ထိုင်း-မြန်မာနယ်စပ်

July 14, 2021

ထိုင်းနိုင်ငံကို တရားမဝင် ဝင်ရောက်လာသည့် မြန်မာရွှေ့ပြောင်းသား ၂၆ ဦး အဖမ်းခံရ

မြန်မာနိုင်ငံ ကရင်ပြည်နယ်ကတဆင့် ထိုင်းနိုင်ငံကို တရားမဝင်သွားတဲ့  မြန်မာရွှေ့ပြောင်းအလုပ်သမား ၂၆ ယောက်ကို နယ်စပ်မှာ ဇူလိုင် ၁၃ ရက် မနက်ပိုင်းက  ဖမ်းဆီးခံရတယ်လို့ ထိုင်းသတင်းတွေမှာ ဖော်ပြပါတယ်။ 

ဖမ်းဆီးခံရတဲ့ ရွှေ့ပြောင်းလုပ်သားတွေဟာ ထိုင်းနိုင်ငံမှာ အလုပ်သွားလုပ်ဖို့အတွက် မြန်မာနိုင်ငံ ပဲခူး၊ ရခိုင်နဲ့ မွန်ပြည်နယ်တို့က ဖြစ်ကြပါတယ်။

မြဝတီမြို့ကတဆင့် ထိုင်းနိုင်ငံဘက်ကို သွားဖို့အတွက် မြဝတီမြို့ မြောက်ဘက် မိုင် ၃၀ ကျော် တောတွင်းတနေရာကနေ သောင်ရင်းမြစ်ကို စက်လှေနဲ့ကူးပြီး ခြေလျင် လမ်းလျှောက်ကာ  ကားထပ်စီးရင်း လမ်းခရီးမှာ ၅ ညအိပ် ထမင်းမစားရဘဲ ဒုက္ခရောက်ကြပြီးနောက် ထိုင်းနယ်မြေလုံခြုံရေးတပ်နဲ့ တာဝန်ရှိသူတွေက ပူးပေါင်းဖမ်းဆီးသွားတာ ဖြစ်တယ်။

ဖမ်းဆီးခံရတဲ့  ရွှေ့ပြောင်းမြန်မာအလုပ်သမားတွေကို ထိုင်းနိုင်ငံ တာ့ခ်ရိုင် မယ်လမတ်မြို့မ ရဲစခန်းမှာ စစ်ဆေးပြီး  မြန်မာ-ထိုင်း နယ်စပ် ချစ်ကြည်ရေးတံတား အမှတ် (၁) အရှေ့ထိုင်း (လ.ဝ.က)ကို လွှဲပြောင်းပေးကာ ထိုင်းနိုင်ငံ တရားမဝင် အထောက်ထားမဲ့နဲ့  အရေးယူသွားမှာ ဖြစ်ပါတယ်။

မြန်မာ-ထိုင်း နယ်စပ်မှ ကိုဗစ်-၁၉ ရောဂါ ကူးစက်မှုကြောင့် တရားမဝင် ဝင်ရောက်သူတွေနဲ့ နယ်စပ် ဖြတ်သန်းသွားလာမှုတွေကို ထိုင်းဘက်က လုံခြုံရေးနည်းပေါင်းစုံနဲ့  တင်းကျပ်နေဆဲ ဖြစ်ပါတယ်။

2 weeks Ago

April 27, 2021

ထိုင်း-မြန်မာနယ်စပ် အကြမ်းဖက်စစ်ကောင်စီစခန်းကို ကေအန်အယ်လ်အေ သိမ်းယူ

ထိုင်း-မြန်မာနယ်စပ် သော်လယ်ထာ (မဲ့စန်လက်) စစ်ကောင်စီတပ်စခန်းကို ဒီနေ့မနက် အစောပိုင်းမှာ ကရင်အမျိုးသားစည်းအရုံး၊ ကရင်အမျိုးသားလွတ်မြောက်ရေးတပ်မတော် (ကေအန်ယူ/ကေအန်အယ်လ်အေ) တပ်မဟာ ၅ က တက်ရောက်သိမ်းယူခဲ့တယ်လို့ သိရပါတယ်။

နယ်စပ်ဘက်ကို မြန်မာစစ်သားတွေ ထွက်ပြေးလာခဲ့ပြီး ကေအန်အယ်လ်အေကလည်း လိုက်လံပစ်ခတ်ခဲ့တယ်လို့ မျက်မြင်တွေ့ရှိတဲ့ ဒေသခံရွာသားတစ်ဦးက ပြောပါတယ်။ 

ထိုင်းဘက်ခြမ်းက ရွာသားတဦး သေနတ်ထိမှန်သေဆုံးသွားခဲ့ပြီး ထိုင်းစစ်တပ်ကလည်း ဒီမနက်ရောက်ရှိလာကာ နေရာယူထားတယ်လို့ ထိုင်းနိုင်ငံဘက်ခြမ်းမှာနေတဲ့ ဒေသခံရွာသားတစ်ဦးက ပြောပါတယ်။

“မနက် ၅ နာရီလောက်က မိုးမလင်ခင် မနက်အစောပိုင်းလောက်က စပြီးပစ်နေကြတာ။ အသံတွေ ဆူညံနေတာပဲ။ မိုးလင်းတော့ ဗမာစစ်သားတွေ ထိုင်ဘက်ကမ်း ထွက်ပြေးလာတာ မြင်ရတယ်။ စခန်းတွေလည်း မီးလောင်နေတာ တွေ့ရတယ်။ ထိုင်းဘက်မှာနေတဲ့ ရွာသားတစ်ဦးတော့ သေနတ်မှန်လို့ သေသွားတယ်။ ထိုင်းစစ်တပ်ကလည်း အခုမနက်မှာ ထိုင်းဘက်ခြမ်း စောလယ်ထရွာကို ရောက်လာတယ်။ ထိုင်းရွာသားတွေကို ရွှေ့ပြောင်းပေးနေတယ်။ ထိုင်းစစ်တပ်လုံခြုံရေးယူ ပြင်ဆင်ထားတာလည်း တွေ့တယ်။”

အခု သိမ်းယူခဲ့တဲ့ စစ်ကောင်စီရဲ့ သော်လယ်ထာစခန်းဟာ ပြီးခဲ့တဲ့လက ထိုင်းဘက်ခြမ်းကနေ ရိက္ခာတွေ ပို့ပေးဖို့ ကြိုးစားခဲ့ဖူးတဲ့ စခန်းလည်း ဖြစ်ပါတယ်။

ပြီးခဲ့သည့် မတ်လ ၂၇ ရက်နေ့တုန်းကလည်း ထိုင်း-မြန်မာနယ်စပ်ရှိ ထီးမူထာ စစ်ကောင်စီ စခန်း တစ်ခုကိုလည်း ကေအန်အယ်လ်အေ တပ်မဟာ ၅ က တက်ရောက်သိမ်းယူခဲ့ပြီး ဖြစ်ပါတယ်။

3 months Ago
More News
Up