ထန်တလန်

November 29, 2021

ထန်တလန်တွင် စစ်တပ်က ပစ်ခတ်မီးရှို့သဖြင့် ဘုရားကျောင်းနှင့် နေအိမ် ၁၀၀ ခန့် မီးလောင်ဆုံးရှုံး

ချင်းပြည်နယ်၊ ထန်တလန်မြို့မှာ ထပ်မံဖြစ်ပွားတဲ့ ဒုတိယအကြိမ်အကြီးစားမီးလောင်မှုမှာ ကတ်သလစ်ဘုရားကျောင်းတကျောင်း  အပါအဝင် နေအိမ် ၉၆ လုံးမီးလောင်ပျက်စီးသွားတယ်လို့ ထန်တလန်မြို့နယ်နေရာချထားရေးကော်မတီက ထုတ်ပြန်ပါတယ်။

နိုဝင်ဘာ ၂၇ ရက် ညနေက  ထန်တလန်မြို့  ဇုန်မွှန်ရပ်ကွက်မှာ ၄၁ အိမ်၊ စိုက်ပျိုးရေးရပ်ကွက်မှာ ၃၉ အိမ်နဲ့ လုံတီာလ်ရပ်ကွက်မှာ ၁၆ အိမ်မီးလောင်ပျက်စီးခဲ့တာဖြစ်ပြီး စစ်ကောင်စီတပ်က လက်နက်ကြီးတွေနဲ့ ပစ်ခတ်မီးရှို့တာလို့ ဒေသခံတွေက ပြောပါတယ်။ 

စက်တင်ဘာ ၉ ရက်ကစပြီး နိုဝင်ဘာ ၂၇ ရက် အထိ ထန်တလန်မြို့မှာ မီးလောင်မှု ၉ ကြိမ်ဖြစ်ပွားခဲ့ပြီး အိမ်ခြေ ၃၀၀ ကျော်ပျက်စီးဆုံးရှုံးခဲ့ပါတယ်။ 

အောက်တိုဘာ ၂၉ ရက်နေ့တုန်းက ပထမအကြိမ် အကြီးစားမီးရှို့ဖျက်ဆီးခံခဲ့ရတာဖြစ်ပြီး နေအိမ် ၁၆၄ လုံး ပျက်စီးဆုံးရှုံးခဲ့ပါတယ်။ 

ထန်တလန်မြို့မှာ ပြည်သူတွေမနေထိုင်တော့ပေမယ့် စစ်ကောင်စီတပ်က  အခုလိုမီးရှို့တာဟာ မြို့ထဲမှာ CDF တွေခိုလှုံပြီး သူတို့တပ်စခန်းတွေ လုံခြုံရေးအတွက် ပစ်ကွင်းမသာအောင်ဆောင်ရွက်တာလို့ ချင်းအမျိုးသားတပ်ဦး CNF တာဝန်ရှိသူက ပြောပါတယ်။

ချင်းပြည်နယ် ၉ မြို့နယ်ထဲက မြောက်ပိုင်းမှာရှိတဲ့ တွန်းဇံမြို့နယ်ကလွဲပြီး ဟားခါး၊ ထန်တလန်၊ ဖလမ်း၊ တီးတိန်၊ မင်းတပ်၊ ကန်ပက်လက်၊ မတူပီ၊ ပလက်ဝ မြို့နယ် ၈ ခုမှာ စစ်ရေးတင်းမာနေပြီး အချိန်မရွေးတိုက်ပွဲတွေ ဖြစ်နိုင်တယ်လို့ ဆိုပါတယ်။

ချင်းအမျိုးသားတပ်ဦး CNF တာဝန်ရှိ ဆလိုင်းထက်နီက "ထန်တလန်မှာ ဟိုနေ့က မီးရှို့တာက အဓိကက ထန်တလန်မှာ အခြေချတဲ့ စစ်ကောင်စီတပ်ဖွဲ့တွေကို ကုန်းကြောင်းကနေ စစ်ကူမပေးနိုင်တဲ့အခါမှာ မြို့တွင်းတိုက်ပွဲတွေ ဖြစ်လာခဲ့သော်ဆိုပြီးတော့မှ သူတို့လုံခြုံရေးအတွက် ပြည်သူ့အိုးအိမ်တွေကို မစာမနာဘဲ မီးရှို့ပြီးတော့ ကျနော်တို့ အကာအကွယ်မယူနိုင်အောင် လုပ်တာဖြစ်ပါတယ်။ ကျနော်တို့ အမြတ်တနိုးထားတဲ့ ဘုရားကျောင်းတွေကိုလည်း ရှို့ပါတယ်။ ပြည်သူတွေဘဝ ပြန်လည်ထူထောင်လို့ မရတော့အောင်လုပ်တာတွေရှိပါတယ်။ တိုက်ပွဲတွေပို ဖြစ်ပွားလာမယ်လို့ ကျနော်ကတော့ ယူဆပါတယ်။"

စစ်ကောင်စီက ချင်းပြည်နယ်မြောက်ပိုင်း ဟားခါးဗျူဟာနဲ့ တောင်ပိုင်း မတူပီဗျူဟာဆိုပြီး အနော်ရထာစစ်ဆင်ရေးအမည်နဲ့ ထိုးစစ်ဆင်နေတာပါ။

ချင်းပြည်နယ်တောင်ပိုင်း ကန်ပက်လက်နဲ့ဆောဒေသတွေမှာ တိုက်ပွဲတွေဆက်ဖြစ်နေပြီး အင်အားနည်းတဲ့နေရာတွေကို အရင်ထိန်းချုပ်ဖို့ စစ်ကောင်စီက ကြိုးစားနေတာမျိုး ဖြစ်နိုင်တယ်လို့ မင်းတပ် CDF ခေါင်းဆောင်တစ်ယောက်က သုံးသပ်ပါတယ်။ 

မင်းတပ် CDF တာဝန်ရှိသူတစ်ဦး "ကန်ပက်လက်ဘက်မှာ လှုပ်ရှားမှုတွေရှိနေတယ်။ မင်းတပ်ဘက်မှာ လှုပ်ရှားမှုမရှိသေးဘူး။ ဆောတို့ ကန်ပက်လက်တို့ဘက်ကို စစ်အရင်ထိုးချင်ပုံရတယ်။ အင်အားပျော့တဲ့နေရာကို အရင်တိုက်ချင်ပုံရတယ်။ မနေ့ကတော့ ကန်ပက်လက်မြို့ပေါ်မှာ ပစ်ခတ်မှုတော့ဖြစ်ခဲ့တယ်။ ထန်တလန်ကိစ္စကတော့ ကြွက်မနိုင်ကျီမီးနဲ့ရှို့တဲ့ ကိစ္စဖြစ်တယ်။ မတရားအကြမ်းဖက်လုပ်ရပ်တွေ စစ်ကျင့်ဝတ်နဲ့ မညီတာတွေကို လောလောဆယ်လက်ပိုက်ကြည့်နေရတယ်။ မိုးကောင်းတုန်းရွာထားပေါ့လေ။ ရှုတ်ချစရာလည်းမရှိဘူး။ ရှုတ်ချနေလို့လည်း မထူးဘူးလေ။ တော်လှန်ရေးပြီးရင်တော့ အဲ့ဒီမှာရှိခဲ့တဲ့သူတွေ တပ်ရင်းတွေက တာဝန်ယူမှုတာဝန်ခံမှုနဲ့ သူတို့ကျူးလွန်ခဲ့တဲ့အတိုင်း ဥပဒေနဲ့ ပြစ်မှုခံရမှာပါပဲ။ အဲလိုမျိုးပဲပြောချင်ပါတယ်။"

ချင်းပြည်နယ်ထဲမှာ လူဦးရေ ၅ သိန်းကျော်နေထိုင်ပြီး ပြည်သူတွေဟာ စစ်ဘေးဒဏ်ကြောင့် စားဝတ်နေရေး ခက်ခဲနေပါတယ်။ 

နို၀င်ဘာ ၂၄ ရက်နေ့ မွန်းလွဲ ၂နာရီအချိန်လောက်ကလည်း ထန်တလန်မြို့မှာ နေအိမ်တွေကို စစ်ကောင်စီက မီးရှို့ခဲ့တာကြောင့် ဇွန်မွှန်ရပ်ကွက်က Thantlang Centenary Baptist Church (TCBC) အပါအ၀င် အိမ် ၄၉ လုံး ပြာကျသွားတယ်လို့ ဒေသခံ CDF တွေက အတည်ပြုခဲ့ပါတယ်။

ထန်တလန်က နေအိမ်တွေ မီးရှို့တာနဲ့ ပက်သက်လို့ စစ်ကောင်စီဘက်တော့ PDF တွေ ရှို့တာလို့ စွပ်စွဲထုတ်ပြန်ထားပါတယ်။ 

ဒေသခံဘာသာရေးခေါင်းဆောင်တွေ၊ ပြည်သူတွေနဲ့ ဒေသခံကာကွယ်ရေးအဖွဲ့တွေကတော့ စစ်ကောင်စီတပ်က ပစ်ခတ်  မီးရှို့တာဖြစ်တယ်လို့ အခိုင်အမာပြောဆိုကြပါတယ်။ 

1 hour Ago

November 25, 2021

ထန်တလန်မြို့တွင် စစ်ကောင်စီတပ်က လူနေအိမ်များကို ထပ်မံမီးရှို့ဖျက်ဆီး

ချင်းပြည်နယ်၊ ထန်တလန်မြို့မှာ စစ်ကောင်စီတပ်က နေအိမ်တွေကို ထပ်မံမီးရှို့ခဲ့ပြီး ကန်ပက်လက် CDF စခန်းတစ်ခုနဲ့ မကွေးတိုင်း ယော PDF စခန်းတစ်ခုတို့ကို သိမ်းယူကာ စစ်ရေးလှုပ်ရှားမှုတွေ တိုးမြှင့် လုပ်ဆောင်နေပါတယ်။ 

နိုဝင်ဘာ ၂၄ ရက် ညနေပိုင်းက ထန်တလန်မြို့မှာ စစ်ကောင်စီက ထပ်မံမီးရှို့တာကြောင့် နေအိမ် ၁၀ လုံးကျော်မီးလောင်ပျက်စီးခဲ့ပါတယ်။ 

ထန်တလန်မြို့မှာ ပြည်သူတွေမနေထိုင်တော့ပေမယ့် စစ်ကောင်စီက အခုလိုမီးရှို့တာဟာ မြို့ထဲမှာ CDF တွေခိုလှုံပြီး သူတို့တပ်စခန်းတွေကို ပစ်ကွင်းမသာအောင်ဆောင်ရွက်တာလို့ ချင်းအမျိုးသားတပ်ဦး CNF တာဝန်ရှိသူက ပြောပါတယ်။ 

နေအိမ်တွေကို မီးရှို့အကြမ်းဖက်ပြီး ပြည်သူတွေကြောက်လန့်အောင် ခြောက်လှန့်နေသလို သူတို့တပ်စခန်းတွေ လုံခြုံရေးအတွက် အခုလို မီးရှို့နေတာလို့ ဆိုပါတယ်။ 

ထန်တလန်က နေအိမ်တွေ မီးရှို့တာနဲ့ ပက်သက်လို့ စစ်ကောင်စီဘက် သတင်းထုတ်ပြန်တာ မရှိသေးပေမဲ့ အရင်တခေါက် နေအိမ်တွေ ရာနဲ့ချီ မီးလောင်တုန်းကတော့ PDF တွေမီးရှို့တာလို့ စစ်ကောင်စီဘက်က တုံ့ပြန်ထားပါတယ်။ 

ချင်းပြည်နယ်မှာ တိုက်ပွဲတွေဖြစ်ပွားမှု  နိုဝင်ဘာလဆန်းပိုင်းက လျော့နည်းခဲ့ပေမဲ့ ဒီလကုန်ပိုင်းမှာတော့ ချင်းပြည်နယ် ၉ မြို့နယ်ထဲက ၈ မြို့နယ်မှာ အသေးစားပစ်ခတ်မှုတွေ ပြန်ဖြစ်လာတယ်လို့ ချင်းအမျိုးသားတပ်ဦး CNF တာဝန်ရှိသူတဦးဖြစ်တဲ့ ဆလိုင်းထက်နီက ပြောပါတယ်။

စစ်ကောင်စီတပ်တွေက  နိုဝင်ဘာ ၂၂ ရက်နေ့မှာ မကွေးတိုင်းယောဒေသ PDF စခန်းငယ်တစ်ခုကို လည်း အင်အား ၂၀၀ ကျော်အသုံးပြုပြီး သိမ်းယူခဲ့ပါတယ်။  နိုဝင်ဘာ ၂၃ ရက်နေ့မှာတော့  ကန်ပက်လက် CDF စခန်းငယ်တစ်ခုကိုလည်း သာလွန်အင်အားနဲ့သိမ်းယူခဲ့ပေမဲ့ ပြည်သူ့ကာကွယ်ရေးတပ်ဖွဲ့ဝင်တွေ ကျဆုံးတာ၊ အဖမ်းခံရတာ မရှိခဲ့ပါဘူး။ 

ချင်းပြည်နယ်နဲ့ မကွေးတိုင်းနယ်စပ်မှာ စစ်ကောင်စီက စစ်ရေး တိုးမြှင့် လုပ်ဆောင်လာသလို ချင်ပြည်နယ်ဒေသတွင်း ကာကွယ်ရေးတပ်တွေကလည်း အဆင်သင့်ပြင်ထားတယ်လို့ ဆိုပါတယ်။

ချင်းပြည်နယ်အတွင်းက နေအိမ်တွေကို မီးရှို့တာ၊ အကြမ်းဖက်ဖမ်းဆီးအနိုင်ကျင့်တာတွေအတွက် ပြန်လက်တုံ့ပြန်မယ်လို့ မင်းတပ် CDF ခေါင်းဆောင်တစ်ယောက်ကပြောပါတယ်။

အောက်တိုဘာ ၂၉ ရက်ကလည်း စစ်ကောင်စီကလက်နက်ကြီးနဲ့ပစ်ခတ်ပြီး မီးရှို့ဖျက်ဆီးတာကြောင့် ထန်တလန်မြို့က အိမ်ပေါင်း ၁၆၄လုံးကျော် မီးလောင်ပျက်စီးခဲ့တာပါ။

မီးလောင်ပျက်စီးသွားတဲ့အထဲမှာ ဘုရားကျောင်း ၂ ကျောင်းလည်းပါဝင်ခဲ့ပြီး ဘာသာရေး၊ လူမျိုးရေးအရပါ အနိုင်ကျင့်စော်ကားခဲ့တာလို့ ချင်း CDF ခေါင်းဆောင်တွေကပြောပါတယ်။

အောက်တိုဘာ တတိယအပတ်ထဲမှာ ဖလမ်းမြို့အနီးက ရမ်ထလိုနဲ့ တလန်ဇာကျေးရွာတွေက နေအိမ် ၁၀၀ ‌ကျော်ကိုလည်း စစ်ကောင်စီက ဖျက်ဆီးခဲ့ပါသေးတယ်။ 

ပြီးခဲ့တဲ့ စက်တင်ဘာလကလည်း  ထန်တလန်မြို့မှာ   CDF နဲ့ စစ်ကောင်စီတပ်တွေ တိုက်ပွဲတွေဖြစ်ပွားခဲ့ပြီး စစ်ကောင်စီတပ်တွေ  လူနေအိမ်တွေကို ပစ်ခတ်မီးရှို့ဖျက်ဆီးခဲ့ပါတယ်။

အနောက်မြောက်တိုင်းစစ်ဒေသကို နယ်မြေထိန်းချုပ်ဖို့ စစ်ကောင်စီက ဇွန်လကတည်းက အင်အား အလွန်အကျွံ သုံးနေတာဖြစ်ပြီး အင်တာနက်နဲ့ဖုန်းလိုင်းတွေကိုဖြတ်တောက်ထားပါတယ်။

4 days Ago
More News
Up