ထိုင်းနယ်စပ်

September 15, 2020

ထိုင်းနယ်စပ်ရှိ ရှမ်းစစ်ပြေးရှောင်ပြည်သူထောင်ချီ ဆန္ဒမဲပေးပိုင်ခွင့် ဆုံးရှုံးနေ 

မြန်မာနိုင်ငံမှာ ရွေးကောက်ပွဲကျင်းပဖို့ ရက်ပေါင်း ၅၀ ကျော်လောက်သာ လိုတော့ပေမယ့် ထိုင်း- မြန်မာနယ်စပ်ရောက် ရှမ်းတိုင်းရင်းသား စစ်ဘေးရှောင်ပြည်သူတွေ အကြားမှာတော့ ရွေးကောက်ပွဲကို စိတ်မဝင်စားတဲ့အပြင် စိတ်ဝင်စားသူတွေလည်း ဆန္ဒမဲပေးပိုင်ခွင့်တွေ  ဆုံးရှုံးနေကြပါတယ်။ ထိုင်း-မြန်မာနယ်စပ်ရှိ ရှမ်းဒုက္ခသည်စခန်း ၆ ခုမှာ လူပေါင်း ၆၀၀၀ ကျော် ခိုလှုံနေပြီး အများစုဟာ  ဝေးလံခေါင်ဖျားဒေသကျေးရွာတွေက ရောက်လာကြကာ မြန်မာစကားမတတ်တာနဲ့၊ အမျိုးသားမှတ်ပုံ တင်လည်းမရှိကြတာကြောင့် ရွေးကောက်ပွဲနဲ့ အလှမ်းဝေးနေတယ်လို့   ရှမ်းပြည်နယ် လင်းခေး ခရိုင်နဲ့ ချင်းမိုင်ခရိုင် ဝိန်းဟိုင်မြို့နယ်ကြားရှိ ကုန်းကျော် စစ်ဘေးရှောင်စခန်းမှ စခန်းကော်မတီ ဦးစိုင်းလင်းက ဒီဗွီဘီကို ပြောပါတယ်။  “ကျနော်တို့ အိုင်ဒီပီတွေ ရှမ်းစစ်ပြေးဒုက္ခသည်တွေမှာ အများစုက ကျေးလက်တောရွာက လာတာ မြန်မာလိုမတတ်ဘူး။ မှတ်ပုံတင်ရဖို့လည်း တအားခက်တယ်။ အဲဒါကြောင့် မှတ်ပုံတင် လည်း မရှိဘူး။ မဲပေးဖို့အတွက်ကိုလည်း သူတို့ကစိတ်မဝင်စားဘူးပေါ့။ တချို့ကတော့ ရွှေ့ပြောင်း လုပ်သားအနေနဲ့  ထိုင်းနိုင်ငံထဲကို ဝင်သွားကြတယ်။၊ သူတို့တွေလည်း မှတ်ပုံတင်မရှိတာ၊ ရှိရင် လည်း တရားဝင်သွားတာမဟုတ်တော့ မဲပေးလို့မရဘူး။ တရားမဝင်အလုပ်သမားတွေရော စစ်ပြေးရှောင်စခန်းကလူတွေပါပေါင်းရင် ဆန္ဒမဲမပေးနိုင်တာ တစ်သိန်းကျော်ရှိမယ်လို့ ကျနော် ထင်တယ်။” အခုလို ရှမ်းပြည်ကလူတွေ သိန်းနဲ့ချီဆန္ဒမဲမပေးနိုင်တာကြောင့် ရှမ်းပြည်ထဲက တိုင်းရင်းသား ပါတီတွေအတွက်လည်း နစ်နာရတယ်လို့ သူကဆက်ပြောပါတယ် ။ မြန်မာ့တပ်မတော်နဲ့  တိုင်းရင်းသားလက်နက်ကိုင်အဖွဲ့တွေကြား လွန်ခဲ့တဲ့ ၁၀ နှစ်ကျော်က ဖြစ်ပွားတဲ့ တိုက်ပွဲကြောင့်လည်းကောင်း၊ တောင်ပိုင်း  ဝ တပ်ဖွဲ့ လုံခြုံရေးအတွက် ခြံမြေတွေ အသိမ်းခံရတာကြောင့်လည်းကောင်း  ရှမ်းပြည်တောင်ပိုင်းနဲ့အရှေ့ပိုင်းက ရွာသားတွေဟာ နယ်စပ်ကို  ထွက်ပြေးလာရာက အခုဆိုရင် ထိုင်းနိုင်ငံ ချင်းမိုင်ခရိုင်နဲ့ မျက်နှာချင်းဆိုင် ကုန်းကျော်၊ လွယ်လမ်နဲ့ လွယ်ဆာမ်ဆိပ်၊ မယ်ဟောင်ဆောင်ခရိုင် မျက်နှာချင်းဆိုင် ကောင်းမွန်မိုင်းနဲ့ လွိုင်တိုင်းလျန်း၊  ချင်းရိုင်းခရိုင်နဲ့ မျက်နှာချင်းဆိုင် လွယ်ကော်ဝမ်းစတဲ့ စခန်း ၆ ခုမှာ လူပေါင်း ၆၀၀၀ လောက်ခိုလှုံနေပါတယ်။ အဆိုပါစခန်းတွေဟာ အရင်က ယူအန်အိတ်ချ်စီအာနဲ့ နိုင်ငံတကာအန်ဂျီအိုတွေကနေ စားနပ်ရိ က္ခာထောက်ပံ့မှုတွေရခဲ့ပေမယ့် လွန်ခဲ့တဲ့ ၂ နှစ်ကျော်ကစလို့ ထောက်ပံ့မှုတွေရပ်နားသွားခဲ့ပါတယ်။ ဒါ့ကြောင့် ထိုင်းရောက်ရွှေ့ပြောင်းလုပ်သားနဲ့ တခြားအလှူရှင်တွေဆီကနေ အကူအညီရယူနေရပြီး ဒုက္ခသည်စခန်းရှိတဲ့နေရာတွေမှာ  မြေဆီမြေနှစ်မကောင်းတာကြောင့် စိုကိပျိုးရေးကောင်းစွာ မလုပ်နိုင်သလို ထိုင်းမှာအလုပ်လာလုပ်ဖို့လည်း အထောက်အထား မရှိတာကြောင့် စားဝတ်နေရေး  အမြဲလို အခက်အခဲတွေ့နေကြပါတယ်။  ထိုင်းနိုင်ငံထဲမှာလည်း နေရပ်မပြန်နိုင်သေးဘဲ ဆယ်စုနှစ်နဲ့ချီပြီး ခိုလှုံနေကြရတဲ့ ကရင်နဲ့ ကရင်နီ ဒုက္ခသည်ပေါင်း ၁ သိန်းလောက်ဟာလည်း မဲပေးပိုင်ခွင့် ဆုံးရှုံးနေဆဲ ဖြစ်ပါတယ်။ အလားတူ  ထိုင်းနိုင်ငံအတွင်းမှာ လာရောက် အလုပ်လုပ်ကိုင်နေတဲ့  ရွေ့ပြောင်း မြန်မာ အလုပ်သမားတွေ သန်းနဲ့ချီရှိတဲ့ အထဲမှာ အများဆုံး သောင်းဂဏန်းလောက်သာ မဲပေးခွင့်ရ နိုင်တဲ့ အခြေအနေ ရှိနေပါတယ်။ 
8 months Ago

August 21, 2020

မြန်မာဘက် မူးယစ်ဆေးအမြောက်အမြားဖမ်းမိပြီးနောက် ထိုင်းနယ်စပ် ၁၀ နေရာတွင် လုံခြုံရေး တင်းကြပ်

ထိုင်းနိုင်ငံ၊ တာ့ခ်ခရိုင်၊ ဖုပ်ဖရမြို့နယ်ရဲ့ မျက်နှာချင်းဆိုင် မြန်မာဘက်ခြမ်းမှာ ပြီးခဲ့တဲ့ ရက်ပိုင်းက အိုက်စ်မူးယစ်ဆေးဝါး အမြောက်အမြားကို ကရင်လက်နက်ကိုင်အဖွဲ့က စစ်ဆေးဖမ်း ဆီးရမိတဲ့နောက် ထိုင်းဘက်ခြမ်းမှာ နယ်စပ်လုံခြုံရေးကို ပိုမိုတိုးမြှင့်ချထားလိုက်ပါတယ်။ တာ့ခ်ခရိုင် ဖုပ်ဖရမြို့နယ်အခြေစိုက် ထိုင်းတပ်မဟာ ၄ ခြေလျင်တပ်က အထူးစစ်ဆင်ရေးတပ်၊ နယ်ခြားစောင့်ပြည်သူ့စစ်တပ်ဖွဲ့ဝင်တွေ ပူးပေါင်းပါဝင်တဲ့အဖွဲ့ဟာ အုပ်စုခွဲပြီး ဖုပ်ဖရမြို့နယ် သောင်ရင်းမြစ်ကမ်းတလျှောက်ရှိ နယ်စပ်တောလမ်း ၁၀ နေရာမှာ စောင့်ကြပ်လုံခြုံရေးယူထားတယ်လို့  siamrath.co.th ထိုင်းသတင်းက ဩဂုတ် ၂၁ ရက်နေ့မှာ  ဖော်ပြပါတယ်။ အဆိုပါ ၁၀ နေရာမှာ ချောင့်ခက်ပ်ကျေးရွာအုပ်စုတွင်းရှိ  ဘန့်ငေါင်းဖိုင်ရွာနဲ့ ဘန့်ဟွေ့လိုက် ရွာတွင်းမှာ ၂ နေရာ၊ ဖုပ်ဖရကျေးရွာအုပ်စုရှိ လုမ့်ထိုင်းဖတ်ထနားရွာ၊ မိုင်ရစ်ချိုင်းရွာနဲ့ ဘန့်ဟွေ့နမ့်နတ်ရွာနားမှာ ၃ နေရာ၊ ဝေါ်လေကျေးရွာအုပ်စုရှိ ဝါလေနေ၊ နောင်ကေထိုင်း၊ မဲ့အောက်ဟူး၊ ဘန့်ဖယော၊ ဘန့်ဆစ်ဖတ်ထနားကျေးရွာမှာ ၅  နေရာတို့ ဖြစ်ပါတယ်။  အခုလို လုံခြုံရေးတွေ တိုးမြင့်ချထားတာဟာ မူးယစ်ဆေးဝါးဝင်ရောက်မှုကို ကာကွယ်ရုံ တင်မကဘဲ လူကုန်ကူးမှုနဲ့ တရားမဝင်အလုပ်သမားဝင်ရောက်လာမှု၊ ဒုစရိုက်မှုနှိမ်နင်းရေး တွေအတွက်လည်း ပါဝင်တယ်လို့ ဖုပ်ဖရမြို့နယ်အုပ်ချုပ်ရေးမှူး နိုင်းဆုမ်ဖုန်း ဖုန့်ထဝီးဝုန်းက သတင်းထောက်တွေကို ပြောပါတယ်။  ထိုင်းနိုင်ငံ ဖုပ်ဖရမြို့နယ်ရဲ့ မျက်နှာချင်းဆိုင် မြန်မာဘက်ခြမ်းမှာ ပြီးခဲ့တဲ့ ဩဂုတ် ၁၁ ရက် နဲ့ ၁၉ ရက်နေ့တွေက အိုက်စ်မူးယစ်ဆေးအလေးချိန် စုစုပေါင် ကီလိုဂရမ် ၂ ထောင်ကျော်ကို ဒီကေဘီအေတပ်ဖွဲ့က စစ်ဆေးဖမ်းဆီးရမိခဲ့ပါတယ်။  အဆိုပါ မူးယစ်ဆေးဝါးတွေဟာ ထိုင်းကနေတဆင့် မလေးရှားနိုင်ငံဘက်ကို တင်သွင်းဖို့ ဖြစ်တယ်လို့ တာဝန်ရှိသူတွေရဲ့အပြောကို ကိုးကားပြီး မန်နေဂျာ အွန်လိုင်းထိုင်းသတင်းမှာ ဖော်ပြပါတယ်။  ကိုးကား - https://siamrath.co.th/
9 months Ago
More News
Up