထက် လက်နက်ကြီးပစ်ခတ်ခံရလို့ အကျအဆုံးများရတာဖြစ်ပြီး ဘယ်တော့မှ နောက်ဆုတ် ကြောက်ရွံ့နေမှာမဟုတ်ဖူးဘဲ အရေးတော်ပုံအောင်မြင်တဲ့အထိ တိုက်ခိုက်သွားမယ်လို့ PDF အဖွဲ့ဝင်တစ်ဦးကပြောပါတယ်။

“ကျနော်တို့ PDF တွေ အကျအဆုံးများတာက သူတို့ဘက်က RPG ခေါ်မလား စိန်ပြောင်း ခေါ်မလားတော့မသိဘူးလက်နက်ကြီးနဲ့ဆက်တိုက်ပစ်ခတ်လို့ လက်နက်ကြီးကျည်ထိလို့ ကျဆုံရတာပါ။ ဒီအတွက် တစ်မြို့နယ်လုံးကလည်း ဝမ်းနည်းကြတယ်။ ကျဆုံးအာဇာနည်တွေအတွက်လည်း ဂုဏ်ယူပါတယ်။ ကျနော်တို့အနေနဲ့ကတော့ အရေးတော်ပုံမအောင်မခြင်း ဆက်လက်ပြီး တိုက်ပွဲဝင်သွားမှာပါ။ ဘာမှကို ကြောက်ရွံ့နေကြမှာမဟုတ်ပါဘူး” လို့ ပြောပါတယ်။

ဇူလိုင် ၂ ရက်နေ့ မနက် ၆ နာရီကစပြီး ညပိုင်းအထိ ဖြစ်ပွားခဲ့တဲ့ အကြမ်ဖက်စစ်တပ်နဲ့ PDF တို့တိုက်ပွဲမှာ PDF ဘက်က ၁၈ ဦးကျဆုံး၊ ၁၀ ဦးဒဏ်ရာရခဲ့ပြီး၊ အကြမ်းဖက်စစ်တပ်ဘက်က ၄ ဦးသေ၊ ၇ ဦး ဒဏ်ရာရတယ်လို့ သိရပါတယ်။

3 weeks Ago

ဒီပဲယင်းမြို့နယ် ဆပ်ပြာကျင်းကျေးရွာတိုက်ပွဲ PDF ၉ ဦးနှင့် စစ်ကောင်စီဘက်က ၄ ဦး ကျဆုံး

စစ်ကိုင်းတိုင်း၊ ဒီပဲယင်းမြို့နယ်၊ ဆပ်ပြာကျင်းကျေးရွာအနီးမှာ ဇူလိုင် ၂ ရက်နေ့က အကြမ်းဖက်စစ်တပ်နဲ့ တိုက်ပွဲဖြစ်ပွားရာ PDF တပ်ဖွဲ့ဝင် ၉ ဦးကျဆုံးပြီး အကြမ်းဖက်စစ်တပ်ဘက်က ၄ ဦး ကျဆုံးတယ်လို့ မြို့နယ် PDF ပြန်ကြားရေးက ပြောပါတယ်။

“မနက် ၆ နာရီလောက် ဆပ်ပြာကျင်းရွာဘက်ကို စစ်ကောင်စီအဖွဲ့တွေက SKAT ကား ၄ စီး၊ အင်အား ၁၅၀ လောက် ဝင်ရောက်လာတယ်။ အဲဒါကြောင့် ဆပ်ပြာကျင်းကျေးရွာ၊ ဘုတ်ရွာ၊ အုန်းဒင်၊ ကျွန်းတောကြီး၊ ကျွန်းတောလေး၊ အင်ပင်နဲ့ အနီးနားက ကျေးရွာနေပြည်သူတွေ ထွက်ပြေးတိမ်းရှောင်ကြရတယ်။ မနက် ၈ နာရီဝန်းကျင်လောက်မှာ ထွက်ပြေးနေတဲ့ ပြည်သူတွေဘက်ကို အကြမ်းဖက်စစ်တပ်က လက်နက်ကြီးတွေ သေနတ်တွေနဲ့ ပစ်ခတ်တယ် (လက်နက်ကြီး အချက် ၃၀ ခန့်)။ ဒါကို မခံမရပ်နိုင်ဖြစ်လို့ မြို့နယ် PDF အဖွဲ့ဝင်တွေက မနက် ၁၀ နာရီအချိန်အထိ ပြန်ခုခံခဲကြတယ်။” 

ဒီပဲယင်းမြို့နယ် PDF အဖွဲ့ဝင်တွေ ပြန်လည်ခုခံခဲ့တဲ့အတွက် အကြမ်းဖက်စစ်တပ်ဟာ နီးစပ်ရာရွာဖြစ်တဲ့ ကျွန်းတော‌လေး‌ကျေးရွာ ဘုန်းကြီးကျောင်းမှာ တပ်စွဲခဲ့ကြောင်း၊ ဒီနောက် နေ့လယ် ၂ နာရီလောက်ကနေ ညနေ ၆ နာရီအချိန်ထိ ဘုန်းကြီးကျောင်းအတွင်း တပ်စွဲထားတဲ့ အကြမ်းဖက်စစ်တပ်နဲ့ မြို့နယ် PDF အဖွဲ့တွေ အပြန်အလှန် ပစ်ခတ်ကြရာမှာ အကြမ်းဖက်စစ်တပ်ဘက် လက်နက်ကြီး လက်နက်ငယ်တွေနဲ့ ပစ်ခတ်တာ ခံခဲ့ရတယ်လို့ PDF အဖွဲ့ကပြောပါတယ်။

“ဒီနေ့မနက်ပိုင်းအထိ လတ်တလော စိစစ်ရသလောက်ကတော့ မြို့နယ် PDF အဖွဲ့ဝင်တွေထဲက ထိခိုက်ဒဏ်ရာရရှိသူ ၁၀ ဦး၊ ကျဆုံးသူ ၉ ဦးနဲ့ ဖမ်းဆီးခံရသူ ၁ ဦးရှိတယ်။ နောက်ထပ်လည်း တိုးလာနိုင်တယ်။ စစ်ကောင်စီဘက်ကတော့ ၄ ဦးသေ၊ ၇ ဦး ဒဏ်ရာရတယ်လို့တော့ သိရတယ်။ ကျနော်တို့ဘက်က အကျအဆုံးများတာက မြေပြင်အနေအထားနဲ့ လက်နက်ပါပဲ။ ကွင်းပြင်ကျယ်မှာ ခံတိုက်ရတာဆိုတော့ အဝေးပစ်နိုင်တဲ့လက်နက်က တပမ်းသာသွားတာပါ ကျနော်တို့ မကြောက်ပါဘူး။” 

ကျွန်းတောကြီးကျေးရွာ၊ ဘုန်းကြီးကျောင်းမှာ တပ်စွဲထားတဲ့ အကြမ်းဖက်စစ်တပ်ဟာ ညပိုင်းအချိန်ထိ လက်နက်ကြီးတွေနဲ့ ဆက်လက်ပစ်ခတ်နေတာဖြစ်လို့ အပြစ်မဲ့ပြည်သူလူထုတွေ ထိခိုက်တာတွေလည်း ရှိနိုင်တယ်လို့ဆိုပါတယ်။

စစ်ဆင်ရေးဆင်းလာစဉ်မှာလည်း လမ်းသွားလမ်းလာ ပြည်သူနှစ်ဦးကို သေနတ်နဲ့ပစ်ခတ်ထားခဲ့တာရှိပေမဲ့ ဘယ်သူမှ အလောင်းကောက် မသွားရဲကြဘူးလို့ လည်း သိရပါတယ်။

အကြမ်းဖက်စစ်တပ်ဟာ အခုမနက်ပိုင်းအချိန်အထိ ပစ်ခတ်တာတွေ တောနင်းရှာဖွေတာတွေ ပြုလုပ်နေလို့ ပစ်ခတ်မှုနဲ့နီးစပ်တဲ့ ကျေးရွာ ၁၀ ရွာလောက်ဟာ အခုချိန်အထိ တောထဲမှာ ထွက်ပြေးတိမ်းရှောင်နေကြရပြီး ရေနဲ့ အစားအသောက် အဓိက လိုအပ်နေတယ်လို့ PDF အဖွဲ့က ပြောပါတယ်။

3 weeks Ago
More News
Up