ထိုင်း

June 29, 2022

ထိုင်းဘက်တင်ပို့မည့် ဆေးခြောက် ၁ တန်နီးပါး လာအိုရဲတပ်ဖွဲ့ ဖမ်းဆီးရမိ

လာအိုနိုင်ငံတောင်ပိုင်း၊ ခမ်းမုန့်ခရိုင်၊ ဟင်ပွန်မြို့နယ်ထဲမှာ ထိုင်းနိုင်ငံဘက်ကို  တင်ပို့ဖို့ပြင်ဆင်နေတဲ့ ဆေးခြောက်အလေးချိန် ၁ တန်နီးပါး ဖမ်းဆီးရမိတယ်လို့  လာအိုအစိုးရသတင်းဌာန LAO PSTV ရုပ်သံက ဇွန်လ ၂၈ ရက်မှာ သတင်းထုတ်ပြန်ပါတယ်။ 

ဟင်ပွန်မြို့နယ် မူးယစ်ဆေးဝါးနှိမ်နှင်းရေးရဲတပ်ဖွဲ့ တာဝန်ရှိသူတွေဟာ မူးယစ်ဆေးဝါးနဲ့ ပတ်သက်လို့ သင်္ကာမကင်းဖြစ်နေသူတွေရဲ့နောက်ကို ခြေရာခံလိုက်လံနေခဲ့ရာမှာ ဇွန် ၂၁ ရက် ညနေပိုင်းမှာ ဟင်ပွန်မြို့နယ် ဘန့်ဖွန်းခေါအုပ်စု မဲခေါင်မြစ်ကမ်းဘေးက ဟိုင်းလပ်ကား တ စီးပေါ်က အိတ်တွေကို  မဲခေါင်မြစ်ထဲကမ်းကပ်ထားတဲ့ စက်လှေ တစီးပေါ် ပြောင်းရွှေ့ သယ်ဆောင်နေတာကိုတွေ့ရှိပြီး မသင်္ကာလို့ တာဝန်ရှိသူတွေက သွားရောက်စစ်ဆေးရာမှာ ဆေးခြောက်တွေဖြစ်နေတာကို တွေ့ရတာလို့ ဆိုပါတယ်။

အိတ်ပေါင်း ၂၄ အိတ်ထဲကနေ လေးထောင့်အတုံးသဖွယ်ပြုလုပ်ထားတဲ့ ဆေးခြောက်အလေးချိန် စုစုပေါင်း ၉၃၉ ကီလိုဂရမ်ကို ဖမ်းဆီးရမိပြီး ဒါနဲ့ပတ်သက်လို့ အသက် ၃၀ ရွယ် အမျိုးသား တယောက်ကိုပါ ဖမ်းဆီးထားကြောင်း၊ အဆိုပါအမျိုးသားကတော့ ဒီပစ္စည်းတွေဟာ သူပိုင်မဟုတ်ဘဲ သယ်ပို့ခ ထိုင်းဘတ် ၃၀၀၀ နဲ့ ထိုင်းဘက်ကမ်းကို ပို့ပေးဖို့ စေခိုင်းခြင်းခံရတာလို့ ဖြေပါတယ်။ 

လာအိုမူးယစ်ရဲတပ်ဖွဲ့ကတော့ သူ့ကိုရော ဆေးခြောက်တင်လာတဲ့ ဟိုင်းလက်စ်ကား ၁ စီး ၊ ဆိုင်ကယ် ၁ စီး နဲ့ စက်လှေကိုပါ ဖမ်းဆီးထားပြီး ပါဝင်ပတ်သက်သူတွေ ဆက်လက်စုံစမ်းနေ တယ်လို့ ဆိုပါတယ်။ 

ထိုင်းနိုင်ငံမှာ ဆေးခြောက်ကို မူးယစ်ဆေးဝါးစာရင်းကနေ ပယ်ဖျက်ထားပေမဲ့ လာအိုနိုင်ငံမှာတော့ ပယ်ဖျက်ခြင်းမရှိသေးပါဘူး။ 

ကိုးကား - LAO PSTV

7 hours Ago

ထိုင်းတွင် မိုးသက်လေပြင်းကျမည်ဟု မိုးဇလထုတ်ပြန်

ထိုင်းနိုင်ငံမှာ ဇွန် ၃၀ ရက်မှ ဇူလိုင် ၂ ရက်အတွင်း မိုးသက်လေပြင်း ကျရောက်နိုင်တယ်လို့ ထိုင်းအမျိုးသားမိုးလေဝသနဲ့ ဇလဗေဒက ထုတ်ပြန်ထားပါတယ်။

ဒီကနေ့ ဇွန်လ ၂၉ ရက် မနက် ၅ နာရီ ထုတ်ပြန်ချက်အရ တောင်တရုတ်ပင်လယ်ပြင်မှာ လေဖိအားနည်းရပ်ဝန်း ဖြစ်နိုင်ကြောင်း၊ အဆိုပါမုန်တိုင်းမှာ တောင်တရုတ်ပင်လယ်ကနေ ဘင်္ဂလားပင်လယ်အော်သို့ ၁ နာရီလျှင် ၅၅ ကီလိုမီတာနှုန်းနဲ့ ဖြတ်သန်းလာဖွယ်ရှိပြီး မုန်တိုင်းဂယက်ကြောင့် ထိုင်းနိုင်ငံမြောက်ပိုင်း၊ အရှေ့မြောက်ပိုင်း၊ အလယ်ပိုင်း၊ အရှေ့ပိုင်းနဲ့ အနောက်တောင်ပိုင်းမှာ မိုးသက်လေပြင်း ကျလာနိုင်တယ်လို့ ဆိုပါတယ်။

ဇွန်လ ၃၀ ရက်နေ့အတွင်း မြောက်ပိုင်းဒေသ ချင်းရိုင်း၊ ဖယောဝ်း၊ နန့်ခရိုင်၊ အရှေ့မြောက်ပိုင်း နောင်ခိုင်၊ ဘင်ကန်၊ ဥဒွန်းဌာနီ၊ ဆကွန်းနခွန်း၊ နခွန်းဖနုန်၊ မုတ်ဒါဟန်၊ အရှေ့ပိုင်းဒေသ လယောင်း၊ ကျန်ထပူရီ၊ တလတ်နဲ့ တောင်ပိုင်း ရနောင်း၊ ဖန်ငါး၊ ဖူးကက် စတဲ့ခရိုင်တွေမှာ မိုးရွာသွန်းနိုင်တယ်လို့ ဆိုပါတယ်။

ဇူလိုင် ၁ ရက်မှ ၂ ရက်အတွင်း ထိုင်းမြောက်ပိုင်း မယ်ဟောင်ဆောင်၊ ချင်းမိုင်၊ ချင်းရိုင်း၊ ဖယောဝ်း၊ နန့်၊ ဖရဲ့၊ လမ်းပန်း၊ ဥဒရာဒစ်၊ တာ့ခ်၊ ဗိစနုလုတ်နဲ့ ဖစ်ချဘွန်းခရိုင်တွေ၊ အရှေ့မြောက်ပိုင်း လွေး၊ နောင်ခိုင်၊ ဘင်ကန်၊ ဥဒွန်းဌာနီ၊ နောင်ဘိုလမ်းဖူး၊ စကွန်းနခွန်း၊ နခွန်းဖနုန်၊ ခွန်ကဲန်၊ မဟာဆာရာခမ်း၊ မုဒ်ဒါဟန်၊ လွဲ့အစ်၊ ယဆိုထွဏ်း၊ အမ်နတ်ကျလွန်းနဲ့ ဥဘွန်းရာ့ချဌာနီခရိုင်တွေ၊ ထိုင်းအလယ်ပိုင်း ကန်ကျနပူရီ၊ ရာ့ချ်ပူရီခရိုင်၊ အရှေ့ပိုင်း ချွန်းပူးရီး၊ လယောင်း၊ ကျန်ထပူရီနဲ့ တလတ်ခရိုင်တွေနဲ့ တောင်ပိုင်း ရနောင်း၊ ဖန်ငါး၊ ဖူးကက်နဲ့ ကရပိခရိုင်တွေမှာ မိုးကြီးနိုင်မယ်လို့ ဆိုပါတယ်။

ဘင်္ဂလားပင်လယ်ပြင်မှာ လှိုင်းအမြင့် ၁ မီတာမှ ၂ မီတာထိ တက်လာနိုင်ကြောင်း၊ ဒါကြောင့် မိုးသည်းထန်တဲ့ဒေသက ရေလုပ်သားတွေ ပင်လယ်ထဲ ငါးဖမ်းထွက်တာ ရှောင်ကြည်ဖို့ မိုးဇလက သတိပေးထားပါတယ်။

ပြည်သူတွေအနေနဲ့ မိုးလေဝသသတင်း အဆက်မပြတ်နားစွင့်ပြီး အရေးပေါ်အခြေအနေ ကြုံပါက ဖုန်းနံပါတ် ၀၂ ၃၉၉၄၀၁၂ - ၁၃ သို့မဟုတ် ၁၁၈၂ သို့ ၂၄ နာရီ ဆက်သွယ်နိုင်တယ်လို့ ဆိုပါတယ်။

9 hours Ago

June 28, 2022

မဲဆောက်တွင် နယ်စပ်ဖြတ်ကျော်တရားမဝင် မြန်မာရွှေ့ပြောင်းလုပ်သား ၁၆ ဦး ဖမ်းဆီးခံရ

ကရင်ပြည်နယ်၊ မြဝတီမြို့တဘက်ကမ်း ထိုင်းနိုင်ငံ၊ မဲဆောက်မြို့၊ မယ်တော်တိုက်နယ် ရပ်ကွက် ၁ မှာ တရားမဝင်နယ်စပ်ဖြတ်ကျော်ဝင်ရောက်လာတဲ့ ရွှေ့ပြောင်းမြန်မာ ၁၆ ယောက်ကို မနေ့ညသန်းခေါင်ကျော်  ဇွန် ၂၈ ရက် ဒီမနက် အစောပိုင်းမှာ ဖမ်းဆီးခံရတယ်လို့  ထိုင်းသတင်းမှာ ရေးသားဖော်ပြပါတယ်။

ပစ်ကပ်ကားတစ်စီးပေါ်လိုက်ပါလာတဲ့ အဆိုပါ  တရားမဝင်  ရွှေ့ပြောင်းမြန်မာ ၁၄ ဦး၊ ကလေးငယ်  ၂  ဦးနဲ့ လူကုန်ကူးပို့ဆောင်သူ ၁ ဦးတို့ကို ထိုင်းအာဏာပိုင်တွေက မြန်မာ-ထိုင်းနယ်စပ်ကနေ စတင်ခြေရာခံလိုက်လာခဲ့ပြီး  မယ်တော် မီးပွိုင့်အရောက်မှာ တားဆီးစစ်ဆေး ဖမ်းဆီးခဲ့တာလို့ ထိုင်း ရပ်ကွက်ဥက္ကဋ္ဌက ဆိုပါတယ်။

ကားပေါ်လိုက်ပါလာသူတွေအားလုံးဟာ မြန်မာနိုင်ငံကနေ ထိုင်းနိုင်ငံဘက်ကို  တရားမဝင် ဝင်ရောက်လာသူတွေ ဖြစ်တဲ့အတွက်  မဲဆောက်မြို့ပိုင်ရဲ့ ညွှန်ကြားချက်နဲ့  ဖမ်းဆီးလိုက်တာ ဖြစ်ပါတယ်။

နယ်စပ်မှ ဝင်ရောက်လာတဲ့ မြန်မာ ၁၆ ဦးနဲ့ လူကုန်ကူးပို့ဆောင်သူ ထိုင်းယာဉ်မောင်းအပါ အားလုံးကို တရားဥပဒေအတိုင်း အရေးယူနိုင်ဖို့ ကိုဗစ် စစ်ဆေးမှုပြုလုပ်ပြီး မဲဆောက်မြို့ပိုင် စစ်ဆေးရေးအဖွဲ့ထံ လွှဲပေးထားပါတယ်။

1 day Ago
More News
Up