တောင်တွင်းကြီးမြို့

January 4, 2022

တောင်တွင်းကြီးမြို့ ၌ ၃ ရက်အတွင်း အပြစ်မဲ့ပြည်သူ ၃၀ ခန့် ဖမ်းဆီးစစ်ဆေးခံရ

မကွေးတိုင်းဒေသကြီး တောင်တွင်းကြီးမြို့မှာ ဒီဇင်ဘာ ၁ ရက်နေ့ကနေ ၃ ရက်နေ့အထိ အပြစ်မဲ့ ဒေသခံပြည်သူ အယောက် ၃၀ လောက်ကို စစ်ကောင်စီက ဖမ်းဆီးစစ်ဆေးနေတယ်လို့ ဒေသခံတွေဆီကနေ သိရပါတယ်။

တောင်တွင်းကြီးမြို့မှာ စစ်ကောင်စီသတင်းပေး ဒလန်တွေနဲ့ ကြံ့ခိုင်ရေးပါတီ အတွင်းရေးမှူး အသတ်ခံရတဲ့ကိစ္စနဲ့ ၃ ရက်အတွင်းမှာ အပြစ်မဲ့ ပြည်သူ ၃၀ ယောက်လောက်ကို စစ်ကောင်စီက ဖမ်းဆီးစစ်ဆေးတာတွေ ပြုလုပ်နေတာလို့ တောင်တွင်းကြီးမြို့ခံတစ်ယောက်က ပြောပါတယ်။

စစ်ကောင်စီတပ်တွေဟာ တောင်တွင်းကြီးမြို့ပေါ်နဲ့ မြို့ဝင်ဂိတ်တွေမှာ အင်အားသုံးပြီးတော့ အရပ်ဝတ်တွေနဲ့ကော၊ ယူနီဖောင်းတွေနဲ့ပါ ခရီးသွားပြည်သူတွေ ခန္ဓာကိုယ်တွေနဲ့ ကားတွေ၊ ဆိုင်ကယ်တွေကို လှည့်ပတ်စစ်ဆေးနေတယ်လို့ ဆိုပါတယ်။

အဲဒီဖမ်းဆီးစစ်ဆေးခံရတဲ့ ပြည်သူတွေကို တောင်တွင်းကြီးမြို့မရဲစခန်းနဲ့ မြို့တော်ခန်းမမှာထားပြီး စစ်ဆေးနေကာ အမှန်တကယ် ပြုလုပ်တဲ့သူတွေကို မိအောင်မဖမ်းနိုင်ဘဲနဲ့ အပြစ်မဲ့ပြည်သူတွေကို ဖမ်းဆီးစစ်ဆေးနေကြတာလို့ ပြောပါတယ်။

တောင်တွင်းကြီးမြို့ခံ လူငယ်တစ်ယောက်ကတော့ “ကျနော်တို့ မျိုးဆက်တွေရဲ့ ဘဝဟာ လုံခြုံမှုလည်း မရှိတော့ဘူး။ ဆိုင်ကယ်လည်း ၂ ယောက်စီးခွင့်မရှိဘူး။ အပြင်ထွက်လည်း စစ်ကောင်စီတပ်တွေက ဖမ်းချင်သလိုဖမ်းနေကြတော့ ကျနော်တို့တွေရဲ့ အနာဂတ်တွေကိုပါ ရိုက်ချိုးခံနေရတယ်” လို့ ပြောပါတယ်။

အဲဒီဖြစ်စဥ်နဲ့ ပတ်သက်လို့ အတိကျသိရှိနိုင်ဖို့ တောင်တွင်းကြီး မြို့မရဲစခန်းကို ဆက်သွယ်ခဲ့ပေမယ့် ဖုန်းလက်ခံဖြေကြားခြင်းမရှိဘဲ ရဲတပ်ဖွဲ့နဲ့ နီးစပ်သူတစ်ယောက်ကတော့ ဒီဇင်ဘာ ၃၁ ရက်နေ့က ကြံ့ခိုင်ရေးပါတီအတွင်းရေးမှူး အသတ်ခံရတာနဲ့ ပတ်သက်လို့ မသင်္ကာတဲ့သူတွေကို ခေါ်ယူစစ်ဆေးနေတာလို့ ဆိုပါတယ်။

1 year Ago

September 15, 2021

တောင်တွင်းကြီးမြို့နယ်၌ ပြည်သူ ၄ ဦးကို အကြမ်းဖက်စစ်တပ်က ဖမ်းဆီး

မကွေးတိုင်း၊ တောင်တွင်းကြီးမြို့နယ်၊ ဆတ်သွားတိုက်နယ်၊ သိမ်ကုန်းကျေးရွာက ဒေသခံပြည်သူ ၄ ဦး ကို စစ်ကောင်စီတပ်တွေက စက်တင်ဘာလ ၁၄ ရက် ည ၁၀ နာရီဝမ်းကျင်လောက်က အကြမ်းဖက် ဖမ်းဆီးခေါ်ဆောင်သွားပါတယ်။

သိမ်ကုန်းကျေးရွာမှာနေထိုင်ကြတဲ့ ဦးမောင်မြင့်၊ သား ကိုကျော်ထက်လင်း၊ သားမက် ကိုသိန်းကျော် နဲ့ ကိုနိုင်လင်း တို့ကို  အကြမ်းဖက်ဖမ်းဆီးခေါ်ဆောင်သွားတာလို့ ဒေသခံတွေက ပြောပါတယ်။

ဒေသခံရွာသားတဦးက “ညက မိုးတွေရွာနေတဲ့အချိန်မှာ ဖမ်းသွားတာ။ ဘယ်ကိုဖမ်းသွားသလဲ မသိဘူး။ အခုမနက်လည်း စစ်သားတွေ ၃၀ လောက် ရွာထဲမှာ ခြေလျင်ပတ်နေတယ်။ ရွာထဲကလူတွေလည်း အဖမ်းခံရမှာစိုးလို့ လယ်ထဲကိုမသွားရဲဘူး” လို့ ပြောပါတယ်။

ပြီးခဲ့တဲ့စက်တင်ဘာ ၁၂ ရက်နေ့ကလည်း သိမ်ကုန်း ကျေးရွာနဲ့ဆက်စပ်နေတဲ့ တောင်လျောင်း(ရွာမ) ကျေးရွာမှာ Mytel တာဝါတိုင်ဖျက်ဆီးတဲ့အထဲပါဝင်တယ်လို့စွပ်စွဲပြီး စစ်ကောင်စီကပစ်ခတ်ခဲ့လို့ ဒေသခံရွာသား ၂ ဦးသေဆုံးပြီး ၄ ဦး ဖမ်းဆီးခံလိုက်ရပါတယ်။

ဒါ့အပြင် အိုးပေါက်ကျေးရွာက ပြည်သူ ၅ ဦး၊ တိုက်ပွဲ ကျေးရွာဘက်ကပြည်သူ ၁၀ ဦးလောက်ကိုလည်း စစ်ကောင်စီတပ်တွေက ဖမ်းဆီးခေါ်ဆောင်သွားပါတယ်။

တောင်တွင်းကြီးမြို့နယ်မှာ အကြမ်းဖက်စစ်ကောင်စီတပ်တွေက  နယ်မြေရှင်းရေးအကြောင်းပြပြီး စက်တင်ဘာ ၁၄ ရက် မနေ့ကတည်းက အင်တာနက်ဖြတ်တောက်လိုက်တယ်လို့ ဒေသခံတွေဆီက သိရပါတယ်။

အင်တာနက်ဝန်ဆောင်မှုလုပ်ငန်း ဆောင်ရွက်တဲ့ ဒေသခံတဦးက “ဝိုင်ဖိုင်စက်တွေကတော့ မနက်ပိုင်းလောက်ကတည်းက ဖြတ်ခံရတယ်။ ဖုန်းလိုင်းအင်တာနက်တွေတော့ နေ့လယ်ပိုင်း ဖြတ်လိုက်တာ” လို့ ပြောပါတယ်။

စစ်ကောင်စီက ပြည်သူကို ကြိုတင်အသိပေးခြင်းမရှိဘဲ အင်တာနက်ဖြတ်တောက်လိုက်တဲ့အတွက် ဒေသခံပြည်သူတွေ  စိုးရိမ်နေတယ်လို့လည်းပြောပါတယ်။

မကွေးတိုင်းမှာ ၂၅ မြို့နယ်ရှိတဲ့အနက် အင်တာနက် ဖြတ်တောက်ခံရတာဟာ တောင်တွင်းကြီးမြို့ တမြို့တည်း ဖြစ်တယ်လို့ ဒေသခံတွေဆီက သိရပါတယ်။

1 year Ago
More News
Up